Ngā Tirohanga a ngā Kirirarau - Mano Reo, Mano Whakaaro Te tūhura i ngā tirohanga rerekē ki Te Pakanga Tuatahi o te Ao i Aotearoa me ngā haepapa o ngā kirirarau i ngā wā o te pakanga, o te rongomau hoki. Tau 5-8 He kupu whakamahuki Inā te nui o ngā tirohanga a te iwi Māori ki te kirirarautanga i Aotearoa i te wā i tū ai Te Pakanga Tuatahi o te Ao. Kua whakarārangihia ētahi tirohanga me āna kupu taunaki hei tūhura mā koutou ko ngā ākonga. Ka arohia: · te māperetanga, te tūaotanga i te wā o te pakanga me ō ia āhuatanga pānga ki te hapori · te tika me te hē - mā wai, mā te aha hoki e whakatau? · ngā tikanga whakahaere hapori e mārire ai te noho · ngā hua o te pakanga ki te tangata ā mohoa nei. Ngā hononga ki ngā wāhanga ako o TMoA E hāpaitia ana ngā āhuatanga o ngā whenu e rua o te wāhanga ako Tikanga ā-Iwi: Taumata 3-4 Te Whakaritenga Pāpori me te Ahurea Te Ao Hurihuri He huarahi ako, he mahi whakaea Kua takoto i konei ētahi mahi whakaea hei tīmatanga. Ehara i te mea e hāngai ana ki Te Pakanga Tuatahi o te Ao kau, e kāo, heoi anō, mā ēnei mahi whakaea e whakakorikori i ngā hinengaro o ngā ākonga ki te tīmata ki te whakaaro ki te pakanga me ōna āhuatanga me ōna pānga hoki. Te whakatakoto tikanga whakahaere He hapori kei tō ākomanga, he reo tō tēnā, tō tēnā o ngā ākonga kei taua hapori. Whakaarohia ētahi āhuatanga o tō akomanga e tika ana kia whai tikanga whakahaere. Mā ngā ākonga tonu e whakatakoto tikanga whakahaere, mā rātou hoki e whakaū. Ki te kore tētahi e whakaae ki te/ngā tikanga, ka aha koutou? Whakaritea he ara hohou i te rongo ki te puta tēnei āhuatanga. Mā ngā ākonga ētahi pānui whakaahua o ngā tikanga kua whakatakotoria e tā, ā, ka whakairihia ki te pātū o te akomanga. Mā te aha e kīia ai kei te “tika” kei te “hē” rānei tētahi mahi? He tāngata ka whakaae ki te pakanga, he tāngata kāore e whakaae ki te pakanga. He rite hoki ki ētahi take o ia rā . Ko te whāinga ia o tēnei tūmomo pātai ko te whakakōrero i ngā whakaaro ake o ngā ākonga me te akiaki i a rātou ki te whakatau he aha rawa ngā āhuatanga e kīia ai kei te tika ake tētahi mahi i tētahi atu; kei te hē kē atu tētahi mahi i tētahi atu. He kōrero, he wānanga te mahi. Mā te āta whakarite i ētahi pātai tōmua me te whakaako i tētahi tauira Hurihanga Pakirehua e taea ai tēnei wānanga te tutuki me tēnei reanga ākonga. Pāwhiritia te honongaitua nei ki te Hurihanga Pakirehua e kitea ana i Te Marautanga o Aotearoa hei hāpai i ngā mahi - Te Hurihanga Pakirehua me te Waihanga Mātauranga. He wā anō, he hua rerekē ka puta? He maha ngā āhuatanga kua puta i ngā tau nō te taenga mai o ō tātou tīpuna ki Aotearoa nei atu iho rā ki ēnei rangi nei. Ki te whakaaro koe/koutou ki ētahi o aua āhuatanga me ōna hua, ka pēhea ki a koe/koutou mēnā i rerekē te/ngā hua i puta? Hei tauira: · He aha rā te hua kē mēnā rā kāore i hopukia e Māui te rā? · He aha rā te āhua kē mēnā rā i purutia e Mahuika ōna maikuku ahi, arā, kāore i tuku ki a Māui? Mutu ana te kōrero i ētahi take o te iwi Māori tonu, whakaarohia te pakanga. Kōrerohia ētahi āhuatanga i puta, ā, whakatakotoria he whakaaro kē mēnā i rerekē te hua, te putanga rānei o ngā āhuatanga kua kōrerohia. Whiriwhiria he ara e whakaatu atu ai ngā kōrero kua puta. Tōia mai te whānau Kāore e kore he tāngata kei ngā whānau o ngā ākonga he pānga o rātou ki tētahi i tae atu ki tētahi o ngā pakanga o te ao. Pōhiritia rātou hei kaikōrero ki te kura. Kohikohia ngā kōrero me ngā whakaaro o te whānau ka tiakina ai ki tētahi kōnae matihiko, ki tētahi pukapuka rānei ka whakaputaina e tō akomanga. Ko au ko koe, ko koe ko au Koinei te wāhi e akiaki ana i te ākonga ki te piri atu ki tētahi o ngā kaituku whakaaro o te kōwae ako nei ānō nei he mokopuna rātou nōna. Me whakaro te ākonga ki te āhua o ngā reta ka tae mai i ngā hōia i aua wā rā me te āhua ki ngā whakautu o te whānau. Mā te ākonga tonu e whakautu i tētahi o ngā reta, māna rānei e whakatairanga i ngā kōrero o te hunga kua mū mā roto mai i te waiata. Ka noho ēnei tuhinga me ēnei titonga hei tohu whakamaharatanga. He rauemi tautoko, he honongaitua hāngai Waiata E te ope tuatahi nā Apirana Ngata - he waiata ngahau e akiaki ana i ngā tāngata He maha noa atu ngā waiata kei te pae tukutuku YouTube - tirohia. Reo Māori He kōrero mō Te Rangi Hīroa (Sir Peter Buck) http://www.teara.govt.nz/mi/biographies/3b54/buck-peter-henry http://www.nzhistory.net.nz/people/peter-henry-buck He kōrero mō Te Puea Kirihaehae Hērangi http://www.teara.govt.nz/mi/biographies/3h17/herangi-te-kirihaehae-te-puea http://www.nzhistory.net.nz/people/te-kirihaehae-te-puea-herangi He kōrero mō Henare Wēpihana Te Wainohu http://www.teara.govt.nz/mi/biographies/3t23/te-wainohu-henare-wepiha http://www.nzhistory.net.nz/media/photo/hwtewainohu He kōrero mō Rua Kenana http://www.teara.govt.nz/mi/nga-poropiti/page-6 He kōrero mō Ethel Pritchard http://www.teara.govt.nz/en/biographies/5p38/pritchard-ethel He kōrero mō Henry Te Reiwhati Vercoe http://www.teara.govt.nz/mi/biographies/3v5/vercoe-henry-te-reiwhati http://www.28maoribattalion.org.nz/audio/ohinemutu-1943-major-henry-te-reiwhati-vercoe He kōrero mō Tonga Mahuta http://www.teara.govt.nz/mi/biographies/3m34/mahuta-tonga http://paperspast.natlib.govt.nz/cgi-bin/paperspast?a=d&d=AS19160512.2.53 He kōrero mō Pahikore Te Koeti Turanga http://www.teara.govt.nz/mi/biographies/3t15/te-koeti-turanga-pahikore Te Takanga o te Wā - Hītori Māori http://maorihistory.tki.org.nz/assets/Uploads/Te-Takanga-o-Te-Wa-Maori-Web.pdf Te Hurihanga Pakirehua http://tmoa.tki.org.nz/Te-Marautanga-o-Aotearoa/Te-Anga/Te-Hurihanga-Whakaako-Pakirehua-me-te-Waihanga-Matauranga