Nga Wharekura o Te Arawa ki Santiago de Chile: Te Wiki i roto i te Kura o Pucalan skip to main | skip to sidebar Nga Wharekura o Te Arawa ki Santiago de Chile Tuesday, September 15, 2009 Te Wiki i roto i te Kura o Pucalan Na te nui o nga mahi i whai i te wiki nei, maku nga mea e hihiko nei anake e tautu, e whakamarama kia kore ai au e tuhituhi noa. Hai aha nga take meamea. I te Rarua he rangi pai ano. E kaha ana nga Maories ( ka whakahuatia peneitia e te iwi kainga o koneki) ki te uru tonu atu ki nga mahi. Ko tenei te rangi ka whakaakona te puoro ki nga akonga, a, ko nga Maories kai roto i te whare puoro e whakatangitangi ana i nga momo taputapu, ara ko te rakuraku, te piana hiko, me nga taramu. Ko ratau ano i te kapokapo atu ki te rakau hopu reo e waiata noa ana. Haruru ana te whare nei i te hoihoi, me ki, he hoihoi pai. Kaore kau te whakama i puta, ko nga pukenga anake ka rangona, ka kitea. I te rangi nei ka kuhu atu au ki roto i tetehi o nga akomanga takaro. He ropu nohinohi nei, i raro i te 5 tau te pakeke o enei tamariki. Ko te kanikani me te takaporepore te mahi hai whakakorikori i te tinana. Pai kare, he tino ngawari nga kaiako o te kura e akiaki ana i nga tamariki ki te whai i nga mahi. Ka whaia tonutia e nga tamariki i runga ano i te harakoa. I te ahiahi kua pohiritia matau kia kuhu ki roto akomanga ano, i te mea kua whakahaerehia e etehi o nga akomanga he whakaaturanga mo matau. Te ahua nei kua pau nga wiki tata nei ki te whakarite i nga mahi. No reira, e rua nga akomanga ka kuhuna, a, ka whakaatuhia nga mahi, ka homai hoki e nga tamariki o enei reanga he kai tuturu no koneki, he momo paraoa te nuinga. Ka mutu te whakaaturanga, ka puta ki waho, na, i runga i te hiahia o nga tamariki ka takaro poiwhana matau. He tino ngakaunui nei te nui o nga tama o te kura ki te poiwhana. E ta, ahakoa iti, ahakoa nui he hikaka ratau ki te takaro. Ko nga rutu he orite ki to te rutu hutuporo. Heoi ano, heke nei te werawera i te rae o te koroua nei, a kua huri te wa kia hoki ano ki te kainga. I mua atu i te hokitanga me whai nga kamera i a Okeroa raua ko Tanawhea ki o raua kainga. I te po nei ka hari a Justin i a matau (nga pakeke Maories) ki tetehi paparakauta o te taone ki te matakitaki i a Chile e purei ana ki a Brazil. Ko te kirika poiwhana kua pa mai ki a Chile whanui mo te kemu nei, ana, ki ana te paparakauta nei i te tangata. Kaore i whai turu i roto, me noho matau ki waho, he mata nui i waho ra kia matakitakina e te huinga tangata. Ka hinga a Chile, 4-2. Ka hoki ki te departamento, ko te moe te tino take. Posted by koa at 6:11 PM No comments: Post a Comment Newer Post Older Post Home Subscribe to: Post Comments (Atom) Followers Blog Archive ▼  2009 (9) ▼  September (9) Te Ra Wehenga He rorerore (bbq) ki te kainga o Te Mangai o Aotea... Nga mahi turuhi Ko nga turuhi Maori no Rotorua Te Huritau tekau tau o Pucalan Te Wiki i roto i te Kura o Pucalan Te Kura O Pucalan Katahi te makariri Nga Wharekura o Te Arawa ki Santiago de Chile About Me koa View my complete profile