Te Wātaka a Te Ope Taua Māori – Tihema 1942 | 28th Maori Battalion Skip to main content English Māori Mō tēnei pae Whakapā mai Kaiwhakamahi rēhita Rauemi kura Kimihia Kāinga Te Kōrero mō te 28 Mapi Rēhita o te 28 Whakaahua Ataata Oro Rauemi Contribute Tāpirihia ōu kōrero, whakaahua, oro, me ētahi atu Timata te tuku ināianei He kaituku kē koe? Takiuru i konei Ngā takupu hou M. Gilsenan i kōrero mō Moffat family at war TANYA Tarapata (not verified) i kōrero mō Waka Rotana Mary Baker (not verified) i kōrero mō John Sonny Baker Mary Baker (not verified) i kōrero mō John Sonny Baker Kusabs i kōrero mō John Richard Ormsby See all comments Kāinga > Te Wātaka a Te Ope Taua Māori – Tihema 1942 Te Wātaka a Te Ope Taua Māori – Tihema 1942 Ōrite Stories Battalion Diary Ōrite Hoia Edward Vere Hayward Sydney Freyberg Jackson Andrew Joseph Stephens Jerry Smith Karamea Rika Hamahona Mervyn Mitchell Peter Frederick Te Heu Heu Ornberg Edward Clayton Pohio Alfred Edward McRae George McDonald Edward Morgan Matia Parkes Swainson Pineamine Taiapa Roi Carl Te Punga George Katene Watene Katea Haig James Gerard Pera Aperahama Kuru Waaka Charles Moihi Te Arawaka Bennett Kingi Areta Keiha Renata Mangatekapua Mackey Charles Taite Henry Colton Arundel Lambert Arapeta Marukitepua Pitapitanuiarangi Awatere Rangi France Logan Manu Ruhi Pene Te Aorere Sutherland Moana-Nui-a-Kiwa Ngarimu Ngatai Tunoa Wanoa William Poata Christopher Sorenson Tutu Wi Repa Walter Downs Piiti Wordley Matarehua Wikiriwhi William Vercoe Kaiwhakāmaori: Tautohe Kupenga (Ngāti Porou) Kupu whakamārama I whakapuaretia mai a Tihema ma te hui hakinakina a 5 Brigade, a i riro i a te Patariana Māori te wikitoria. Ko te utunga he ra wātea. Na Kapara A. M. Kirk o Taumarunui o te ‘carrier’ paratunu i tangotango me te whakapiri ano te pū ’bren’ i roto i te 1 miniti 32 hekena – he 30 hekena e iti iho i te katoa, he mahinga tino miharo. I te 1 o Tihema ka uru atu te ope Māori i raro i te maru o 5 Brigade. Mai i tōna whakatuwheratanga i whai wā te Patāriana Māori i raro i ngā Pirikeeti katoa o te Tiwhana. Ko te tapawhā whero i runga i ō rātau kākahu i tangohia mo te tohu tamatea-kai-ariki-o-te-marama, o 5 Brigade. No te 5 o Tihema ka timata te Patariana Māori me te ope Eighth Army ki te whai i te hoariri me te whakaaro kia riro mai a Tripoli – he mahi tūāoma he 400 maero te mamao. Kua tū mai a Rommel me tana ope ka whakarārangi mai i Al Agheila ki te Gulf o Sirte. No te 12 o Tihema ka whakapiri atu a Montgomery me te Eighth Army ki te tuki i aia. I taua wā ka whakahautia te ope o Niu Tireni kia huri mā te taha maui kia whakarukea mai te ope o Rommel mā te taha. Ko te whakaaro kia kutia te ope a Rommel ki waenganui engari i mua i te otinga o taua huri kua hoki whakamuri kē te ope a Rommel. I pera ano i nga rā o muri mai i Nofilia. I te timatanga o Tihema ko nga āpiha o te Patāriana he 29 me te takuta, te minita me te kaitaraiwa o te taraka Te Rau Aroha a te YMCA – ko ngā tokotoru nei i whakapiria mai ki te ope. Meiha Taupua: Charles Bennett Kapene: Reta Keiha (tumuaki tuarua o te Patāriana), Peta Awatere, Rangi Logan, Ruhi Pene, Ben Porter, Chris Sorrenson, Tutu Wirepa. Rūtenete: Jim Aperahama, Ted Hayward, Syd Jackson, Mervyn Mitchell, Peter Ornberg, Ted Pohio, Matt Swainson, Pine Taiapa, Roy Te Punga. Rūtenete Taupua: WilliamVercoe Rūtenete Tuarua: Walton Haig, George Katene, Eddie Morgan, George McDonald, A. E. (Duncan) McRae, Kara Rika, Jerry Smith, Andrew Stephens, Kuru Waaka, Monty Wikiriwhi, Wally Wordley.  Whakapiria: Capt. Cam, D’Arcy (RMO takuta), Capt. Chaplain Tunoa Wanoa (minita) , Mr Charlie Bennett (Y.M.C.A.) Wātaka 1 o Tihema, Turei: Tirohia te marautanga. Tirohia te Ota Whakaatu Nama 4 . 1300 haora ka tū te tākaro i waenganui i te Brigade ki runga i te papa takaro a te Patāriana. Ko te taonga māpuna he ra motuhake whakatā ma te ope ka wikitoria. He tino pārekareka te whakahaeretanga o te hotaka. Tirohia te Hotaka Tākaro . Ko te otinga (e whā noa iho ngā tīma) ko te Patāriana Māori he 106 ngā piro, ko 21 NZ Battalion he 49 ngā piro, ko Brigade HQ he 43 ngā piro, ko 23 Battalion he 23 ngā piro. Ko ngā tohu o te rangi he paki he rangi ataahua. 2 o Tihema, Wenerei: He rā whakatā motuhake mā te Patāriana Māori. I te ahiahi i purei ngā tīma whutuporo ‘A’ me ‘B’ ki a 4 Field Regiment me 25 Battalion. Ko te otinga i wikitoria ngā tīma Māori ko te tuatahi he 25 – 3, ko te tuarua he 22 – 3. 1200 haora i rangatū mai a Rūtenete Tuarua Moana Ngarimu me ngā hoia 36 ki roto i te Patāriana mai i te hopuni o Maadi. Ko ngā huarere he paki, he rangi ataahua me te marangai kopatapata i heke mai i te 1400 haora. 3 o Tihema, Taite: Tirohia te marautanga. Tirohia te Marautanga Whakaako . Ko te utu mā ia hoia he 50 piasters. 1600 haora ka hui ngā āpiha katoa ki te 5 Brigade HQ ki te hui a Brigadier Kippenberger e pā ana ki te ngā whakarite mo te nekenga a te Brigade ki Haseiat. 1730 haora ka karangahia te C.O. he hui mo ngā Kaihautu o ngā Kamupene kia āta tirohia ngā whakarite mo taua nekehanga. Ko ngā ota katoa i tukua a waha. Ko ngā huarere he taritari te āhua, he paki me te mākere whatu i heke mai i ngā haora 1415 ki te 1500. 4 o Tihema, Paraire: Ko ngā kamupene kei te mahi a rātau mahi ako o te hotaka o tainihi. Ko etahi wāhi o te ahiahi he wā hei whakareri mo te neke apopo. Nā te I.O. i homai tana rīpoata ki ngā kamupene mo ngā āhuatanga o ngā wāhi kei mua i a rātau, ko Agheila tetahi me te whakamōhio mai mo ngā huarahi e haeretia ana e te Patāriana mo ngā rā torutoru nei kei mua i a rātau. 1700 haora i karangahia e te CO he hui mutunga mo ngā āpiha katoa mo te whakatau i ngā whakaritenga mo te wehenga. Ko ngā whakahaere mo apopo, hei a te 0630 haora he whakaarahanga, hei a te 0645 haora he whakatūtū mo ngā tūroro, hei a te 1715 haora he parakuihi, hei a te 0930 haora ka eke atu ki runga i ngā waka. 1130 haora ka whakawhiti atu i te rārangi timatanga (te raina rerewa o Sidi Azeiz) ka whai atu i te huarahi ki Hareifet En Nbeibat  Bir Hacheim  Msus  Saunnu  Kasieat, ko te roanga he 340 maero pea. Ko ngā tikanga e pā ana ki ngā P. O. L.  ngā kai, ngā wai, ngā kariri kua oti kē te whakatau. Ngā tohu o te rangi he paki he rangi ataahua. 5 o Tihema, Rāhoroi: 1030 haora ka neke atu te Patāriana ki te rārangi timatanga (raina rerewa i Sidi Azeiz) e toru ngā rārangi waka. Ko te whakarite ko B, C, D, A me ngā kamupene HQ ki muri tata i a 5 Field Regiment. Ko Patāriana 28 ki mua, ka whai mai a Patāriana 21 i a rātau. Ko te V. T. M, ko te mamaotanga o ia waka ki ia waka he 150 iari. Ko te MIH ko te maero ki ia haora he 10, ā, ko tōna whakaritenga ki te M. P. H. he 12. 1245 ka hipa atu i te rārangi timatanga, ka anga atu ki Trig Capuzzo mo te 23 maero ka huri ki te uru ki te whakawhiti i te koraha ki Hagfet En Nezha. 1700 haora ka tū, ka noho mo te pō. Kaore ngā waka i whakatata engari i whakatūpatotia te katoa kia noho pango katoa te āhua. Ko te mamaotanga i haeretia he 49 maero. Ko te hahani o te rā, ko te uauatanga ki te pupuri i te VTM ki te Artillery Regiment i mua. Ko ngā tohu o te rangi he taumarumaru te rangi, he turuturu, he matao. 6 o Tihema, Rātapu: He whakaarahanga i te 0545 haora. 0630 haora he parakauihi. 0720 haora ka timata te haere, e anga ana ki te uru. 1240 haora ka tū mo te tina i Bir Scerrara. 1315 haora ka whakareri mo te neke. Ka huri te haere a te Brigade kia kotahi te rārangi kia pai ai te haere i roto i te whīra maina a te hoariri. 1430 haora ka hipa atu i Bir Hachiem. Ka huri ano ngā waka kia toru rārangi te haere kotahi maero i tera taha o Bir Hachiem. Kei te pai te haere, he iti nei te aitua o ngā waka. Ko etahi wāhi o te huarahi haere atu ki Bir Hachiem he āhua kino engari ki te taha uru he tino pai. Ko te mamaotanga i haerea he 88 maero. Ko ngā huarere he uāpo ka whiti mai te ra i etahi wā. 7 o Tihema, Mane: 0700 haora he whakaarahanga. 0800 haora he parakuihi. 0900 haora ka haere. I tenei wā ka tae mai te kōrero whakatūpato mo ngā maina kei te taha tonga o Saunnu. Ka haere te Patāriana me te Brigade ki roto i ngā rārangi e toru, ka anga atu ki te uru. 1230-1330 haora he tina. 1700 ka tū mo te pō. He 25 maero i te taha rawhiti o Msus. Ko te haerenga mai he tino pai ko ngā huarahi o te koraha he tino pai rawa atu. Ko ngā tohu o te rangi he rangi tino ataahua, he paki, ā, ko te hau he tiotio mai i te raki. 8 o Tihema, Turei: 0700 haora he whakaarahanga. 0800 haora he parakuihi. 0900 haora ka timata te  haere e anga ana ki te uru. He 2 maero i te taha rawhiti o Msus ka hurihia te haerenga ki te taha tonga, ka anga atu ki Bir El Hag Hame. I te taenga atu ki reira ka tū mo te tina. He 1230 te haora. 1330 haora ka haere ano ka puta atu i Saunnu Defile Rug Bet El Gazi i te 1600 haora. 1730 haora ka tū mo te pō i te pūrere kapo hau o Saunnu. Kei te āhua pai te haere, ko ngā rārangi waka i whakapiripiri i te whaititanga o te huarahi i Saunnu Defile puta noa i tera taha. I noho pera mo te pō. 9 o Tihema, Wenerei: 0700 haora he whakaarahanga: 0800 haora he parakuihi. 0900 haora ka haere, e anga ana ki te tonga. Ko te katoa me haere ki runga i ngā huarahi anake, kei whara i ngā maina. 1230 haora ka tū mo te tina he 5 maero mai i Fort Teruzzi. 1330 haora ka haere ano. 1600 haora ka tae mai te ota a te Brigade kia haere takirima ngā rārangi waka i te wā e haere tonu ana, he haere motuhake mo te koraha. I oti pai i te Patāriana taua whakaritenga, ka tū hoki ngā rārangi waka ko ngā ati-taake me ngā Carriers i te ārai mai i ngā taha. Ko te anga o te tau pae he 230. Ko te Patāriana Māori i te taha matau, ko te 23 Battalion i te taha maui, ko te 21 Battalion i muri me Brigade HQ me 5 Field Regiment me ngā pū āwhina i waenganui i a rātau. 1630 haora ka hui ngā Kaihautu o ngā Kamupene ki te Brigade HQ. Ko te whakatau ka noho ki taua wāhi mo ngā rā e rua. He kōrero: Ko te haerenga kei te pai. Ko te katoa o te mamaotanga kua haerea he 339 maero. Ko ngā huarere he paki, he kōruru, he matao. 10 o Tihema, Taite: 0700 haora he whakaarahanga. 0800 haora he parakuihi. Ko te mahi a te Patāriana i tenei ata ko te horoi me te whakatikatika i ngā pū me ngā waka. 1300 haora ka wehe atu te O/G ki te hui ki Division HQ. 1600 haora ka hui ngā āpiha ki te Tari a te Patāriana. Ko tohutohu atu te C.O. ki ngā NCO mo te nekehanga mai o te Patāriana me te kōrero atu kei te tirohia ano ngā āhuatanga katoa. Ko Rūtenete Tuarua a Monty Wikiriwhi i hoki ki te Rear Division, mai i reira ki Cairo. Ko Rūtenete M. Ngarimu i rangatū mai hei I.O. i tenei rā. 11 o Tihema, Paraire: 0600 haora he whakaarahanga. 0700 haora he parakauihi. 0830 haora ka tae mai ngā taraka ki te mau i te Patāriana i te haerenga whakamua. 0845 haora kua reri mo te haere. 0900 haora ka timata te haere, e anga atu ana ki El Haseiat. 1010 haora ka tū i C4992. 1155 haora ka hipa atu i Wadi El Faregh. 1425 haora ka tae atu te Patāriana ki C4452 ka ata noho. Ko ngā kamupene i whakatātaitia ko Kamupene B e anga ana ki te puāwanga, ko Kamupene D, C me A e anga ana ki te uru. Ko ngā tūtei he tokorua me te NCO hei tautiaki te rohe o ia paratūnu. 12 o Tihema, Rāhoroi: 0600 haora he whakaarahanga. 0800 haora he parakuihi. Na te mea he marangai turuturu kaore e taea te rangatū haere. 1200 haora he tina. 1700 haora ko te hapa. 13 o Tihema, Rātapu: 0630 haora he whakaarahanga: 0715 he kori tinana. 0800 haora he parakuihi. 0815 haora i whakatakahia ngā paranaki, kei te whakareri te Patāriana mo te haerenga whakamua i runga i te ota i tukua mai i tera pō. 14 0 Tihema, Mane: 1510 haora i wehe atu te C.O. ki te hui a te Brigade HQ he 7 maero pea mai te upoko o te Patāriana, ka waihotia mā Adjutant Rūtenete Roy Te Punga e mau atu te Patāriana. I tenei wā kua tae atu te Patāriana ki te wāhi e tika ana mōna i roto i te nekehanga mai o te Division. 1730 haora ka hoki mai te C.O., mai i te hui a te Brigade.  1745 haora ka hui te “O” Group (Orders Group) i te taha o te motoka o te C.O. kua tae mai hoki te ota kia neke te Brigade Group i taua pō tonu, ā, ko te whakahau mo te haere, ko 23 Battalion, ko Brigade Group, ko 5 Field Artillery, ko 28 Battalion, ko 21 Battalion. Te Pō 14/15: 1800 haora i whakapiripiri mai te Patāriana kia 25 iari  te mamao o ia taraka, kātahi ka neke whakamua kia piri atu ki a 5 Field Artillery, ko rātau kei te tau pae o te haerenga a te Division. Ko te Patāriana Māori i haere penei e whai haere ana i ngā rama whero e whakaatu ana i te huarahi. 2400 haora ka tata atu te Patāriana ki Agheila, kātahi ka tino whakapiri rawa atu, te ihu ki te waero, kia orite ki te upoko o te Brigade HQ Group. Ka tae mai te kōrero kia moe, kāti ka mutu ngā haerenga a te Division mo aua pō. 15 o Tihema, Turei: 0639 he whakaarahanga. Ka piki ngā tāngata ki runga i ngā waka ka timata te whakareri mo te ‘haere-a-koraha.’ 0700 haora ka neke whakamua mo te 2 maero kia pai ai ngā ope o muri ki te ‘haere-a-koraha.’ 0745 haora, ka wehe atu te ope tirotiro hoariri ki te Brigade HQ, ko te C.O. a Rūtenete Kānara Charles Bennett, ko Rūtenete Tuarua Ngarimu, ko Signals Officer Rūtenete Tuarua George McDonald. Ka noho ko Meiha Reta Keiha te tumuaki tuarua, ka noho māna e whakahaere te haere whakamua a te Patāriana. He tino hikohiko te whakaritenga o te tina i te 1230 haora. 1330 haora ka hono mai ngā pū ‘6 pounders’ o te 31st Battery, ka neke atu rātau ki tetiaki i te taha matau. 1900 haora ka tū te katoa o te Brigade Group ki te takiwa o Bir El Merduma. Ka tukua mai e Meiha Keiha te ota kia neke atu 1 maero ki te rawhiti, kātahi ka huri ki te raro ka neke mo te 500 iari kātahi ka whakatū papare me te anga atu ki te rāwhiti. Ko 23 Battalion kei te taha maui. Ko te wāhi wātea i waenganui mā ngā pū a 4th Light Armoured Brigade e huihui. Ko 21 Battalion kei te taha maui o 23 Battalion. 2230 haora ka timata ngā āpiha o ngā kamupene ki te whakatikatika a rātau tāngata i muri mai i te tirotiro haere i taua wāhi. Ko Transport me B Echelon i hoki atu ki te taha uru o te Patāriana he 2000 iari. Koia nei te whakaritenga o ngā kamupene. Ko Kamupene A ki te taha maui, ko Kamupene B ki waenganui, ko Kamupene D ki te taha matau, ā, ko Kamupene C ki muri hei whakaihinga. Kua āta noho te Patāriana ki roto i o rātau rua, ā, mā te hoariri nunui tonu e takahi mai, ka hinga te Patāriana, ahakoa tonu, kaore pea. 16 o Tihema, Wenerei: He matatū i te urunga mai o te rā. Ko te Patāriana kei te kari, kei te whakapakari i o rātau rua. 0830 haora ka kitea atu ngā ope a te hoariri e anga ana ki te taha tapatapa-atiu ki te takiwa o 6 Brigade, ka pūhia ake e ngā pū nunui. Ka tutuki atu te hoariri ki a 21 Battalion. Hei te kokiritanga ka puta mai rātau i waenganui i a 21 Battalion me 6 Brigade. I mauhere mai i a 21 Battalion he 12 ngā mauhere me etahi waka me etahi pū. Mai i ngā rīpoata ko te ope hoariri nei he morehu no te Axis hei tiaki a muri, i mahue mai i Agheila hei tautiaki i taua wāhi. 0930 haora ka tae mai te parakuihi na B Echelon i mau mai. Ka uru mai etahi wahanga o te 4th Light Armoured Brigade ki te rohe o te Patāriana, e haere ana he 3 maero ki te taha matau. 1200 haora he kai maroke i homaitia ki ngā tangata e whakatā ana i taua ahiahi. 1530 haora ka hui ngā āpiha ki te HQ o te Patāriana, ā, i reira i tukua mai te kōrero ko te Patāriana, he wāhanga hoki o te Brigade Group, ka neke atu ki Nofilia i taua ahiahi pō. 1600 haora ka tae mai ngā waka mauranga ki ngā kamupene hei mau i ngā tāngata. 1630 haora i tae mai te hapa a B Echelon ma te Patāriana. 1700 haora ka oti te whakauta i ngā tāngata kua reri mo te haere. 1715 haora ka neke atu te Patāriana, he haere-a-koraha, he 2 maero i tua atu o Brigade HQ ka moe mo te pō. 17 o Tihema, Taite: 0545 haora he whakaarahanga. Kātahi ano ka whakaeatia te tahu ahi i te wā o te pō mai i te timatanga o te kokiritanga a te Division i te hoariri. He rite tonu te āhua o te noho a te Brigade i tetahi taone iti nei i te wā o te rongomau; ko ngā ahi he raiti. 0640 haora ka timata te haere-a-koraha a te Brigade. 1200 haora ka tū i Z 9523. Ko te rārangi i te upoko o te Brigade i puhia mai e ngā anga poma o ngā pu nunui me ngā ati-taake a te hoariri, mai i te rohe o Nofilia. I te wā e tū ana ka tukua kia kai tina. 1430 haora ka hui te Brigade. 1500 haora ka haere whakamua ano te Brigade, he haere-a-koraha. 1700 haora ka tae atu te Brigade ki te paemaunga i tiro whakararo ana, ka kitea atu te hoariri e oma ana ki te uru i runga i te rori o Agheila-Sirte. I tenei wā ka tino tukua mai e te hoariri āna anga poma mai i āna pū nui me āna ati-taake. I taotu tetahi o te Patāriana, mate rawa mai i taua tukinga. Ko 65402 Paraiwete Te Aorere (Sonny) Sutherland , he tino kino tōna taotutanga, ā, ka mate. I tapuketia ki reira.  1735 haora ka heke ngā hoia i ngā taraka ka hikoi whakamua ki ngā tūnga mo rātau. Ko D ki te taha matau, ko A ki te taha maui, ko B ki waenganui me C ki muri hei whakaihinga. Ko 23 Battalion i to rātau taha maui i runga i te paemaunga e titiro kau ana ki te rori, ā, ko 21 Battalion kei te taha maui o 23 Battalion. Ka kari te Patāriana i o rātau rua. He ngohengohe te oneone, kaore he pohatu. Kua tino ngawari rawa atu te pupuhi mai o ngā pū nui a te hoariri, no te mea, he hāngai te haere o a matau pū nui me ngā ati-taake me te mea ano i tutuki atu a 23 Battalion ki etahi atu o te hoariri i rō rua, kāti ka huri mai te nuinga o ngā pū nui a te hoariri ki a rātau. 2140 haora ko Kamupene D i raro i a Meiha Rangi Logan i whakawātea i tō rātau wāhi noho, ka neke atu rātau ki te rori matua ki te huihi i a 7 Field Sappers e ono maina i ngā taha e rua o te piriti i Uadi Schedgan. Ko te paratunu o Kamupene C i heke atu ki te wāhi i whakawāteatia ra e Kamupene D ko rātau hoki kua haere ki te huihi i ngā sappers. Tirohia te ripoata ā ngā āpiha o ngā Kamupene . E rua ngā ope tira o Kamupene B i noho atu mo te pō i runga i te maunga Trig 121 i Z73. E tata ki te haora 2400 ka rongohia ngā waka a te hoariri e haere ana ki te uru mā te huarahi i te taha moana. 18 0 Tihema, Paraire: 0630 haora i hoki mai a Kamupene D i tā rātau mahi me Kamupene B ki roto i te rohe o te Patāriana. Ko te matatū ko taua rite tonu ra. 0800 haora he parakuihi. Ko te Patāriana kei te whakatā i te ata. 1100 haora ko tetahi wehenga o 7 Field Engineers i wehe atu ki te hiki i ngā maina i hunahia i tera pō. I te katoa o te rā, ko ngā rererangi e rere rōpu ana i kitea atu e rere ana ki te uru i runga ake i a mātau. 1400 haora ka wehe atu a Kamupene B ki te wāhi i whakaritea mo rātau i te taha maui o 21 Battalion. 1635 haora ka tae mai te ota whakatūpato i te Patāriana mo te nekehanga apopo. 2015 haora i whakatarewatia taua ota. 19 o Tihema, Rāhoroi: 0730 he matatū. 0800 haora he parakuihi. 1200 haora ko te hotaka kokiritanga mā ngā waka mauranga i tukua mai e te CO 1230 haora 14 ngā mauhere (1 te Haihana, 13 etahi atu) i whakahokia mai e Kamupene B. Ko enei mauhere e tū whakahihi ana mo to rātau ope taua matua me ngā kupu  “Afrika Corp” e tohu ana i runga i o rātau pare i ngā pakihiwi. I tonohia rātau ki a Brigade HQ. 1245 haora ko te CO me te Adjutant i wehe atu ki te  hui  a te Brigade. 1330 haora ka hoki mai a Kamupene B mai te taha maui o 21 Battalion. 1420 haora ka tae mai te kōrero ki te Patāriana kei te noho te Brigade ki tenei rohe mo te wā roa tonu. Ka timata te Patāriana ki te whakaparepare i tā rātau noho he 1500 iari i te tonga o te wāhi i noho ai rātau. 1500 haora ko “O” Group me te CO  i haere ki te tirotiro i taua wāhi. I tenei wā kua hekeheke ngā tāngata, ā, kei te whakaratoa ngā wāhi noho mo ngā kamupene. Ko 23 Battalion kei te taha matau tonu, ko 21 Battalion kei te taha maui. Ko te parepare e huri rauna ana, he parepare tino mau ana. Ko te katoa o te rā he kari rua te mahi. 1800 haora ko te matatū ko taua rite tonu rā. I tukua mai te ota ki ngā kamupene kia whakaritea he tūtei, kia 1 te N.C.O., kia tokorua etahi atu. Ko te mahi ko te tautiaki i ngā rohe o ngā paratunu. Ko ngā kamupene i ngā taha ki te whakapā atu ki ngā Patariana kei o rātau taha i ngā wā o te pō. Ko te pakaritanga o te ope Māori, hāunga ngā āpiha, he 694 ngā hoia, 6 i whakapiria mai no NZEME. He 67 ano ka eke ki tōna ake tino pakaritanga. Ko te katoa o ngā āpiha he 29, e 3 i whakapiria mai. 20 o Tihema, Rātapu: 0645-0730 he matatū. Ko te mahi a ngā kamupene mo te katoa o te rā  hei whakapakari i o rātau parepare, hāunga mo te wā i tae mai te minita ki te whakahaere i ngā karakia ki te taha o ia kamupene. 1800-1845 haora he matatū. 21 o Tihema, Mane: 0645-0730 haora he matatū. 0800 haora he parakauihi. 0900 haora ka tū mai ngā kamupene kia mātakitakitia rātau. 0930-1000 haora he whakatūtū, he whakatikatika, horoi i ngā pū. 1100-1230 haora he whakapakari i ngā rua pū. I muri mai o te tina ka riro mā ia C.O. o ia kamupene e whakahaere i tana ake kamupene, ko ngā kaupapa  ko te tapahi makawe me te whakatikatika te wāhi noho. 1630 haora ka hui ngā āpiha me ngā N.C.O. katoa ki te tari matua o te Patāriana. I reira ka tukua mai e te CO ana kōrero: Ka whakanuia te Kirihimete e te Patāriana i tenei rohe. Ka hoki whakamuri te Patāriana hei whakawātea te rohe mo te 7th Armoured Division. Ko ngā pia mo te Kirihimete kaore  e tae mai no te mea i totohu te waka moana, nā ngā Tiamana i pupuhi, engari ka taparatia te rama mā ia tangata. He poaka te mīti mo taua rā. Ko Rūtenete Harry Lambert me Kāpara Charlie Taite i rangatū mai ki te Patariana mai i Maadi.  1800-1845 he matatū pera ano i te atapō. 22 o Tihema, Turei : 0645-0700 haora he matatū. 0800 haora he parakuihi. 0900 haora he 26 ngā hoia me te āpiha kotahi i haere ki tāhuna mo te katoa o te rā ki te kaukau. I maurea e rātau he kai mo te tina. Ko ngā hoia i mahue mai i haere ki te rangatū me te parakatihi ngā kokiri a ngā paratunu. I peka mai a Brigadier Kippenberger ki te rohe o te Patāriana, ā, he roa tonu raua ko te CO e kōrerorero ana. 1600 haora ka hoki mai te hunga i haere ki tāhuna. Ko Rūtenete Peter Ornberg , te āpiha mo ngā mota mai i tōna urunga mai ki roto i te Patāriana, i whakawhitia hei kaiarahi mo Paratunu 17, o Kamupene D. Ko te kaiarahi o taua paratunu a Rūtenete Tuarua George Katene M.M. ka hoki ki te Paratunu Mota. 1630 haora ko te pānui i tae mai moata mai i te ata, kua whakakorea. 1800-1845 haora he matatū pērā ano i te atapō. 23 o Tihema, Wenerei: 0645-0730 haora he matatū. 0800 he parakauihi. 0900 haora ka tutu mai ngā kamupene kia whakatātaretia rātau. He 26 ngā hoia, he 1 te āpiha mai i Kamupene D me te HQ, me ngā hoia 19 o te HQ o te Patāriana i haere ki tahuna ki te kaukau mo te rā. Ko ngā kamupene i mahue mai i haere ki te rangatū me te parakatihi ngā kokiri a ngā paratunu. 1600 haora ka hoki mai te ope i haere ki tāhuna. 1650 haora i tae mai tetahi āpiha mai i DMT General HQ, Middle East Forces ki te Patāriana, i tonoa mai ki te kōrero ki ngā tāngata e matatau ana ki te mau i ngā pū a te hoariri, engari kaore aia i whai taima ki te kōrero ki aua tāngata. Kei te hoki mai apopo. 1800-1845 he matatū. 24 o Tihema, Taite:  0645-0730 haora he matatū. 0800 he parakauihi. 0900 haora ka whai i te marautanga. I muri mai i ngā wā i whakatakotoria e te marautanga, ko ngā kamupene kei te whakareri kai mo te hakari o te Kirihimete. Ko Meiha Main o DMT, i tae mai ki waenganui i te Patāriana ki te pataitai haere ko tehea o ngā pū a te hoariri te mea tino kino, ās, ko tehea te mea e taotu nui ai ngā tangata. Ko ngā whakautu; tuatahi ko te 88mm, ā, tuarua ko ngā pū mota e taotu nui ai ngā tāngata. 1330 haora i whakahaeretia e Kamupene D tetahi kokiri i raro i te maru o te pupuhi a ngā mota me te kauruki. Ko te mahi a ngā kamupene mo te katoa o te ra he kohikohi kai mo te hakari o te Kirihimete. Mai i te taenga mai ki tenei rohe ko te wā o te matatū i ngā ahiahi, mai i te 0800 ki te 0845 o ngā haora, engari i tenei rā i whakakorea taua mahi. Ko te tikanga, kua hoki whakamuri kē te hoariri ki te uru me te mea he ope ano kei waenganui i a mātau me te hoariri. Ahakoa tonu, i whakaturia he tūtei mo te pō. I te wā moata o te pō nei, ngā ope huri rauna ana i a mātau i pupuhi i a rātau muramura rere he karakara katoa me te pakū mai o ngā mota. Ko rātau kei te whakanui i te pō i mua i te Kirihimete. I tukua e te Patāriana etahi muramura me ngā kariri muramura SAA. 25 o Tihema, Paraire: 0645-0730 haora he matatū. 0800 he parakauihi. 0900 haora he  whakatūtū mo te karakia. I mua i te karakia i mihi mai te CO ki te Patāriana, ngā mihimihi o te Kirihimete me te ui mai kua tae mai etahi moni mai i a P.K. Paikea M.P., te minita mo te kohi kai, rawa, moni mo ngā hoia Māori ki rawahi, mai i ngā iwi o Niu Tireni. Ko tenei moni ka tuaritia ki ngā hoia, he orite ki te katoa. Ka tuaritia taua moni i te wā ka haere ngā hoia ki te whakatā. I tonoa mai he takoha, he £45 mai i ngā iwi o Hawkes Bay, hei hoko tupeka mā ngā hoia. He £145 i tuaritia i waenganui i ngā hoia rawakore. I panuitia ngā mihi a te Army Commander me ta Brigadier Kippenberger ki ngā hoia. I muri mai na Padre Kapene Tunoa Wanoa i whakahaere ngā karakia me te hāpati. I reira te nuinga. 1300 haora ka whakanuia te hakari o te Kirihimete ta te Māori whakanui. He poaka i roto i te hangi, he puha te kinaki, no ngā kokoru o te wāhi nei. I rongohia te reka o te kai. Ko ngā kai reka hai whai atu ko ngā tīni whurutu nā ngā moni a te Regiment me te Patriotic Fund i hoko mai. He 1 te patara pia, he 50 ngā hikareti ma ia tangata. He kotahi te pūhera ki ia tangata, he rare, he tīni whurutu, he kēkē i roto. Ko tenei te Kirihimete tuarua a te Patāriana ki roto i te koraha, ā, mo etahi ko tenei te Kirihimete tuatoru mai te ngarongo mai i te kainga. I whakaturia ngā tūtei mo te pō. T irohia ngā whakahaere mo te rā o te Kirihimete . 26 o Tihema, Rāhoroi: 0700 haora he whakaarahanga. 1715-1745 haora he kori tinana he whakamaro uaua. 0800 he parakuihi. Ko te katoa o te rā me whai i te marautanga. Ko te pakaritanga o te ope, haunga ngā āpiha, he 696 te katoa, he 6 i whakapiria mai, mai i NZEME. He 65 ano ka eke ki te tino pakaritanga o te ope. Ko te katoa o ngā āpiha he 29 (3 i whakapiria mai). 27 0 Tihema, Rātapu: 0745 haora he whakaarahanga. 0815 haora he parakuihi. Ko te minita i peka atu ki ngā kamupene ki te whakahaere i ngā karakia ki roto i ō rātau rohe. Ko te katoa o te rā e wātea ana. 1330 haora ka wehe atu  ngā kaiwhakahaere o ngā kamupene ki te tirotiro i te wāhi hou. 1800 haora i te hui a te “O” Group i te HQ o te Patāriana ka tukua mai te kōrero kei te neke atu te Patāriana kia tata atu ki tāhuna. I whakaturia ngā tūtei mo te pō. 28 o Tihema, Mane: 0700 haora he whakaarahanga.  0730 haora he parakauihi, ā, kei te tukua ngā paranaki ki raro mo te neke atu ki tāhuna. 0930 haora kua mā katoa ngā rohe o ngā kamupene, kua reri mo te neke, kua whakatūtū mai ngā tāngata. Ko ngā waka o ngā kamupene me ngā kaiwhakahaere kua haere atu ki te rohe hou. Ko ngā kamupene ka rangatū atu i raro i o rātau 2 i/c. 1230 haora ka tae atu te Patāriana. Ko Kapene Mervyn Mitchell i waimarie kaore i whara, ko aia hoki te āpiha whakahaere o te paratunu ati-taake, i pakū te maina Teller i raro i tana waka. Pakaru katoa te mihini o te waka. Ko te kaiāwhina a Mitchell  i marū tana waewae. Ko ngā maina nei na ngā Tiamana i ruirui haere i taua wāhi. Na te NZE i hikihiki haere, he nui tonu e takoto haere noaiho ana, e whakaatu nei te ohorere o te hoki whakamuri o te hoariri. Ko ngā waka katoa o te Patāriana, haunga te taraka whakahaere me te taraka tao kai, i tonoa ki muri ki tāhuna. 29 o Tihema, Turei: 0700 he whakaarahanga. 1715-0745 haora he kori tinana me te whakapakari uaua, 0815 haora he parakuihi. I te ahiahi ka purei whutuporo ngā kamupene o te Patāriana i waenganui i a rātau ake, i hinga i a te tīma HQ “A” a HQ “B”. Ko Kamupene C i purei ki a Kamupene A, ā, ka riro i a C te honore he 6 ki te 3. Ko te kemu i waenganui i a D me B te tino kēmu o te rā. He tino harikoa te mātakitaki a ngā kaimātakitaki, he tere, he kaha te purei ā ngā kaitākaro. Ko te otinga o taua kēmu he orite ngā piro, he 3 ki te 3. Ko te kaitātaki mo tenei kēmu ko Meiha Ben Porter M.C. & bar. 30 0 Tihema, Wenerei: 0700 he whakaarahanga. 1715-0745 haora he kori tinana me te whakapakari uaua, 0815 haora he parakuihi. I te ahiahi, i haramai te tīma whutuporo o 21 Battalion ki te purei i te tīma “A” o te Patāriana. He tino tākaro ano taua kēmu. Ko te tīma o te Patāriana i puta, he 22 ki te 0 ngā piro. Ehara i te mea kotahi anake te tīma i tākaro, he riterite tonu, engari ko te hononga o ā matau pou mua ki ngā pou muri te rereketanga, na reira e hiki ai ngā piro. He pai tērā tīma engari nā te hē o ngā ringa ka hinga rātau. Ko Paraiwete Len Mackey te kaitātaki. Ko te kēmu o mua atu i waenganui i a “B” me te tima “Rest” no te Patāriana tonu. Ko te tīma “B” i puta he 9 ki te 6. Kua tae mai te kōrero i whakatahia a Buerat me Wadi Chebir i tainihi nei. Kotahi te Haihana me ngā hoia tokowhā o te 4 Field HG i peka mai ki te Patāriana i tenei rā, ka tina ki te taha o te Battalion HQ, kātahi ka wehe atu. Ko ngā tūtei he N.C.O. me ngā hoia tokowha no ia paratunu, ā, hei tutei mo ia rohe o ngā paratunu mo te pō. 31 o Tihema, Taite:  0700 he whakaarahanga. 1715-0745 haora he kori tinana me te whakapakari uaua, 0815 haora he parakuihi. Ko te katoa o te ata e rite ki era o ngā ata. I tae mai i te Brigade, te ota whakatūpato mo te neke. I te ahiahi i tae mai te tīma whutuporo o te Division Petrol Support Unit ki te purei i te tīma a te Patāriana. Ki o rātau whakaaro ko rātau te toa. Kaore ano rātau kia hinga i etahi atu. E kiia ana, na te tino manawanui o te tīma o te Patāriana, ka riro i a rātau te honore, he 6 ki te 5. Ko Brigadier Kippenberger i reira mo taua tākaro. Ko Paraiwete Len Mackey te kaitātaki. Ko te nuinga o te Patāriana kaore i kite i te kēmu nei. Ara kē rātau e rangatū ana i ngā wāhi horoi wera a te Division. I tukua mai ngā momo mapi, he 500,000 te rahi, e tohu ana i a Tripoli, a Mizda me Misurata, ki te Patāriana. 1700 haora ka tukua mai he kotahi me te hāwhe ngā patara pia ki ia tangata, me ngā takoha o te wā kainga me ngā pūhera rare, tīni whurutu me ngā miraka. 1745 haora ka hui te “O” Group ki te HQ o te Patāriana, he kōrero mo te neke apopo. I te pō ka puhia e ngā ope o te Brigade a rātau muramura, kāti ka whai atu te Patāriana i taua mahi, hei whakanui i te mutunga o te tau me te urunga mai o te tau hou. Ko ngā tūtei e rite i era ake pō. Ko Rūtenete Tuarua a Walton Haig me Eddie Morgan mengā hoia tokorima i tukua ki te kura No 2 Army 30 Corp School of Patrolling. Rarangi Pukapuka Te Rua Mahara o te Kāwanatanga 28 NZ (Maori) Battalion Diary, WAII 1 1665 DA 68/1/36 Submitted by mbadmin on Fri, 21/12/2012 - 12:35 English Hoki anō ki te tīmatanga Comments so far: Takupu There are no comments Add your comments: Tāpirihia ōu kōrero, whakaahua, oro, me ētahi atu Timata te tuku ināianei He kaituku kē koe? Takiuru i konei Hoki anō ki te tīmatanga Mana Tārua | Whakakape | me te Punanga