ANZPB Te Hākari Tapu - He Tikanga Anō He Tikanga Anō Korōria ki te Atua Mō te whārangi 477. Korōria ki te Atua i runga rawa, he maungārongo ki tōna iwi i runga i te whenua, E te Ariki e te Atua, e te Kīngi o te rangi, e te Atua Kaha rawa e te Matua, ka koropiko mātou ki a koe, ka whakawhetai, ka whakamoemiti ki a koe mō tōu korōria. E te Ariki e Īhu Karaiti, te Tama kotahi a te Matua, e te Ariki e te Atua, e te Reme a te Atua, e waha atu nei i ngā hara o te ao: tohungia mātou, e noho mai nā koe i te ringa matau o te Matua: whakarongo mai ki tā mātou īnoi. Ko koe anake te Tapu, ko koe anake te Ariki, ko koe anake te Runga Rawa, e Īhu Karaiti, me te Wairua Tapu, i roto i te korōria o te Atua Matua. Āmine. Te Whakapono o Naihia Mō ngā whārangi 481 ko tēnei rānei 503. E whakapono ana mātou ki te Atua kotahi, ki te Matua, te Mana tino nui, ki te Kai-hanga o te rangi me te whenua, o ngā mea katoa e kitea ana, o ngā mea hoki e kore e kitea. 494 Te Hākari Tapu E whakapono ana mātou ki te Ariki kotahi, ki a Īhu Karaiti, ki te Tama kotahi a te Atua, nō tuawhakarere i puta mai ai i te Matua, He Atua nō te Atua, he Māramatanga nō te Māramatanga, he tino Atua nō te tino Atua, i whakawhānautia, kāhore i hangā, kotahi anō ia me te Matua. Nanā nei ngā mea katoa i hanga. Mō tātou mō te tangata, mō tō tātou oranga hoki, i heke iho ai ia i te rangi: nā te mana o te Wairua Tapu, i whānau mai ai ia i te Puhi i a Meri, ā i whakatangatatia. I rīpekatia ia mō tātou i te wā i a Ponotio Pirato: i whakamamaetia, i mate, ā, i tanumia. I ara ake anō hoki ia i te toru o ngā rā, ki te whakatutuki i tā ngā Karaipiture: i kake atu ia ki te rangi, ā e noho mai nei i te ringa matau o te Matua. Ka hoki mai anō ia i runga i te korōria, ki te whakawā i te hunga ora i te hunga mate, kāhore hoki he mutunga o tōna rangatiratanga. E whakapono ana mātou ki te Wairua Tapu, ki te Ariki, ki te Kai-hōmai i te ora. E ahu mai nei i te Matua i te Tama. E koropikoria nei e whakakorōria tahitia nei me te Matua me te Tama. Kua whakapuakina āna kōrero a ngā poropiti. E whakapono ana mātou kotahi anō Hāhi tapu ko tō ngā Āpōtoro, ā, puta noa i te ao. E whakaae ana mātou kotahi anō iriiri hei murunga hara. E tūmanako atu ana mātou ki te aranga mai o te hunga mate, ki te oranga hoki ki tērā ao atu.  Āmine. He Tikanga Anō 495 Te Whakapono a ngā Āpōtoro Mō ngā whārangi 481 ko tēnei rānei 503. E whakapono ana ahau ki te Atua, ki te Matua Kaha rawa, Ko ia te Kai-hanga o te rangi, o te whenua; Ki tāna Tama Kotahi anō hoki, ki tō tātou Ariki, ki a Īhu Karaiti; I whakatangatatia nei e te Wairua Tapu, I whānau i te Puhi, i a Meri, I whakamamaetia i te wā i a Ponotio Pirato, I rīpekatia, i mate, i tanumia I heke atu ki te rēinga; Nō te toru o ngā rā i ara ake ai ia i te mate, A kake atu ana ki te rangi; E noho mai nei i te ringaringa matau o te Atua, o te Matua Kaha rawa; Ka hoki mai anō ia i reira ki te whakarite whakawā mō ngā tāngata ora, mō ngā tāngata mate. E whakapono ana ahau ki te Wairua Tapu; Ki te Hāhi tapu puta noa i te ao; Ki te Kotahitanga o te Hunga tapu; Ki te Murunga hara; Ki te Aranga mai o te tinana, Me te ora tonu.    Āmine. Ētahi atu Īnoi Mō ngā whārangi 482, 503. E te Matua i te rangi, tēnei mātou te īnoi atu nei mō tāu Hāhi, i runga i te ingoa o tāu Tama, o Īhu Karaiti, te ūpoko o te Hāhi. (ko ēnei karakia / whakamoemiti rānei) E te Matua, meinga kia mataara tāu Hāhi mō taua mahi i te ao. Kia meinga ai mātou, hei tote mō te ao, hei māramatanga hoki. Whakahāngia mai tōu mauri ki te iwi. Whakamana mai ā mātou kupu, ā mātou mahi, hei whakanui i a te Karaiti. 496 Te Hākari Tapu Tātou ka īnoi mō te ao (ko ēnei karakia / whakamoemiti rānei) E te Kai-hanga, aratakina ngā iwi katoa ki te whai i te tika, i te rongomau. Kia aro ai mātou, tētahi ki tētahi, i runga i te māhaki, i te pono. Whakapuāwaitia i roto i a mātou, te mīharo mō te whenua me õna mea katoa. Tohutohungia mai ki āu tikanga rāhui. Tātou ka īnoi mō te wā-kāinga (ko ēnei karakia / whakamoemiti rānei) E te Atua pono, hōmai tōu māramatanga ki te hunga whakatakoto tikanga. Kia mahi ai rātou i runga i te pono, i te tika. Tukua mai āu manaakitanga ki ō mātou whanaunga, hoa hoki. Kia mahi ai ki taua Karaiti kei roto nei i a mātou katoa, kia taurite ai, tō mātou aroha ki te aroha o te Karaiti mō rātou. Tātou ka īnoi mō ngā whakarau: (ko ēnei karakia / whakamoemiti rānei) E te Atua e tūmanakohia nei, atawhaitia, whakaorangia te hunga māuiui ana ngā tinana, ngā hinengaro, ngā wairua. Kia piki tōu ora ki a rātou. Meinga mātou hei kai-hāpai i āu mahi tohu. Whakakahangia ā mātou mahi whakaora katoa. Kia maumahara tātou ki te hunga kua mate, ki te hunga e pōuri ana: (ko ēnei karakia / whakamoemiti rānei) E whakapai ana mātou mō te hunga kua hinga i roto i te whakapono o te Karaiti, me rātou hoki e mōhiotia nei e koe. E te Matua, e tukua atu ana rātou ki ōu ringa. He Tikanga Anō 497 Atawhaitia te hunga e mamae ana. Tauawhitia mai te hunga e noho pani ana. E whakapai ana mātou mō (..., mō) te kāhui tapu kua uru atu nei ki tōu oranga mutungakore. Mā tēnei tauira mātou e mea kia hihiko, kia mataara. Tātou ka īnoi mō tātou ake, me ā tātou mahi. (ko ēnei karakia / whakamoemiti rānei) E te Ariki, nāu nei mātou i karanga ki āu mahi, Meatia kia hīkoi mātou i mua i tōu aroaro, whakaūngia mai tōu aroha ki ō mātou ngākau, tōu pono ki ō mātou hinengaro, tōu mārohirohi ki ō mātou whakaaro, mō te taenga ki te tino tauranga, ka mōhio pū ki te hari, kua tau ki te haukāinga, ki te tānga manawa i roto i a koe, i roto hoki i tō mātou Ariki, i a Īhu Karaiti.   Āmine. Ko Tēnei Rānei He rama tāu kupu ki ōku wae I ngā wā o te pōuri, o te mārama, o te raru, o te hari, āwhinatia mai mātou e te Matua i te rangi, kia manako ki tōu aroha, kia mahi i āu mahi, kia whakapai i tōu ingoa, i roto i a Īhu Karaiti, te Ariki.   Āmine. 498 Te Hākari Tapu A New Zealand Prayer Book | He Karakia Mihinare o Aotearoa Go to: Contents Page