Te Kura Kaupapa Māori ō te Kura Kōkiri, Tauranga Moana - Mō Mātou / The History of our School and Community Kāinga Mō Mātou Mō tō mātou Whānau He Kura Karere He Kohinga Whakaahua Ngā Akoranga Whakapā mai Hitori I timata Te Kura Kokiri ki runga o Tawhitinui Marae, ki Omokoroa. Na te kaha piki o te rehita me te kaha whakahe o te Tari o te Mātauranga kia noho te kura ki runga i te marae, i neke te kura ki Ngā Pāpaka o Rangataua, ki te rohe o Ngā Pōtiki. Kei reira tonu mātou, arā ki te huinga o ngā rori Welcome Bay Road me te huarahi matua tuarua (SH2). Heoi, he kaupapa tēnei i ahu mai i te tino hiahia kia pupuri ki te reo rangatira me ōna tikanga, kia eke ā mātou tamariki ki te taumata, ā, kia whai wahi ai ngā whānau ki te arahi i te whakaako o a ratou tamariki. No te tau 1982, i timata te whakatū Kohanga Reo ki te rohe o Tauranga Moana. Ko te aroha me te ngakau nui o te tangata i awhi atu ki te kaupapa. Na wai rā, i timata te tohetohe ki ngā kura auraki kia riro mai he rūma, he akoranga motuhake kia whakaakongia ngā tamariki i roto i te reo Māori anake. Kahore ratou i aro mai. He nui ano te hoha me te pukuriri. No ngā tau 1990, i karanga hui, i whakawhiti kōrero, i wānanga mātou kia rapu huarahi e taea ai te whakatutuki i ā mātou hiahia. Ahakoa ngā hui ki ngā tari kāwanatanga, kaore he tino hua i puta mai i aua tau. Katahi ka tono atu ki Te Rūnanga Nui o Ngā Kura Kaupapa Māori. Na ratou i tuku tangata mai ki a matou ki te awhina mai. E rima ngā wananga i whakaturia e te whanau kia whāwhā ai te kaupapa o Te Aho Matua. Heoi anō, no te 10 o Whiringa-a-Nuku i te tau 2000, i timata Te Kura Kokiri ki te marae o Tawhitinui, tokowhitu ngā tamariki. Kare kau he putea, he rauemi hoki engari ko te aroha me te ngakau nui ano i awhi mai. He kaha hoki te tautoko a ō mātou kuia, koroua ki to mātou kura, me to rātou whakapono kia whai atu tātou he huarahi hou, kei raro i ngā tikanga me ngā mātauranga Māori a ō tātou tupuna. Kaore i whakaae e ratou kia tupou tonu a mātou tamariki mokopuna hei pononga ki ngā whakahaeretanga o te Ao Hurihuri, te Ao Tauiwi. Ko to matou tino hiahia kia tu ā mātou tamariki mokopuna hei rangatira mo ō rātou ake ao. Kia whakakii anō i ngā paepae i runga i ngā marae o Tauranga Moana. Ko ngā whakaritenga, ko ngā kawenga kia tū, kia tutuki te Kura Kaupapa Māori, he tino roa rawa atu, me te uauatanga hoki. E rima tau te kura e noho ora ana kare noa iho he putea mai i te Tāhūhū o te Mātauranga. Heoi anō na te whakapau kaha o te whānau kia kite i a rātou tamariki e angitū ana, me te pukumahi ki te kohi pūtea mo te kura, ako i ngā tamariki, whakawhanake rauemi, arahi i ngā mahi hakinakina, i ngā tikanga Māori hei whakaea i to ratou mātauranga. Matakitaki ana i te tipu o ngā pukenga, te mātauranga, te tuakiri me te maiatanga i roto i ngā tamariki. Ko rātou i pōkai kaha nei i roto i ngā kura auraki, kare nei i taea, ā, whakauru ana ki Te Kura Kokiri, kia riro ma te whānau e awhina. I te tau 2005, ka whakaaetia e te Tāhūhū o te Mātauranga kia tū tēnei kura. He kura tuatahi anake, ā, ka tau iho he putea paku nei, engari taumaha ana ngā porearea hei turaki atu. Na te tipu o te kura, ka whakaarotia he rahi rawa ki te kawe i ngā mahi i te marae o Tawhitinui, no reira ka mea ake Te Tāhūhū o Te Mātauranga ki te whānau kia neke ki tētahi atu Kura Aho Matua, arā ko Te Wharekura o Ngā Pāpaka o Rangataua, pātata ki Papamoa. Na ēnei whakaritenga i whakatutuki te whanake o ēnei kura e rua i raro i Te Wharekura o Tauranga Moana, engari te mate kē 40 kiromita ki te kura mo ngā whanau kaiwhakaū, mai i Whakamārama me Te Puna. Kare e roa, na te tipu haere o te kura kua matatoru rawa. Na tēra ka tutakitaki te Wharekura ki te marae o Tamapahore i Mangatawa. I tautokotia rātou e te hau kāinga, e te hapū o Ngā Pōtiki ki Ngāti Pūkenga. I whakatūria he kura pekanga whakawhiti ki roto ki te kura kaupapa Māori mai ngā kura auraki, ki te marae o Whetu i te Rangi, ki Te Tehe. Ko ngā kaiako he kaimahi no te whānau. Ko te nuinga e whakamatautau ana hei kaiako Māori tūturu i whai tohu mai i Te Wānanga o Raukawa. Na te tūngā whai tikanga ā te Kura Teina, i whakaaetia ai kia utua ngā kaiako tokoiti i raro i Te Kura Kaupapa Māori o Ruamata. Ka puta te rongo o te kura mo ngā hua ki ngā tamariki matatau ki te reo, ngā kōrero hōhonu o Tauranga Moana, ōna hitori, ōna tikanga me ō rātou whiwhinga mātauranga, hakinakina, i whakakao mai i ngā whānau ki te whakauru mai i ā rātou tamariki. Ko te nuinga i ahu mai i waho atu o te kura, ara ngā whanaunga o Te Pirirakau me Ngāti Ranginui. I waenga i te tau 2005 i te whakaaetanga o Te Minita o te Mātauranga kia whakatū kura teina, arā i te tau 2009, ka whakaaetiea te rehitatanga. Koia rā ka piki te rarangi ingoa mai i te 35 ki te 82. I te tau 2006, ka whakawhiwhia te kura ki ētahi orau teitei rawa atu mo te NCEA i waenga o ngā tauira o ngā kura tuarua o Aotearoa. I taua wā tonu i whiwhi anō hoki ēnei tauira ki te Diploma me te Bachelor Mātauranga Māori i Te Wānanga o Raukawa. I te tau 2007 i haramai Te Tari Arotake Matauranga (ERO) ki te whakamahi tirotiro haere i te kura me te kii kua ea, kua tutuki te mātauranga na Te Aho Matua i arahi, me ngā hiahiatanga o ngā iwi i Tauranga Moana. Aua atu te miharo o te kura me te mōhio anō mo tētahi wā roa, e huri ana Te Kura Kokiri hei kura whakahīhī ki te mātauranga Māori i roto o Tauranga Moana. I roto i ngā tau tekau mai 2000 ki 2010, he nui anō ngā piki me ngā heke, engari kei te haere tonu te kura, kei te para tonu te huarahi. Ahakoa te aha, ka pēra tonu tēnei whānau. Anei e whai ake nei, ētahi o ngā tino kitenga i roto i ngā tau kua pahure ake nei; 2001 I whakaaetia te noho hei mema o Te Runanga Nui o Ngā Kura Kaupapa Māori. I kohi putea te whanau hei rawa mo te whakahaere kura, nui ake i te $15,000. Na te tini me te mano o ngā whānau Māori i koha mai he moni tautoko. I haere he tira o te kura ki Rarotonga. 2002 I tono te kura ki te Minita o Te Mātauranga kia tū ai mātou he KKM Arongatahi Te Aho Matua. 2003 I whakaaetia TKKM o Ruamata hei ahuru te kura nei, he kura teina ki a rātou. I haere te kura ki Tahiti. 2004 I haere te kura ki Ruatahuna. 2005 I whakaaetia te Minita o Te Mātauranga te noho hei kura teina (tau 0-8) ki TKKM o Ruamata. I whakatū Te Kura Kokiri mātou ko Te Wharekura o Ngā Papaka o Rangataua i Te Wharekura o Tauranga Moana. I whakatū te kura hei peka o Te Wānanga o Raukawa. 2006 I whakaaetia te tono ki Te Tāhūhū o Te Mātauranga kia neke atu ki te whenua o Ngā Pāpaka o Rangataua hei noho. 2007 I whiwhi ngā tamariki wharekura tokoono i te Tohu Mātauranga Māori o Te Wānanga o Raukawa.I whakatau te Tari Arotake Matauranga (ERO) he kura angitu to mātou kura. 2008 I neke atu te wharekura kia kuraina ki Tamapahore Marae, Mangatawa. 2009 I whiwhi rehitatanga i te Minita o Mātauranga hei kura arongatahi. 2010 Ka whakanui te tau Ngāhurutanga o Te Kura Kokiri. Ka nui ake i te kotahi rau ngā akonga o te kura 2011 Ka whakatūria he peka anō o Te Wharekura o Tauranga Moana ki runga o Motiti, ko Te Haupapa Kohatu. 2012 Ka whakatūria he peka anō o Te Wharekura o Tauranga Moana ki raro o Mangatawa, ki te marae o Tamapahore, ko Te Aka ki Tawhaki. Whāinga matua Ko ā mātou tamariki he Kahurangi He toko atua, he whatu tupuna, he māngai iwi, he tamaiti. He kahurangi katoa ngā tamariki, ā, ka tika kia manaakitia, kia poipoia. He Kura Mahara He taipitopito kōrero He Kura Tomokia Whakapā Mai To Mātou Nohoanga He Kura Kakahuria He Ripoata nā E.R.O Te Nuinga Atu Kāinga Mō Mātou He Kura Tangata He Kura Karere He Kohinga Whakaahua Ngā Akoranga Te Kura Kaupapa Māori ō te Kura Kōkiri 2012 Site - iSCHOOLS Limited