Ko Wai Mātou – Kaupare 0 Te Taha Ture Te Taha Mātanga Te Taha Auaha Ko Wai Mātou Ngā Rawa Toa Kete Whakapā Mai Te Taha Ture Te Taha Mātanga Te Taha Auaha Ko Wai Mātou Ngā Rawa Toa Kete Whakapā Mai Ko Wai Mātou Ki Tāmaki Makaurau, ki Rotorua hoki a Kaupare me wā mātou toronga ki ngā kokonga katoa o te motu. Hakoa te tawhiti, ko te here ā whānau e tuitui nei mātou kia motuhenga te tū i te reanga kamupene mātanga. Ko ēnei here e kore rawa e tuku, e kore rawa e motu. He kōrero māori mātou katoa o Kaupare. Koia pū hei kīnaki i ngā mahi katoa o Kaupare, ao noa, pō noa. Alana Thomas Ngāti Rehia, Ngāti Kuri DIRECTOR WHAKAPĀ MAI Alana.Thomas@kaupare.co.nz PĀNUITIA TE KATOA Tuia te rangi e tū nei, tuia te papa e takoto nei, tuia te muka tangata e rangitāmirohia nei, e whiria nei i roto i tō tātou whare, e ita ai te taukaea o te aroha kei roto i tēnā, i tēnā o tātou. Mauri ora! Mai tōna pōtaetanga i Te Wānanga o Tāmaki Makaurau i te tau 2007, i rukutia rawatia e ia ngā puna maha i te ao Ture, pērā i te ture taihara, te ture whānau, me ngā wahanga katoa o te ture pakihi. Engari ko te nuinga o ōna wheako katoa, e pūkana mai ana i nga take Māori i Te Kooti Whenua Māori, Te Kooti Teitei Māori me Te Tairaipiunara o Waitangi. Ko ia tētahi o ngā roia e koke ana ngā kokoraho o ngā hapū, whānau me ngā kaikereme puta noa i Aotearoa. He mema a Alana o Te Hunga Roia Māori o Aotearoa (The Māori Law Society), he tumuaki o Mua o Te Rākau Ture (Māori Law Students Association), anō hoki, mohoa noa nei, he mema a Alana o tētahi rangapū e whakahaere ana i te mana o te wahine i roto i te ao Ture. E tika ana, ko te reo te maiaorere i tuituia, i tānikotia e ō tātou tūpuna hei tāwharautanga mō ngā whakatupuranga o mohoa noa nei, o haere ake nei kia mahana tonu ai tātou i roto i te ao hurihuri. Nō reira, ko tōna whāinga matua kia māori ai Te Reo kei ngā Kooti, ngā Taraipiunara, ngā wāhi katoa o Aotearoa. E ngākau nui ana a Alana ki te ao hākinakina, ki te ao haka, ki tōna hapū, whānau me wāna tamariki tokorua. Nō reira, kei ngā kākā tarahae, kei ngā kēkerematua o te wao, kei ngā tātāriki o te tongarerewa tapu o tuawhakarere kua tau mai nei, ka mihi rā. Ā, ka mātua i kōnei ngā kupu whakamihia. Apimaera Thomas Te Arawa, Aitutaki, Te Ati Awa CONSULTANT WHAKAPĀ MAI PĀNUITIA TE KATOA He toto Kuki Airani, he toto Māori anō hoki tā Apimaera. Mai tōna pōtaetanga i Te Wānanga o Tamaki Makaurau i te tau 2009, he tangata whatiwhati kō ia ki te māra o te Hauora Māori. Kua ngaki, kua hutia, kua whakaturia e ia ngā kaupapa maha e pukana mai ana i taua māra, pērā i te roopu CAYAD (Community Action Youth and Drugs), National Action Group, Kia Piki Te Ora – All Age Māori Suicide Awareness and Prevention, Kaitoko Whānau me te Whangarei Children’s Team. Mai ēnei pōtae maha, kua taea tonutia e Apimaera te noho tahi ki ngā roopu whakahaere i roto i ngā hāpori Māori, ngā hāpori Pākehā, ki te taha o ngā Poari Hauora a Rohe hoki. Ko te kii a Apimaera, e hia kē nei ētahi o tātou e noho taharangi ana, e hukore ana ki te tautoko i ngā kaupapa Māori i te ao hauora. Me mutu tēra. E whakapono ana a Apimaera ki ngā rautaki me ngā kaupapa here i roto i te ao hauora e manawanui ana ki Te Reo me ōna tikanga. Hei ko tāna, kei reira te oranga tonutanga mā tātou te iwi Māori. E whakapono ana a Apimaera ki te hauora o ngā whānau Māori katoa, me tā rātou māramatanga ki Te Ao Māori. E tika ana te kōrero, “mā te rongo ka mōhio, mā te mōhio ka mārama, mā te mārama ka matau, mā te matau, ka ora”. E ngākau nui ana a Apimaera ki te ao o te Taiaha/Mau Rākau, te ao whutupōro, tōna ake whānau me āna tamariki tokorua. Kerri Anne Hancock Ngāti Whakaue DIRECTOR WHAKAPĀ MAI Kerri.Hancock@kaupare.co.nz PĀNUITIA TE KATOA I takea nga wheako matua o Kerri mai i tōna mahi ki te taha o te karauna, ki te taha hoki o tōna iwi ki roto i te rāngai whakatau take Tiriti. No tōna wā i roto i te rāngai nei i pahore i a ia nga mātauranga motuhake mo te puretumu arumoni me te puretumu ahurea, ā, kua hanga kua whatinana kaupapa here ia ki nga taha e rua o te rāngai. Engari ko tāna i tino whai tikanga ko te kōkiri whakaritenga i wero i nga ripa tauārai o te karāuna, kia whai hua mō nga iwi. Na tōna mahi ki rō karauna, ki te taha o tōna iwi hoki e taea e ia te arotake I nga raru kerēme mai i nga taha e rua, me te whakataki huarahi e puta ai te ihu o ōna kiritaki. E mārama hoki ia ki te hiranga o te whakatau whakaaro i te ao tōrangapu o nāianei. E whakapono a Kerri kia kounga te tutuki o te mahi, me āta mahere me āta whakariterite hoki, ā, kia mutu ēnei wāhanga me kaha pukumahi kia tutuki mārika nga whainga. Koinei te ture kua whakamahia e ia kia whai hua i roto i āna mahi i te ao i te pō. E ngākaunui a Kerri ki ana tamariki, tōna whānau me tōna iwi, ā, he ngākaunui hoki ia kia Māori Te Reo. Kua riro i a Kerri he tūranga i runga i nga mana whakahaere o Te Arawa Swimming me te Kōhanga Reo o āna tamariki, I ōna wā whakatā ka pai ki a Kerri te mahi i nga tumomo kori tinana cross fit. Te Amohaere Morehu Tai Tokerau, Tūwharetoa, Ngāti Porou DIRECTOR WHAKAPĀ MAI TeAmohaere.Morehu@kaupare.co.nz PĀNUITIA TE KATOA Nā tana putanga ā ihu i te Whare Wānanga o Tāmaki Makaurau ka whāia e ia ngā akoranga ki Rānana, ki Airani noki. I aua whenua rā ōnā pukenga me ōna tirohanga katoa rangiwhāwhā ai ki ngā pekanga o tēnā, o tēnā. Ā, tōia mai ēra wheako ki Aotearoa nei, ko Te Amohaere me tōnā reo māori rātou ko ngā mahi whakatairanga piri tahi ai hei hoa haere. I noho āhuru a Te Amohaere ki te ao pāpāho ki reira titia rawatia tōnā hiahia kia tū ia hei mātāmua i roto i āna mahi katoa. Kua toka rawa ia ki ngā rautaki ā waitohu, ā mahi tauhokohoko, ā ao ipurangi. Kā mutu, kua rongo marika a Te Amohaere i te angitū i roto i aua mahi. Hei mātāpono matua mōnā, ko te mauri o te kupu me tana karawhiu, koia tērā hei tauihu i ngā ara e hiahiatia nei e te tangata. Kupu māori mai, kupu pākeha mai, ko ngā reo e rua nei ka noho hei marumaru ,engari ko te reo māori, ko ia kē te tuāpapa, te pou whakawhirinaki. Hāunga rā te mahi o te tari, kua rae tōtā a Te Amohaere ki ngā mahi o te kāinga, o te noho hoki hei māmā ki ngā tamariki tokowhā. He whānau reo māori, he whānau kapa haka, he whānau hākinakina hoki. Kia tūpato, ko te whakataetae te mutunga kē mai o tōnā pai, o tōna hianga hoki. Te Arepa Morehu Ngāti Whātua, Ngā Puhi CONSULTANT WHAKAPĀ MAI TeArepa.Morehu@kaupare.co.nz PĀNUITIA TE KATOA Mai i tōna mutunga i Te Wānanga Aronui o Tāmaki Makaurau, he nui tō Te Arepa uru ki ngā pūkenga huhua. He mata kikoha ia i te whakawhitiwhiti kōrero me te whakangāwari i ngā kupu ā-kaupapa. E mārama kehokeho ana a Te Arepa i ngā tino hiahia, i ngā takohanga, i ngā rautaki o ngā pakihi, waihoki rā ko te hira o te mahi tika, ao noa pō noa. Kua hua mai ēnei wheako matua i ōna akoranga hangarau whakaaturanga, me tana hīkoi ki ngā tauwharewharenga hangarau o te ao. Kua huri te aro a Te Arepa ki te mahi waitara, ki te tātari pakihi hoki. Kua whānui ōna mōhioranga ki ngā tukanga mahi i te wā tū, i te wā haere ake nei hoki, ā, kia whakapiki ai ngā kaupapa pakihi. Ka toia e ia ngā hiahia o te pakihi, kia whakatūturu i te aronga me ngā paetae i ngā hunga whaipānga. Ko te whakatipu i te ohonga māori tētahi o ngā whāinga matua o Te Arepa. He toki ia i roto i āna mahi katoa, he Māori i te ao, i te pō. He ringa tohu ia i te poari o Ngāti Whātua Whai Rawa. Tua atu i tāna ‘Samuraitanga’, e hiahia ana ia ki te tākaro ki āna tamariki e whakatipu tere ana na te mea ko tōna tino aronga, ko tōna whānau. Ko tēhea arero Māori English Whakapā mai ki Kaupare P O BOX 133102 info@kaupare.co.nz (09) 527 3201 Copyright © 2017 Kaupare Law & Consultancy