ANZPB Funeral Liturgies - The Unveiling of a Memorial Mā te Pirihi e ārahi atu te iwi ki te wāhi kei reira te tohu whakamaharatanga, ā, ka tae atu, ka mea ia I runga i te Ingoa o te Atua, o te Matua, o te Tama, o te Wairua Tapu. Āmine. Kua hanga a muri, a mua, ōku e koe: kua pā mai anō tōu ringa ki ahau. Ki te kake atu au ki te rangi, kei reira koe: Ki te whārikitia e ahau tōku moenga i roto i te rua tūpāpaku, nā, kei reira anō koe. E Ihowā, tohungia mātou. E te Karaiti, tohungia mātou. E Ihowā, tohungia mātou. E tō mātou Matua i te rangi Kia tapu tōu Ingoa. Kia tae mai tōu rangatiratanga. Kia meatia tāu e pai ai ki runga ki te whenua, kia rite anō ki tō te rangi. Hōmai ki a mātou āianei he taro mā mātou mō tēnei rā. Murua ō mātou hara, Me mātou hoki e muru nei i ō te hunga e hara ana ki a mātou. Āua hoki mātou e kawea kia whakawaia; Engari whakaorangia mātou i te kino: Nōu hoki te rangatiratanga, te kaha, me te korōria, Āke ake ake.    Āmine. 882 Te Hura Kohatu Ngā Īnoi Ka mea te Pirihi E te Atua Kaha rawa, nā tōu mana, me tōu aroha, i whakatapua ai i tika ai ngā mea katoa; kia aroha mai koe, ā manaakitia mātou; tukua kia whakapūmautia te mahi a ō mātou ringaringa: ko Īhu Karaiti hoki tō mātou Ariki. Āmine. E te Matua i te rangi, āwhinatia mātou ki te tuku atu ki tōu atawhai te hunga e arohatia ana e mātou; i ngā wā e pēhia ai mātou e te pōuri, ākona mātou ki te anga atu ki a koe me te mahara anō ki te kapua nui o ngā whakaatu e karapoti nei a mātou: tukua mātou e ora nei, kia whiwhi me rātou, ki te okiokinga me te rangimārie e hōmai e koe, arā e tāu Tama, e tō mātou Ariki, e Īhu Karaiti. Āmine. Hei konei ka tango ai i te ārai o te tohu whakamaharatanga, ā ka mea te Pirihi I runga i te Whakapono o Īhu Karaiti, ka whakatapua e tātou tēnei Kohatu / Tohu Whakamaharatanga , hei whakamaharatanga ki tāna pononga ki a Ingoa , i runga i te Ingoa o te Matua, o te Tama, o te Wairua Tapu. Āmine. Ka mutu te Īnoi Whakatapu, ka āhei me pānui ngā kupu i runga i taua Tohu Whakamaharatanga. Te Hura Kohatu 883 Te Īnoi mō te Hunga Tapu E te Atua kaha rawa, i te mea e kotahi ana te hunga tapu ki a koe i roto i te tinana tapu o te Karaiti o tō mātou Ariki, meinga mātou kia aru i a rātou i roto i te aroha me te piri pono kia tae rawa atu mātou ki te kāinga kua whakaritea mai nei e koe mō te hunga e aroha ana ki a koe, i roto i te kotahitanga pai o te Wairua Tapu, ake ake. Āmine. Ka āhei te kōrero i konei ētahi atu Īnoi e tika ana. Ka āhei he hīmene i konei. Kia noho a Ihowā ki a koutou. Mā Ihowā koe e manaaki. Mā te Atua o te rangimārie, nāna nei i whakahoki mai i roto i te hunga mate tō tātou Ariki, a Īhu Karaiti, taua Hēpara nui o ngā hipi, he meatanga nō nga toto o te Kawenata mutungakore; māna koutou e mea kia tino tika i runga i ngā mahi pai katoa, kia mahia anō e koutou te mea e ahuareka ana ki tāna titiro, i roto anō i a Īhu Karaiti; waiho atu i a ia te korōria ake ake. Āmine. Haere i runga i te aroha. Haere i runga i te rangimārie. Āmine. Ka haere mātou i runga i te Ingoa o te Karaiti. 884 Te Hura Kohatu A New Zealand Prayer Book | He Karakia Mihinare o Aotearoa Go to: Contents Page