Nga Ingoa o Nga Rangi   Nga Ingoa o Nga Rangi   Ko nga Rangi e tu iho nei, ngahuru-ma-rua; ko ia tenei nga ingoa o aua Rangi:- Tikitiki-o-rangi. Tiritiri-o-matangi Rangi-naonao-ariki Rangi-te-wanawana Rangi-nui-ka-tika Rangi-mataura Tauru-rangi Rangi-matawai Rangi-mairekura Rangi-parauri Rangi-tamaku Rangi-nui--tamaku-rangi Ko ia tenei aua rangi, o ratou ingoa, me ta ratau tu e tu iho nei ratau. Ko aua rangi nei, ngahuru-ma-tahi nga rangi e haerea ana e nga apa atua o aua rangi. Kotahi te rangi kaore e taea e aua apa nei. Ko te Toi-o-nga-rangi tetahi o nga ingoa, ko Tikitiki-o-rangi tetahi o ona ingoa. Ko ia nei te rangi tapu o aua rangi katoa. I a Io anake taua rangi me nga apa whatukura, me te apa mareikura o tera rangi. Ko nga Mareikura me nga Whatukura e tomotomo ana i nga rangi ngahuru-ma-tahi nei, tae mai ki a Tu-a-nuku nei. Ma Io rawa te karere ki tetahi o nga apa o nga rangi ngahuru-ma-tahi katahi ano ka tapokoria a Tikitiki-o-rangi. E kore e tapoko noa. Ko Tawhiriranga hoki te whare, me tomo rawa ma roto i tera e uru ai. Kati; kei raro ra hoki te waha o te tatau. Ko ia i (kiiia) ai ko te Pumotomoto-o-Tikitiki-o-rangi, ara, ko te tatau tera e uru ati ai ki roto i Tawhirirangi; a, ka puta atu ma te koropihanga o te tuarongo ki roto ki Tikitiki-o-rangi. Ke iroto i taua whare nei, i Tawhirirangi, e noho ana nga kai-tiaki o te Pumotomoto o Tawhirirangi, tona tini o Puhitau, a Maioro-rangi, o Houere-tu, o Hauere-tau, me era atu, tona tini o aua apa; e kore ai e uru oa mai tetahi apa kia kotahi, engari ma Ruatau, ma Aitu-pawa, ma Rehua, ma Puao-rangi me Tau-orongo rawa (e) huaki te koropihanga me te rangi ngahuru-ma-tahi, o Papa-tu-a-nuku ranei. Kati; he nui nga korero kei konei e kore e taea e au te whakatakitaki ki a koe.   previous | contents | next