Ngā Titonga Waiata | First World War Communities Schools Search TKI Search TKI Search Search all of TKI? Navigate in: te reo Māori Tools https://www.tki.org.nz/ Pātene whakatere Te Pakanga Tuatahi o te Ao Kāinga Ngā kaupapa Tuakiri me te Tuku Ihotanga Te whatu hononga Aotearoa i roto i Te Moananui-a-Kiwa Te hohou i te rongo Ngā tirohanga a ngā kirirarau Taumata ā-Tau Ngā paki ā-kura Ngā Ataata Hoki atu ki te tomokanga Hoki atu ki te tomokanga Kāinga Ngā kaupapa Tuakiri me te Tuku Ihotanga Te whatu hononga Aotearoa i roto i Te Moananui-a-Kiwa Te hohou i te rongo Ngā tirohanga a ngā kirirarau Taumata ā-Tau Ngā paki ā-kura Ngā Ataata Ngā Titonga Waiata Kaiako' Notes Arā noa atu ngā tini kaupapa i titoa ai ngā waiata me ōna pānga katoa ki te ahurea Māori. Me kī rā, he pātaka iringa kōrero ngā waiata e pupuri ai i ngā āhuatanga mō neherā i kōrerohia ai ngā ingoa tūpuna, ngā wāhi i ekengia me ngā mahi i kawea. Ko taku muri, taku mua Nō te huringa o te rautau 1900, kātahi anō ka tīkina atu e te kaitito Māori tētahi taki Pākehā hei rangi matua mō tana waiata, hei whakanikoniko i āna kupu, hei whakarata hoki i te hunga whakarongo. Ka rerekē rawa atu ngā piki me ngā hiki o ngā rangi hou nei i ā ngā rangi mōteatea e taungatia ana, ā, he mahi i tere kapohia e ngā kaitito puta noa i Aotearoa. He ahunga e waingōhia ai te mau o ngā kupu o ēnei waiata hou. E ai ki te kōrero, nō Te Pakanga Tuatahi o te Ao, nā Tā Āpirana Ngata rātou ko Paraire Tomoana, ko Te Puea Hērangi hoki i tīmata te tāpiri ringa ki ngā waiata e mōhiotia whānuitia ana e tātou ināianei, he waiata ā-ringa. Ko Te Ope Tuatahi e haka ana ki a Joseph George Ward, nā Henry Sanders, 1918. Alexander Turnbull Library. 1/2-013282-G Kāore hoki i pērā rawa te nui o ngā waiata i puta i Te Pakanga Tuatahi o te Ao i ngā rau waiata i puta i Te Pakanga Tuarua o te Ao engari, katoa ēnā waiata he rongonui, ā, e waiatatia tonuhia ana ērā waiata katoa e ngā iwi katoa i tēnei wā. Koinei i kīia ai, ‘Ko taku muri, taku mua’. Nā konei, ka mārama tātou ngā uri ki tō te kaitito whakaaro i ōna wā, ā, ki tā te tupuna titiro ki tōna ao. Kia tahuri ake ki ngā waiata i titoa i te wā o Te Pakanga Tuatahi o te Ao, e taea anō ai ēnei āhuatanga te tūtohi atu. Te whakairo kupu 'I te wā i a rātou mā Ko te kupu te tīmatanga Ko te kupu te whakamutunga Ko te kori i hanga noa...' mai i te waiata, E nanawe ake ana i ahau nā Tīmoti Kāretu.  Hei tā Tīmoti Kāretu, ko ngā āhuatanga tito waiata e tino mōhio ai te tangata nō te wā o Te Pakanga Tuatahi o te Ao taua waiata rā, ko te ‘...ngāwari me te tau o te kupu, ki te hōhonu o te whakaaro me te aroha nui e ahu mai ana i ngā kupu o ngā waiata nei.’ Arā ia, ko te kupu me te kaupapa i titoa ai te waiata ngā mea nui. Nā ngā kupu rā i whakatinana ai, i tō ai ngā kāre ā-roto huhua o te whatumanawa. E mīharo atu ana ki te māmā o te kupu me te reka o te rangi ki te taringa. He waiata i titoa hei poroporoaki i ngā hōia i tō rātou wehenga ki te mura o te ahi, hei tangi ki ērā i ngaro atu rā, hei tuku aroha ki te whaiāipo, hei pōwhiri i ngā mōrehu i waimarie ki te hoki mai, hei hari mā ngā hōia i a rātou e tāwhai ana. Ko Tipirere tētahi tauira o aua momo waiata. E mōhiotia ana ko te rangi Pākehā i tīkina atu ai ko ‘ It’s a Long Way to Tipperary (external link) ’ a Jack Judge. I tino rata ngā kaitito o nehe ki ngā waiata Pākehā me ōna rangi. Ka whakamāoritia, ka waiatatia, ānō nei he waiata Māori kē aua waiata. Kāore i tino mōhiotia nā wai ngā kupu o Tiripere i whakamāori, engari, ko te whakaaro ia nā Tā Āpirana Ngata. He kāripōhi Tipirere nā National Reserve Headquarters, Te Whanganui-a-Tara, ca. 1915.Alexander Turnbull Library. Eph-B-POSTCARD-Vol-12-003-btm Tipirere (external link) He roa te wā ki Tipirere He tino mamao He roa te wā ki Tipirere Ki taku kōtiro E noho Pikatiri Hei konā Rehita Koea He mamao rawa Tipirere Ka tae ahua (ahau). I waiatatia tuatahitia te waiata Tipirere e Te Hokowhitu-a-Tū nō rātou i pakanga ai ki te kauhanga riri, i Wīwī i ngā tau 1916-1918. Ko Koe Niu Tireni Ko tētahi atu tauira mō te tāwhai haere, ko Ko koe Niu Tireni .  Ko te karere o roto i te waiata mō te hono ki a Ingarangi e tīahoaho ana te kitea. Me whai wāhi atu te ao Māori ki te taunaki i te karanga a Ingarangi. Ko koe Niu Tireni, Te kuini o te ao Arohaina nei e au, Ko koe tangihia Ko koe e mihia Ko koe te kīanga pai, Te au taku moe Te aroha ki a koe, I te roa o te rā. Korihi : x2 Ka whai mai rā te aroha A huri noa te ao. Ko ngā kaitito Tā Āpirana Ngata Te Ope Tuatahi  - 1916 Ko  Te Ope Tuatahi   (external link) tētahi o ā Tā Āpirana waiata maha i kaha te waiatatia i te Pakanga Tuatahi o te Ao. Ko tōna pūtake he whakaatu i ngā ekenga taumata o ngā Māori i tae atu ki te pakanga hei hōia me te whakaatu i te hiahia kia tokomaha ake ngā hōia. I whakaingoatia ngā rohe me ngā iwi i kaha tautoko kia haere. I whakatūria e Ngata rāua ko Paraire Tomoana ētahi kapa haka hei kohikohi moni mō te Pūtea Hōia Māori. Ka waiatatia tēnei waiata i ngā ngahau puta i Aotearoa. Nō Ngāti Kahungunu, nō Tūranganui-a-Kiwa, nō Ngāti Porou anō hoki ngā kapa matua. Nā Tomoana ngā kupu mō te whiti tuatoru. He kaitautāwhi rāua ki a rāua mō te tito waiata. Te ope tuatahi Nō Aotearoa, Nō Te Waipounamu, Nō ngā tai e whā, Ko koutou ēnā E ngā rau e rima, Te Hokowhitu toa A Tūmatauenga: I hinga ki Īhipa, Ki Karipori rā ia; E ngau nei te aroha, Me te mamae. Te ope tuarua Nō Māhaki rawa: Nō Hauiti koe, Nā Porourangi: I haere ai Henare Me tō Wīwī, I patu ki te pakanga, Ki Paranihi rā ia. Ko wai he mōrehu Hei kawe kōrero Ki te iwi nui e, Taukuri nei. Te ope tuaiwa Nō Te Arawa, Nō Te Tai Rāwhiti, Nō Kahungunu, E haere ana ’hau Ki runga o Wīwī Ki reira ‘hau nei, E tangi ai. Me mihi kau atu I te nuku o te whenua, Hei konei rā e, E te tau pūmau. A Noble Sacrifice ; and, Hoea ra te Waka Nei = Come where duty calls words and action nā Hon. A.T. Ngata and P.H. Tomoana. Te Whanganui-a-Tara [N.Z.] : N.Z. Free Lance Office, [1919] Hei kōpaki atu i ētahi atu waiata a Tā Āpirana Ngata i titoa mō te Pakanga Tuatahi o te Wā, ko ēnei e whai ake nei: Karangatia rā - 1919 He waiata ā-ringa tēnei ki ngā mōrehu o Te Hokowhitu-a-Tū i tō rātou hokinga mai ki te hau kāinga kia mihia ai rātou, te hunga ora me te hunga mate. Karangatia rā! Karangatia rā!  Powhiritia rā! Ngā iwi nei.  Ngā mate tini, haere mai!  Te Hui aroha  mou e Wi Pere.  Ngau nei te aroha me te mamae.  Ngā mate tini! Ngā mate tini,  Kei Paranihi, haria mai rā.  Kia tangihia ki te marae!  Te Hui aroha  mou e te Wiwi  Ngau nei te aroha me te mamae.  Ngā toki heke! Ngā toki heke!  Maringi kino, e toha mai rā  I te whenua pamamao  E karanga ana i  Te Hui Aroha,  Kia pumau te aroha me te mamae!                           Māori Battalion arrives home, Queen St, Tāmaki Makaurau, nā Auckland Weekly News, 1919, Sir George Grey Special Collections, Auckland Libraries, AWNS-19190410-34-2 Kia ora rā koutou - 1919 I horahia tuatahitia tēnei waiata e ngā tamāhine o Te Kura o Hukarere ki te tūmatanui, ā, i rangona i te Hui Aroha i Tūranganui-a-Kiwa hei pōwhiri whakatau whakaharahara ki ngā ika a whiro. E ta ma! he marie,  Na te Ariki  Koutou i tohu,  Kia ora tonu.  Na te aroha o te Kaihanga,  Kia ora ra koutou!  Nau mai, e te iwi  Ki te marae  Pae o te riri  Mai onamata.  Whiua te aroha  Ki nga hoia,  Kia ora ra koutou.  E te iwi, kia toa,  Whaia ko te kaha,  Whiua te aroha  Ki nga hoia.  Kei wiri ra ‘hau,  Kia tangi tatou,  Kia ora ra koutou! Paraire Tomoana Ko tētahi kaitito i kaha rangona i te Pakanga Tuatahi o te Ao i te hira o āna titonga ki ngā momo hui, ko Paraire Tomoana o Ngāti Kahungunu. Ko tana waiata tangi, arā, ko E Pari Rā (external link) tētahi waiata rongonui i hōrapa ki te motu hei tangi i ērā kāore i waimarie ki te hoki mai. Mō Pōhau Ellison tēnei waiata i mate mai rā i te tāhuna o te riri, ā, e kaha tonu ana te waiatatia i ēnei rā nei. He ngaringari hoki te waiata nei mō Te Taua Moana o Aotearoa. E Pari Rā - 1918 E pari rā ngā tai ki te ākau E hotu rā ko taku manawa Auē me tangi noa ahau i muri nei Te iwi e He ngākau tangi noa Kōrihi : Tēnā rā tahuri mai, e te tau te aroha Tēnei rā ahau te tangi nei mōhou kua wehe nei Haere rā mahara mai, e te tau kia mau ki a au Haere rā ka tūturu ahau haere rā Ngaro noa koe, e tama, i ngā marae nei Ko te aroha rā, e tama, e pēhi kino nei Kei Īhipa koe, e tama, kei Karipori rā Kei Paranehe koe, e tama, haere, haere rā Haere rā, e tama, haere rā Mauria rā te aroha i ahau Auē me tangi noa ahau i muri nei Te iwi e He ngākau tangi noa Nei rā ētahi atu titonga o Paraire Tomoana: I Runga o ngā Puke - 1915 He waiata e tino makau ana i te poroporoakitanga i Te Ope Māori Tuarua i Te Whanganui-a-Tara i tō rātou whakakopatanga atu ki te pakanga ki pāmamao. Nā te taokete o Tomoana i tono kia tito waiata mō ōna kitenga me ōna hokinga mahara i a ia e takoto ana ki te hōhipera i Ingarangi. I runga o ngā puke  Ka pā mai toa reo;  Hau maiangi hei kawe mai.  He reo aroha pātai ana mai.  "He aha tau e, pirangi nei?" Kia awhi kau atu  Ki tō tinana i ngaro,  E ngaro nei i au  i ēnei ra Ko tōu aroha,  Ko tōku aroha,  Ka mutu pea!  Aue! Te tau! Pōkarekare Ana - 1912 Kātahi te waiata aroha hira ko Pōkarekare Ana puta ki ngā tai katoa! Ahakoa i titoa i mua i te tīmatanga o te Pakanga Tuatahi o te Ao, i waiatatia whānuitia hei mahara i ngā ipo i mahue mai. Pōkarekare ana  ngā wai o Waiapu,  Whiti atu koe hine  marino ana e. E hine e  hoki mai ra.  Ka mate ahau  I te aroha e. Tuhituhi taku reta  tuku atu taku rīngi,  Kia kite tō iwi  raru raru ana e. Whati whati taku pene  ka pau aku pepa,  Ko taku aroha  mau tonu ana e. E kore te aroha  e maroke i te rā,  Mākūkū tonu i  aku roimata e.   Ko tā Tīmoti Kāretu: ‘Ko tētahi pea o ngā waiata kua kaha nei te hau o ōna rongo ko tēnei e tohea nei nā wai kē rā i tito. Ko ngā kaitito e tohea nei ko Paraire Tomoana rāua ko Tā Āpirana Ngata, ka mutu kei ia kaitito anō āna kaitautāwhi’ - Kia Rōnaki , wh. 95 Hoea Rā Te Waka Nei - 1917 He waiata poi waka tēnei e tono ana ki ngā iwi kia tuku moni ki ā rātou uri e pakanga ana i Wīwī. Tū ai ēnei konohete penapena pūtea i te motu hei taunaki i te Pūtea Hōia Māori. Haere mai e hine mā,  Me ngā taonga o te wā,  He reo karanga i katoa,  Haere mai ki au.   Hoea rā te waka nei.  Hoea, hoea ki te pae  Mā te poi e karawhiu  E rāhui i te pai. Me pehea rā e taea ai  Te aroha pehi kino nei,  Mō te tau i pamamao  Haere mai ki au!  Koia ra e hine mā  Koha kore noa te pai.  Haere me te atawhai  Ka rahui i te pai.  Na te ngākau tangi ra  Ko te tiwaiwaka nei  Te poi ka hoea atu nei  He tohu no te pai. Hoki, Hoki Tonu Mai - 1918 Ka ngaro atu rā ngā hautoa ki tāwāhi, ki te pakanga, ka noho mai ngā whaiāipo ki muri nei kōrangaranga ai. Aua atu, ka panonihia hei hoa mō te poi, ā, e kaha kē ake ana te hari o te rangi. He tauira anō tēnei mō te tiki atu i te rangi o te ao Pākehā.  Hokihoki tonu mai  Te wairua o te tau Ki te awhi Reinga Ki tēnei kiri e. Ka pinea koe e ahau Ki te pine o te aroha Ki te pine e kore nei E waikura e. Tahi Nei Taru Kino - 191? He waiata ā-ringa, he waiata aroha hoki tēnei e kaingākautia ana e ngā iwi. Ko tōna pūtake, ko te whakaatu i te mahara i roto mō te aroha. Tahi nei taru kino  Mahi whai-ā-ipo  Kei te wehenga  Aroha kau ana  Haere mai rā  Ki ahau nei rā  Te aroha tino nui  Haere mai  He aha kei taku uma  Pākikini nei ?  He aroha rānei?  He aha rānei?  Titiro atu au  Tahuri kē koe  Kei roto i a koe  Pīrangi mai ana  Kore ua e noho  Hoatu taku ringa  Kei huri kē koe  Whakakaitoa i muri Te Puea Hērangi Kāore a Te Puea Hērangi i whakaae ki te ture me uru ngā tama toa o Tainui ki te pakanga, i te mea, kāore tonu i ea tā te kāwana raupatu i ngā whenua o Waikato. Ko Ngā Rā o Hune hei whakatauira i ētahi atu titonga kaupapa nō te Pakanga Tuatahi o te Ao. Ina tirotirohia ngā kupu nei, mārakerake ana te kitea te iri mārō hoki o te manawa o Te Puea ki tēnei kaupapa. Ngā Rā o Hune Ngā rā o Hune ka ara te pakanga Ki roto o Waikato ka riro ko Te Rau Me tana Hokowhitu tūria atu rā Te tatau o te whare o te hoariri Te tatau o te whare o te hoariri Me whakatupu ki te hua o te rengarenga Me whakapakari ki te hua o te kawariki Rukuhia atu rā Te Moana a Kiwa E te iwi nui tonu kia manawanui E te iwi nui tonu kia manawanui Kūpapa rapua te mea i ngaro nei Ka hoki tātou ki runga ki ngā tongi Hei kawe i a tātou ki runga ki te oranga Hei kawe i a tātou ki runga ki te oranga Hei kawe i a tātou ki runga ki te oranga Tēnā Kāwana whakapaua tō kaha I whea koe i mua rā i taku taioretanga Ka tukua e koe kia tūtāhangatia Ka āhei tāua i te peka tītoki Ka āhei tāua i te peka tītoki Autoro ki waho rā ka whēke koe i ahau E ka murumurua e māua ko taku ipo Koia hoki tēnā ngā tongi o mua rā E ka murumurua e māua ko taku ipo E ka murumurua e māua ko taku ipo Me kore te rāhui he pane he toitū E ka kamukamu ki ngā mahi koia hoki Whatiwhati te kakau o te paipa kia poto Kia ngau kau ki te kōhua koia hoki Kia ngau kau ki te kōhua koia hoki Kāti nei e te iwi tō kumekume roa Kei mau tātou i te rā whakawā I te rā whakawā i te rā whakawā I te rā whakawā o te atua I te rā whakawā o te atua Nau mai Kāwana ki runga o Waikato Whakatikahia rā tō hara ki te iwi I riro whenua atu me hoki whenua mai I te rā o Matirā kua hokia e I te rā o Matirā kua hokia e Tāiri te aroha i ā hā hā Toro mai ō ringa me aroha tāua Auē hī, auē hā Auē hei auē, auē hei auē Tīhei mauri ora hī Wh Kaiako' Notes He whakatakinga tēnei kohinga pārongo ki te āhua o ngā momo titonga waiata Māori i puta, i rongonui i te Pakanga Tuatahi o te Ao. Ka tirohia: ngā āhuatanga mō te whakairo kupu i ngā waiata Māori i ngā tau 1900 ngā kaitito me ō rātou pūkenga tito waiata ngā momo kaupapa i hua ake kia tito waiata. Ngā rauemi tautoko Pokarekare ; for voice and piano Digital scan of handwritten score of the song Pokarekare, for voice with piano accompaniment. Includes four verses and refrain in... ‘Pōkarekare ana’ by Ana Hato and Deane Waretini An enduring classic of the New Zealand recording industry,‘Pōkarekare ana’ was first recorded in Tunohopu meeting house, Rotorua, in 1927.... Singing 'Pōkarekare ana' The crowd at a rugby match sing what is sometimes called New Zealand's unofficial national anthem, 'Pōkarekare ana'. A Māori... Deane Waretini and Ana Hato Cousins Ana Hato (Ngāti Whakaue and Tūhourangi) and Deane Waretini (Tūhourangi) popularised Māori music. They were probably the first Māori... "Te Ope Tuatahi!" - The Maoris in the Great... (This was composed as a recruiting song, to raise men for the Maori Contingent and money for the Maori Soldiers'... E TE OPE TUATAHI - (Te Ao Hou - No.... E te ope tuatahi O te ropu Maori e, Haere mai ki te hui o Ngarimu e. Chorus : I... War Report - 16 November Reports from the Otago Daily Times about anti-German feeling and wartinme stoies from newspapers in Tauranga and Blenheim. Captain Pitimi... [Postcard]. Tipirere. N.Z.M.E.C. Hokowhitu-a-Tu. [ca 1915]. Shows the words and a line of music for a song entitled "Tipirere". It is the Maori version of "It's... TIPPERARY RECAST. (Thames Star, 07 October 1916) Tomoana, Paraire Henare, 1874/75?-1946 : Notes on Maori history /... Notes on Maori history, in particular of Hawke's Bay, given orally by Tomoana of Waipatu, Hastings, Hawke's Bay, 4-12 Jan... Te Puea Hērangi Two of the greatest cultural go-betweens of the early 20th century are seen in this 1938 photograph. In the middle... Te Puea Hērangi Te Puea Hērangi is renowned as a strong leader within the Kīngitanga (Māori King movement). She was the granddaughter of... Te Puea Hērangi Te Kirihaehae Te Puea Hērangi, shown here aged about 15, later became the Kīngitanga's most revered and effective leader. A... Apirana Ngata Apirana Turupa Ngata while he was the Member for Eastern Maori. Taken by Stanley Polkinghorne Andrew in 1914. Quantity: 1... Āpirana Ngata Āpirana Ngata, of Ngāti Porou, was the pre-eminent Māori leader of his generation. He is photographed here in 1923 at... Tihau Te Puna Mātauranga o Aotearoa He rauemi anō mō Te Pakanga Tuatahi o te Ao Hapori Kōrerohia tētahi paki mō Te Pakanga Tuatahi o te Ao ki tō hapori He Pae Kōrero He toronga tono āwhina ā-ipurangi Tiritiria Terms and conditions Communities Schools Search TKI Search TKI Search Search all of TKI? Navigate in: te reo Māori Feedback About this site Accessibility Contact TKI Copyright and privacy Help Back to top Search TKI Search TKI Search Loading... Search result for '   ' returned   results. Did you want to Search all of TKI ? Close