Te tūhura i ngā kōrero o nehe mā roto mai i ngā take o nāianei | First World War Communities Schools Search TKI Search TKI Search Search all of TKI? Navigate in: te reo Māori Tools https://www.tki.org.nz/ Pātene whakatere Te Pakanga Tuatahi o te Ao Kāinga Ngā kaupapa Tuakiri me te Tuku Ihotanga Te whatu hononga Aotearoa i roto i Te Moananui-a-Kiwa Te hohou i te rongo Ngā tirohanga a ngā kirirarau Taumata ā-Tau Ngā paki ā-kura Ngā Ataata Hoki atu ki te tomokanga Hoki atu ki te tomokanga Kāinga Ngā kaupapa Tuakiri me te Tuku Ihotanga Te whatu hononga Aotearoa i roto i Te Moananui-a-Kiwa Te hohou i te rongo Ngā tirohanga a ngā kirirarau Taumata ā-Tau Ngā paki ā-kura Ngā Ataata Te tūhura i ngā kōrero o nehe mā roto mai i ngā take o nāianei Kaiako' Notes Te kekeritanga me te hohounga o te rongo i te Pakanga Tuatahi o te Ao Ko Te Ope Tuatahi te Ope Māori i tae tuatahi atu ki te Pakanga Tuatahi o te Ao. Ko te mahi whakaari ki Karipori (Gallipoli) tana tūnga tuatahi. I tūtahi, i hingatahi te iwi Māori i Karipori. I kotahi ai te tū a te iwi Māori me he whānau kotahi i te āhua o te mamae i rangona i te rirohanga o te tangata, i te whakarērea o te whānau, i ngā āhuatanga huhua i pā ki tēnā, ki tēnā i te wā o te pakanga. I te otinga o ngā mahi whakaari a te ope nei i Karipori, i te wehenga hoki o ngā ope taua Taunaki, ka wetewetekina ngā taua Māori i te Ope Tuatahi e ngā āpiha Pākehā, ka whakanōhia ki ngā ope Pākehā. Ka pā mai te pōuri ki te rahinga o ngā taua Māori, ka kawea ō rātou take ki ngā āpiha Māori, ka tuhi reta ki a Apirana Ngata mā e kī ana “Kua wehewehe mātou”. I taua wā rā ko Meiha Herbert te rangatira o te Matua Māori, he tangata Pākehā a ia. Inā te nui o ngā raruraru i waenganui i a Meiha Herbert me āna taua Māori. He pērā rawa te nui taioreore o ngā raruraru i waenganui i a rātou i panaia tētahi tokotoru āpiha Māori i rangatira, i māia hoki te tū ki te pakanga ki Karipori e Tianara Godfrey i tō rātou whakarere i te ope ka mutu, ka whakahokia rātou ki Aotearoa. Ka puta i a Apirana Ngata rāua ko Te Rangi Hīroa tō rāua kore i rata ki tēnei mahi āna ki te kī ake he takahi tā Tianara Godfrey mahi i te mana o te Māori. I whakatū tohe a Apirana Ngata me tana kī ake kāore a ia e akiaki i tētahi o te iwi Māori ki te rēhita ki te pakanga tae rawa atu ki te wā kua tau tēnei o ngā take. I te tau 1916, i whakaritea anō e Godfey ngā taua ki Te Ope Taua o Aotearoa, ka whakakotahi anō te wāhanga Māori ki te Ope Tuatahi. Ko Te Ope Māori Tuatahi te hunga mahi - nā rātou ngā huarahi i hanga, ngā maioro keri i kō me ngā ara tereina i whakatakoto. He mōrearea katoa ēnei mahi i te mea i te nuinga o te wā he mahi ēnei ka whāia i ngā matā a te hoariri e rere ana. Ka haere te wā ka whakahokia atu ngā taua i panaia e Meiha Herbert ki Te Ope Māori Tuatahi, ā, ka tito waiata a Apirana Ngata hei akiaki i te iwi Māori ki te rēhita hei taua. Kōkiritia ai te hohounga o te rongo i ngā kekeritanga pēnei ki te kāwanatanga, ki ngā kaingārahu hoki e Apirana Ngata, e Te Rangi Hīroa, e ērā atu rangatira Māori anō hoki i te mana o tō rātou tū hei kaitōrangapū. Ko tā Apirana Ngata kī taurangi kāore a ia e paku tautoko ana i ngā mahi whakawhere i te iwi Māori ki te tū hei taua i runga i te hē o ngā mahi ki ngā taua Māori a Meiha Herbert ka mārama ki te kāwanatanga, ki te kāhui taua, ki ngā iwi hoki o Aotearoa te rētōtanga o tēnei take i tōna ngākau ake, me te ngākau hoki o te iwi Māori. He hui whakanui i Te Pakanga Tuatahi o te Ao ki Te Whanganui-a-Tara me ētahi motukā e rite ana ki ērā o taua wā i te mutunga wiki ANZAC 2015.   Te āhua o te kekeritanga me te hohounga o te rongo o nāianei tāngata, i nāianei rā Te kekeritanga mō te ture e hāngai ana ki: Te Takutai, te Takere Moana I te tau 2004 ka pupū ake te tohe i waenganui i ngā iwi Māori me te kāwanatanga o Aotearoa e pā ana ki te rangatiratanga o te takutai moana me tōna takere. I tohea tēnei take i te whare whakawā o te motu e te iwi Māori. I tōna otinga, nā te kāwanatanga te mana whakatau o kaiwhakawā i kapo ake, ā, nā te kāwanatanga kē i whakatau, nō te karauna kē te rangatiratanga o te takutai moana me tōna takere i Aotearoa. He tāngata i whakaae, he tāngata i whakahē. Ko te hunga i whakahē tērā i kawe i te take ki te Whare Paremata. I muia te papa ki waho atu o te whare pāremata e te tangata Māori, e te tangata Pākehā anō hoki e tohe ana ki tēnei whakataunga, ki tēnei ture hōu. Kaiporotēhi e mau ana ki te kara Tino Rangatiratanga i te wā o te hīkoi porotēhi i tū i Aotearoa i te kōkiritanga o ngā take e pā ana ki te takutai moana. Ko te whakapakoko tērā e kīia nei ko te ‘Seddon Statue’ e tū ana ki waho atu o Te Whare Paremata o Aotearoa, nō te rēhita o Pouhere Taonga nama 230. I taua wā rā ko Tariana Turia tētahi minita i te kāwanatanga o te wā, ko tana rōpū ko Reipa. Ka tuki ōna whakaaro ki tēnei ture ki ō ōna āpiti Reipa, ka tuku a ia i tana pōti whakahē. Ka heke i tana tūranga i te rōpū Reipa, ka huri a ia ki te kōkiri i tētahi rōpū tōrangapū Māori, ko te Pāti Māori tōna ingoa. Te Ture Takutai Moana: Hei rārangi pāhurehure putanga 1997 Ka whakatakoto tono ngā iwi Māori o te Tauihu o te Waka a Māui ki te aroaro o te Kōti Whenua Māori kia whai mana whenua whakatupu i raro i te mana o Te Ture Whenua Māori. Ka whakatatūhia e te kōti kei a rātou te mana whakatau heoi anō i tahuritia tēnei whakatatūtanga e te Kōti Teitei. Ka whakatakoto tono ngā tāngata Māori nei ki te Kōti Pīra. 2003 Ka whakatauhia e te Kōti Pira, kei te Kōti Whenua Māori te mana ki te torotoro haere ki te rapu i te rangatiratanga o te whenua. 2004 Paenga-whāwhā: Ka kī ake a Tariana Turia ka whakahē a ia i te pire nā tōna rōpū tōrangapū i waihanga ka mutu ka rihaina hoki i te 17 o Paenga-whāwhā. 2004 Te 5 o Haratua: Tekau mā rima mano tāngata neke atu i rāmemene atu ki te whenua ki Pāremata i te tatūnga o te hikoi porotēhi i te pire e pā ana ki te takutai moana. 2004 Te 18 o Whiringa-a-rangi: Ka whakaaetia te pire, ka whakaturetia. 2005 Poutū-te-rangi: Ka pūrongotia e te kōmiti o Te Kotahitanga o Ngā Iwi o te Ao, he takahi tēnei ture i te mana o te tangata whenua, o te iwi Māori. He mea whakatuturi tēnei pūrongo e te kāwanatanga. 2011 Ka poroa te mana o te Ture Takutai Moana e te kāwanatanga Nāhinara o te wā, ka panonihia, ka puta te ture hōu ‘Marine and Coastal Area Act’. E whakamana ana tēnei ture i te mana o te iwi Māori me tōna rangatiratanga i te takutai moana me tōna takere. Te hohounga o te rongo i te take takutai moana Puta ai tēnei take ka tohea e tēnā tangata me tāna ake tirohanga, e tēnā iwi me ōna ake whakaaro. Ko tā ētahi he tautoko i te whakaaro he ōrite te iwi Māori me te iwi Pākehā nā reira me kaua te mana ki ēnei rawa e rere kē. Ko tā te Māori titiro ki a ia anō e meatia ana, ko ia hei kaitiaki i ēnei rawa ka mutu he mana tuku iho tōna ki ēnei rawa. Tē aro i te rahinga o ngā tāngata o Aotearoa te tikanga o ēnei whakaaro o te Māori i te korenga o rātou i mārama ki te ahurea o te iwi Māori. Tohea ai tēnei take i pāremata pū, i ngā kōti, i ngā kāinga maha, i ngā marae huhua, i ngā hapori puta noa. I te Pāti Māori e noho haumi ana ki te Pāti Nahinara me tōna kāwanatanga i te tau 2010 i whakawhiti kōrero ki ōna āpiti kāwanatanga e pā ana ki te ture nā te kāwanatanga Reipa i whakamana. I tono a ia kia panonihia te ture, kia whai mana hoki te iwi Māori i raro i te whakaaro ki te āhuatanga o te whenua whakatupu. I tutuki pai, i panonihia te ture kia noho ko te mana o ēnei whenua ki te tūmatanui. Nā tēnei whakataunga ka wātea ki te iwi Māori, ki ngā hapū ki te tono mana whenua whakatupu i te takutai moana i tōna rohe. I tēnei whakatau ka kitea te hohounga o te rongo ka mutu te whakaae o te nuinga o te iwi Māori me te iwi Pākehā i runga i te mōhio ko ngā taha e rua o te take i whai mana i roto i te whakatau. He kekeritanga hanga huarahi 2014 Ko Wii Parata Te Kakakura te rangatira whai mana o Te Ati Awa ki Waikanae, o Ngāti Toa hoki i te tōmuritanga o te rautau 1800. Noho ai ia ki Waikanae. He tangata pupuri whenua, e 1600 hoki ana hipi. Whakamahia ai ēnei whenua hei hāpai i tōna whenua me ōna iwi. I te mahutatanga o te whakaaro ka whakatakotoria he ara tereina whakawhiti i tōna whenua ki Waikanae ka tirohia tēnei whakaaro i runga i tana mōhio ka whai rawa ōna tāngata i tēnei tūāhuatanga. Ka whakaae hoki a ia ki te tono i tōna whenua hei whakatū whare karakia me te taone o Waikanae. E kīia ana ko Wii Parata te whītiki o te kī i tōna mātanga ki te kōrero, ki te tohe hoki, ā, i te tau 1871 ka whakaurua a ia ki te pāremata hei māngai Māori mō te hunga o te Tai hau-ā-uru. Nōna e minita pāremata ana ka whakatairangatia e ia te hanga tika o ngā take whenua Māori i te wā tonu i te raupatuhia ngā whenua e te kāwanatanga puta noa i Aotearoa. I te tau 1877 ka mautohe a Wii Parata Te Kakakura ki te kōti, ko te Whakapono Mihingare te hoa riri i te korenga o rātou i whakatū whare karakia ki runga i te whenua takoha nā Ngāti Toa ahakoa tā rātou i kī taurangi ai. I te kōti, ka whakatauhia e te kaiwhakawā e Chief Justice Prendagast, kāore ō Te Tiriti o Waitangi mana ā-matatika, ā-ture hoki. Kei te rangona tonuhia te pānga kino nei o tēnei whakataunga puta noa, puta noa. Hei mea whakamiramira mā te marea I te tau 2014 i hiahiatia te wāhanga whenua kotahi o Wii Parata i toe mai e te Te Manatū Waka o Aotearoa, ko te hanga huarahi matua te whāinga. Tū ai te kāinga o Wii Parata ki tēnei whenua i tōna wā ka mutu he urupā ki tētahi takiwā o taua whenua. He mana nui ake tō te huarahi e ai ki te mana whakarite huarahi. Ka taunakitia tēnei whakaaro e te pirimia o Aotearoa me tana kī mai ko te huarahi nei, ‘hei mea whakamiramira mā te marea’. Ko Patricia Grace tētahi uri whakatipu nā Wii Parata. I mautohe rātou ko tōna whānau ki te Kōti Whenua Māori me te Kōti Taiao ki te tohe i te hanganga o tēnei huarahi i tō rātou whenua pū. ‘He whakamiramira hoki tēnei whenua mā te marea’ tā Patricia Grace mō te whenua o tōna tipuna. Kotahi tonu te whakatau a ngā kōti e rua, karekau rāua i whakaae nā reira kāore Te Manatū Waka i whai wāhi ki aua whenua hei hanga huarahi mā rātou. Ahakoa whakanuia ai tēnei wikitōria i roto i ngā mahi tiaki whenua Māori, kei te rongo hoki i te matakawa o te toa i runga i te mōhio i hangaia tonuhia tēnei huarahi ki whenua Māori kē kāore i whai mana kaitiaki i raro i te marumaru o ngā kōti. Ko Patricia Grace tētahi uri whakatipu nā Wii Parata. I mautohe rātou ko tōna whānau ki te Kōti Whenua Māori me te Kōti Taiao ki te tohe i te hanganga o tēnei huarahi i tō rātou whenua pū. Hei ara hohou i te rongo He rite tonu te hui tahi a Te Manatū Waka me ngā uri o Wii Parata e mārama ake ai rāua ki ngā take i rere kē ai o rāua whakaaro, o rāua mātāpono. Ko te manako ia o ngā uri o Wii Parata ko te pupuritanga o te kaitiakitanga o ō rātou whenua haere ake nei. Ka kahaki tonu Te Manatū Waka i ngā whenua Māori i raro i te whakaae o te Ture Hanganga Tūmatanui. He mea akiaki te whakatau ki te whenua o Wii Parata me ōna uri i ngā iwi Māori puta noa i a rātou e mautohe pēnei ana te rite ki ngā kōti. Koinei tētahi āhuatanga pai kua puta i tēnei kekeritanga i tāmi, i pēhi i te iwi Māori. Kua houhia te rongo i waenganui i te whānau Grace me Te Manatū Waka i te nui o ngā hui mata-ki-te-mata. Ahakoa te pōkaikaha o te whānau i te putanga mai o tēnei take, i tōngakingaki tonu te whai o tēnei whānau kia purutia tonutia ō rātou whenua ka tahi, ka rua kia mau tonu te mana o te whenua e kīia nei he taonga tuku iho. THR Kaiako' Notes He whakatakinga tēnei kohinga pārongo ki te āhua o te kekeritanga i te putanga o tētahi take i waenganui i te iwi Māori me te iwi Pākehā ka tahi, ka rua ki te āhua o te hohounga o te rongo i te taunga o ēnei kekeritanga. Ka tirohia: te kekeritanga me te hohounga o te rongo i waenganui i te iwi Māori me te iwi Pākehā i te Pakanga Tuatahi o te Ao ka tahi, ka rua i Aotearoa tonu nei te wāhi ki ngā titonga hei akiaki i te hunga tangata ki te tū hei hōia, hei tohu whakamaharatanga hoki ki te Pakanga Tuatahi o te Ao. te wāhi ki ngā titonga hei hāpai i te tirohanga a te tangata ki ētahi take o mua i te wā o te pakanga, o nāianei hoki. Tihau Te Puna Mātauranga o Aotearoa He rauemi anō mō Te Pakanga Tuatahi o te Ao Hapori Kōrerohia tētahi paki mō Te Pakanga Tuatahi o te Ao ki tō hapori He Pae Kōrero He toronga tono āwhina ā-ipurangi Tiritiria Terms and conditions Communities Schools Search TKI Search TKI Search Search all of TKI? Navigate in: te reo Māori Feedback About this site Accessibility Contact TKI Copyright and privacy Help Back to top Search TKI Search TKI Search Loading... Search result for '   ' returned   results. Did you want to Search all of TKI ? Close