Tiriti o Waitangi - Te Rerenga o ngā Tānga Kirikoti Kāinga Pānuitia te Tiriti Wātaka Orokohanga Raumei Whakataunga Tiriti Ngā Take Mahere Pae Reo Pākehā   Tāngata Ingoa Nui Kupu Ake He Mapi Rerenga Ngā FAQ Whakamārama Kei tĒnei wĀhanga Kupu Whakataki Ngā Hainatanga Te Rokiroki i ngā Tānga o te Tiriti Pānuitia te Tiriti o Waitangi English version of this page TE RERENGA O TE TIRITI NgĀ Hainatanga I te tau 1840, he uaua, he mōrearea anō ngā ara whakapāpā ki ngā tāngata e noho ana ki ētahi atu tōpito o te motu. Ka whakatauria kāore e pai te tuku i te tānga kotahi nei kia kōpikopiko haere i te motu, kei ngaro. Nā reira i mahia ai ētahi tāruatanga. Ka hoatu ēnei ki ōna anō āpiha, mihingare anō hoki, ā, he mea tono rātou kia kohi waitohu atu anō i ngā rangatira Māori puta noa i te motu. Hāunga te tānga i kawea ki Waikato, i tuhia te katoa ki te reo Māori. Kāore i te mōhiotia he aha i tuhia ai tō Waikato ki te reo Pākehā, engari ko te whakaaro, i whakaaturia ngātahitia me ētahi tāruatanga reo Māori. Kua ngaro te tuhinga Pākehā taketake ake nō reira mai te whakamāoritanga, tae atu ki ngā tauira hukihuki o te whakamāoritanga o te Tiriti. I te mea i mahia ētahi whakatikatika ki te tauira Māori i te 4 me te 5 o Pēpuere, ka tahuri te mihingare a te Church Missionary Society (CMS), a Richard Taylor, ki te hanga tauira hou mō te hui o te 6 Pēpuere, me te pupuri ki te tauira pepa tuatahi. Ko tēnei tauira hou, i tāia ki te kiri o te nanekoti, o te hipi rānei – he momo pepa tonu tēnei i whakamahia nuitia i ērā wā mō ngā tānga ture, i te mea he kaha ake i te pepa noa iho. Ko te tānga matāmua i hainatia i Waitangi te mea kāore e tino mōhiotia ana ngā ingoa katoa o runga me ngā wā i tāpiria ai. Ko te hainatanga tuatahi, i Waitangi tonu i te 6 Pēpuere, ā, e toru ngā ripa, e whakapaetia ana e 40 pea ngā ingoa, ngā waitohu rānei e rārangi mai ana ki aua ripa. Tekau mā tahi neke atu rānei ngā rangatira i tuhi i ō rātou ingoa, i tāia e ētahi anō ō rātou waitohu me ngā kōrero tautuhi i te taha, hei tauira, ko “Te tohu o Hori Kingi Warerahi”. E whitu anō ngā rangatira i haina i te 9 Pēpuere, i Te Waimate. He tokomaha ngā rangatira o Hokianga i haina i Hokianga i te 12 Pēpuere, ko tō rātou tohu whakaae, he rīpeka kau, ā, ko te Hēkeretari o te Koroni, a Shortland, te kaitaunaki. I tēnei wā ka tāpiria he ripa tuawhā. I te 17 Pēpuere, ka tāpiria atu ngā waitohu o Kawiti, o Tirarau me Pōmare ki runga ake i tō Hone Heke. Ka tīmata i konei te hē haere o te raupapa o ngā ingoa. I te tāpiritanga o ētahi atu huinga ingoa, waitohu i Waitematā i te 4 Maehe, kātahi ka tino hē kē atu. Ka tāpiria e Kāpene Nias, o te Herald, rāua ko George Cooper, te Kaitiaki Pūtea mō te Koroni, he pepa kirikoti anō ki raro o te kirikoti taketake, i te mea kua kapi katoa te mea tuatahi. Ka tāpiria ki tēnei pepa kirikoti tuarua ētahi ingoa i Kaitaia, i Tāmaki-makau-rau, me Kororāreka. Nā te maha me te putuputu o ngā tāpiritanga ingoa, kāore e taea te kī e hia rawa ngā rangatira nō rātou ngā ingoa me ngā waitohu i tēnei tānga mātāmua o te Tiriti, engari e whakaarotia ana kei te takiwā o te 240. Ko te tānga o te Tiriti i hainatia i Manukau me Kāwhia te mea tuarua. I tukuna ki a Kāpene William Symonds i te 13 Maehe 1840, ā, nāna i kohikohi ngā ingoa me ngā waitohu o ētahi rangatira i te whanga o Manukau. Kāore ngā rangatira o Waikato i whakaae ki te haina i te Tiriti, engari e toru ngā rangatira o Ngāti Whātua (ko Kawau, ko Tinana me Reweti, he mōhio anō a Reweti ki te pānui me te tuhi) i haina, i te 20 Maehe. Ka kohia e ētahi mihingare Wēteriana tokorua, (e James Wallis rāua ko John Whiteley) ētahi atu ingoa 10 i Kāwhia, i waenga i te marama o Aperira me Hepetema. Koia nei te tānga whakamutunga kia whakahokia atu Pewhairangi, i te tau 1841. He mea haina te tānga nei e Shortland, kāore i hainahia e Hopihona, i te mea i pā he ikura roro ki a ia i te 1 Maehe, me te aha, pākia ana tana tinana e te mate iokerewai. Ko te tānga i hainatia i Waikato me Manukau (koia anake te mea i tuhia ki te reo Pākehā, e whakamahi ana i te tauira reo Pākehā “whaimana”) he tānga i āta tuhia ā-ringa ki te pepa. E mau mai ana ki runga te hīra a Hopihona me tana waitohu anō. He āhua rerekē tana waitohu, i te mea i tuhia ki tana ringa mauī. Nō te pāngia ōna e te ikura roro, ka raru tana ringa matau i te iokerewai. Ka tukuna te tānga nei ki te mihingare CMS, ki a Robert Maunsell i te wāhanga whakamutunga o Maehe, me ētahi tāruatanga anō pea o te tauira reo Māori i te taha. Ko Maunsell rāua ko B. Y. Ashwell ngā kaitaunaki i ngā waitohu me ngā ingoa e 32 i mau i a Ashwell. He mea whakaū e rāua ēnei ingoa i te 11 Āperira. E whitu atu anō ngā ingoa i kohia e Symonds i Manukau (i Awhitu pea) i te 26 Āperira. Arā anō tētahi tāruatanga, nō ētahi rangatira e rima o Waikato ngā waitohu o runga, engari kāore i tuhia atu te rā. E whakapaetia ana he tāpiritanga tēnei ki te tānga o Waikato-Manukau. Tērā pea e toro ana ngā rangatira o Ngāti Pou, o te awa o Waikato, me Ngāti Te Wehi, o Whāingaroa, i te teihana o Maunsell i taua wā. Ko tēnei kape tētahi o ngā tāruatanga e 200 o te tauira reo Māori o te Tiriti i tāruatia ki te pūreretā CMS i Paihia, i te 17 Pēpuere. E rua ngā tānga o te Tiriti i tukuna ki Tauranga mā Alfred Brown, te mihingare CMS e noho ana ki reira. Ko tētahi o ēnei, he mea āta tuhi ā-ringa ki te pepa, me ōna hīra harare e toru. Heoi, kāore i whakamahia te kape nei, kāore rānei i whakahokia. Kei ngā ringa tūmataiti kē e pupuri ana ināianei. Tērā anō tētahi kape, kāore he hīra o runga, ka mutu, ko te waitohu o Hopihona, he mea tuhi kē pea e tētahi atu. Heoi, kua noho koinei te tānga ki Tauranga . E 21 ngā rangatira i haina i te tānga ki Tauranga, engari karekau i tuhia he rā hei whakaatu nōnahea i hainatia ai. Ki tā ētahi, ko te take i āhua tokoiti ai te hunga nāna i haina, ko ngā riri Māori tara-ā-whare, ko te pura o Brown, ko te noho mai rānei a Pompallier, te Pīhopa Katorika, i tau atu ki tērā takiwā i te 7 Maehe. Ka pā ngā tohutohu a Hopihona ki a Brown i te 1 Āperira “e mea ana kia kohia e au ngā ingoa o ngā tino rangatira e noho ana ki te rohe”. E ai ki ngā tuhinga i te rātaka a Brown mō te 10 Aperira, i pau he rā ki te kohikohi ingoa, he aha te aha. Ka mutu i konei ngā kōrero i tana rātaka mō tēnei kaupapa. Ka tae atu a Meiha Thomas Bunbury, te tuarua a Hopihona, ki Tauranga i te 11 Mei, kia kitea ai e pēheatia ana tā Brown kohikohi haere i ngā ingoa, me tana kite iho kāore e tino whaihua ana. Whakaritea ana mā te mihingare mā James Stack e tā ētahi atu kape e rua o te Tiriti. Ko tētahi i tukuna ki Rotorua, ki Taupō, engari ka tū ngā ihu o ngā rangatira o Te Arawa me Ngāti Tūwharetoa. He aha rā, ka ngaro tēnei o ngā tānga. Ko te tānga tuarua, i hoatu ki a James Fedarb , he kaihokohoko tūmataiti. He whārangi pepa āhua roa tonu tēnei, ko te waitohu o “William Hobson” i tuhia e tētahi atu (ko te “W Hobson” kē te waitohu tūturu o Hopihona), ā, kāore i tuhia atu te tūranga o te kāwana ki runga (i pērā anō te āhua o te tānga mō Tauranga). Ka wehe atu a Fedarb i Tauranga i te 22 Mei, me te kohikohi haere i ētahi ingoa e 26 i Ōpōtiki, i Te Kaha, i Tōrere me Whakatāne. Ka hoki ia ki Pewhairangi i te 19 Hune, me te hoatu i tēnei tānga ki a William Colenso (Te Koroneho), te kaitā a te CMS, hei hoatu māna ki a Hopihona. Ko tētahi āhuatanga motuhake o tēnei tānga, ko ngā rīpeka Karaitiana i tāia ki te taha o ētahi o ngā ingoa, e whakaatu ana kua tahuri mai ngā rangatira nō rātou aua ingoa ki te hāhi Katorika. Tērā pea e tohu ana tēnei i whai tonu ngā kaikohikohi i ngā tohu nei kia parea atu te awe o Pompalier. I Pewhairangi hoki a Pompallier mō tētahi wā, ā, kua whakanihoniho ia me ngā mihingare Karaitiana ki te Uru i reira. Ko te Rev. Henry Williams (Te Karuwhā) te tangata nāna i whakamāori te Tiriti. I rere mai ia i Pewhairangi mā runga i te Ariel i te 2 Āperira, me ētahi tānga e rua o te Tiriti. Ko tētahi i whakarerea atu ki tana teina, ki a William Williams, i Tūranga i te 8 Āperira. Ka tae mai a Te Karuwhā ki Pōneke i waenga o Aperira, ā, e 39 ngā rangatira i haina i te Tiriti i konei i te 29 Āperira. E 34 atu anō i haina i Arapaoa me te moutere o Rangitoto. I te marama o Mei, ka hoki haere ia mā Te Tai Hauāuru, ka mau i a ia ngā waitohu o ētahi rangatira tokomaha i Ōtaki, i Waikanae, i Manawatū, i Whanganui, me Motu Ngārara (he moutere iti e piri ana ki Kapiti). Nōna ka hoki ki Kapiti i te tīmatanga o Hune, ka rongo ia kua haria e Bunbury tāna ake kape ki te tonga. Ka hoki a Te Karuwhā me ōna ingoa rangatira 132 ki Pewhairangi. He tino rerekē te tānga i mauria haerehia e ia i ērā atu tānga katoa. He taitapa huarua ōna, me te noho mai o ngā kupu o te Tiriti ki ngā ripa e toru. He momo tohu anō e whakaatu ana ko wai ngā rangatira nui o mea iwi, o mea iwi, me ētahi atu tohu whakamārama i te taha. Nō Hopihona taketake ake te waitohu o runga, engari he tūretireti te tuhi. He rite te āhua o te tuhinga ā-ringa o te tānga ki Tūranga ki tērā i a Te Karuwhā, he whai taitapa huarua anō. Nō Hopihona tūturu anō te waitohu o runga, me te tūretireti anō o te āhua, e tohu ana kua āhua whakamāui ake ia i tana ikura roro. Nā Te Karuwhā tēnei i whakataka atu ki tana teina, ki a William Williams i te 8 Āperira, mei kore e mau i te teina te whakaaetanga o ngā rangatira mai i Te Tai Rāwhiti ki Ahuriri. I waenga i te 5 me te 12 o Mei, e 25 ngā rangatira i haina i tēnei tānga o te Tiriti i Tūranga. Ka tāpiria ētahi atu i wāhi kē. Ko William Williams rātou ko Henry Williams Jnr, ko George Clarke Jnr ngā kaitaunaki. Hui katoa, e 41 ngā ingoa i kohia. I tana reta ki a Shortland i te 8 Mei, ka kīia tēnei tānga e William Williams he “tauira hukihuki o [te] Tiriti”, e tohu ana i whakapono ia ka puta he whakatūturutanga ā tōna wā. Ko ia anake te mihingare i whakapuaki i tēnei whakaaro. I āna tohutohu ki a Bunbury i te 25 Āperira, ka mea ake a Hopihona ki a Bunbury, ko te katoa o ngā waitohu ka tāpiria i muri i te 6 Pēpuere, he tohu tautoko noa, kāore e tino whaimana. I a Meiha Bunbury anō tētahi tānga o te Tiriti ( te tānga o te HMS Herald ) i kawea ki te tonga i runga i te Herald i te tīmatanga o Mei. He torutoru ngā ingoa i mau i a ia i Te Tara o te Ika i te 4-5 Mei, ā, i reira anō ētahi kore rawa i whakaae ki te haina. Heoi, he tokoiti anō i haina i Ahuahu i te 7 Mei. Nō te 11 Mei ka ū ia ki Tauranga, korekore nei he rangatira i whakaae ki te haina i reira, me tana kite kua āhua pūhore anō te mahi a Brown rāua ko Stack i reira. Mahue atu ana a Tauranga, ka tau atu ki Akaroa, i Te Waipounamu, i te 11 Mei. Mā te aha anō i te tokorua i haina i reira. Ka pā he marangai kino i kore ai te Herald e tapoko atu ki Ōtākou, engari ka waimarie i Ruapuke, he moutere i Te Ara a Kewa. E toru ngā rangatira i haina i reira i te 10 Hune. Ka hoki haere mai te Herald mā te taha rāwhiti, me te tuku waka iti ki uta i te Whanga o Ōtākou. Kātahi ka rere mā Te Moana o Raukawa, ka puta atu ki Kapiti. He roa te haere, engari he poto te rārangi ingoa i hua ake – e 27 noa te tapeke. Heoi, ka poua e ia te mana o te Kuini ki te moutere o Rakiura, i runga i te tikanga ‘kitenga tuatahitanga’ (i te kore ōna i kite i ētahi Māori i reira). I pērāhia anō e ia te “moutere o waenganui”, arā, Te Waipounamu. Ko te tānga o te Herald, i tāia ki te kirikoti, ā, ka takakinohia i muri mai e te kiore. Ko te waitohu māori o Hopihona kei runga, ā, ko ngā tuhinga ā-ringa, nā Henry Tacy Kemp pea. Ko ia tētahi o ngā kaiwhakamāori kāwanatanga tino pai o ērā wā. I te Oketopa 1840, ka tukuna te tānga whakamutunga o te Tiriti ki te Tari o ngā Koroni i Rānana (kei te Tari Mauhanga Tūmatanui e pupuri ana, CO 209/7, 178). He whārangi rahi tēnei nā, he whai taitapa huarua, e mau mai ana ngā kōrero reo Māori me ngā kōrero reo Pākehā whaimana, he mea whakatūturu anō ki te waitohu o Hopihona. He kupu anō kua tāpiria atu e mea ana “kua tangohia ngā waitohu”, engari tē kitea te tikanga o tēnei kōrero, i te mea kāore kē i whakapaua he kaha ki te āta tuhi, ki te tatau rānei i ngā ingoa me ngā waitohu. Ko te kaupapa kē o tēnei karere, he whakaatu noa e tukuna ana ngā tauira whaimana e rua o te Tiriti hei tānga tōtika, he mea whakatūturu anō nā te Rūtene-Kāwana, hei rau atu ki te kōnae. Koinei anake te tānga o te Tiriti ko ngā kupu “Te Tiriti o Waitangi” (ki te reo Pākehā) e mau mai ana hei ūpoko. Tirohia te Mahere o ngā Hainatanga Kimi KIMI MĀRIRE Kāore e arohia ngā tohutō i roto i ngā mahi kimi. NGĀ HONO E HĀNGAI ANA • Tāngata Ingoa Nui • Te Puni Kokiri • Archives New Zealand © 2005 - 2006. Kāinga | Pānuitia te Tiriti | Wātaka | Orokohanga | Rauemi | Whakataunga Tiriti |  Ngā Take | Mahere Pae Reo Pākehā | Tāngata Ingoa Nui | Kupu Ake | He Mapi | Rerenga | Ngā FAQ | Whakāmarama Me mātua whakaae te rangatira me te kaipupuri manatārua i mua i te whakamahinga anō o ētahi whakaahua o te pae tukutuku nei. Me mātua whakaae te Whare Pukapuka o Alexander Turnbull, Te Puna Mātauranga o Aotearoa, i mua i te whakamahinga anō o ā rātou whakaahua. Kia kitea ai te roanga atu o ngā kōrero mō ngā whakaahua a ATL, whakatakotoria te kiore ki runga ake i ngā whakaahua.