Te rātaka a te Taua Māori - Tīhema 1941 | 28th Maori Battalion Skip to main content English Māori Mō tēnei pae Whakapā mai Kaiwhakamahi rēhita Rauemi kura Kimihia Kāinga Te Kōrero mō te 28 Mapi Rēhita o te 28 Whakaahua Ataata Oro Rauemi Contribute Tāpirihia ōu kōrero, whakaahua, oro, me ētahi atu Timata te tuku ināianei He kaituku kē koe? Takiuru i konei Ngā takupu hou M. Gilsenan i kōrero mō Moffat family at war TANYA Tarapata (not verified) i kōrero mō Waka Rotana Mary Baker (not verified) i kōrero mō John Sonny Baker Mary Baker (not verified) i kōrero mō John Sonny Baker Kusabs i kōrero mō John Richard Ormsby See all comments Kāinga > Te rātaka a te Taua Māori - Tīhema 1941 Te rātaka a te Taua Māori - Tīhema 1941 Ōrite Stories Desert Fighters Battalion Diary Ōrite Hoia Eruera Te Whiti o Rongomai Love Edward Clayton Pohio Pineamine Taiapa Waipaina Matehe Awarau John College Reedy William Poata Donald Stewart Walter Downs Piiti Wordley Hone Te Kauru Green Martin Te Takahi McRae Rangi France Logan Meinata Wiki John Tainui James Matehaere Hamahona Mervyn Mitchell Kaiwhakamāori: Waldo Houia (Ngāti Porou) Tirohanga Whānui Ko te whai wāhi atu ki te whakakōkiri hou, hai whakawhawhati i te here hoariri e karapoti ana i Topuruku i Rīpia, ka mahue ake e te Hokowhitu a Tū te rohe o Sollum mō Menastir, e tata ana ki te 22 kiromita ki te tapatapa ātiu, i te tīmatanga o Tīhema. Ka hipa te toru rā, i haupapatia ai e rātau tētahi rārangi kapa Tiamana mau taonga, ka whakahaua rātau kia hoki atu anō ki ngā Puni o Sollum, i whakapau ai rātau i te wā e whakakōkori huaki ana i Sollum o Raro. I tēnei wā tonu, ko te Ope Taua Tuawaru, e whaiwhai haere ana i te ope taua o Rommel e taui ake ana ki Gazala, ā, i te Tīhema 8, i hou atu Te Hokowhitu a Tū Toa i te whaiwhai haeretanga nei. I rangatū atu rātau ki Sidi Azeiz, i mua ake o te hari taraka atu ki Acroma, i tīmataria mai ai e Pirikēti 5 he peitanga rima rā i te whaka-te-hauāuru ki Gazala. I te huarahi, i pakanga haere anō Te Hokowhitu a Tū Toa i ētahi whakaanga ki runga i ētahi muri ope Itāriana, me te hao mauhere manomano,  me ngā wharatanga 145 me te 36 i mate. Ko te Kirihimete, i hāngai pū ki te whakamutunga iho o te Whakahau Rīpia Tuarua me te hoki atu o Te Hokowhitu a Tū Toa ki tō rātau ake kamupene hōpuni i Pākuihi, i Ihipa. I tīmataria e  Te Hokowhitu a Tū Toa te marama, me ngā āpiha 25, me Rewhetanara Tuarua Maloney, te tākuta, te minita me te Hēkeretari Whīra o te YMCA me rātau katoa he mea whakapiri mai. I whakaritea ko Kāpene Tiwi Love hai Kaiārahi Mana Matua whakakapi o Te Hokowhitu a Tū Toa.   Ko te Rewhetanara Kānara Humphrey Dyer (kaiārahi matua tuarua, Āpiha Patāriana Kaitakawaenga) Ko ngā Kāpene: Ko Tiwi Love (Āpiha kaiārahi mana matua whakakapi ), Chris Sorrenson (kaiwhakatau me te whakakapi Kaiwhakatuari Taonga ), Rangi Royal (Āpiha tumuaki Kamupene B) Kapene Whakakapi: Charles Bennett (Āpiha tumuaki whakakapi Kamupene C) Ngā Rewhetanara:  Tiwha Bennett (Kamupene Takuahi ), Ben Porter (Āpiha tumuaki, Kamupene A), Dan Urlich (Āpiha tumuaki , Kamupene Takuahi ) Ngā Rewhetanara Tuarua: Rangi Logan (Āpiha tumuaki, Kamupene D), Wai Awarau (Kamupene B), Jack Ormsby (Kamupene D), Ted Pohio (Kamupene B), Jim Matehaere (Kamupene D), Mervyn Mitchell (Kamupene A), Ruhi Pene (Kaitakawaenga Āpiha Patāriana),   Henry Toka (Kaitakawaenga Āpiha Patāriana), Hati Rangiuia (Kamupene C),   Jack Reedy (Kamupene Takuahi), Jim Tuhiwai (kōhi),   Paki West ( Kaitakawaenga Āpiha) , Kamupene takuahi ), Terry Gilroy ( takuahi ),   Hone Green (Kaitakawaenga Āpiha Patāriana),   Don Stewart (Kamupene Takuahi ), Pine Taiapa (Kamupene C), Wally Wordley (Kamupene A) Whakapiringa: Kāpene M. Kronfeld (Āpiha Tākuta Retimana ), Kāpene Kahi Harawira (Minita - ope), Charles B. Bennett ( YMCA Hēkeretari Waeranga,), Rewhetanara Tuarua H. T. Maloney (Kamupene D) Rātaka Tīhema 1: Ngā Hōpuni Sollum: He pū nui pupuhi iti, mai i Herewhaea. Ko te ope tōmua o ngā Retimana Pawhe i tae i mua mai i te rā poupou, ā, ko ngā whakatūtūtanga haere o Te Hokowhitu a Tū Toa i whakamōhiotia atu ki tō rātau Āpiha Mātauranga; ka hou mai tō rātau Wāhanga Mātauranga hai tiaki i tō rātau tūranga ake.  Katoa o ngā mōhiohio i pā hāngai ki te āhuatanga ā-rohe o konei i tukua katoatia atu ki a rātau. Tae mai ana anō hoki te Āpiha Mātauranga o te Tiwihana Inia 4, ā, ko taua āhua anō, arā, ko te tuku atu i ngā mapi whakaaturanga o ngā tūranga pū hoariri o roto tahi o Sollum ki Raro me te Herewhaea. Haora 1000: Ko te tae mai o ngā whakahau nekeneke. Ko te Hokowhitu a Tū Toa, hai whakatū i a rātau i te takiwā o Bir Zemla. Ko tōna tikanga, ko te whakahaere i ngā whakaritenga mai i tēnei tarawāhi, hai pūtake tūranga whakanekeneke hai whakanonoti haere i ngā rārangi kapa ope taua hoariri o muri e nukunuku ana i waenga o Tōpuruku me Bardia. 1100: ko te Pirikēti, i tua mai o te Hokowhitu 28, i hūnuku ki tētahi takiwā hou. Haora 1700: E wātea mai ana ngā taraka i nāianei, ā, e hūnuku atu ana te Hokowhitu a Tū Toa. Te whakahau rangatū: 10 ngā Perēne Karia-D-A-B-C i rō tira rārangi kapa haere, ka hipa atu i a Pā Musaid ki Pā Kapuho, hai reira, ki Biz Zemla. I hipa atu te tira waka mā roto o ngā Ranga Inia i te ahunga atu ki Tohu Roherohe 204. Ko te takitū kōraha i whakamahia mai i Tohu Roherohe 204. Kotahi te tūtanga o te tira, tahi, i te wā, ko ngā matataua o ngā Perēne Karia e torotoro whakamua haere ana, ka hoki mai ki te ripoata he tira waka anō i tō mātau kaokao mauī, tērā pea, he ope Tiamana. Ka heke atu a Kamupene D ā, ka anga pērā atu ki te āhuaranga torotoro, me te hoki taumaru i muri mai, i te mea, he tira hoa kē. Kātahi ka anga whakamua Te Hokowhitu a Tū, ka tū i te haora 2300. Ko te Kamupene Āpiha Mana Whakahaere a Kāpene Tiwi Love me ngā kaiārahi matua o ngā Kamupene i anga atu ki te whakapā atu ki te Pirikēti, ka  whakatā Te Hokowhitu a Tū Toa, i te mea, kāore kē ake he mahi e oti i taua pō. Tīhema 2: Menastir. I te “ata hāparatanga”, ka takitū whakaroha puare Te Hokowhitu a Tū Toa. Ko te tūranga, ko runga o te tākau e tiro whakararo iho ana ki te rori matua ki Topuruku. Haora 1000: Ko te hekenga whakararo ki te wāhi i whakaritea i tatū me te whakatōpū i muri mai. I mua tata tonu ake o tō mātau taenga atu, i te ngakia ngā mahuenga hoariri rōpū iti nei. Tohatoha mararā ana a tātahi i ngā mahuenga hoariri me te tū tahanga tonu o ngā pahī (bivouacs). Haora 1500: E rua ngā wāhanga kaitorotoro o Kamupene A, me tētahi āpiha kaitiaki i ahu whakamua atu i te mano iari pea o taua wāhi. Kāore rawa atu he oreoretanga i te kitetia atu. Haora 1830: Ko tētahi atu anō kaitorotoro o tēnei Kamupene – ko tōna maitai, e 2 ngā ope iti me tētahi haihana kaiwhakahaere e ahu pērā atu ana ki te rāwhiti, i whakapā atu ki ngā kaitorotoro o Patāriana 23, ā, i hoki mai i te 2130. E tika ana i te rā o muri mai, ko ētahi atu kaitorotoro ki te āta kimi ake i ngā puna wai, ā, mēnā ka kitea ētahi, ko te whakahoki mai he paku wai, hai whakamātautanga mā te Āpiha Rongoā. I te ahiahi taumaha tonu ana te hekeheke mai o te marangai i te wāhi o Te Hokowhitu a Tū Toa. Tīhema 3: I te tatanga waenganui pō, i mauherehere i a Kamupene D tētahi Kāpene me te rua hoia ehara i te āpiha, i runga i tētahi waka atitāke ō mātau ake, e ahu pērā atu ana i te rori ki Bardia. I mau anō ētahi hoariri kāpara tokorua i runga tētahi atu waka Tiamana i muri mai. Haora 0830: Ko ngā mauhere i whakatahia ki te Takuahi Pirikēti me te hono atu ki tētahi kapa hari taonga o te Ope Taua Ratonga Āriki i te huarahi ki Sidi Omar. Haora 0900: I tono a Kamupene D i tētahi kaitorotoro pakari ki te raki me tētahi tautiaki whawhai me te whai āwhina atu anō o ngā pū mīhini, ngā atitāke tāke, ngā mōtā me ngā Perēne Karia. Ko Rewhetanara Tuarua Tiaki Ormsby te kaitiaki o te kaitorotoro nei. Haora 1100: I whakahaungia rātau e te waerehi kia hoki mai. Ko Kamupene A me te āwhina a te Tiwihana Kamupene kua haere whakamua atu anō hoki mā te Rori o Topuruku. Ka tūpono atu ki ētahi ope hoariri kātahi ka hoki wawe mai. Ka tae mai te kōrero i te whakatata haere mai tētahi rārangi kapa hoariri mai i te takiwā o Topuruku. Haora 1130: Ko ā mātau pū nunui i whakautu atu i ētahi matā pū nunui nei i tau mai ai i te hoariri ki waenga i tō mātau kaokao mauī. Ka hoki atu tō mātau Tiwihana Kamupene ki ō rātau tūranga i te tākau. Haora 1200: Ko tētahi pū toru pāuna kotahi a te hoariri i puhipuhi matā nunui i kō atu o te takiwā o Kamupene A, ka pakū atu ki waenganui i te takiwā o Kamupene C. Ko te Takuahi Hokowhitu a Tū Toa me te wāhi o Kamupene A, i tātāhia e te puhipuhi mai a te pū mīhini hoariri. Ka hoki mai ngā kaitorotoro o Kamupene D. I tēnei wā, ko ngā pū Perēne Karia i te noho mai ki te kaokao katau o Kamupene A. Ko Kamupene D i te kaokao mauī o Te Hokowhitu a Tū Toa kua paraha kē i ngā taha e rua o te rori matua, me te kite atu i te rārangi kapa hoariri o mua e whakatata mai ana. Kua tukua ake e rātau te hoariri kia tino tātata rawa mai ki roto rā anō i tō rātau waonga, tae noa ki te tata pea o ngā waka 12 o te rārangi kapa hoariri i te kitea atu e ngā wāhanga whakamua, ā, ko te waka kaiārahi i te 55 mita noa iho te tata mai ki te ope iti i ngā taha e rua o te rori. Haora 1300: I konei, whakahau ana a Rewhetenara Tuarua a Jim Matehaere , kia pupuhi, kātahi ka huaki katoa ngā waonga me te hingahinga putuputu tokomaha aituā kaipukahu i waenga i te taua hoariri. Ko ngā pupuhitanga ā-kaokao i hanake i ngā wāhanga kaokao katau o te wāhanga ope iti 18, me te ope iti 17 anō hoki, (i raro i te mana o Haihana Jack Tainui ), o mua kē atu ai o ope iti 18 (o Rewhetenara Tuarua Matehaere .) Ko te hoariri kua whakawehe ki rō rārangi kapa e rua. Tātāngia ana e Kamupene D te kapa taua hoariri i runga i te rori me te kaipukahu o te hoariri i hingahinga, i mauhereheretia. Ko tērā atu o ngā kapa hoariri i rere whakawhenua atu ki te takiwā o Kamupene A. I tino whai kiko ngā pupuhi pū mīhini tautoko me ngā pū nunui mai i te tākau i te taha mauī. Mai i te tīmatatanga o te whawhai, ko Kamupene A i te tata nukukore i runga i te tāmi o ngā mīhini pū hoariri, i runga anō hoki o te tāwakawaka o te whenua, i uaua ai te kite atu i ngā tūranga hoariri o mua i a rātau. I taua wā, kua oti kē i a Kamupene D te ngaki i te tira rārangi i runga i te rori. Haora 1600:  I te auhikitanga iti o te whawhai, i muri mai i te kōrerorero tahi me ngā kaiwhakahaere o ngā Kamupene, i whakarite a Kāpene Love kia ngakia te rārangi kapa i mua i a Kamupene A, i te mea me tino tatū te toatanga i mua i te taunga mai o te pouri. Haora 1700: I tīmataria te kaingakitanga. Ko Wāhanga 1 o Kamupene A, e rere atu ana me ngā pēneti whakamau, i raro i te mana o Kāpara Meinata Wiki . Rokohanga, ko ngā auahi mōtā me ngā pupuhitanga o ngā mīhini pū, tae atu anō hoki i ngā pupuhi ātitāke mai i te wāhi o Kamupene A e tautoko ake ana. Toa katoa ana te kaingakitanga, ā, karikaria ana ngā toenga mahuenga hoariri. Ko ētahi atu o ngā hoariri i te anga rere whakamuri ana, tere noa te whakawhāititanga e ngā Perēne Karia, ā, i te mutunga iho ko ngā mauherehere katoa, i 6 ngā āpiha (kotahi i mate atu i te Retimana Pou Āwhina, ā, e tata ana ki te 140 ngā hoia ehara i te āpiha. I roto i ngā āpiha ko te āpiha matua mana Tiamana, ko Meiha von Debschuetz o te 15 Rīpeka Māia Patāriana. Tata ki te 15 ngā mauherehere i taotū, ā, i tirohia e tō mātau Retimana Pou Āwhina. Nuku atu i te 250 i mate i te whawhaitanga. Ko ō mātau wharatanga: 1 i mate, 5 i taotū. Ko tētahi kāpara o ngā pū mīhini i mate i ōna taotūtanga. He whakarāpopototanga: Ko rātau, ngā mauherehere te āhua nei nō te 1 Hoia ā-waewae ERS BEL 93/309. Ko te nuinga o ngā āpiha e hari kāpehu ana, ā, i heke mai i tētahi Patāriana hirahira motuhake o ngā hoia ā-waewae hoariri. Ko te heu-kore hoki o te āhua me te tino hia inu wai hoki ō rātau, e waitohu ake ana, i te whawhai rātau mō ētahi rā nei. I waenga i ō rātau taonga, i kitea ētahi kete-pēke o te Pirikēti Tuawhā, Tiwihana o Aotearoa, ā, i tua atu, i ā rātau ētahi o ō tātau waka ake. I taua wā anō, i haria ake e ngā kaitorotoro o Tiwihana A, te 6 mauherehere me tētahi heramana o Ahitereiria, ko tōna waka i totohu ki waho o Topuruku i ngā rā tata o mua ake. Ko te tino toatanga o tēnei papātanga, i hua nui ki te take o te whakawarea kētanga e ō mātau turupa whakapiri i te tākau ki tō mātau taha mauī, i te rārangi kapa hoariri. I te hoariri e whakatata mai ana, i te mātaki kē rātau i taua tākau ā, kāre rātau i te whakaaro ake, he hoia anō i te raorao ki tō rātau taha mauī. Ko ngā tāwakawaka hōhonu anō hoki o tēnei tarawāhi, i te āta whakapeke ake, mai i ō rātau kite, tō mātau waka tāke tūturu e huna noa ana, koia anake. Ko te pū ātitāke i te takiwā o Kamupene D i te whakatutuki i tāna wāhanga. Ko tōna keu tuatahi, i pā hāngai ki te toru pāuna pū o te hoariri me tōna murara mai, me ngā pupuhi āwhinatanga mai i te tākau i whakakaupapa hāro i te hoariri i waenga o te rārangi kapa o muri o te tira hoariri. I riro mai anō hoki i a Kamupene D, te 12 Spandau pū mīhini, e 4 ngā mōtā 3 inihi, tētahi pū 3 pāuna me te hia nei o ngā waka me ngā motokā, tētahi pū-4 ātitāke. I te pouri haeretanga ka ngakia haere anōtia te tarawāhi e Te Hokowhitu a Tū Toa. I pau katoa te wā o te ope Retimana Pou Āwhina e ārō ake ana i ngā hoariri taotū me te whakatahi anō hoki i ētahi. He raruraru tō te whakatahinga, i te mea ko ngā whakaurunga Teihana Takai Kōkiri kāore i te nui rawa. Ko te nuinga o ngā Tiwihana Ope ā-tinana, i mau kē i te hoariri. 64 ngā hoia kapa hoariri katoa i mātakina e te RAP. Haora 2100: Te haute inu rama tuatahi ki ngā turupa.  Ka whakatā Te Hokowhitu a Tū Toa ki te wā wehenga. Ka mutu anō hoki te rā whakahirahira. Tīhema 4: Waenganui pō, ko Te Hokowhitu a Tū Toa me Kamupene B e pae ārahi ana i rangatū o te rārangi kapa i te ara o te hokinga atu ki te Pahī o Sollum. Haora 0300: Ka tū Te Hokowhitu a Tū Toa ki Tohu Roherohe 2700, ki te tonga o Bir Zemla, ā, i rō whakatā hanganga piri ki te mutunga iho o te pō. Haora 0600: Ko te whakaarahanga me te anga haere whakamua me te noho hanganga kōraha o Te Hokowhitu a Tū Toa. Ko ngā ārai Perēne Karia i tata ki te 800 mita i mua o te rārangi kapa. Haora 0730: He ope taua tira waka i te huapae o tēnei tarawāhi. I runga i te kore mōhio ka tātata 1800 mita atu mātau, nā, ka whiuwhiutia mai mātau e ngā matā o ōna pū nunui. Pakū iho ana ngā matā ātitāke ki waenga i ō mātau waka, heoi anō, waimaria ana mātau. Ka huri hāwhe mauī ngā wīra o ngā tira waka hai  whiwhi hua mai i tētahi manga wai pāpaku. Ko te tāke ātitāke i tō mātau taha katau ka tū, ā, ka pupuhi atu ki te tira waka hoariri me te āinga i a rātau ki te whātinga. Kai te tere mamao haere atu mātau i te mōreareatanga nei. Kotahi o ō mātau waka i keua mai, ā, ko tētahi o ngā wīra o muri i wera katoa, engari kāre rawa atu i tū, me te mau kotahi tonu o te tira waka e ahu whakamua me te kore tū, nō te taenga rawa ki te Tohu Roherohe 204, e tata ana ki te 3 ki te 5 kiromita ki te hauāuru o te Pā o Kapuho. Ko Rewhetanara Rangi Logan i te āhua taotū i te mahi o te whiuwhiu matā ā-pū nui mai i tēnei rārangi waka hoariri, heoti, i tua atu o tēnei kāre rawa atu he heipū taumaha i tūpono mai. Ka whakaoti Te Hokowhitu a Tū Toa i te wāhanga o muri atu o te haerenga ā-rārangi mā Pā Kapuho me te Pā o Musaid, ā, i reira ka whakawhiti ā-whenua me te tū ki te ūnga wakarererangi 2.4 kiromita i te hauāuru o ngā Puni Sollum ki te parakuihi. Ko te Āpiha Mātauranga i ahu whakamua ki te whakapā atu ki ngā turupa Pawhe e tiaki ana i ngā Puni Sollum ā, ko ngā whakaritenga i whakatatūngia i taua wā tonu. I whakaritea kia whakarīwhingia, kotahi kamupene i ia wā. Ko Kamupene C te mea tuatahi ki te whakarite i tōna ake tūranga o mua atu, i te tākau tirohanga o runga ake o Tohu Roherohe Beacon. Nō te pā pouritanga, kua tau Te Hokowhitu a Tū Toa i ō rātau tūranga whakatōpū, e rite ana, ā, i ngā tarawāhi i reira rātau i mua ake. I te wā o te whakawhitinga i tēnei rangi, ko ngā oreore nui o ngā turupa me ēnei mea, i whakawhiuwhiu mai i ngā matā ā-pū nui taumaha, mai i a Herewhaea, inā rā, ki ngā takiwā e karapoti ana i a Kamupene C me Kamupene A. E rua ngā Pawhe i mate i ngā matā ā-pū nui nei. Tīhema 5: Āta tau ana te ata nei. Ko te tikanga matua o Te Hokowhitu a Tū Toa i tēnei takiwā, ko te tautiaki i te tākau ki te raki e āwhiwhi ana ki te wāhi tata ki te waea taiapa i te tonga o Bardia, ā, hai reira, ki te anga rāwhiti ki te moana rawa, ā, ki te tonga anō hoki ki Herewhaea kai runga o te tākau. Me mataara ngā tautiaki torotoro i te wā katoa o te ao o te pō. I te poupoutanga o te rā, ko Rewhetanara Kānara Andrews VC, e noho nei hai kairīwhi, kaiārahi matua o te Pirikēti 5, i torotoro i te takiwā o Te Hokowhitu a Tū Toa, me te whakaaro ake ki te whiriwhiri i tētahi pupuhi tahi o Te Hokowhitu a Tū Toa me te Patāriana 22. Haora 1445: He iti pupuhinga pūnui, mai i Herewhaea. E toru ngā pū i te tākau ki te raki o te ara, i te tino kitea atu. E whiuwhiu matā ā-pū nui mai ana rātau i ngā wāhi kamupene C me kamupene A. ½ haora ana te roa e whiuwhiu ā-pū nui mai ana. Tērā tētahi nukunuku iti i te kitea atu mai i a Herewhaea me Sollum ki Raro. Ko ngā Pawhe, kua oti kē te whakatūturu i ngā whakahaeretanga i te takiwā o te wāpū, hai Tohu Roherohe whakatohatoha haere, hai pou whakatahi i ngā taotū mā ngā waka raro moana rānei, mā rōnihi rānei. I āhua toa tonu rātau i ētahi wā i ō rātau wāhanga kaipupuhi huna takitahi me te whakaputa whakaaro mā te Pū Iti te raruraru wāpū e kuhu ake. Haora 1500: He hui poto i tū i waenganui i a Haihana Tainui, i a Haihana Martin McCrae me ngā wāhanga tautiaki mō tētahi huaki ki roto o Sollum o Raro. Nā te uaua o ngā whakapāpātanga ki tō mātau Takuahi i muri ake o mātau, ko te whakatahi o ngā mauherehere me ngā mea i taotū, kāre anō kia whakatutukingia. Haora 2300: Ko te wehenga atu o te tautiaki huaki ki roto o Sollum ki Raro e ai ki te whakahau whakamahi . Tīhema 6: Haora 0400: Ko te tautiaki, ka āpitihanatia mai i tētahi whare. Ko ētahi Tiamana i hone me te rere hoki atu i runga rori tāhira, i pupuhi māhora mai ai i te pū mīhini, me te taotū i tētahi o Kamupene B. Kāti, kāre kē atu he mahi mā te tautiaki, ko te āinga kia taui. Kāore i tūtuki tō rātau whāinga, heoi anō rā, i tino paraketutia e rātau te katoa o te takiwā o te mākete hōhipera, me te kore kite i tētahi tangata, ā, i tapahi haere katoatia ngā rāina waea, i heipū ake. Haora 0700: I hoki mai ki ngā Takuahi o Te Hokowhitu a Tū Toa e waha ana i te mea koia anake i taotū. I taea te kī, ko ētahi o ngā hoariri i mate i te kurutanga  ō ngā kaitorotoro i ngā pohū ā-ringa ki roto i te wāhi moe o reira. Haora 0830: Ko ngā wāhanga pū me te wāhanga mōtā i whakarerekē ake i ngā wāhi tūranga pū, kia hāngai ai ki te whakaritenga pupuhi mō te waonga o te raina o Sollum-Musaid me te Patāriana 22 me te Patāriana 23 i Kapuho. Kua itiiti ake te pupuhi mai o te pū nunui mai i Herewhaea. Haora 0920: I te tino kitea atu te paoa kauruki ki runga ake o Herewhaea me te āhua nui haere o ngā nekeneke ā-waka i taua takiwā. I tae mai he kōrero whakamaumahara ake, mai i a Kāpene Love me te kōrero pukapuka atu ki ngā turupa katoa. Ko te kōkiritanga toa i Menastir i whakahuatia. Ko te take toatanga o te kaupapa o te mau ohoreretanga i whakahautia me te āhua o te pākahatanga pai o ngā turupa i mua. E pā ana ki ngā mauherehere, i whakamaumahara mai i a mātau ki te tiaki paitanga o ngā Tiamana i ngā mauherehere 43 o tēnei Patāriana, i mau tahi me Echelon B, ā, i muri mai i tukua kia hoki; kore rawa tētahi o ō rātau taonga ake, i tangohia. He whakatūpatotanga anō i puta i a ia mō ngā rākau hoia hoariri i riro mai, o ngā waerehi, o ngā aha atu anō. He wāhanga mōtā kua kitea e whakaruruhau ana ki roto i te tākau. Kotahi te āpiha, ko Rewhetanara Tuarua Hone Green me te 10 hoia ehara i te āpiha i tae mai i nanahi. Tīhema 7: Ko ngā pū nunui hoariri kua kore e rongohia atu, engari ko ō mātau i te tino whakamahia. Ko ngā nekeneketanga o ētahi nama turupa hoariri mai i Herewhaea ki ngā raorao ki te taha moana i ripoatatia mai e Kamupene C. Haora 1200: Ko tēnei te tohatoha tuatahi o te mērā me ngā pūhera, mai i te wehenga mai i Pakuihi. Ko ngā pūhera nei i whai wāhi maioha mai i ngā whakaratonga. Kua pakanga puaki ngā Hapanīhi ki a USA. Haora 1700: Kua riro i a Meiha Humphrey Dyer, i haramai i te Puni Kaitakawaenga o te Patāriana, te mana o Kāpene Love o Te Hokowhitu a Tū Toa. Haora 1900: He raiti whero i kitea atu e uira tohu mai ana, mai i te moana ki te tuawhenua, me te ripoata mai o Kamupene D mō te rongorongo ake i te nekeneke o ngā tira waka mai i Sollum i Raro. Ko tētahi atu karere mai i a Kamupene A i tae mai. He rōnihi, he waka raro moana rānei kua kitea e whakatata mai ana ki te wāpu. E whiti ana te marama mārama i te rangi, ā kai te āhua matatia te kite atu. Ka whakahaungia ngā pū nunui kia noho takatū. Haora 2230: Ka pupuhi tahi ngā pū nunui i te wāpū. 20 ngā pupuhi tahitanga, ā, i whai tere atu ētahi anō i muri mai. He pouri rawa ki te kite atu i te hua o te pupuhitanga. Ko ngā rererangi taipara taumaha e rere iti ana i te takiwā, ā, kotahi i mōhiotia atu he Weringitanga, me te rangona i ngā māoroorotanga, e wheorooro ana, puta noa te pō. Tīhema 8: Kua noho tino wahangū ngā pū nunui o te hoariri. I torotoro a Meiha Dyer i Te Hokowhitu a Tū Toa i mua i te poupoutanga o te rā. Haora 1330: I karanga hui poto a Kāpene Love ki ngā wāhanga e rua, kotahi mai i Kamupene A me Kamupene C mō tētahi kōkiri whakatuki ki runga i Sollum o Raro. I whakamahia he tēpu kirikiri hai whakaatu i te āhua o te kōkiri whakatuki. I te tautoko tahitia te katoa o ngā pū nunui me ngā mōtā, ngā Pouwhoa, ngā pū mīhini, ā, ko Te Hokowhitu a Tū Toa kia noho mataara ki te āwhina, ki te hiahiatia. Haora 1300: Ko tētahi rama whero e korakora karere mai ana mai i te moana ki te tuawhenua. Haora 2000: Ko te pū o tētahi rōpū hoa i whiuwhiu matā ā-pū nui ki te takiwā o te wāpu mai i tō rātau tūranga i te ahunga o Sidi Baranni. Haora 2200: Tae mai ana ngā whakahau kia neke Te Hokowhitu a Tū Toa i runga i ngā tohutohu Pirikēti. Ka whakatā Te Hokowhitu a Tū Toa me te whakariterite i taua wā tonu. I whakakoretia te huaki o te wāpū. Tīhema 9: Haora 0300: Ko Te Hokowhitu a Tū Toa me te Kamupene A i te paeārahi i te rārangi kapa rangatū ki waho o te takiwā Puni, ka ara ake tētahi tuatea puehu tino taumaha. Ko te rangatū ki te wāhi o muri mai, kua tīmataria. I te kore waka i rangatū ā-waewae atu mātau mō te wāhi tuatahi o te haerenga, mā te tohu huarahi 280°. I runga i te tikanga tū o ia 10 miniti ia haora, ka whakawhiti Te Hokowhitu a Tū Toa i te ūnga waka, me te kite atu i te āputa i te taiapa waea hipa atu i Pā Musaid, ka whakarite i rō hanganga tata, anō nei i runga waka, ka ahu atu ki Sidi Azeiz. I te ata hāpara, ka tū mātau i mua tata i te korohi rori i Sidi Azeiz. Ko te toenga o te Pirikēti i roto anō o tēnei takiwā, kai te rangatū ā-waewae anō hoki. Mutu mai ana te inu kaputī wera, ko te kite maioha atu i ngā waka e ahu mai ana. Haora 1000: Ka whakaeke atu mātau i ngā waka me te ahu whakamua anō. Ko te ope waka kua whakapiria mai ki a mātau i tēnei wā, kātahi anō ka ahu mai i Tōpuruku, ā, ko te tino wāhanga matua o te ope Waka Mīhini Whakaihinga o Aotearoa. I rō whakaritenga kōraha, ko te tira waka ka ahu atu ki te takiwā e whanga mai ana te Pirikēti. Ko te ahunga o te rangatū mā te teihana Tohu Roherohe o Kapuho ki Bir el Giaser ka huri katau i tēnei takiwā me te whakarerekē anō o mātau ki rō rārangi kapa o te huarahi, me te ahu whakararo atu i te tākau, ka huri mauī i te rori matua ki Topuruku, ā, hai reira mā te huarahi matua ki te takiwā hou. Tērā atu anō te whakaroaroa tino nui o te whakawhitinga mai i te hanganga kōraha ki te rārangi kapa huarahi me te mutunga iho ko ngā kamupene tata i ngaro te whakapā atu ki te muanga o te rārangi kapa. Ko te whakawhitinga ki te rori tāhira, nāna pea i whakatere haere i ngā wāhanga whakamutunga o te haerenga nei, ā, i te pouri i te tūtanga whakamutunga ki Si Bu Amud. Ko Kamupene A me B, me Te Hokowhitu a Tū Toa me te Patāriana Takuahi i moe hanganga tata. Ko ngā Kamupene C me D kāore i hono atu anō, nō te ata rawa o muri atu. Ko te waka o te Kamupene D me Echelon B i tahuri i te Rori Topuruku. Ko te aituā: Ko Paraiwhete Raukura Ngātoro i mate, ā, e rua anō i whara. Tīhema 10: I te ata hāpara i whakapā mai te Āpiha Mātauranga i ngā kaupapa o Te Hokowhitu a Tū Toa i ngarongaro, ā, ka mauria mai ki te takiwā wehe atu. Haora 0800: E rima ngā mauherehere Itāriana o te Tiwihana Ope matua Bolognia 86 i haria mai, ā, ka hoatutia atu ki ngā Enetia i te Pirikēti Takuahi. Ko tētahi tangata Arapi o tētahi rōpū haereere i pupuritia i ngā Takuahi Patāriana, heoi anō, a muri iho mai i tukua kia haere. I te roanga o te ata, ka tū tētahi hui o ngā kaiwhakahaere matua katoa o ngā Kamupene me ngā āpiha rangatira o ngā turupa piri, ā, i reira ko te tūranga o te Pirikēti kātahi anō ka tino whakamāramatia. I muri i te piri ki te Tiwihana Inia 4 me ngā Tiwihana Awherika ki te Tonga e rua, i ngā wā rerekē, ko te Pirikēti i tēnei wā kai te Ope 13 i raro i te whakahaere o Tianara Goodwin/ Austin. Ko te mahi noa, ko te ngaki i ngā toenga hoariri mā Adem, Acroma me Gazala. Ko ia kamupene, e tika ana kia whiwhi i tōna ārai whakaruru ia pō. I tēnei tarawāhi, e tata ana ki te 27 kiromita te paeroa o Topuruku, ko tā Te Hokowhitu a Tū Toa, ko te tautiaki i te raki, ki te moana, ā, ka hoki mā te whatianga ki te rori matua mai i te wā hāpara ki te pōrehu o te rā. Haora 1400: i whai karere ko Te Hokowhitu a Tū Toa kia ahu tonu i tōna ahunga i tēnei pō. Ka whakaitia te kaha i te whakatahinga i a Kāpene Love ki te Teihana Takai Kōkiri. Ko ngā pū nunui i whakapiringia mō te tātai tāpiri atu. Ka whakatā Te Hokowhitu a Tū Toa me te whakariterite i ngā nekeneketanga o muri atu. Ko te wharekai ā-waka i kohaina mai e ngā tamariki Māori o Aotearoa i tae mai ki te ope. He karere mai i te CnC ki nga turupa o te Ope Tuawaru i tae mai ki te Takuahi o Te Hokowhitu a Tū Toa. Tirohia te karere . Tīhema 11: Haora 2200: Whakaarahanga me te whakarite i te nekehanga mai i te whakahau kōkiri . Haora 0315: Ko te Pirikēti i haere rārangi kapa tahi i te huarahi me te Pirikēti 23 e aratakina ana, me Te Hokowhitu a Tū Toa e whai atu ana, me te Patāriana 28 i muri mai, me te Takuahi Pirikēti 5 i muri ake, ā, ko te RMA 22. Ko te raina rangatū i te ara ki El Adem, ā, ki Acroma. Kotahi te Tiwihana Turupa i hono mai ki te ope nui i kō atu o te haere nei. Haora 0700: I whakatūngia he hui o ngā kaiwhakahaere o ngā Patāriana ki Acroma ā, ka whakawewehetia ngā Pirikēti, me te Patāriana 23 e ahu whakamua ana i te rori matua o Derna. Ko Te Hokowhitu a Tū Toa i ahu i te huarahi tata ki te whakaritenga 281°. Haora 1115: Ko ngā pū nunui hoariri pupuhitanga taumaha i tutuki mai, engari ka mau tonu te tira waka ki te ahunga me te hanganga i haere hāngai tonu. Ko te waka o te kaiwhakahaere matua i whakararua i tētahi matā marara, kātahi te tira waka ka huri hāwhe mauī kia pai ai te whiwhi hua mai i te manga wai pāpaku ki te taha o Hiwi 209. Ka raupatu mātau i ngā rua o ngā Pawhe. Ko nga kamupene tōmua ka whakaheke waka, ka nuku whakamua ki te tuki i ngā hoariri i te 90 mita noa te tawhiti atu. Nā te tino kōkiritanga māia  o te tira waka i whakaohoreretia te hoariri, ā, i te  reretanga mai o te  hoariri i hauraro tere mai rātau me te tata tonu ki te 20 ngā mauherehere i whakawhāititia i taua wā tonu. Wetiweti ana te whiuwhiu matā ā-pū pūnui, ā, ko ngā huanga o muri o Te Hokowhitu a Tū Toa, i waimarie i te pā-koretanga atu i a rātau. Ko te Wāhanga Pū Mīhini i tere ki te kite i te hua o te takotoranga, ā, i roto noa i te tino wā poto i te pupuhi i ngā whakatōputanga Itāriana i muri ake i te Tohu Roherohe tuatahi i haurarotia ai. Ko tētahi o ngā ope iti o Kamupene A i ahu whakamua i ētahi atu mita 450. Ko tēnei whakaanga i haere tonu ki te pouri rawatanga, ā, i reira i haria mai anōtia ētahi atu mauherehere, ā, ko te toenga o te hoariri i taui ki Gazala. Ko tō mātau pū nunui i tino pārekareka rawa atu te mahi. Ko te katoa iho o ngā mauherehere ko te 1123 o ngā taumata katoa. E 36 ngā āpiha. Ko te ope nei, nō te 62 Tiwihana Trento Retimana. Tērā anō he whawhai wakarererangi i te rangi.  E rua ngā rererangi pōma Tiamana i pūhia, ā, ko tētahi a ō mātau Perene Karia, nāna ngā paereta e 4 i hopu ake, i tā rātau ūnga mai i runga heketārewa. Kotahi te paereta i toro atu ki tōna pū ā, i pūhia tonutia atu. Ko tētahi āpiha mai i te Pirikēti Inia nāna ētahi mauherehere e 3 i mau atu. He nui ngā taonga kaipukahu i kitea, pēnei me te pū atitāke, ngā pū Wīwī 75mm me ngā pū mīhini. Ko ngā aituā: E 5 i mate, 11 i taotū. Tīhema 12: Ko te maitai o te ope taua o te wiki kua pāhemo atu nei, i tua atu o ngā āpiha, ko ngā hoia ehara i te āpiha, 747, (me te piri o te tokorima 5). E 6 ngā whakapakaritanga i te pīrangi tonutia, hai hiki tonu i Te Hokowhitu a Tū Toa ki tōna maitaitanga e tika ana. 23 ngā āpiha, e toru i te piri, ā, e 9 anō ngā mea i te pīrangitia. I whakatūroatia Te Hokowhitu a Tū Toa i waho o Tohu Roherohe 201. Ko Te Hokowhitu a Tū Toa i te huri whaka-te- hauāuru i te muanga 1800 mita pea. Ko te Echelon Patāriana i te 3600 mita ki te rāwhiti i te takiwā o Bu Amaia, ahakoa i te ata i hono atu ki Te Hokowhitu a Tū Toa. Ko te aronga Retimana Pou Āwhina, i te āhua pōkia i ō mātau tāngata taotū, me ngā Itāriana taotū, i te noho haumaru i rō puna wai maroke i Bu Amaia. Haora 1115: Ko ngā rererangi taipara Tiamana Tuka i tukituki iti i te wāhi o Te Hokowhitu a Tū Toa. Kāore he pākarukarutanga taonga, engari ko ngā aituā, e rua ngā hoia ehara i āpiha i mate, me Haihana Turnbull he kaimahi whakapiripiri o Te Hokowhitu a Tū Toa, i taotū. Ko tēnei momo kōkiritanga ā-rererangi taipara he mea tuatahi ki te whai wāhi mai ki tēnei whakangakitanga. He karakia whakamaumahara i whakahaerengia e te minita e Kāpene Kāhi Harawira i te ata tonu. Haora 1330:  E kōkiri whakamua ana Te Hokowhitu a Tū Toa ki tā ngā whakahau whakahaere. Haora 1400: Ko te Āpiha Mātauranga me te Retimana Pou Āwhina 3-tana taraka me te Wāhanga Waitohu e whai atu ana i roto i te riporipo o Te Hokowhitu a Tū Toa. Uaua ana ētahi mahi o te whakatahitanga i ngā tūroro taotū. He tumu maina i kitea i te ata nei i te whakapakūtanga o tētahi Perēne Karia o te ope taua o te Pirikēti 5. I waimarie Te Hokowhitu a Tū Toa i te tīmatatanga o te whiuwhiu ā-pū nui, i haere hāngai tonu rātau me te kore huri i taua wā. Mēnā kāre, kua taraiwa tonu ki runga i te tumu maina. Ko te hūnuku a Te Hokowhitu a Tū Toa ki te takiwā o muri atu i mutu mai i mua tata i te tōnga o te rā. He whiuwhiu ā-pū nui, itiiti noa nei tā te hoariri i mua i te taenga o Te Hokowhitu a Tū Toa ki taua wāhi, engari kāore tētahi i aituā. Ko te haere whakamua ki tēnei tarawāhi, kua whakaritea kētia e ngā paparahi hoariri me ētahi toenga taputapu i whiua i roto i te whāwhai o ngāi-rātau kia tae ki ngā haumaru o ngā waonga ruruhau o Gazala. Tīhema 13: Haora 0800: Ko te kōkiritanga i haere tonu me Te Hokowhitu a Tū Toa i wehe hai hanganga parirau rua, i tā te whakahau nekehanga . Ko Parirau A i raro i te mana o Kāpene Rangi Royal me Parirau B i raro i te mana o Kāpene Tiare Pēneti . 0840: Nā ngā whiuwhiu taumaha ā-pū nui te tira i tū ai, kua tāwhai mai nei rātau i te 3600 kiromita mai i Tohu roherohe 182. Ko te torotoro haere i ngā tūranga hoariri e tika ana kia whakahaeretia; ko te Patāriana 22 i tō mātau kaokao mauī, i whakatakoto whakarite ngakinga, ā, i taua wā tonu i te whakahekea ngā waka me te whakatinana mai. Ko Kamupene C i te kaokao mauī me tōna Takuahi i te Tohu Roherohe 185. Ko Kamupene A me Kamupene B i te tonga o Kamupene C i tō mātau taha katau i rō wāhi manga wai me Kamupene D i muri o Kamupene C. Ko Te Hokowhitu a Tū Toa i te huri ki te hauāuru e tata ana ki te 4500 mita i te taua putanga Haora 1000: Kai te karawhiua tonutia Te Hokowhitu a Tū Toa e te whiuwhiu ā-pū nui, ā, ko ngā kamupene A me B i te tahitahia e ngā pupuhinga pū mīhini me ngā matā ā-mōtā. I haua tētahi o ngā 3 tana taraka o Kamupene C e te matā ātitāke; kāre he aituātanga. Ko ngā tūranga hoariri i Tohu Roherohe 181 e mārakerake ana te kite atu me ō rātau turupa e nekeneke haere ana i taua takiwā. Kāore he kōkiritanga i whakahaeretia i tēnei rā. Ko te hui o ngā kaiwhakahaere matua i whakatūngia i mua i te pouritanga. Ko ngā mea o te pū nunui mai i te Matua Waerenga 5, i rīpoata mai i tēnei rangi me te karere whakaahurutanga, i te tino nui tonu ā rātau matā. Ka whakatakotoria he kōkiri ngakinga, ā, ka whakatā Te Hokowhitu a Tū Toa ki te haora kore o te huaki i whakakorongangia mō te hao o Tohu Roherohe 181. Tīhema 14: Haora 0300: I whakahāngaingia e ō mātau ake pū nunui ngā whiuwhiunga pupuhi tino taumaha ki runga o Tohu Roherohe 181; ko te kōkiri kua tīmataria kē, me Kamupene C ki te kaokao mauī me B me A e nuku ake ana i te taha katau. Ko te Kamupene D kai te taha mauī o Kamupene C, ā, e tika ana kia whai haere tahi atu. Haora 0315: Ka kati te pupuhi o ngā pū nunui. Haora 0320: Rangona mārakeraketia ana ngā hāparangitanga o te wāhanga a-waewae i a rātau e  rangatū whakamua ana me ngā pēneti mau, me te hoariri e pupuhi mai ana i ō rātau pū mīhini, mōtā, ātitāke. Ko te ātetenga hoariri i whakakūpapatia, ahakoa, i te haora 0720 ko te puta ake anō o ētahi whiuwhiu ā-pū nui, e karapoti ana i tō mātau takiwā o Tohu Roherohe 181. I whakatōpū a Kamupene C me D ki mua ake o te raina tuatahi o ngā rua. Kua ahu 550 mita whakamua kē atu a Kamupene B i a Kamupene C me D me te whakaū i tō rātau takuahi i waenga i ngā pākarukarutanga ki te puāwanga o Tohu Roherohe 181, tae noa atu i te whakawehe ake e tētahi o ngā ope iti tētahi atu takiwā, 250 ki te 350 mita ki te taha hauāuru. Ko Kamupene A, ki te taha katau, i whakamahi ngā rua hoariri i ngā raorao ki te tonga o te Tohu Roherohe 181. Ko te ngakitanga nei i toa. Nō ngā kapa katoa, ngā 382 hoariri i mauhereheretia. Tata tonu ki te 18 ngā āpiha, me tētahi he Kānara. Ko ngā mōhiotanga mōna: Nō te Retimana 36 Tiwihana Pavia. Ko ngā pū Wīwī, ngā mōtā, ngā pū ātitāke me ngā pū mīhini i riro katoa mai, ā, ko ngā pūnaha o ngā whakatakotoranga rua, he pai. He rite ki ngā pūnaha rua o Tōpuruku. I te tino kirihunatanga. Ko ō mātau aituā e 3 i mate, e 27 o ngā kapa katoa i taotū. O ngā mea i taotū ko Kāpene Royal, ko Rewhetanara Tuarua Wally Wordley, ko Rewhetanara Tuarua Don Stewart me Rewhetanara Ben Porter. Heoi anō, ko Porter i noho mai ki te ope nei. Haora 1000: 27 ngā rererangi hoariri e rere rāwhiti ake ana. Haora 1100: 18 ngā Rere Taipara Tuka Tiamana e rere hauāuru ana, ka kōkiri i te Pirikēti Takuahi i te 4500 mita ki te taha rāwhiti o tō mātau tūranga, me te whakamakere iho i ētahi pōma. Iti noa iho ngā wharatanga. Kātahi tēnei hanga ka rere tino pāpaku ki runga ake i te wāhi o Te Hokowhitu a Tū Toa engari kāre i whakamakere pōma mai. Ko Tohu Roherohe 181 i whakatakaina ki te pōmatanga tino taumaha, mai i te hoariri ki roto i ngā waonga tata ki te 1.6 kiromita ki te tapatapa atiu, me tētahi pū mīhini hoariri e tahitahi karapoti ana i tō mātau takiwā o Tohu Roherohe 181 ki te pupuhi taumaha. Ko te ahunga mai o ngā pupuhitanga nei, nō te hauāuru. Ko te whawhai ā-rererangi i tēnei takiwā kai te rahi haere, heoi anō, ahakoa rā te nui o ngā wakarererangi hoariri, ko ō mātau rererangi tonu i te kitea atu, e matatū tiaki iho ana i ngā ope ā-whenua. He waka Tomahōka i āinga kia ū mai ki raro kāore i tino mamao rawa ake i a Kamupene B me te rere atu o tētahi o ngā Perēne Karia ki te whakahoki haumaru mai i te paerata āpiha o te Tonga o Awherika ki muri i tō mātau rohenga. Ko ngā nōhanga hoariri kāre i mamao atu i “M” me te Tohu Roherohe 154 me Tohutohu 152. He āhua nui anō ngā pū i te kitea atu, me ngā rārangi kapa o ngā waka e whakarewa puehu ake ana i a rātau e kopikopiko mai ana me te hoki atu anō ki Gazala. I te tino mārama atu, ko taua takiwā e tino pupuritia ana e ngā taua hoariri Itāriana katoa me ētahi Tiamana ruarua pea i te mea i mate tētahi āpiha Tiamana i taua ata. He Perēne Karia kaitorotoro i raro i te mana o Rewhetanara Tuarua Jack Reedy i te tatatanga ki te pouri haeretanga i pūhia mai, mai i tētahi tūranga pakari ki te raki o Tohu Roherohe 181 i roto i te takiwā o Tohu Roherohe 152. I tēnei rā, k rangona he Pirikēti Pourihi e mahi tahi mai ana ki te kōkiri hanganga matakahi i roto i te āhuatanga o waenganui ō mātau ake me Patāriana 22. E tātā taumaha tonutia ana te takiwā o Tohu Roherohe 181 mai i ngā waonga hoariri o runga ake o Gazala. I whakamahia e Kamupene C, ngā pōma mōtā Itāriana, hai whiuwhiu i ngā tūranga hoariri i tarea ai. Tīhema 15: Kai roto i te rohe Hokowhitu, tērā tonu te tino nui o te whiuwhiu pū nui, mai i ngā taha e rua. Ko ō mātau pū nunui i te tino kaha ki te pupuhi, ā, ka whakaritea tētahi huakina awatea. Tirohia te whakahau nekeneke. Kia riro i a Kamupene A a Tohu Roherohe 154, a Kamupene C a Tohu Roherohe 152. Ko Kamupene D me kōkiri mā te haere mā te tākau ki “M”, ā, me ka tarea, ko te pupuhi āwhina hai āwhina i a Kamupene A me Kamupene C e kōkiri ana i ngā raorao. Ko Kamupene B hai noho mai hai kairīwhi. Ko te āwhina o ngā pū nunui me haere tahi me te kōkiri, ā, ka taea te karanga ake hai tautoko i te ope tohu, me mea ka hiahiatia. Te tatanga ki te haora 1300, nā tētahi whiuwhiu pū nui i Tohu Roherohe 181, i hinga a Rewhetanara Tuarua Green . E tika ana, ko Kamupene D hai rīwhi i a Kamupene B. Haora 1500: Ka tīmataria te ngakinga. Ko Kamupene C me Kamupene A i te ahu whakamua atu mā te raorao ki ō rātau ake whāinga. Ko te hanganga tino puareare, o te iwa mita te tawhiti i waenganui i ia hoia i whakamahia. Ko Kamupene D i ahu mā te huarahi o te tākau. I ngā wā katoa, tino taumaha rawa atu ana te whakaruke mai o te hoariri. I te mutunga, i tino toa a Kamupene A me Kamupene D, ā, ko Kamupene C i muri i te rironga o te rārangi tuatahi, i āngia kia takoto tāpapa e ngā pupuhi pū mihini tino taumaha me ngā whiuwhiutanga mōtā. Ko ope iti nama 10 me ope iti nama 11 o Kamupene B i ahu whakamua ki te āwhina i a Kamupene C. I raro i te mana o Rewhetanara Tuarua Waipaina Awarau , i rere hāngai tonu atu a ope iti nama 11 ki ngā tūranga o ngā hoariri, i te kaokao katau o Kamupene C me te riro mai o aua rua me ngā mauherehere e hia nei i whakahauraro mai. I te kitenga mai i taua wāhanga o te rārangi e whakahauraro ana, kātahi ka manawa mataku ērā o ngā hoariri o ngā rua ka hauraro anō mai me te tuku i te Kamupene C kia kōkiri whakamua, ā, i te mutunga mai, ka ngakinga katoatia mai e rātau te tūranga hoariri nei. I te pouritanga, ko te kōkiritanga katoa ko te mutunga mai o te toa. Ko ngā mauherehere i hikoitia ki te Takuahi Hokowhitu a Tū. 181 ngā mauherehere mai i ngā kapa katoa. Ngā Mōhiotanga mō rātau - nō te Tiwihana Brescia, ā, i roto anō i a rātau ko tētahi meiha, tētahi kāpene me ngā rewhetanara tokowhā. Ngā aituātanga: 10 ngā hoia ehara i te āpiha i hinga, 37 ngā taotūtanga nō ngā kapa katoa. Ko Rewhetanara Tuarua Jack Reedy me Rewhetanara Pine Taiapa , i taotū. Nā te kore āpiha, ko Rewhetanara Tuarua Pine Taiapa i tangohia mai i tana tūranga matua o te kaiwhakahaere o te Ope Iti Tuatahi, hai ārahi i te ope iti o Kamupene C. Ko Rewhetanara Tuarua Ted Pōhio mai i te ope Āpiha Waka, i noho hai kaiwhakahaere mana mō te ope iti nama 10 o Kamupene B. Ko te Pirikēti Pourihi i tō mātau kaokao mauī, i kōkiri anō hoki i tēnei rā, ā, ko tō rātau kaokao katau i whakapā atu ki Kamupene D, i tō rātau whakatutukitanga i tō rātau whāinga i Retimete Carmuset Er. I āhua taumaha ngā aituātanga o Kamupene A, ā, me whai tāngata hou me mea, mō te pana whakamua rātau.  Tīhema 16: I whiwhi whakahau a Kamupene A, kia ahu whakamua tonu tōna kōkiri ki te whāinga o Tohu Roherohe 137. I taua pō, i tono ake a Patāriana 22 i tō rātau Kamupene D hai āwhina i a Kamupene A. Ko te kōkiritanga ki Tohu Roherohe 137, ko tētahi ope iti mai i a Kamupene A me te āwhina o tētahi ope iti i te kaokao katau. Ko Kamupene D o Patāriana 22 kia haere whakamua anō hoki. I te “ata hāpara” ka tīmata te kōkiri, me te tae atu ki te wāhi e tata ana ki te 1100 mita mai i Tohu Roherohe 154. I tēnei wā, i te tino pakari rawa atu te kaha o te hoariri ki te pupuhi mōtā, pū mihini, pōma atitāke ki roto i ngā turupa e kōkiri atu ana, ā, i taumaha o ngā aituā. 14 ngā hoia i mate, ā, ko te nuinga nō te ope iti o Kamupene A, me te 2 anō o Patāriana 22, i mate. Ngā taotūtanga 23, ko te nuinga, nō Patāriana A. I taotū anō hoki te Rewhetanara tuarua, a Mervyn Mitchell o Pāhiatua, te mana kaiwhakahaere o ope iti A. Kua tū tūturu te kōkiritanga te ahu whakamua, ka whai ake ko te whakatōpūtanga, ā, he mahi tino uaua te whakatatū, i te mea, ko te oneone he tino pōhatuhatu, heoi anō, i pūmau tō rātau pupuri i tō rātau tūranga, ahakoa ngā whiuwhiu taumaha o ngā matā pū nunui, puta noa i taua rā. Tirohia te whakahau muna. I taui a Kamupene ko ngā Pourīhi i reira. Ko Kamupene C, i hoki atu ki Tohu Roherohe 181, ā, hai reira ka whakaroatia ake te rārangi ki te kārapu i runga o te raorao i mua tonu o te Takuahi o Te Hokowhitu a Tū Toa. Tae mai ana ngā mōhiohio mai i te Pirikēti, ko tētahi Pirikēti Inia e hia maero nei ki te kaokao mauī o tō mātau Pirikēti i te pēhi whakamua atu ki te rori matua ki Derna, i muri iho o te takiwā o Gazala. Ko Kamupene D o Patāriana 22 i taui i tēnei pō me te hoki atu anō ki tōna takiwā ake. Ko Kamupene A me B a muri atu i taui, me te noho o B i ki Tohu Roherohe 152. Tīhema 17: Ko te takiwā o Gazala i tēnei ata kai te tino nohopuku, ā, i te whitinga mai o te rā, ka kitetia atu ko ngā hoariri kua whakatahi katoa i te katoa o te takiwā o Gazala. Ko ngā Pourihi i te kōkiri whakamua tonu me te whakatōpū i ngā tūranga katoa o te tākau e tiro whakararo atu ana i te takiwā o te ūnga waka o Gazala. Haora 1000: I whakahaeretia e te minita e Kāpene Harawira, he karakia whakamaumaharatanga ki te wāhi i tāpuketia 11 o ngā hoia o Kamupene A. Haora 1300: Ko Te Hokowhitu a Tū Toa me ōna turupa piri, i puta atu i te takiwā o Gazala i rō hanganga kōraha. Ko te Ope Taua Tuawaru e tika ana kia taui, ā, ko te āhua nei kua oti i a mātau, tō mātau wāhanga o te raupatu anō o Cyrenaica. I te pouri haeretanga, ka tū Te Hokowhitu a Tū Toa ki Tohu Roherohe 191 me te anga whaka-te-hauāuru me Kamupene B me Kamupene D ki mua, me Kamupene A me C ki muri. Ka kari rua ngā kamupene, ka whakatā. Tīhema 18: He rā ngāwari ki ngā turupa. Ko te wāhanga waka o te Kamupene Mihini, māwehe ai i te haora 0900. Ko Te Hokowhitu a Tū Toa, ko te whanga ki tēnei wāhi kia tae rawa mai ngā waka hai whakahoki i a mātau ki tō mātau Papa Noho. Te aituā o tēnei rangi: kotahi te āpiha atitāke piri i mate i ōna taotūtanga. Ko te rīpoata o te wiki, i kī e 16 ngā āpiha i roto i tēnei ope, ā, e 3 i whakapiria mai.16 ngā āpiha i te tino hiahiatia. Tīhema 19: I te ata, i tū tētahi huihui poto o ngā kaiārahi kamupene me ngā āpiha kaiwhakahaere o ngā momo wāhanga o roto o Te Hokowhitu a Tū Toa. I whakawhiwhia ki  ngā turupa he wai mō te horoi me te heu mehemea i tarea Ko ngā whakahaere anō hei whakatutukitanga, ko te whakamā pīataata i ngā rākau o te riri me te whakatikatika waka. I tua atu, ko ngā mahi o ia rā anō. Ko te hokinga mai o te ope YMCA i tēnei rangi me te whiwhi huarākau me te tiakarete utukore. I te wehenga mai i te tīmatatanga o ngā whawhai i Pā Kapuho, nō tēnei rangi rawa, kātahi anō ka āhei te YMCA ki te hono anō ki te Hokowhitu ā-Tu. I whai wāhi atu anō hoki rātau ki ngā ārai mai i ngā hoariri i ia wāhanga katoa o tō rātau haerenga. Mai i te rironga mai o Tohu Roherohe 181, ko te Ope Iti Tuatahi kua whakahaungia ki te āwhina i ngā Enetia i roto i ngā mahinga whakatikatika i roto i te takiwā. Ko ngā kohinga waka o Te Hokowhitu a Tū Toa, he paipōro ngā āhua. I Kamupene D tētahi tāke Itāriana māmā, me ētahi taraka nei. He wakarore tīhere hinu taumaha anō i te kamupene. Ko ētahi mema o Te Hokowhitu a Tū Toa i peka atu ki te kite atu i te whīra o te mura o te ahi i Gazala. Whakahaeretia ai e te minita e Kāpene Harawira he karakia whakamaumahara poto. Tīhema 20: Kai tēnei wāhi tonu Te Hokowhitu a Tū Toa e whakatā ana, ā, e tau ana nga mea katoa. I tua atu i ngā āpiha, ko te pakaritanga o te ope mō te wiki nei, ko te 483 hoia ehara i te āpiha. Kia eke ai Te Hokowhitu a Tū Toa ki tōna taumata pakari rawa atu, 270 ngā kaitautoko kai te hiahia tonutia. Tīhema 21: Ko aua mahi o ia rā anō. Haora 0715: Ngā Rōmana Katorika i karakia ki te Pirikēti Takuahi. Haora 1000: i whakahaeretia e te Minita, e Kāpene Harawira te karakia i te takiwā o Kamupene B. Ko ngā Pouwhō me te Ope Iti Atitāke i tū ā-hoia i roto i te karakia ā, he mea whakatūpato noa, ka karia i mua atu i te wāhi whakahaere karakia ētahi rua roroa. He tino mihi toa rawa atu i kōrerotia mo ō mātau hoa whawhai i mate mō tēnei kaupapa haumī. Haora 1400: ko te Kaitakawaenga, te Āpiha Mātauranga i kōrero mai ki te Pirikēti Takuahi 5 mō tētahi huihui taha i ētahi atu āpiha Pirikēti, e pā atu ana ki ngā rekoata hitori pakanga. Haora 1500: He mahinga wakarere iti i runga ake o te takiwā o Gazala. I whakamakerengia ētahi mumura engari kāore he pōmatanga. Tīhema 22: Ko aua mahi anō o ia rā me te karere tino pai rawa atu, arā, e nuku ana mātau āpōpō. Kotahi i mate, ko te kāpara ā-rongoā, i taotū i tētahi pōma muna, i roto i tētahi rua Itāriana. Tīhema 23: Haora 0600: Whakaarahanga me ngā waka i tae mai i te haora 0800. Ko te Pirikēti 5 me Te Hokowhitu a Tū Toa 28 ka neke ki tētahi takiwā hou mā te huarahi o Acroma. Haora 0845: Ko Te Hokowhitu a Tū Toa i ahu i rō hanganga kōraha ā, ko Kamupene A me B ki mua, ko Kamupene B me C ki muri, me Te Hokowhitu a Tū Toa Takuahi me Kamupene Takuahi i waenganui, ka tīmata anō te hokinga. I a mātau e wehe atu ana i te takiwā o Gazala, ka tīmata te ua mai o te marangai. Ko te tira waka i tū ia haora, ā, i mua tata i te taenga atu ki Acroma, ka whakarerekētia te hanganga ki te rārangi kapa o te huarahi, i te mea, i te whai atu mātau i te rori matua mā El Adem. Tina atu mātau 1.6 kiromita ki te rāwhiti o Acroma. Haora 1500: Ka tae atu mātau ki te wāhi tohatoha, ā, ka heke iho mātau i ngā waka i Bir el Garaa. Ka kari rua Te Hokowhitu a Tū Toa ki konei, ka whakatā. Ko Rewhetanara tuarua Ormsby ka whakakairīwhi i a Rewhetanara tuarua Paki West hai Āpiha Takawaenga, me West ka hoki atu ki Kamupene D. Tīhema 24: Kāore he nekeneketanga o tēnei rā. Ka whakarite ngā Kamupene mo te Kirihimete me te whakatū pahī whakaahuru e tarea ai. Ko ētahi mema o Te Hokowhitu a Tū Toa ka haere 19 kiromita te tawhiti ki Topuruku. 17 ngā OR i whakawāteatia mai i te hōhipera i Topuruku ka hou mai anō ki Te Hokowhitu a Tū Toa, i tēnei rā. Tīhema 25: Ko ngā mahi o ia rā anō. Haora 1000: Ka whakahaeretia tētahi karakia Kirihimete i ngā raina Takuahi Hokowhitu. Ka whai mai ko te Kai Tahitanga Tapu. Ka karakia anō ngā Rōmana Katorika i te miha, i te ata i te Takuahi Pirikēti 400 i te rāwhiti o tēnei tarawāhi. Ko te mana kaiwhakahaere o te Pirikēti me Pirikēti Āpiha Mātauranga i haere ki te karakia wairua tapu. Ka mihia e mātau te Minita a Kāpene Harawira mo tana kauhau whakahirahira. Ko te whatumanawa ā-hinengaro e whakaharikoa ana i tēnei Kirihimete i rō kōraha, he mea whakamoemiti, he mea whakawhētai, he mea whakamanawa, he mea whakamahuru i nga turupa, me te whakaara i te ngākau hari o tō mātau rā Kirihimete. Haora 1200: Wā tina. Ko ngā ō uaua i whakanuia e te parāoa hou, e te tīni huarākau i kohaina mai e te YMCA. Ko te haerenga atu i whakaritea mo Tōpuruku i whakakorea, i te mea, i tae mai te kupu, i te nuku mātau i tēnei ahiahi tonu. Haora 1330: Ko Pirikēti 5 me Te Hokowhitu a Tū Toa 28 ka nuku ki te takiwā o muri atu. Ko te raina o te hīkoi ko te ahu atu mā Bit el Gubi, ā, hai reira, mā te rori kōraha o Tohu Roherohe Trig el Abd o te rohe whakamua. Ko te raupapa o te rangatū, ko ngā Takuahi Hokowhitu o Kamupene A-B, ko te Takuahi o Kamupene C-D. Ko te hanganga haere ko te rārangi kapa i te ara. Nā te roa o te tīmatanga o te hīkoi, kāore i tū, nō te haora 1800 rawa i te haere tata tonu ki te 64 kiromita. I te takiwā pahī, ka noho te Hokowhitu a Tu i rō hanganga tata mō te pō. He āhua nui tonu ngā ope waka RAF i pāhia i te ara haere, e ahu whakamua ana. I te pouri i te wā i tau ai Te Hokowhitu a Tū Toa,  ā, ko te Kirihimete tuarua i whakapaungia e te ope ki rāwāhi kua mutu. Tīhema 26: Haora 0800: Ko te haere tonu o te rangatū ki Bir el Thalatha, ā, i reira ki te upoko rerewē. Haora 0930: I rō rārangi kapa i te ara, ka hipa i tētahi pou whakamōhio–ko Bir Gibni. Haora 1030: ka tae mātau ki te waea whakatakotoranga rohe, ā, kua tae atu anō mātau ki runga oneone Ihipa. Kātahi, ka ara ake tētahi tūātea puehu, e whakaroiroi ana i te kite atu i ngā āhuatanga o mua o te rārangi kapa. I te tino kaha taumaha rawa atu, me tōna kaha roa, ka whati te tira waka i te wā o te haerenga, ā, i te karangatanga o te tū whakamutunga o te rā, ka kitea e mātau ko ētahi wāhanga o Te Hokowhitu a Tū Toa kāore i te taha o te ope.  Tīhema 27 : Ko te tūātea kirikiri o nanahi kua whakakūwawa i te wāhanga nui o te hanganga Hokowhitu a Tū engari nō te haora 1500 o tēnei rā, ko te nuinga i whakakotahitia, ā, ka hanga hou anō Te Hokowhitu a Tū Toa 28 i a rātau i Bir el Thalatha. Haora 1700: Ko te mērā o Aotearoa, ko ngā pūhera i tae mai. I te pouri haeretanga ka hui o ngā kamupene kaiārahi. Tīhema 28:   Ko te pakaritanga o te ope mō te wiki kua hipa atu, i tua atu i ngā āpiha, ko te 519 ngā O.R. me ngā piri e 3. 234 ngā kaitautoko i te pīrangi tonutia hai hāpai i Te Hokowhitu a Tū Toa ki tōna kahanga teitei. 27 ngā āpiha i tēnei ope, ā, e 3 he mea piri. E 5 anō i te hiahiatia. I roto o te haere tonutanga o te hoki ki te pahī i Baggush ka whakaweheruatia Te Hokowhitu a Tū Toa, ko te rōpū tereina ko Tiare Pēneti te mana, ā, ko te rōpū haere ā-rori i roto anō te CO. Haora 0730: Ko te rōpū tōmua o te iwi e nuku ana mā runga tereina wehe ai ki te ūpoko rerewē, e tata ana ki te 16 kiromita te mamao. Ko te rōpū ā-rori wehe ai i muri o te tina, ā, ko te toenga o Te Hokowhitu a Tū Toa i te mutunga i kohia e ngā waka i te wā pea o ngā haora 1430, ā, ka ahu atu ki te upoko rerewē, e whakaroha ai te Hokowhitu a Tu ki rō hanganga puare, ā, ka moe mō te pō. Ko te raina rerewē, kāore e āwhiwhi te tawhiti i te 400 mita, ā, i konei, he rahi ngā nama o ngā turupa, ko ngā Kariki me ngā Inia e noho tahi ana me ngā mea o Aotearoa me ngā Ingarihi. Tīhema 29: Haora 0600: Whakaarahanga. Haora 0715: Ko Te Hokowhitu a Tū Toa i rō rārangi kapa o te huarahi ka hīkoi ki te taha rerewē tata mai. Haora 1000: Ka eke i te tereina mō te wāhanga whakamutunga o te hoki anō ki te papa noho. Haora 1300: Ka tū ki te “Charing Cross” i tunua he tina wera mō ngā turupa katoa i runga i te tereina e tētahi o ngā ope o reira. Haora 2030: Ko te taenga atu ki te teihana o Sidi Haneish, ā, ka heke Te Hokowhitu a Tū Toa. Ko ngā mema o te rōpū Kaitakawaenga Patāriana e tatari mai ana ki a mātau, ā, nā te ope tira waka mātau me ngā turupa i kawe ki te nōhanga Te Hokowhitu a Tū Toa. Ko ngā Kamupene ka āia ki te whakatā i roto i te rohe i pupuringia ake i mua e te Kamupene Takuahi me te Takuahi Hokowhitu o mua atu. Ko tētahi ope o te Awherika ki te Tonga e noho ana i tētahi wāhanga o tēnei takiwā. I te mutunga o te kai mahana, ka whakatakotoria e Te Hokowhitu a Tū Toa ō rātau moenga mo te pō. Kua tutuki te hokinga mai i Rīpia. Tīhema 30: Haora 0700: Whakaarahanga. I whakapaungia katoatia ngā kaha o Te Hokowhitu a Tū Toa i tēnei rā ki te whakamā i ō rātau rākau o te riri me te whakatau anō i tō rātau noho. I whakawhāititia ngā rākau whawhai o te hoariri, ā, ka tonoa ki te Toa Whakatohatoha o te Kamupene. Ka whakahaerengia he āta mātātakitanga o ngā taonga a ia hoia. Ka tino whakatikaina te takiwā o Te Hokowhitu a Tū Toa. Nā te kaha o te marangai, kua tino pai anō ngā huawhenua, arā, kua tino matomato. I utua ngā hoia ki ō rātau pei. I te wāhi tahito tonu te YMCA e tū ana. 15 ngā āpiha me te OR 36 i hīkoi mai ki roto i Te Hokowhitu a Tū Toa. Kai te mātao te huarere i te marangai e whakaauhi ana i te noho i roto i ngā pahī. Tīhema 31: Ko aua mahi anō o ia rā. E rua ngā pūhera koha i tukua ki ia o te turupa me ngā whakaritenga whakahaere o te Hapa Tau Hou. Ko tētahi whakamaharatanga ake mai i te HQ o Te Hokowhitu a Tū Toa e kī ana: Ko te kape kupu waea ki te ope Kaiwhakahaere Matua, mai i a P. K. Paikea MP, “Mai i ngā iwi kotahi o Aotearoa, ka tukua atu e au tēnei karere mihi o te Kirihimete ki a koe ake me Te Hokowhitu a Tū Toa a Toa me te mihi anō ki a koe ā, ki ngā mea taotū kia piki anō te ora. Arohanui.” Haora 1900: Ka tae mai tētahi rōpū tango whakaahua mai i Awherika ki te Tonga, i peka mai ki te rohe Pirikēti ki te whakaatu pikitia o te Patāriana 22. Ko te rā i mua i te Tau Hou ka whakanuia i roto i te “Pouaka,” mā te tahutahu pahū ahi mai i ngā pītara mumura, i tangohia mai i ngā hoariri me te pupuhi i ētahi mōtā iti. Submitted by mbadmin on Thu, 09/08/2012 - 16:40 English Hoki anō ki te tīmatanga Comments so far: Takupu There are no comments Add your comments: Tāpirihia ōu kōrero, whakaahua, oro, me ētahi atu Timata te tuku ināianei He kaituku kē koe? Takiuru i konei Hoki anō ki te tīmatanga Mana Tārua | Whakakape | me te Punanga