Te Ao Taketake : - waiata and haka lyrics Tāmata Toiere English Māori Menu Learn Home About this site Resources Browse Newest Genre Composer KAPA HAKA Year Search Search More Search Options Connect Contribute Contact Us Te Ao Taketake 00:00 04:27 repeat repeat off play pause stop mute unmute max volume Composer Jason King Ko Tainui te waka Ko Waikato te iwi Ko Ngāti Mahuta te hapū Ko Te Koraha te marae Ko Tahāroa te papakāinga Ko te reo Māori te moko o te hinengaro,he reo ohooho, he māpihi maurea, he whakakai marihi. The Māori language is the blueprint to the soul and mind, a treasured adornment that is upheld with the highest esteem. Read more Songs by this composer Te Ao Taketake Taku Manu Tāwhiowhio              Kōrihi atu taku manu tāwhiowhio              Ki te tini, ki te mano o Hākuturi              Aku manu honenga              Aku manu whitirua 5           Ki te... more Te Ipukarea Te Ao Taketake Composer: Jason King, Year: 2011 Genre: Haka - Ngeri Ref#: KIN002 Lyrics E tātou e te ao taketake Kia hiwa rā! Kia hiwa rā! Huakina! Huakina! 5.          Huakina mai ko te pū o te ora              Tōku pounamu, mōtoi kahotea              Tōku reo, kia ita, kia mau              Kei ngaro ā-moa              Kei whakangaro atu 10.       Whakamanawa tō mana purutia              Whakarangatira tō mana tiketike              Whakareia tō mana Māori motuhake              Kia eke panuku, eke Tangaroa              Takakawehia te ara poutama 15.       Ka poua, ka titi, whakatepe e!              Arā, hikina mānuka              Ki te rākau whakarawe              Kia hiwa rā!              Kia hiwa rā! 20.       Huakina! Huakina!              Tī hei mauriora! Explanation Kua roa tā tātou whawhai, arā, tā te ao taketake whawhai ki a tauiwi, mō te mana motuhake o te tangata. Kei roto i ngā pukapuka hītori me ngā kōrero tuku iho a ngā tūpuna te taunakitanga o ngā taukumekume, o ngā kakaritanga ki a tauiwi. I pae mai a tauiwi ki uta ki ngā takutai o ngā whenua katoa o te ao. Ko tā tauiwi mahi ki te ao taketake, he patu tikanga, he kōhuru tāngata, he raupatu whenua, ā, monemone noa. Ki ngētehi tāngata kua panoni ngā tai, kua mutu tēneki mahi, ā, kua murua ngā hara o tauiwi mā. Engari kē, ki ngētehi atu, e whakamau tonu ana i ngā kinonga a tauiwi. E patua tonutia ana ngā tikanga taketake, e raupatu whenua tonu ana a tauiwi. Heoti anō, ko te tino e whakararuraru ana i ngā mātanga mātauranga o te ao taketake, ko te kōhurutanga o te mana motuhake, ā, ko te tūrakitanga hoki o te tino rangatiratanga. He āhua kino, he whakaaro kino kua āta kuhu haere i ngā poka o te hinengaro, i ngā kokonga o te ngākau, ā, i ngā awe o te wairua. E pā kaha tonu ana tēneki āhua ki ngā tāngata o te ao taketake. Ka rere atu ngā urupounamu, ‘me aha te ao taketake? Kei whea rā tōku reo taketake? He aha taku koha ki tōku ao taketake?’ Nei rā tētehi paremata. He ngeri e whakahau ana, e whakatītina ana i te ao taketake. Ahakoa ngā pīere nuku me ngā papatoiake, e akiaki ana te ngeri nei, kia tū kaha, kia tū mārō, kia tū rangatira tonu ai ngā tāngata o te ao kua aupēhi nei. Hei te tau 2012, ka heria te ngeri nei ki Amerika. Ka whakarewahia ki te Hui Whakaora Reo ki Niu Ioka, hei kupu tautoko i te kauwhau a Ahorangi Tīmoti Kāretu. Whai muri, ka kawea hoki te ngeri nei ki te Hui Native American & Indigenous Studies Association (NAISA), Connecticut. Ka taetae atu te iti me te rahi, ahorangi mai, tākuta mai, kaiako mai, tauira mai. 20 ngā tāngata o Te Wānanga Aronui o Tāmaki Makau Rau e haere ana ki te whakatakoto whakaaro, ki te kauwhau, ā, ki te tautoko i ngā kaupapa taketake o te ao. Ētahi Kupu Rārangi: 4. Huakina! Huakina! E tīwaha atu ana ki te iwi, ‘Tēnā, areare mai ngō koutou taringa. Whakatuwherahia ngō koutou ngākau, ngō koutou hinengaro, ngō koutou wairua’. 5. Huakina mai ko te pū o te ora. Kimihia, rangahaua. Koia ko te pūtake o tāu noho ki tēneki ao. He hononga ki te ōrokohanga o te whakaaro, o te āhua, o te tangata. I roto i te karakia Te Kawa Maiorooro...‘i tupu ko pū, ko te weu, ko te rito, ko te take...’ 6. Mōtoi Kahotea.   He whakakai pounamu, he kōpatapata tōna āhua. He tino taonga. 8. Ngaro ā-moa. Kua korehāhā, kua ngaro noa atu, e kore rawa e waihape mai. 12. Whakareia. He kupu whakahau, he kupu whakakaha. I tīpakohia i te pēpeha o Te Ipukarea, te wāhanga whakatairanga Reo Māori o roto o Te Wānanga Aronui o Tāmaki Makau Rau. Ko te katoa o te pēpeha e whēnei ana, ‘Whakareia te kounga o te reo’. Ko tōna kaupapa, kia pūmau ki tēneki taonga a kui mā, a koro mā. He mauri tō te reo Māori, he mana tō te reo Māori. He reo waiwaiā, e tika ana kia noho ki ngā taumata tiketike. 14. Takakawehia te ara poutama. Ko tēneki te pēpeha o Te Ara Poutama, te wāhanga Māori o roto o Te Wānanga Aronui o Tāmaki Makau Rau. Ko te katoa o te pēpeha e whēnei ana,‘Takakawehia te ara poutama, kia whakareia ki ngā tohu o te mātauranga’. Ko tōna kaupapa, he kupu whakanui i te tauira, kia whai tonu i ngā huarahi ako. Ka whakapeto ngoi kia eke ki ngā taumata o te mātauranga. 15. Whakatepe e! He kupu i tangohia mai i te whakataukī, nā Te Wharehuia Milroy, ‘Me whakatepe te kō’. Mā te whakangonge ngao te huanui hei tārake kia mārakerake ai. Kātahi, ka whai wāhi ai ki te whakatutuki i ngā kaupapa nui whakaharahara ki mua i te aroaro. 16. Hikina te mānuka. Kua whakatakotohia te wero, nā tēnā, kawea ake. 17. Rākau whakarawe. Ko te tikanga o te kōrero nei, kei ngō ringaringa te rongoā, nō reira whakatikatikahia e koe tō whare. Whakaarohia, māu anō tō huarahi hei para, hei koke whakamua, hei aha? Hei painga mōu, mō te katoa anō hoki. © 2019 Tāmata Toiere - waiata and haka lyrics VO2 web design