ANZPB Funeral Liturgies - Te Tikanga Karakia mō te Takahi Whare Mehemea ka taea, me tīmata atu te Karakia i waho o te whare. Ka āhei mā te Pirihi mā te Reimana rānei e whakahaere tēnei Karakia. Te Tomohanga I runga i te Ingoa o te Atua, te Matua, te Tama me te Wairua Tapu. Āmine. Kia tau mai te rangimārie o te Atua tō tātou Matua i te rangi, te rangimārie o Īhu Karaiti, te puna o te rangimārie, te rangimārie o te Wairua Tapu te Kai-whakamārie ki runga ki tēnei whare me te hunga e noho ana i konei. Hei konei ka tomo atu te Pirihi me ngā tāngata ki roto i te whare, me te kī a te Pirihi Huakina e te Atua te tatau o tēnei whare; tomo mai ki roto, ā tukua kia tīaho tōu mārama hei whakakāhore atu i ngā mea katoa o te pōuri; ko Īhu Karaiti hoki tō mātou Ariki. Āmine. Kua ara mai a te Karaiti i te mate, Kua waiho hei mātāmua mō te hunga kua moe. Nā te tangata nei hoki te mate, Waihoki nā te tangata te aranga mai o te hunga mate. I roto hoki i a Arama ka mate katoa ngā tāngata, Waihoki i roto i a Te Karaiti, ka whakaorangia katoatia. Kia whakakorōriatia te Matua, te Tama, me te Wairua Tapu. Ko te ritenga ia i te tīmatanga, ā tēnei anō ināianei, ā ka mau tonu iho, ā ake ake ake. Āmine. 872 Takahi Whare E Ihowā, tohungia mātou, E te Karaiti, tohungia mātou, E Ihowā, tohungia mātou. E tō mātou Matua i te rangi Kia tapu tōu Ingoa. Kia tae mai tōu rangatiratanga. Kia meatia tāu e pai ai ki runga ki te whenua, kia rite anō ki tō te rangi. Hōmai ki a mātou āianei he taro mā mātou mō tēnei rā. Murua ō mātou hara, Me mātou hoki e muru nei i ō te hunga e hara ana ki a mātou. Āua hoki mātou e kawea kia whakawaia; Engari whakaorangia mātou i te kino: Nōu hoki te rangatiratanga, te kaha, me te korōria, Āke ake ake.    Āmine. Mehemea ko te tikanga a te iwi me ruirui te whare ki te wai, me whakatapu te wai i te tuatahi i mua atu i te ruiruinga. Hei konei ka haere te Pirihi ki ia wahi i roto, i waho rānei o te whare ka rui haere i te wai, me te mea Ka ruiruia e tātou tēnei wāhi, hei horoi atu i ngā mea poke, a te rēwera a te tangata rānei, i runga i te Ingoa o te Matua, o te Tama, o te Wairua Tapu. Āmine. Takahi Whare 873 Ngā Īnoi Whakamutunga Pirihi E te Ariki, e Īhu Karaiti, nā tāu Āpōtoro tapu nei te whakahau kia kaua e whakarite ki te hunga tūmanako-kore te pōuri mō te hunga e moe ana i roto i a koe; e īnoi atu ana mātou ki a koe kia āwhinatia e koe i runga i te aroha, te hunga e tangi ana mō te hunga kua mate, mukua atu ngā roimata katoa i ō rātou kanohi: tēnā koe te ora nei, te kīngi tahi nei me te Matua, me te Wairua Tapu, kotahi anō Atua ā ake tonu atu. Āmine. E Ihowā, ko koe te Matua o ngā mahi tohu te Atua hoki o ngā whakamārietanga katoa; he īnoi atu tēnei nā mātou ki a koe, kia titiro iho koe me te aroha, me te atawhai anō ki ēnei pononga āu, e nui nei tō rātou pōuri; whakamāmāngia ngā taimahatanga kei runga i ō rātou tinana me ō rātou hinengaro; āraia atu i a rātou ngā rauhanga a te wairua kino; meinga te mārama o tōu kanohi kia whiti mai ki runga i a rātou, ā, tukua mai ki a rātou te tino rangimārie; kia whakaaro hoki koe ki ngā mahi wawao a tō mātou Ariki, a Īhu Karaiti. Āmine. Ka āhei he Hīmene ki konei. Kia noho a Ihowā ki a koutou. Mā Ihowā koe e manaaki. Kia haere atu tātou i konei i runga i te rangimārie. I runga i te Ingoa o te Ariki. 874 Takahi Whare Pirihi Mā te Atua o te rangimārie, nāna nei i whakahoki mai i roto i te hunga mate tō tātou Ariki, a Īhu, taua Hēpara nui o ngā hipi, he meatanga nā ngā toto o te kawenata mutungakore; māna koutou e mea kia tino tika i runga i ngā mahi pai katoa, kia mahia anō e koutou te mea e ahuareka ana ki tāna titiro, i roto anō i a Īhu Karaiti; waiho atu i a ia te korōria ake ake. Āmine. (Kauaka te reimana e mea ‘koutou’, engari ‘tātou’.) Me mau mai ki te Pirihi he wai, i roto i te ipu tika, ka mea ai te Pirihi. E te Atua Kaha rawa, ora tonu, i whakatapua e koe te wai hei hākarameta mo te horoi i te hara, tēnei mātou te īnoi atu nei ki a koe, he nui nei hoki tōu aroha, kia whakatapua tēnei wai i runga i te Ingoa o te Matua, o te Tama, o te Wairua Tapu. Āmine. Takahi Whare 875 A New Zealand Prayer Book | He Karakia Mihinare o Aotearoa Go to: Contents Page