Tiriti o Waitangi - Wikipedia Home Random Nearby Log in Settings Mō Wikipedia Whakakapenga Open main menu Rapu Tiriti o Waitangi Read in another language Mātaki Edit Ko te Tiriti o Waitangi Ka hainatia te Tiriti o Waitangi i te 6 Hui-tanguru 1840 ki Waitangi , Te Tai-tokerau , Aotearoa , e te māngai a te Karauna o te Kīngitanga Kotahi , rātou ko ngā rangatira Māori o Te Ika-a-Māui . Rārangi kōrero 1 Ko te tuhinga 2 Ko te tuatahi 3 Ko te tuarua 4 Ko te tuatoru 5 Hoto ki waho Ko te tuhinga Edit   Ko Hone Heke rāua ko Hariata, tana wahine. Ko Hone tētahi i haina Ko Wikitoria , te Kuini o Ingarangi , i tana mahara atawhai ki nga Rangatira me nga Hapu o Niu Tirani i tana hiahia hoki kia tohungia ki a ratou o ratou rangatiratanga, me to ratou wenua, a kia mau tonu hoki te Rongo ki a ratou me te Atanoho hoki kua whakaaro ia he mea tika kia tukua mai tetahi Rangatira hei kai whakarite ki nga Tangata maori o Niu Tirani - kia whakaaetia e nga Rangatira maori te Kawanatanga o te Kuini ki nga waahi katoa o te Wenua nei me nga Motu - na te mea hoki he tokomaha ke nga tangata o tona Iwi Kua noho ki tenei wenua, a e haere mai nei. Na ko te Kuini e hiahia ana kia whakaritea te Kawanatanga kia kaua ai nga kino e puta mai ki te tangata Maori ki te Pakeha e noho ture kore ana. Na, kua pai te Kuini kia tukua a hau a Wiremu Hopihona he Kapitana i te Roiara Nawi hei Kawana mo nga wahi katoa o Niu Tirani e tukua aianei, amua atu ki te Kuini e mea atu ana ia ki nga Rangatira o te whakaminenga o nga hapu o Nu Tirani me era Rangatira atu enei ture ka korerotia nei. Ko te tuatahi Edit Ko ngā rangatira o te whakaminenga me ngā rangatira katoa ,hoki, Ki hai i uru ki taua whakaminenga. Ka tuku rawa atu ki te Kuini o Ingarangi ake tonu atu ,Te Kawanatanga kātoa o rātou whenua. Ko te tuarua Edit   Ko Kāpene Wiremu Hopihana , Kāwana tuatahi o Aotearoa Ko te Kuini o Ingarangi ka whakarite ka whakaae ki nga Rangatira ki nga hapu-ki nga tangata katoa o Niu Tirani te tino rangatiratanga o o ratou wenua o ratou kainga me o ratou taonga katoa. Otiia ko nga Rangatira o te Whakaminenga me nga Rangatira katoa atu ka tuku ki te Kuini te hokonga o era wahi wenua e pai ai te tangata nona te Wenua-ki te ritenga o te utu e wakaritea ai e ratou ko te kai hoko e meatia nei e te Kuini hei kai hoko mona. Ko te tuatoru Edit   James Busby Hei whakaritenga mai hoki tenei mo te whakaaetanga ki te Kawanatanga o te Kuini-Ka tiakina e te Kuini o Ingarangi nga tangata maori katoa o Niu Tirani ka tukua ki a ratou nga tikanga katoa rite tahi ki ana mea ki nga tangata o Ingarangi. (Nā) William Hobson, Consul and Lieutenant-Governor. Na ko matou ko nga Rangatira o te Whakaminenga o nga hapu o Niu Tirani ka huihui nei ki Waitangi ko matou hoki ko nga Rangatira o Niu Tirani ka kite nei i te ritenga o enei kupu, ka tangohia ka whakaaetia katoatia e matou, koia ka tohungia ai o matou ingoa o matou tohu. Ka meatia tenei ki Waitangi i te ono o nga ra o Pepueri i te tau kotahi mano, e waru rau e wa te kau o to tatou Ariki. Ko nga Rangatira o te whakaminenga. Hoto ki waho Edit tiritiowaitangi.govt.nz Ngā Ture o Aotearoa Te Rua Mahara o te Kāwanatanga Te Tiriti o Waitangi , Wikisource Retrieved from " https://mi.wikipedia.org/w/index.php?title=Tiriti_o_Waitangi&oldid=148596 " Last edited on 13 Pēpuere 2019, at 04:28 Content is available under CC BY-SA 3.0 unless otherwise noted. Privacy Desktop