N°116 –   Mānava, e HŌKŪLE’A !   Home À propos Centre des métiers d’art Conservatoire Musée de Tahiti Service de l’artisanat Service de la culture Service du patrimoine TFTN E reo to u N°116 –   Mānava, e HŌKŪLE’A !   by jos · 1 mai 2017 Te tāpaera’a/tīpaera’a mai ‘o Hōkūle’a i te 4 nō tiunu 1976 i Pāpōfa’i, « Plage Sigogne », Papeetē, Tahiti. Pāpa’ihia ‘e ‘orerohia ‘e Marc ā MAAMAATUAIAHUTAPU, pi’ihia ‘o Maco Tevane. (Nō roto mai i te pu’e-faufa’a ā te Fare Vāna’a).     ‘Ua fero ha’amauhia te va’a i te ‘aha mo’a ā TĀNE ‘Ua fero ‘e ‘ua ferohia ‘Ua tāviri ‘e ‘ua tāviriviri E aha ïa e paruparu ai ! E rere ra iā va’a nā te mata’are rōroa E rere ra iā va’a nā te mata’are pōpoto Mai te hiti tautau mai ‘e tae roa i te hiti tautau atu E va’a ra ē ! E ma’o nui ‘ai-ata ia E oira’a motumotu i te ‘are rōroa ‘e i te ‘are pōpoto   Inaha ho’i ‘outou na ē ! I te fanora’a mai nā te mōana ‘are fetufetu Mai HAWAI’I-‘Ā mai, te fenua ō te Matau-nui-ā-MĀUI, te fenua anoa ‘Aore ho’i i ‘itea ē, e tae fa’ahou mai ānei i te fenua ‘āi’a nei ‘A riro atu ho’i i te Toa ō te mōana Te vai upo’o ti’ati’a noa ra ho’i ‘o ‘Oropa’a-atua-mōana I roto i te pū māta’i, e ‘ore e ‘āueue, e ‘ore e vī Te ‘are teatea e fāfati ra, e tie niho ïa nō na ‘Aore āna vaha, ‘aore āna reo E horomi’i noa ra i te ta’ata ‘e i te va’a ta’ata E ‘ore ho’i e ha’apae i te ari’i ‘Ua fa’aruru, huru fa’aruru ra ‘outou… ‘e inaha, ‘ua tae mai   Mānava i tō ‘outou taera’a mai Mā tō ‘outou tere mārama roa ‘e te ataata Nā te ‘e’a paruparu ō te mōana hāuriuri ! ‘Ia ‘āruehia te Atua i te ra’i teitei ra ! Mānava i te fārērei-fa’aho’u-ra’a !   Teie tō tāua ‘āi’a tūpuna Teie tō tāua hui taea’e ‘Ua ‘ī te ‘ā’au i te pōpou rahi ‘E te’ote’ora’a ho’i ‘outou nā mātou i mua i tō te ao   ‘Ia horo te mau ‘arere mai tahatai atu nei i te vao Mai ‘Apato’a ‘e i Apato’erau ‘E mai te Hiti’a-ō-te-rā ‘e i te To’o’a-ō-te-rā E fa’aara i te nūna’a ē E ‘ua pū te ‘ae’ae ō te tere ō HŌKŪLE’A ‘E ‘ua fa’ati’a fa’ahou i te ro’o ō te hui tūpuna   ‘Aitō tuiro’o horo mōana ātea ‘Ua tū’oro’oro a’e nei te reva ‘Ua hātuatua i nā pū māta’i ‘o TO’A ‘e ‘o TO’ERAU ‘Ua ‘aehuehu te fenua ‘Ua ‘ūmere i tō tere, e HŌKKŪLE’A Nā te Tai-Nui, te marae nui ō te ao nei ‘Ua ‘amo’amo nā mata ō TO’ERAU i te tīanianira’a i te tama ‘o AHURA’I ‘Ua pā te mara’ai, te ‘ōmua iti ō TO’A ‘Ua nā ni’a mai ‘oe i te tua ō ĀTEA-TA’O-NUI E vai i nā poro e hā, mai te fenua nei ‘e tae roa i te ra’i ‘Ua api ho’i te ‘āere iā na ‘Ua arata’i māite ‘o TINORUA-FATU-MŌANA iā ‘oe Nā tō na ‘utuāfare mania tīputaputa ‘Ua tonotono i tō na ra ma’o ‘arere ‘ei pāruru nō ‘oe ‘Ei mōana mātahataha a’e nō tō ‘oe na tere ‘Ua fārara ‘e ‘ua puhihauhau ‘o MAOA’E-RA’I-ANEANE Matahiapo ‘e ari’i ō te māta’i ‘ia fano hau a’e ‘oe i te ‘āi’a nei Nā MATĀRI’I ‘e ‘o TA’URUA-FAU-PAPA Mata nō TA’AROA-NUI ‘e nō ĀTEA i tīaniani i tō ‘oe na tere ‘Ei mata ‘avei’a ho’i nō ‘oe nā te mōana   ‘Auē rā ho’i i te pōpou rahi ē ! ‘Ua ho’i mai te ohi tei pūrara na Nā te mōana ātea i tō na pu’e ‘āi’a ‘A hāere ana’e mai rā, e tō mātou mau taea’e ! ‘A noho mai rā i ni’a i tō tāua ‘āi’a tūpuna ‘o Tahiti-Nui-i-te-Vai-Uri-Rau ! Tei ‘ahu i te ‘ahu pūteatea ā TA’AROA ‘e ‘a TĀNE Tei hei i te rau maire ‘e i te rau huru rau ō te fenua ‘Ei fa’ahanahana iā ‘outou ‘Outou ho’i tei tā’amu fa’ahou i te taura nati ō te ‘ura I rotopū iā HĀVĀI’Ī-FĀNAURA’A-FENUA ‘E iā VAIHĪ-AHUAHU ā TĀFA’I-‘IRI-‘URA I motu na e tini e tini e manotini mārama…   Mānava, e te autahu’a ‘ohipa ō tō ‘oe tere, e HŌKŪLE’A ! Mānava ‘oe, te tahu’a ‘iritea, e EMORY ē ! ‘Oe ho’i, e KAWAINUI, tahu’a pāpa’i ! Tahu’a pāro’o ho’i ‘ōrua Matamata ‘ōhiti ‘e ta’ere ho’i nō teie fārēreira’a tō tātou iā tātou iho Mānava ‘ōrua, e KAVIKA ‘e RODO Iho tātou ‘ōfefa ā te hui tūpuna Tei rūrūta’ina i te vi’ivi’i tai I ‘ore rā i vī, ‘ua mau pāpū rā i te hoe ō HŌKŪLE’A E huā’ai mau rā ‘outou, e te mau taea’e Nā TA’AROA, nā MĀUI, nā TĀFA’I-‘IRI-‘URA, nā HIRO Te mau ‘ihitai ro’o nui ō te tau ‘āuiui Tei fa’atenitenihia ‘e tō tātou ra hui tūpuna Tē fa’ateniteni ato’a atu nei tō te fenua ‘Ua hāmama te ana ō te fenua ‘e te fāri’i pōpou atu nei !   Mānava, e HŌKŪLE’A !             You may also like... Hiro’a n°139 : E reo tō’u 3 avril 2019 Hiro’a n°141 – E reo to’u 7 juin 2019 N°123 – Te-ara-tupuna e Te-‘e’a-nö te ‘äro’a-Pu’uroa 1 décembre 2017 © 2019. All Rights Reserved.