Te rātaka a te Taua Māori - Hune 1942 | 28th Maori Battalion Skip to main content English Māori Mō tēnei pae Whakapā mai Kaiwhakamahi rēhita Rauemi kura Kimihia Kāinga Te Kōrero mō te 28 Mapi Rēhita o te 28 Whakaahua Ataata Oro Rauemi Contribute Tāpirihia ōu kōrero, whakaahua, oro, me ētahi atu Timata te tuku ināianei He kaituku kē koe? Takiuru i konei Ngā takupu hou M. Gilsenan i kōrero mō Moffat family at war TANYA Tarapata (not verified) i kōrero mō Waka Rotana Mary Baker (not verified) i kōrero mō John Sonny Baker Mary Baker (not verified) i kōrero mō John Sonny Baker Kusabs i kōrero mō John Richard Ormsby See all comments Kāinga > Te rātaka a te Taua Māori - Hune 1942 Te rātaka a te Taua Māori - Hune 1942 Ōrite Stories Desert Fighters Battalion Diary Ōrite Hoia Ihaia Riini Earle Richard Chesterman Frederick Baker James Tuhiwai Albert Tohara Sydney Freyberg Jackson John Richard Ormsby James Tuhiwai Eruera Te Whiti o Rongomai Love Kaiwhakāmaori: Tautohe Kupenga (Ngāti Porou) Kupu whakamārama Ko te Patariana i noho tonu ki Syria mō te wahanga tuatahi o Hune. E noho harikoa ana rātau mo tetahi wiki whakatā, ki tetahi puni ko “Change-of-Air” e tata ana ki te moana o Beirut, i mua i te hokinga mai ki te pourewa o Djedeide. I reira ka hono mai a Meiha Chesterman ki te ope hei Āpiha Tumuaki mo Kamupene HQ. I waenganui o Hune, rātau me te katoa o te 2 nd New Zealand Division, i hoki tere mai te Patariana ki Ihipa ki te tauaro atu i ngā kokiri a Rommel. He rima ngā rā noho ki Mersa Matruh,  ka wehe mai ngā LOB’s me Kamupene D, i raro i ngā whakahaere a Kāpene Peta Awatere, mo Amiriya. I runga i ngā whakarite hou mo te whakatā i tetahi kamupene raiwhara, kaore a Kamupene D mo te ahu atu ki te mura o te ahi. Ko te nuinga o te Patariana i haere ki te tonga ki Bir Abbu Batta, ā, taka rawātu te marama ko rātau ī roto i te pakarutanga mai i Minqar Qaim. I karapotia hoki rātau e ngā Tiamana, katahi te Division ka whakaputa whakaaro ohorere kia puta rātau. I kūtia he 13,000 o rātau mā roto i te āputa i te pō, he kotahi maero noa iho te whānui i roto tonu i ngā rārangi a te hoariri i raro i te pakūtanga mai pū a te hoariri. E kikī ana ngā apiha o te Patariana, he 33 rātau me te Takuta, te Minita, te Kaitirotiro Niho me ngā tēnete (subaltern) tokowha. Tokowhitu rātau i whakapiria mai ki te ope. Meiha: Tiwi Love CO, Fred Baker (2 IC) Kāpene: Chris Sorrenson , Terry Gilroy , Reta Keiha , Ben Porter .  Kāpene Taupua: Jim Tuhiwai , Ruhi Pene , Peta Awatere , Ace Wood (adjutant) Rūteneti: Rangi Logan, H,T. Maloney, Jack Ormsby, Henry Toka, Waipaina Awarau, Jim Henare, Jim Matehaere, Tony Tikao-Barret, Ivan Howden. Rūteneti Tuarua:  Syd Jackson, Reg Mariu, George Marsden, Peter Ornberg, Roy Te Punga, Harry Lambert, Ted Hayward, Kuru Waaka, Meta Francis, Walton Haig, Duncan (AE) McRae, Ben Ropata, William Vercoe, Eddie Morgan. Āpiha Whakapiri: Kāpene R. McDonald (RMO), Kāpene Minita Kahi Harawira (unit padre), Rūteneti Tuarua ko Rangi Tutaki, Jim Aperahama, Hupa Hamiora me Jack Reedy. Rātaka 1 o Hune: 0500 haora whakaarahanga. He mahi i ngā parepare a te Patariana. He mahi i whakaritea i te Hotaka Mahi. Ko ngā Kamupene i rangatū atu ki Laboue WP mo te horoi tūāua. 2 o Hune: 0500 haora whakaarahanga. 0730 haora ka timata te parakatihi a te Paratunu Mota ki te pupuhi mota. Ko ngā Kamupene kei te whakatikatika ngā rua whawhai i waenganui i te pourewa a te Patariana. 1930 haora ka whakaturia he wāhi whakaatu pikitia e te YMCA Mobile Unit, e tata ana ki te toa o te QM. 3 o Hune: 0500 haora whakaarahanga. I tetahi wahanga o te rā ka whakatika te Patariana mo te neke ki te puni “Change of Air” i Beirut. Ka wehe ngā Kamupene i o rātau wāhi noho ka hui mai ki te rohe o Patariana HQ. I moe i raro i ngā whetu mo taua po. 1900 haora ka whakatūtūhia rātau i muri mai i te kai o te po, kati ka tū te Āpiha Tumuaki, te Āpiha Tuarua me te RMO ki te kauhau ki a rātau mo ngā tikanga o te noho ki te puni “Change of Air.” 2000 haora ka werohia rātau kia whakatika i mua i te whakaarahanga moata.    4 o Hune: 0200 haora whakaarahanga. Ka wehe atu te Patariana ki te puni “Change of Air”; i te tonga o Beirut. Ka mahue mai ko te adjutant me ngā hōia 50 OR hei tautiaki i te puni. 0330 haora ka wehe atu te rārangi ope tuatahi ngā kamupene raiwhara e whā ma runga taraka ki Rayak Station, e hanake ana ki te puni “Change of Air.” 0530 haora ko te rārangi ope tuarua ko Kamupene HQ me Patariana HQ ka haere atu rātau mo taua wāhi ano. 1400 haora ka tae atu te rārangi ope tuarua ki Beirut Station, he haerenga ohooho i waenganui i ngā maunga o Lebanon. Ka timata te ata noho ki o rātau puni. Ki rō teneti, he kotahi kuru pohatu noaiho te mamao atu o te moana. I timata atu te whakatā i muri mai i te whakaatutanga ki ngā kamupene ngā ture whakahaere i raro i te P.A.D. 5 o Hune: 0900 haora he whakatūtū whakarite. Ko te katoa o te rā mo te Patariana ko te whakatā i Beirut rānei ki te whakatairuhi ki tāhuna rānei. 1930 haora ko ngā āpiha o te Patariana me etahi o te tangata whenua kua tae ki Niu Tireni, i hui ki te hōtera o St George mo te hakari kawanga. E kiia ana he tino harikoa taua hakari. Tirohia te whakahua o taua hakari . 6 o Hune: 0900 haora he whakatūtū whakarite. I muri mai o te whakatūtū whakarite ka whakatūtū ano te Patariana hei whakatupato i ngā tāngata kaore i puta mai mo te whakatūtū whakarite tuatahi. I te kore ka hoki rātau ki Arsaal. Kei te haere tonu te whakatā. 7 – 9 o Hune: 0900 haora he whakatūtū whakarite. Kei te haere tonu te whakatā. 10 o Hune: 0900 haora he whakatūtū whakarite. I tenei rā 105 tangata o te Patariana i haere ki Tripoli mā runga i ngā waka a te Patariana. I manawareka ngā tāngata i haere ahakoa te iti o ngā pūkoro. 11 o Hune: 0900 haora he whakatūtū whakarite. Koia nei te rā mutunga mō te whakatā. E ohooho ana ngā tangata ki te whakaoti ngā mahi kei te toe, kia mutu pai ai te whakatā. 12 o Hune: 0900 haora he whakatūtū whakarite. 1000 haora i whakawātea te Patariana i ngā teneti ka neke atu rātau ki tāhuna. 1115 haora ko te tina. 1300 haora ka eke waka te Patariana ka hoki ki Arsaal, tae atu i te tōnga o te rā. Ki ngā kōrero i taua wā, ko te whakatā tuatahi e noho tahi ana te Patariana, he tino angitu, ā, me mahi ano. I whakaaea te katoa mō ngā rawa me ngā whakaurunga mō tā rātau noho ki te puni “Change of Air.” 13 o Hune: 0500 haora he whakaarahanga. I te nuinga o te rā ka hoki ngā kamupene ki o rātau ake wāhi noho ki te horoi, ki te whakapaipai tena ki āna ake rawa. Na Kamupene B i tono a Kāpara Riini , te i.c., me tetahi wehenga ope hōia he 20 (OR) hei tautiaki i te wāhi huri rauna i te D.I.D. i roto te wharua o Laboue. Ko Meiha E.R. Chesterman i whakapiria mai ki te ope i tenei ra.  14 o Hune. 0630 haora he whakaarahanga. I whakahaeretia ngā karakia. 1000 haora ka āta tirohia te hauora ō ngā mema katoa o te Patariana. Na te R.M.O. i whakahaere. Mo te katoa o te ra ko taua orite tonu rā. Ko te pakaritanga o te ope, haunga ngā āpiha, he 761 (OR). Te tapeke o ngā āpiha he 40 ( tokowhitu i tapiritia mai). He tokowaru ano hei whakakī ake i te Patariana kia tino eke ki tōna pakaritanga. 15 o Hune: 0500 haora he whakaarahanga. Ko ngā kamupene ka rangatū ki Laboue (WP) mo te horoi ma te wai wera. I roto ake i te Rohe Pourewa i hangahia ngā rua e rua – tetahi mo ngā kai, tetahi mo ngā hinu me ngā kariri. He 56 katoa ngā rua nei. He 1.5 kiromita i muri ake i te Patariana HQ i roto i ngā wāhi awaawa i te taha o te rori hou ki Laboue. I tae mai te whakarite kia nekehia ngā kamupene raiwhara kia tata ake ki te Patariana HQ, kua oti hoki te whao i o rātau  kawenga mo te neke. 16 o Hune: 0430 haora he whakaarahanga. 0700 haora i whakaturia he whakatūtū mo te Patariana ki te taha o te YMCA, ka tū te Āpiha Tumuaki (CO) ki te whaikōrero ki te Patariana mo ngā nekeneke wawe tonu a te ope, me te ki atu, tērā pea ka uru atu ano rātau ki roto i te mura o te ahi. Kei te hoki mātau ki Ihipa. Ko te katoa o te rā ko te whao i  ngā kai me te tino whakatikatika i te wāhi noho. I te ahiahi i tae mai te ope hāpai, te Patariana Kiriki ki tō matau rohe. 1915 haora ka wehe atu te roopu mahi rori a te Patariana, ko Meiha Chesterman te āpiha whakahaere. 17 o Hune: 0500 haora he whakaarahanga. 0800 haora ka timata te heke a te Patariana ki Ihipa. 1715 haora ka tae atu ki Tiberias, ā, he poto te whakatā, ka haere tonu, tae atu ki Hesher a te 2015 haora ka kai he kai werawera. Ka eke atu te Patariana ki runga tereina. I wehe atu i te 2130 haora. Ko te katoa o te po e haere ana. 18 o Hune: Te ata hāpara i roto tonu te Patariana i a Palestine. Ka muia hoki te tereina e ngā tangata whenua kaihokohoko, e hoko ana a rātau whurutu, ko te kerepe-whurutu te kai i whaohia. Ko te whenua he kaura te āhua me ngā maara kai he witi, he pārei, ko ngā uru rākau remana, ārani me ngā huanga kaanga e piupiu ana, he mea whakatairite ki ngā momo marumaru kakariki. 1300 haora ka tae ki Gazala katahi ka timata te ata heke whakararo haere, penei na e uru tomo atu ana ki roto i te kohua, te kaha wera o ngā kirikiri i te taha o te rerewa i te taha o te Suez Canal i haere atu ana ki Kantara. I te 1600 haora ka tae atu ki Ihipa. He kai werawera i reira whakaratohia mo te katoa. 2000 haora, i muri mai o te hikoitanga mai ki tenei taha o te Suez Canal, i haere ano te Patariana mā runga tereina. E tino mōhio ana rātau ki taua wāhi. E hutihuti ana te haere mai i te Nile Delta ki Alexandria.  19 o Hune: 0800 haora ka tae atu ki Amiriya. I muri mai o te parakuihi werawera ka haere ano, ka puta atu ki El Alamein i te 1300 haora, katahi ka tae marika atu ki Mersa Matruh ko te poupoutanga o te po. I rongo atu mātau i te pohū ō ngā poma me te kite atu e muramura mai ana ngā raiti. Kaore he hua o taua huakina. Ka heke te Patariana i te tereina ka rangatū mā te huarahi ki te teihana, he 0.8 kiromita te mamao atu. I reira ka mahia e ngā kamupene a rātau moenga, moe rawātu kua tae ki te 0100 haora. 20 o Hune: 0530 haora he whakaarahanga. 0615 haora ko te parakuihi, katahi ka neke ki te wāhi puni hou, ko Kamupene A ki mua, ko Kamupene B, C, D, HQ o te Patariana me te HQ o te Kamupene. Na te tino ruarua o ngā waka, i pau katoa te rā  i te nekehanga o te Patariana. Te taenga atu o ngā kamupene ki ō rātau rohe hou, ka timata te kari rua i mua i te tōnga o te rā. I moe tonu te Patariana ki waho.   21 o Hune: 0700 haora he whakaarahanga. I tae mai te Āpiha Tumuaki me te Adjutant  i te timatanga o te ahiahi me te roopu mahi rori i te 1730 haora. 1900 haora i whakahaeretia ngā karakia i waenganui tonu o te wāhi noho a te Patariana. 2100 haora ka tae mai te whakahau ki te Patariana kia neke, ā, ko te roopu hāpai ko Meiha Fred Baker 2IC me te IO me tana Wāhanga Tūtei i wehe atu ki te wāhi hou i whakatakotoria mō ngā kamupene. Ko taua wāhi i te taha puāwanga o tetahi kokonga o Mersa Matruh. 22 o Hune: 0100 haora i tae mai te Patariana i runga waka ka timata te ata noho. Ko etahi i roto i ngā whare. 0330 haora ka whakamatatū te Patariana tae rawātu ki te 0430 haora. 0530 haora ko te parakauihi. 0700 haora na te roopu hāpai me ngā kaiārahi no Awherika ki te Tonga, i arahi i a mātau kia tae atu ki roto i te Rohe Pourewa, ko “C”, te wāhi i whakatauhia mā te Patariana. Ko te katoa o taua rā i te whakatau rātau i tō rātau wāhi noho. Ko taua wāhi hou he pourewa ki roto o ‘C Sector.’ 23 o Hune: 0430 haora he whakamatatū tae rawātu ki 0530 haora. I ata tirohia e ngā Kaiwhakahau Kaupeka (Section Commanders) ngā pū ā ō rātau kaupeka. I pāohotia te ota e pā ana ki te huaki ā ngā waka rererangi. I tapiritia ngā tūtei hei tirotiro mō ngā waka rererangi. Ko ngā teneti me whakangaro atu ki roto i ngā rua. Ko ngā kaari tawhiti i mahia. I te wā o te whakamatatū ko ngā Kamupene o mua, a Kamupene A me B, hei whakatū ngā tira tautiaki. 2130 haora ko ngā pū katoa me ata horoi me ata whakatika kia paipai. Ka timata te Patariana ki te neke atu i roto i a ‘B Sector’ me te HQ o te Patariana i whakurutia atu ki roto i tetahi wāhi o te puni o ngā Ihipiana. Ko ngā kamupene i te tauaro atu ki te uru, ko Kamupene A i te kaokao maui ko Kamupene C ki te kaokao matau, ko Kamupene B ki waenganui, ko Kamupene D kei muri hei āwhina. I piri ana hoki te rohe nei ki te pourewa ‘C Sector.’ I te po ka tukua mai ngā pōmu e nga pu nunui a te hoariri, kaore i tino raru mātau. Tirohia te hanganga o B Sector . 24 o Hune: 0430 haora ka whakamatatū tae atu ki 0530 haora. 0615 haora kotahi te rererangi hoariri tuku pōmu i tipi mai i te HQ o te Patariana. I tukua mai e whā ngā pōmu. Kaore i pakaru tetahi mea. Ko te katoa o te rā i noho āta tau ngā kamupene. 2000 haora ka hui ngā Āpiha Kamupene (Company Commanders). Ko Kamupene D i wehe atu i te ope, i te taha o te roopu LOB, rātau ka hoki mā runga waka ki Maadi Puni Kainga. I utuhia te katoa. 50 piastres ORs – 100 piastres āpiha. 25 o Hune: 0430 haora he whakamatatū tae atu ki te 0530 haora. Ko te Patariana e whakatika ana ki te neke. 1000 haora ka tae mai te roopu hāpai a te 5 Indian Division ki te whakakikī i te rohe o te Patariana. 1500 haora ka tonoa te kokiri Anti-tank ki te tirotiro i te takiwa o “Charing Cross”. Ko Rūteneti Jack Ormsby te Apiha Whakahere. 1530 haora ko te Patariana i rangatū rārangi atu ki te wāhi hei huinga mā te Division. I te tōnga o te rā ka moe te Patariana mo te po, etahi ki runga etahi ki raro o te pae maunga. 26 o Hune: 0430 haora he whakamatatū tae atu ki te 0530 haora. 0715 haora i neke atu te Patariana ki te wāhi e anga ana ki te uru ko Kamupene C ki te kaokao matau, ko Kamupene B ki waenganui, ko Kamupene A ki te pae maunga. Te taenga atu ka timata te kari. Ko te katoa o te rā e harikoa ana te kite atu i a mātau waka rererangi mau pōmu me ngā rererangi whawhai i rere ana ki te uru ki ngā rārangi a te hoariri e kiia ana he 50 kiromita te mamao ake. 1545 haora i neke te Patariana me te Brigade ki Bir Abu Batta. Ka ara atu te Patariana ki te uru me te whakapaipai i tō rātau wāhi noho. 2030 haora kotahi te rerenga Tiamana i rere mai ki runga i a mātau ka tukua mai e rua ngā muramura whero. 2045 haora i rere papaku mai he tekau ngā rererangi a te hoariri ki te pōmu i a mātau. Puehu katoa tō mātau rohe te mahi a te pōmu pakū. Kaore i tino puhia mātau. Ko ngā taotu e tokotoru ORs. Mō te katoa o te po e kitea ana ngā muramura i te taha tapatapa-atiu o te kapehu. Ko tenei te wā tuatahi i huakina mātau e ngā pōmu a te hoariri, kati he rua tekau miniti te roa.   27 o Hune: 0330 haora ka whakareri ano te Patariana ki te neke ki tetahi wāhi ano. 0345 haora ka timata, ko ngā Kamupene mā raro, rangatū atu ki te uru. Ko ngā waka i muri e whai mai ana, ko te wehenga he 2700 mita. MINQAR QAIM. Kua uru rua te HQ o te Patariana me ngā kamupene, ko Kamupene A kei te kaokao maui, ko Kamupene C kei waenganui, ko Kamupene B kei te kaokao matua e anga whakararo ana, he 1.5 kiromita i mua o te HQ o te Patariana. Ko ngā rīpoata i tae mai e kī ana ko te hoariri kua tata mai, he 9000 mita te maomao atu i a mātau, kei te taha raro. Ka whakareri mātau mo tā rātau kokiri. 0720 haora ka kitea atu te rārangi hoariri e haramai ana i te 15 o te kapehu, ka tata mai, haere tonu atu i tō mātau HQ. He 0810 taua haora. Ko te rārangi nei he wehenga no ta rātau Armoured Brigade he 12 ngā Crusader Tanks. 0815 haora ka rongohia te pupuhi ā ngā pū mihini i te taha raro. 0845 haora ka kitea atu tetahi rārangi puehu roroa i te topito 345 o te kapehu, kati ka kitea atu te rārangi kauruki pango tino nui i te topito 3 o te kapehu. Ka timata te Patariana ki te whakatōpū haere i a rātau, ahakoa te māro o ngā pohatu mo te kari. Mai i te pae maunga i nohia ana e te HQ o te Patariana ka kitea atu te wāhi whawhai. 0910 haora ka kitea atu ngā puehu e tūtū mai ana i te topito 139 o te kapehu. I tau mai etahi anga poma ki waenganui i a Kamupene C. I pupuhi atu tetahi pū mai i tō mātau taha maui. 0940 haora ka kitea atu ngā puehu nunui mai i te topito 355 o te kapehu. He whitu miniti i muri ka kitea atu e whā ngā rererangi a te hoariri e hurihuri ana i te rohe o te Brigade Group. Ko tetahi o aua puehutanga ko tetahi tonu o ā mātau rārangi i puta atu i tō mātau HQ i te 1045 haora, ngaro atu ki te rāwhiti. I te 1010 haora ka kitea atu ano tetahi puehu e haramai ana ki mua o Kamupene A me ngā rererangi e rua i rere mai i te rāwhiti ka ngaro atu ki te uru.1025 haora ka timata a mātau pū nunui ki te tuku anga poma ki runga i te rārangi i mua i a Kamupene A. Kua tae tata tonu mai rātau. He hoariri marika. Ka pau te rima miniti e pupuhitia ana rātau, ka hoki whakamuri taua rārangi ki waho ake i te takanga o ngā anga poma. He ruarua nei ngā anga poma a te hoariri i taka ki waenganui i te Patariana. Kaore tō mātau  rohe i raru. E rua ngā rererangi a te hoariri e rere ake ki runga i a mātau. Ka timata tā 3” mortar ki te pupuhi mōtā kia kitea te tauranga tino mamao. I te 1145 haora i kitea atu tetahi  rārangi nui a te hoariri (MET) i runga i te huapae i haramai ana i te rāwhiti, i haere atu ana ki te taha tapatapa-atiu. Ka pupuhi mai te hoariri kati ka noho puku mātau. Kaore i te tino pai te tirotiro atu ki runga i te wāhi pakanga, kaore hoki e kitea ko wai ngā rārangi kei roto i tō mātau rohe. Ko Kāpene Jim Tuhiwai , te kaiwhakahaere o te Carrier Platoon, i otahia kia hoki mai i tana wahi i mua(FOP), me ngā waka Bren Carriers e toru. I whakatūpatohia e ia mo te wāhi maina i na tata tonu, i whakatakotohia e te ope waihanga. Ka tonoa atu e ia me tana ope ki mua ki te tirotiro haere i te 1425 haora. Ka tae atu a ia me tana ope ki te wāhi he 6400 mita ki mua, ka puhia mai tetahi o āna waka e te tāke, pakaru rawa. I tere mai tetahi AFV ki te kahaki a mātau hoia engari tere ke atu tā matau kāria ki te tiki atu me te whakahoki mai i a Kāpene Tuhiwai me tana ope. I tae ora mai ki to mātau HQ i te 1521 haora. 1505 haora i rere mai e whā ngā rererangi whawhai, he Tomahawk, ki runga ake i a mātau. 1535 haora i kokiri mai te rārangi a te hoariri ki te wero mai i te parepare a te Brigade, i haramai ma te taha matau. 1600 haora ka tukia mai te 20 Patariana, ka kaha niwha te pupuhi ā ngā pū repo. I pakūtia tetahi waka a te hoariri, na tetahi o ā mātau anga poma. Ko etahi atu waka i wera. Ko tetahi o ā mātau pū akiaki i pakaru. 1620 haora ko etahi o ā mātau rererangi poma me ngā rerenga whawhai āwhina i rere atu ki te rohe o te hoariri. Ko tetahi o ngā rārangi a te hoariri, na mātau i pana atu kia hoki ki tō rātau wahi huna i muri i te pae maunga. No muri tata mai, i kokiri mai te tuatoru o ngā kokiri, i whakatata mai tetahi rārangi hoariri ano ki mua i a Kamupene C i waenganui tonu o te Patariana. Ka kitea atu ngā hoariri e heke mai ana i o rātau taraka ka haramai mā raro. Ka puhia mai wā mātau pū nunui e ngā pū nunui a te hoariri, ko te ope hoia, e rite tonu i te kamupene te nui, i haramai hāngai tonu ana.  Na te Āpiha Tumuaki, na Tiwi Love , i tono mai ki a Kamupene C kia puritia te pupuhi atu ki a rātau kia tae tino tata rawātu mai me te hopu he mauhere, kati kia mau mai he āpiha. Ko te haora i tenei wā ko te 1715. I te 1720 haora ka pupuhi mai te wāhanga pū mihini  i tō mātau taha maui ki te hoariri. Tere tonu te tāpapa o tetahi wāhanga o taua kamupene a te hoariri ki te oneone. Kaore a Kamupene C i tuku kariri ki a rātau, i mau tonu te rongo kia unuhia ngā pū mo te rima miniti. 1730 haora katahi ano ka tukua atu te poupoutahi, ka pūhia e Kamupene C te wāhanga hoia i mua i a rātau. I te kokiritanga atu a Rūteneti Tuarua a Syd Jackson me Paratunu 14 ka mau mai tekau ngā Tiamana, tokotoru ō rātau he NCO. Ko ngā anga poma a te hoariri e takataka haere ana i runga i te Patariana me ngā wāhi tata mai. Ko etahi i pakū mai i runga tonu o te HQ a te Patariana engari kaore i roa ka mutu. I puhia mai e ngā pū nūnui a te hoariri, ā mātau pu nūnui i te wāhi raorao i muri i o mātau kamupene. Ka hoki whakamuri rātau ki te tomokanga o te awa maroke i te taha matau o tō mātau HQ. Ka hikina e te hoariri te pupuhi ā o rātau pū nūnui, whai haere i ā mātau pū nūnui, kati ka puhia mai te katoa o te wāhi huri noa i te HQ a te Patariana, e patu kino ana i a mātau. Ko te puehu, ko te kauruki, ko ngā matā marara e rere ana i te takiwa, kaore kē e kitea te aha, engari i kaha tonu tā mātau ope pū nūnui ki te hoatu atu ki te hoariri e rite tonu ki tā rātau e tuku mai. Ko te kapa hoia a te hoariri i kokiri mai, engari i whiua atu, kati ko ngā pupuhi a ngā pū nūnui anake i te haere tonu. Tae atu ki te tōnga o te rā, ko te mahi a te hoariri ko te āta whakatakoto te taunga o ngā matā a ōna pū nūnui. He nui tonu ngā taotu i roto i te rohe o te Brigade, he tangata, he waka. I mua o te 1800 haora ka kumea whakamuritia a mātau pū nūnui, kati ka mutu tonu te rere o ngā matā. I ata pupuhitia etahi atu wāhi o tō mātau rohe, he paku nei te tukinotanga. Ko te pupuhitanga mai o ngā pū taake mai i te rāwhiti ka mōhiotia kei te āta karapotia tō mātau rohe e te hoariri, ā, i te pupuhitanga mai o ngā matā mai te tonga, ka ata kitea te takoto a te hoariri. Ka tau mai te po ki te koraha, ka kitea atu ngā muramura whero, kakariki me te mā, e karapoti ana i a mātau; kati koia nei tonu te tohu mo te mutunga o te whawhai. Ko ngā aitua: kotahi i mate, ko Kāpara Albert Tohara o te Bren Carrier Platoon; he 8 he 10 rānei i taotu. He 10 ngā mauhere o te hoariri. Etahi no ngā kapa hoia, etahi no ngā pū nūnui, ko rātau katoa no te Panzer Division. I te weheruatanga o te pō ka hoki mai tō mātau Tumuaki, mai i te Brigade HQ ki te mau mai i ngā tohutohu kia whakatika mātau mo te neke. 28 o Hune: 0030 haora i tūtū mai ngā waka o te Patariana mō te haere a pō i raro mai i te pae maunga, e anga ana ki te rāwhiti ko te kopito he 118 o te kapehu. Kati, ko te Patariana me ngā kamupene raiwhara me te toenga o te HQ o te Patariana i hikoi ma raro, me a rātau taonga whawhai, ki te wāhi timatanga i tohua ko 73103090 me te toenga hoki o te Brigade. I homaitia ki te Patariana te mahi mā rātau e whakawātea tetahi pae maunga i te taha matau e piri ana ki Bir Abu Batta. Ko te tikanga ma te Brigade e whawhai kia puta atu i te karapotitanga a te hoariri i a mātau. 0130 haora i whakawhaiti ngā kapa hoia o te Brigade ka timata te haere ngātahi atu ki Abu Batta. Kua tae tonu ki te 1.5 kiromita, ka pupuhi mai te hoariri, kati ka tukua atu te poupoutahi ko ngā pū katoa me ngā pēneti. Hinga atu ana te hoariri i a mātau, he ruarua nei a mātau aitua. 0215 haora i puhia te muramura i whakaatu kua toa mātau otira me haramai ngā waka hei tari i ngā kapa hoia ki waho o te karapoti a te hoariri. Na ngā waka a te Brigade i puta pai ai mātau. Ko ia waka he 9 mita te mamao atu tetahi ki tetahi, ahakoa i roto i te puehu, te pakū, te aha, i puta pai mai te katoa i taua mahi na te kamakama o ngā waka. Ko ngā pū mihini, ngā raiwhara, ngā pū taake e pupuhi ana ki wiwi, ki wawa, i te wā e rere ana te rārangi waka ki te wāhi e whakapuaretia mai e ngā kapa hoia. 0230 haora ka tū ngā waka mō ngā kapa hoia. I a rātau e eke ana ki runga i ngā waka ka taka mai ngā matā me ngā kariri a ngā pū mihini a te hoariri ki waenganui i a rātau. Ko etahi taraka i wera, ko tetahi ko te taraka tuku tohu, tuku kōrero a te Patariana. 0240 haora e rere ana te Patariana, e tere ana te rere ki te rāwhiti. Kua tae tonu he 1.5 kiromita, ka taka mai etahi matā ki mua o te rārangi waka, ka huri te rārangi waka ki te tonga kia kore ai e aitua. Kaore i roa ka mahue mai te mate ka whakahurihia te haere ki te rāwhiti. Ko te whakaaro me anga atu ki Fuka, kati kua tae kē te hoariri ki reira. Ka anga ano te Brigade ki te rāwhiti. I te 0700 haora ka tū te rārangi waka ki te whakatikatika i ngā wāhi hei haerenga mo ngā waka. Ka haere tonu ngā waka i runga i te koraha tino pohatuhatu, tino wera, he pakapaka, he tohu korekore. 1100 haora ka kitea atu a mātau waka taua, he 20 i tō mātau taha maui e tiaki ana i a mātau. He pai tonu te haere mo te katoa o te ra, ā, tae atu ki te tōnga o te ra, ka moe atu tō mātau ope ki te rohe o Kaponga. I tukua tata mai e ngā waka rererangi a te hoariri etahi poma engari kaore he raruraru. Ko ngā pō  e rite tonu ki ngā rā, ko te marama hoki e whiti, e piataata ana i runga i te koraha. 29 o Hune: Kaponga: I whakamatatū tae atu ki te 0530 haora, a, ko te katoa o te ata he ata noho. Ko ngā kamupene kei te kari i ngā rua, me te whakatikatika i ā rātau pū me ngā rawa. Ko te hokinga mai, he hoki tino ora mai. Ko ngā taotu kaore noa i tino aitua. Ko Kāpene Tuhiwai kei te ngaro tonu, i whakaarotia i aitua me etahi atu tokowha. 1330 haora i neke te Patariana me te Brigade ki tetahi atu rohe, ko te topito he 210 o te kapehu, he 4 kiromita te mamao. Ko ngā kamupene i anga atu ki te uru me te whakapūmau i tā rātau noho. Kotahi te Tiamana i mauhere mai ka mauria atu ki te Brigade. I mau i runga i tōna motopaika. 30 o Hune: 0530 haora he whakamatatū mai i te 0430 haora. I eke atu te Patariana i runga waka ka haere atu ki te pouaka i roto o Dier El Quattra he wāhi wehe mai i a 4 Brigade, i whakapirihia ki a 6 Brigade. I whakaturia te HQ o te Patariana i te wāhi i reira mātau i mua atu, i taraina mātau i konei i mua o ngā pakanga i Ripia i te tau 1941. 0700 haora: Ka haere ngā kamupene ki ngā wāhi i whakaritea mō rātau ahakoa i te ngenge tonu mai i ngā whawhai o ngā rā tata. Kati he mahi ano hei mahinga; ko te waea, me te whakatakoto maina, kia pakari ai te noho a te Patariana. Na te noho i te taha matau o te Brigade Group ka anga atu ngā kamupene ki te raki me te rāwhiti, ko Kamupene C ki te kaokao maui, ko Kamupene A ki waenganui, ko Kamupene B ki te kaokao matau. 1530 haora. Ko te whakaaturanga mai i te Brigade i ki mai he rārangi tino nui ta te hoariri e tata mai ana. Kaore i whakararu mai i a mātau, a, ko te mahi he kari i ngā rua me te whakapaipai i ngā wāhi noho. I whakamatatū i te tōnga o te rā katahi ka ata noho mo te pō. Ka mutu ngā ra o te marama o Hune, mai i ngā rā whakatā i ngā maunga o Syria me Lebanon, ki ngā pakanga i runga i ngā kirikiri mōrearea o ngā koraha o Ihipa. He 32 ngā āpiha i te mutunga o te marama (tokorua i whakapiria mai).  Tohutoro Te Rua Mahara o te Kāwanatanga. Whakapuakanga:  28 NZ (Maori) Battalion Diary, WAII 1 1664 DA 68/1/30 Submitted by mbadmin on Fri, 25/05/2012 - 16:04 English Hoki anō ki te tīmatanga Comments so far: Takupu There are no comments Add your comments: Tāpirihia ōu kōrero, whakaahua, oro, me ētahi atu Timata te tuku ināianei He kaituku kē koe? Takiuru i konei Hoki anō ki te tīmatanga Mana Tārua | Whakakape | me te Punanga