Te Pūtahi Rangahau | Te Taura Whiri i te Reo Māori Skip to main content Skip to page navigation Māori English Māori English Enter search terms Rapua whānuitia Menu Enter search terms Main navigation Ko wai mātou He aha Te Taura Whiri i te Reo Māori? Ngā tātai kōrero Tānga rangatōpū Whakapā mai Pānui Pāpāho Ā mātou mahi Te Tuku Tohu ki ngā Kaiwhakamāori ā-Tuhi, ā-Waha Whakamātauria Tō Reo Māori Rēhita Kaiwhakamāori ā-tuhi ā-waha Te whakawhanake reo, whakamaherehere reo Te Pūtahi Rangahau Ngā Tikanga Tuhi Te Amo Te Reo Māori Tikanga Māori Whakahuatanga : Pronunciation Learning te reo Māori resources Te Reo Māori Mō ngā take motuhake Wāhi Ako Reo Kaupapa Whakatairanga Te Wiki o te Reo Māori Hīkoi Whakanui i te Reo Māori Rauemi He Muka He Muka Pūrangaranga Breadcrumbs Home Ā mātou mahi Te Pūtahi Rangahau Ā mātou mahi Secondary Navigation Te Tuku Tohu ki ngā Kaiwhakamāori ā-Tuhi, ā-Waha Whakamātauria Tō Reo Māori Rēhita Kaiwhakamāori ā-tuhi ā-waha Te whakawhanake reo, whakamaherehere reo Te Pūtahi Rangahau Te Tomokanga Rangahau Ngā Tikanga Tuhi Te Amo Te Pūtahi Rangahau I te Rohenga Pūtea 2013, ka taunahatia he $8 miriona ka whā tau e tiritiria ana ki Te Taura Whiri i te Reo Māori hei Tahua Rangahau, Whakawhanake i te Reo Māori. Ko te kaupapa, he waihanga tumu taunakitanga hei herenga mō ngā mahi whakaora ake i te reo Māori. Kia rarahi ai ngā hua o te Tahua nei, kua whakatūria e Te Taura Whiri i te Reo Māori a He Puna Whakarauora. E anga whāiti ana te whare nei ki ngā rangahautanga e pā ana ki ngā mahi whakatorokiki, whakapūioio i te reo Māori. He whare mō te motu whānui, ka mahi tahi ki te maha atu o ngā rōpū rangahau reo Māori e ea ai ngā kawenga kua tohua māna. Te tūtohu rangahau ā-motu mō te whakatupu me te whakapakari ake i te reo Māori Nā Te Kotahi Research Institute – Te Whare Wānanga o Waikato te pūrongo, ko Te Matataua o te Reo i tuhi. He kaupapa rangahau tēnei i kōmihanahia e Te Taura Whiri i te Reo Māori i runga i tōna kaupapa whakarauora i te reo Māori. Ko tā te rangahau nei he tuihono ki ngā momo rangapū reo Māori (ngā tāngata me ngā rōpū e kawe ana i ngā kaupapa whakarauora reo Māori, me te whakahauoratanga ake o te reo Māori); ki te tautohu hoki i ō rātou hiahia mō ā rātou rangahau, mātauranga ake, ngā aronga me ngā mahi tōmua e pā ana ki te whakahauoratanga me te whakarauoratanga o te reo Māori, tae atu ki ā rātou mahi rangahau kei te kawea e rātou me te whai wāhi atu ki ngā rauemi. Ko te whāinga matua o tēnei pūrongo kia riro anō mā tēnei mahi e waihanga  te Tūtohu Rangahau ā-Motu, ā, me te hanga i tētahi puna mātauranga mā ngā hapori reo Māori me te hunga e kawe ana i ngā kaupapa whakarauora reo Māori, rangahau anō hoki. Te Matataua o te Reo [PDF, 3.1 MB] Te tāwaha rangahau E kite mārire ana Te Taura Whiri i te Reo Māori i te wāhi nui ki te ao matihiko e tūhauora ai te reo Māori. Koinā i noho mai ai ki te pae tukutuku nei tētahi tāwaha rangahau, me kore e nui ake te matapaki, te whakawhiti whakaaro mō ngā mahi rangahau i waenga i ngā rōpū whai wāhi nui mai, manako nui mai ki ngā mahi whakaora reo. Te Ahu o te Reo E hura ana i te hauora o te reo ki roto i ngā kāinga me ngā hapori Māori Kua oti ake i te  NZCER – Te Wāhanga (external link) tāna rangahau i te hauora o te reo Māori ki roto i ngā kāinga me ngā hapori. Ka hurahia e Te Ahu o te Reo ngā pēwheatanga ā-whānau ki roto i ngā hapori e iwa, e mahi ake ana ki te whakaū i te reo Māori kia mau, kia ora, kia noho hoki hei reo kōrerorero mō ia rā. Ko ngā whakataunga rangahau a Te Ahu o te Reo ka tirohia mō te tukunga pūtea me te whakahaere hōtaka kia eke ai ki ngā tūmanako mō te reo Māori. He rārangi tūtohu ka puta hei whakamārama ake i ngā mahi a te kāwanatanga o te motu, me ngā kāwanatanga ā-rohe hoki, tae atu ki te wāhanga mātauranga me te wāhanga pāpāho. Ka mahi tahi Te Taura Whiri nāna nei i utu te rangahau ki Te Mātāwai (external link) hei whakatutuki i ngā tūtohutanga. Ka whakaputaina e mātou he rīpoata e āta whakaatu ana i ngā whakataunga mai o tēnā o tēnā o ngā hapori e iwa. Ka whakaatu ngā rīpoata i ngā wero me ngā whaihua i pā mai ki ngā whānau e whai ana i ō rātou moemoeā i ō rātou tūmanako hoki ki te pupuri, ki te whakarauora, ki te whakatau noa i te reo Māori ki roto o ia hapori. Kaitaia Tāmaki Makaurau ki te Tonga Te Wairoa Matawaia Tauranga Moana Taranaki Te Uru o Tāmaki Rūātoki Ōtautahi Ko Te Ahu tēnei o te Reo Māori ki roto i te rautau 21 e haere ake nei. He mea āpiti ki te tino rangahau pūtake mō te reo Māori i whakahaeretia i te ngahuru tau 1970 e Richard rāua ko Nena Benton, i whakaatuna ai te ngaro tonutanga o te reo Māori puta noa i Aotearoa. O aua hapori i rangahautia rā e waru anō i uru mai ki Te Ahu o te Reo. Pānuitia he whakarāpopototanga mō te huarahi i whāia. [DOCX, 35 KB] Ko te ingoa o te kaupapa nei hei tohu i ngā wā o mua, i ngā wā hoki o muri iho nei. Nā Tākuta Patu Hōhepa tēnei kaupapa rangahau i tapa ko Te Ahu o te Reo. He ahunga rua hoki te tikanga o te ingoa nei, e tohu ake ana i ngā wā o mua. i ō muri iho nei hoki. E hāngai ana Te Ahu o te Reo ki te whakataukī nei, ‘Ko te reo te tūahu o te mana Māori’. Ka whakarite tēnei whakataukī i te reo Māori ki te tūahu inā hoki ōna take nui hei pou tikanga, hei taurima i ō tātou marae, hei pupuri i te mana Māori, i ā tātou tikanga me tō tātou rangatiratanga hoki. Ka hāngai ki te whakaaro kia whai wāhi nui rawa te reo Māori. Ā kei roto anō hoki i Te Ahu o te Reo te whakahau ki te titiro whakamua ki ngā rā e heke mai nei ka kōkiri whakamua ai ki te whakarauora i tō tātou reo. Ka whakaata ake hoki te ingoa nei i te hurihanga o te reo, i te wairua hoki o te whakataukī rā. He whakamāramatanga nō hea tātou, kei hea tātou, ā, ki hea tātou ahu atu ai mō te reo Māori. Te Ahu o te Reo Overview  [PDF, 1.1 MB] Te Ahu o te Reo Overview (English) [PDF, 1.6 MB] Te Ahu o te Reo Kaitaia [PDF, 154 KB] Te Ahu o te Reo Kaitaia (English) [PDF, 221 KB] Te Ahu o te Reo Matawaia [PDF, 167 KB] Te Ahu o te Reo Matawaia (English) [PDF, 229 KB] Te Ahu o te Reo Ōtautahi [PDF, 164 KB] Te Ahu o te Reo Ōtautahi (English) [PDF, 246 KB] Te Ahu o te Reo Rūātoki  [PDF, 159 KB] Te Ahu o te Reo Rūātoki (English) [PDF, 236 KB] Te Ahu o te Reo Tāmaki Makaurau ki te Tonga [PDF, 165 KB] Te Ahu o te Reo Tāmaki Makaurau ki te Tonga (English) [PDF, 239 KB] Te Ahu o te Reo Taranaki [PDF, 182 KB] Te Ahu o te Reo Taranaki (English) [PDF, 249 KB] Te Ahu o te Reo Tauranga Moana [PDF, 173 KB] Te Ahu o te Reo Tauranga Moana (English) [PDF, 229 KB] Te Ahu o te Reo Te Uru o Tāmaki Makaurau [PDF, 175 KB] Te Ahu o te Reo Te Uru o Tāmaki Makaurau (English) [PDF, 249 KB] Te Ahu o te Reo Wairoa  [PDF, 178 KB] Te Ahu o te Reo Wairoa (English) [PDF, 246 KB] Te ine i te uara o te reo Māori me ngā tikanga Māori ki te ōhanga o Aotearoa  Nā Te Pua Wānanga ki te Ao - Te Whare Wānanga o Waikato tēnei pūrongo i tuhi. Ko te kaupapa matua, he āta wetewete i ngā tūāhuatanga o te ōhanga reo Māori me te ahurea Māori, waihoki he tātari i ngā hokohoko ōhanga hei whakawhāiti i ngā pou tarāwaho me ngā taputapu e  inehia ai ngā wāriu. Ka aro atu te rangahau ki ngā aroro me ngā tātai whakawhanake i ngā kautenga wāriu o te ōhanga. Nā ngā uiuinga me ngā mātātuhi i whakaahu, i tautuhi hoki  ngā tūmomo āhutanga o te ōhanga reo Māori, nā konā i hua mai he pou tarāwaho  e pā ana ki  ngā kimihanga kōrero mō te wāriu o te reo Māori. Measure the value of te reo Māori [PDF, 1.6 MB] Te arotake i te hua o ngā wānanga whakarauora reo me te wahi ki ēnei i ngā mahi whakatupu, whakapūioio i te reo Māori Nā R & K Consultants Limited te pūrongo, Kura Whakarauora i tuhi. Ko te aronga matua o te kaupapa he arotake i te pānga o ngā wānanga whakarauora reo i ngā mahi whakahauora reo a ngā hapori. He papamahi te Kura Whakarauora mā ngā tauira kia pai ai tā rātou whakarite mahere whakaora reo i tētahi taiao tauawhiawhi tonu, tauwhitiwhiti tonu. E mau mai ana ki te pūrongo nei ngā kōrero i hua ake i tētahi mahi arotake i te whakatinanatanga me ngā pānga o te whai wāhi atu o ētahi tāngata e 85, nō ngā whānau, nō ngā marae, nō ngā hapū, ngā iwi, ngā rōpū hapori, me ngā rōpū kaupapa motuhake, ki ētahi Kura Whakarauora whakamātau e rua. O ēnei tauira i tae ake ki ngā Kura Whakarauora e rua, e 20 i uiuia mō te pūrongo nei; 12 ngā tāngata i whakaotia e rātou ētahi uiuinga turuki. I kawea anō ētahi tirohanga whāiti e toru, ki te wherawhera mēnā he hononga kei waenga i te whai wāhi ki ngā Kura Whakarauora me te aranga ake anō, te oranga ake anō o te reo. Ko te whakatau a te pūrongo  nei e kī ana, me tū tonu ngā Kura Whakarauora me te whakatakoto anō i te tauira e rite ana mō ngā tini rōpū i ngā hapori. Waihoki, me takoto he tautoko hei whakapakari i ngā pūkenga me ngā mātauranga o te hunga whakamahere reo huri noa i te motu, mā konā e pai ai tā rātou āwhina ki te whakatū, ki te manaaki i ngā kaupapa whakarauora i ngā hapori reo, puta noa. Kura Whakarauora (Māori) [PDF, 2.7 MB] Kura Whakarauora (English) [PDF, 2.7 MB]   Reo Māori Pākehā Voices The Bilingual Land Our Hearts Know is Possible Ko te reo Māori, te reo taketake o Aotearoa, he taura kua whiriwhiria ki ēnei motu, ki ōna tāngata. Ahakoa te tokoiti o te hunga Pākehā kōrero Māori, he nui tā rātou papānga ki te reo i runga i te mea ko te iwi nui tonu rātou o te iwi whānui o Aotearoa. Ko te whāinga o tēnei rangahau kia tino mārama ki ngā wheako o ngā kaikōrero Pākehā matatau ki te reo Māori.  Ahakoa te whānui o ngā tūmomo tāngata he nui ngā āhuatanga ōrite puta noa i te rōpū nei. He matatini ngā kitenga, ā, he wā anō he matarua pea te āhua. Kua kitea e te hunga nei ngā huarahi e taea ai ō tātou rā i raro i te ringa ‘atawhai’ o Peretania o mua, ō tātou rā hurihuri o nāianei, me ō tātou tūmanako mō ngā rangi e tū mai nei te kawe mā roto i ā rātou kupu, i ā rātou mahi anō hoki. Mā ō rātou wheako e piki ai tō mātou mōhiotanga ki te tini o ngā whakapātari, o ngā huanga anō hoki i te whai kia tangata Pākehā reorua o Aotearoa. He tekau mā whā ngā kaikōrero Pākehā ko te reo Māori tō rātou reo tuarua, i uiuia mō tēnei rangahau. I tūhuratia, i kōrerotia e whā ngā āhuatanga matua o ā rātou wheako e pā ana ki whakarauoratanga reo me te whakahāngaitanga anō o te reo Māori: 1) ngā hihiri ako i te reo Māori; 2) ngā whakapātari i runga i te huarahi; 3) ngā ara i whāia kia ekea ai ēnei whakapātari; me te 4) te uara o te reo Māori ki a rātou. Reo Māori, Pākehā Voices Report [PDF, 1 MB] Te Tai - Ngā Takinga Kōrero Reo Māori mō te Whakatau Kereme Ka matapaki tēnei tuhinga i te hīkoi o te reo Māori ki te Rōpū Whakamana i te Tiriti o Waitangi. Ka āta kōrerohia te rāngai pāpāho Māori me tōna whanaketanga. Ka kaha kōrerotia te hunga i whai wāhi nui atu, i whakapau werawera kia whai mana ai te reo ki te rāngai. Ka arotahi atu hoki ki tōna whanaketanga mai i te wā i whakamanatia ai te reo Māori ki te rāngai pāpāho. Te Tai - Ngā Takinga Kōrero Reo Māori mō te Whakatau [DOCX, 58 KB] RSS Feed Footer Ko wai mātou He aha Te Taura Whiri i te Reo Māori? Ngā tātai kōrero Tānga rangatōpū Whakapā mai Pānui Pāpāho Ā mātou mahi Te Tuku Tohu ki ngā Kaiwhakamāori ā-Tuhi, ā-Waha Whakamātauria Tō Reo Māori Rēhita Kaiwhakamāori ā-tuhi ā-waha Te whakawhanake reo, whakamaherehere reo Te Pūtahi Rangahau Ngā Tikanga Tuhi Te Amo Te Reo Māori Tikanga Māori Whakahuatanga : Pronunciation Learning te reo Māori resources Te Reo Māori Mō ngā take motuhake Wāhi Ako Reo Kaupapa Whakatairanga Te Wiki o te Reo Māori Hīkoi Whakanui i te Reo Māori Rauemi He Muka He Muka Pūrangaranga Contact Us +64 4 471 0244 info@tetaurawhiri.govt.nz Postal Address: Level 11, The Co-operative Bank House 20 Ballance St, Wellington 6011 Sitemap Te Matatapu Te Noho Wātea o ngā kōrero He Kupu Kaupare Te Taura Whiri i te Reo Māori © 2019 Last modified: 23rd May 2019