1 Putanga 22(4) 2009 Raumati He Pitopito Körero nä Te Taura Whiri i te Reo Mäori nā Tīmoti Kāretu, nō Ngāi Tūhoe/Ngāti Kahungunu He poroporoaki – Mate Huatahi Kaiwai kei te whārangi tuatoru te roanga o tēnei kōrero Ko te rā tuarua tēnei, arā, ko te 24 o Whiringa-ā-nuku o te tau 2009, mai i te hokinga mai i te uhunga ki a Mate Huatahi Kaiwai i te marae o Mangahānea, i paku kō atu i Rua-a- Tōrea, i te rohe o Ngāti Porou. Kua uru kē mai te mānakanaka ki roto i a au mō te āhua o te tū atu ki mua i te kuia nei tuku ai i aku mihi ki a ia, i te mea he tangi rawa nōku ka whati te kōrero. I whakaputa atu au i aku whakaaro ki a Pou me te kī atu ko ia hei waha mō māua, engari ko tāna mai ki a au, ‘E tū koe kia kitea mai ai tō aroha nui atu ki te kuia rā’. Ahakoa ana kupu whakatītina mai i mōhio tonu au e kore au e kaha, nō reira noho ana ko ia hei māngai mō mātou o tō mātou nā tira, me te tino ātaahua nei o te rere o ana kōrero, o tana urupare i ngā whiunga mai a te tangata whenua. Taihoa ake nei ērā kōrero whāia atu ai. Ā kāti, ka eke rā mātou. Aroha ana ngā tangi a ō mātou wāhine. He nui tonu rātou i mōhio rawa atu ki te kuia nei, nā reira me pēhea e taea ai te roimata te pupuri? Me tuku ia kia maringi ka tika! Ko au nei hoki me ōku nā roimata kāore i taea te tātāwhi i te kaha aroha atu ōku ki te kuia nei, me te aurakitanga o mahara ki ngā wā i noho tahi ai ki te āta kai i tā te rangatira kai. Kai atu, kai atu, tē paku hawa, tē paku koto rānei, engari ia, kaha kē atu ana ko te pīkoko ki tāna i āhei ai te whāngai mai. Kua tau nei a mauri i tōna taunga nei, kua taea a huatau te āmi kia puta ai i a au aku mihi kāore rā i taea e au i a au i tū ai ki te aroaro o te kuia nei tangi ai, nō reira tēnā koa kia tahuri ake; ‘E Mate, kei taku kaingākau, Taku manawa e kakapa nei E kakapa ana ki te marama, ki te whetū Ka tau nei kai te rua Kātahi au ka kite i te hē Kātahi au ka kite i te mate Ko taku tau kahurangi E Mate ko koe rā tēnā Ka riro kai Paerau Ki te huinga o te kahurangi Ka oti atu koe, ē Mate ē Haere rā, haere atu rā! 2 nā Huhana Rokx, Kaiwhakahaere Matua Ihirangi He poroporoaki – Mate Huatahi Kaiwai 1 He kupu whakataki 2 He mihi nā te Minita He poroporoaki – Mate Huatahi Kaiwai 3 - 4 Te taputapu whakamāori a Google 4 He Huia Kaimanawa 5 - 9 He whakamānawa reo, he whakamānawa tangata 10 Te Ataarangi 11 Waldo Houia 12 He pānui 12 He kupu whakataki Te Taura Whiri i te Reo Māori Pouaka Poutāpeta 411 Papa 14 Investment Centre Te Ara o Ballance Te Whanganui-a-Tara 6140 Waea: 64 4 471 0244 Waea whakaahua: 64 4 471 2768 Īmēra: tereo@tetaurawhiri.govt.nz Paetukutuku: www.tetaurawhiri.govt.nz He mihi nä te Minita 2 Ngā mihi nui ki a koutou katoa i runga i te whakaaro kua tata pau tēnei tau. Kua tata eke anō ki te wā o te Kirihimete, he wā e karapinepine ai ngā whānau, e puta ai te maha o ngā mahara mō te tau kua hipa. Nō reira tēnā koutou katoa, ngā mihi rā o te wā, o te tau ki a koutou me ō koutou whānau atu i tēnei whānau, i Te Taura Whiri i te Reo Māori. Nō reira, kia mahara ake tātou ki tētahi kōrero ā ngā tīpuna i kī ai: “Kahikatea tū i te uru.” Tēnā koutou, e ngā iwi o te motu. Tēnei tātau e ngākau pōuri ana i ngā mate o te wā. Koia rā, ko ngā tino toa o te reo kua ngaro i te kitenga kanohi. Ko te kuia tērā, ko Nanny Mate, ko Tā Hauata, ā, ko tā tātau tamaiti hoki, ko Hāwea, e moumou nei i a aituā . Moe mai rā, e tama, ki roto i ō mātua me ō tīpuna. Otirā, e te iti me te rahi ē, moe mai rā koutou i te wāhi ngaro. Tēnei ka huri ki a tātau e noho nei hei urupā ora mō rātau, e pupuri nei i tēnei taonga kua whakarērea mai ki a tātau, arā, ko te reo huia kaimanawa nei. Tēnā tātau. He tika tonu te mihi ki a tātau i runga i ngā kaupapa nui mō te reo Māori kua tutuki i nā tata nei. Ko te ritenga tērā mō te Kapu Whutupōro o te Ao. Ko te Huia Kaimanawa tērā a Te Taura Whiri. Ā, ko te haki Māori tērā, taihoa ka whakaatuhia ki te ao. He āhuatanga katoa ēnei ka whakapiki i tō tātau tuakiri Māori ki runga o Aotearoa. Mō te Kapu Whutupōro o te Ao, kua oti kē te whakarite ko Whakaata Māori te kaipāho matua mō ngā pāhotanga kore utu. Ka riro māna anake e whakaari ngā kēmu katoa mō te kore utu. Ki taku rongo, ka whakaaritia ngā kēmu katoa ki te teihana matua ki ngā reo e rua, ā, ka whakaaritia anō hoki ki te hongere Te Reo ki roto katoa i te reo Māori nei. Ka whai wāhi anō hoki ngā reo irirangi Māori ki ēnei āhuatanga. Kātahi rā te ekenga taumata, e taea ai tō tātau reo te whakatairanga ki a tātau ka tahi, ki te motu whānui ka rua, ki te ao katoa ka toru. I nā tata nei, i hui te motu ki Porirua, arā, ki tā tātau Huia Kaimanawa. Ko Te Ururoa tērā i haere hei kanohi mōku, hei taringa, hei waha kōrero anō hoki. Ka nui taku mihi ki a Tīmoti i whakawhiwhia ki tana tohu, me taku tangi ki tō tātau kuia nāna i whakawhiwhi. Heoi anō rā, kua tae mai ngā rongo kōrero ki a au mō ngā kaupapa matua i wānangahia i te hui, arā mō te tautoko i ngā whānau me ngā hapori, mō te kōtuitui i ngā whakahaere reo Māori, me te whakamahere i ā tātau mahi. He āhuatanga ēnei me tautoko ka tika. Kei te tatari au kia tae mai te pānui a Te Taura Whiri me Te Puni Kōkiri mō te huarahi whakamua e tutuki ai ēnei kaupapa. Koia ēnei ko ngā āhuatanga o te wā, me ōna piki, me ōna heke. Kei te tere haere mai te Kirihimete. He wā tēnei e noho tahi tātau ki ō tātau whānau. Kia kaha tātau ki te kōrero Māori ki a tātau anō, i a tātau e noho whānau nei. Mauri ora! 33 mai i te whārangi tuatahi Kai taku taituarā, kai taku pou toko manawa o roto i te reo, kai taku whakaruru i ngā hau kino o te wā, i ngā tao tāwai, i ngā tao rangirangi, i ngā tao whakarōriki, tīraha rā! Tīraha mai i te kaokao o tō tipuna whare, i runga i tō papa kia whakaekea ai koe e te tini, e te mano, tīraha rā. Nā Pou te kōrero atu ki a koe kua riro nei tēnā momo i a koe, tēnā momo ā-reo, tēnā momo ā-tangata. Kua noho mai ko koutou ko Mīria, ko Ngāhinatūrae me tā koutou tamāhine me Wiha, ki konā whakawā mai ai i ngā mahi ā muri nei o roto i ngā kura reo e tū tonu nei, e whakamātau tonu nei ki te whāngai atu i te hunga aronui mai ki te reo. I a koe i whakatau ai kua eke pea te wā e mutu ai tāu nā whakaako i roto i ngā kura nei ko tō kī mai ki a au, ‘Tīmoti, kei taku kaingākau, noho ake ki tā tāua mahi’. I noho mō tōna wā nei ka whakatau māua ko te tuakana, ko Te Wharehuia, me whakawātea anō hoki māua i a māua ka tuku ai i te mahi ki ō rangatahi ake i a māua. Engari, e kui e, he aha nei te aha? He rite tonu te tonoa mai o māua kia hoki atu, kia hoki atu pērā i a au i whakahōhā atu rā i a koe kia uru mai ki ngā mahi. Ko tōu nā pai kāore nei he paku mānenei, he paku horokukū mai ōu, engari uru mai ana, mahia ana te mahi. Ko te momo reo o tōu nā whakareanga kua tino kore haere i roto i te wā nei, ā, puta ana hoki tērā kōrero i te pae tangata whenua. Ko tāku īnoi noa kia tiriwā anō te tangotangohia atu o tō koutou nā momo e te ringa kaha e kore nei e taea te karo, kia rongo ai hoki ō ēnei rā nei whakapaparanga i taua momo reo ka paku kapo mai ai ko tērā, ka waiho ai ko pōhēhē, ko tino hē noa iho nei ki rahaki. Whiua mai ana e te pae tangata whenua āna kōrero mō te āhua ki te reo e rangona ana i te wā nei, me te kī mai tē aro kē i a rātou e pēhea ana ngā kōrero e ahu mai ana i te pouaka whakaata. Ko tā Pou atu ki tērā whiunga mai, ‘Haere ki a Wiremu wherawhera mai ai i ngā whārangi, nā ka kitea aua kupu i reira, nō reira he aha kē tēnei tāwai i te reo?’ Otirā, i nui ā tāua matapakinga i tēnei take o te whakanano mai i te kupu kāore i te mōhiotia, o te kupu kāore i te auau te rangona. Ko te kōrero anō hoki a tētahi, ‘Anei au i whānau mai ko te reo Māori tōku nā reo, kāore au i te mōhio ki ngā kupu e rongo nei au.’ Ko tāku noa ki tērā kōrero, ko wai te kaikōrero o tētahi reo, ahakoa te reo, e mārama ana, e pūrangiaho ana ki ngā kupu katoa o tōna reo? Anei te reo Pākehā me tōna huhua o te kupu, engari kāore i paku kainamu atu te mātau o te hunga taketake ake nō rātou taua reo ki aua kupu katoa rā. Hāunga anō ia te waiho mā te horopaki, mā ngā ponitakatanga rānei o te kupu hei paku tīwhiri ki te rerenga mai o te whakaaro o te kaikōrero. Atu i tērā, kāore i tua atu i te haere ki te papakupu ki reira wherawhera mai ai i te whārangi kia kitea ai te tikanga o te kupu. Nā, engari anō tēnā i te noho noa iho i konā komekome ai! Nā Herewini te kōrero mai ki a au mō taku whai wāhi atu ki a Ngoi, ā, nō muri mai nei ki a koe. Āe, nōku te tino waimarie kia whai wāhi atu ki a kōrua tahi me te taea o te kī nōku rawa atu tētahi whiwhinga nui mai i a kōrua, kōrua ngā wāhine i hau nei ō kōrua rongo ki te motu. Ahakoa au i ō kōrua rekereke noa rā e noho mai ana, ko te tino hua o tērā momo noho ko te noho i te taha o ngā wāhine whakaaro nui, whakapono nui ki te oranga tonutanga o te reo. Ko tētahi o kōrua i wawe rawa te riro atu, engari i pai ai kua takoto kē he tauira hei arumanga atu, ka puta nei ko Te Ataarangi i te taha o Te Heikōkō. I āmio tāua i te whenua nei ki ngā kura reo, e Mate. Nā tātou ko Ngāhinatūrae, ko Wiha mā ko ngā kura e tū nei ki Ōtautahi ia tau, ia tau, engari ko tōna ōrokotīmatanga mai ko te kura i tū rā ki te marae o Ōnuku. Mai i tērā e tipu nei, e tipu nei, me taku whakamihi nui ki te tokoiti e kōkiri nei, e kōkiri nei i te tokomaha kia tahuri. Ko taua iti mokoroa rā, e Mate, e hinga nei te rākau o te kūware, o te whakatōngā. Engari ka taea rānei te kī e ora ana te reo me tō tāua kore nei i paku mataku ka ngaro ā tōna wā? Me pēhea i te mea he kupu noa kei te pahawa? I nui ngā waiata nā Herewini i tātaki ake ko te reo te kaupapa, engari nōnahea kē nei aua waiata rā? Ko tāku kē e mea nei, mēnā i whāia ngā tohutohu o roto i aua waiata rā kua kore kē noa atu i pēnei te hē o te reo, kua kore hoki i pēnei nā Tīmoti Kāretu, nō Ngāi Tūhoe/Ngāti Kahungunu He poroporoaki – Mate Huatahi Kaiwai Tämati Mclean (mokopuna), Mate Kaiwai, Pani Mclean (tamähine) 44 I arohaehaetia te taputapu whakamāori a Google e Rātū Tibble, kaiwhakamāori. Mā te hapa e kitea ai te tika. Mā te tika e kitea ai te hapa. Mā te whakawātea i te whakaaro e tipu ai te whakaaro. Ia rā kei te kite tātau i te kamakama o te paetukutuku. Āpōpō te kitea ai te kamakama o ngā mahi whakatipu reo Māori a Google. E whakapono ana au he tino taonga tēnei. Kei te tuhituhi au ki ngā momo tāngata katoa o te ao i roto i ō rātou ake reo pēnei i te Wīwī, te Pāniora, te Pōtikīhi me ērā reo, nā te mea ka taea i runga i te ipurangi, ā, i ōna puna reo hoki. Ko te kaupapa o te mahi a Te Taputapu Whakamāori a Google (Google Translation Toolkit) he whakatipu i ngā reo katoa o te ao rokohanga. Kei te tirohia e rātou ngā reo o ngā tāngata whenua o te ao ā, kei te whāngaitia aua reo ki te puna reo mā ngā mihīni whakamāori nei. Koianei tonu te mahi mō te reo Māori. I tēnei wā he ruarua noa iho ngā tuhinga reo Māori kei te mīhini nei – nā reira kāore e nui ngā rerenga reo e taea ana te whakamāori. Mā te whāngai i te mīhini nei ka nui ake tana puna kupu. Ko te kaupapa a Google ko te kaupapa ‘ture kore’ arā, waiho mā te tangata e whāngai atu ki te reo. Ki te whāngaitia atu e te tangata, e kore a Google e hara. Ko te hara ka noho tonu ki te tangata nāna i whāngai te mihīni a Google. He reo motuhake i puta mai i te ringa o te kaituhi. Ko te mahi a te mīhini he kōwhiriwhiri, he whakariterite, he tohatoha ahakoa mā te ētita tonu e āta tirotiro. I te mutunga ka tere kē atu te whakamāori, ka whāiti kē atu ngā hapa. Ahakoa, mā te tangata matatau tonu ki aua reo e āta titiro e āta whiriwhiri, e āta whāngai atu kia tika ai te takoto o te kupu. He mea whakawai tonu i te mihīni hei whakatikatika tonu mā te whakariterite i ngā momo whakatakotoranga kupu. Ka poto kē atu te kīanga ka tika kē atu te whakamāori. Ka roa kē atu te rerenga kupu ka hē kē atu te whakamāori. Otirā ka roa kē atu te whāngai i te puna reo ka tika kē atu te whakaputa reo, arā, he mahi whanaketanga hoki tēnei, te whāngai i te mīhini nei ki te reo. Ko te wairua tonu tēnei o te whakatipu i te paetukutuku. Hei tirohanga i te paetukutuku: http://en.wikipedia.org/wiki/Translation_memory - kei konei ko ngā whakamāramatanga http://www.opentag.com/tools.htm - kei konei ko ngā tino taputapu whakamāori Nā Rātū Tibble, nō Ngāti Porou/Te Whānau-a-Apanui Te taputapu whakamäori a Google Kua hë, kua hë! E hika mā ē, kua tīngia mātou e te whakamā. Kua tae mai te kōrero a Nadine, tētahi o ngā tamāhine a Wiha Te Rakihāwea rāua ko Manu Mālcolm, e kī ake ana i hē ētahi o ngā kōrero mō rātou i tāia ki te putanga 22 (2) Koanga o He Muka. E hine mā, kei te aroha ake ki a kōrua tahi, kua tīngia hoki e te whakamā i tō mātou hē. Kei te rongo ake i tā kōrua tangi, i tō kōrua mamae. Tēnei rā ngā kōrero te whakatikahia atu nei. E ai ki te putanga 22 (2) Koanga o He Muka, ka moe a Wiha i tana tāne tuarua, i a Tainui Stevens, ka noho mai rāua ko ā rāua tamariki tokorua i Ngāruawāhia. Ko te kōrero a Nadine kei te hē tēnei. E 29 tau ō rāua mātua, a Wiha rāua ko Manu e moe ana, ka mutu i whakatipuria kēhia mai rāua i Kirikiriroa. E hine mā, Nādine, kōrua ko tō taina/tuakana, ko te tūmanako ka paku mauru ake ō kōrua mamae i ēnei whakamārama e tuhia atu nei i runga i te ngākau whakaiti, i runga i te aroha anō hoki ki a kōrua tahi, ki tō kōrua whaea hoki. E Wiha, moe mai rā. te kaha o tōna ngaro haere. Taukuri e, e Mate, te taringa hakeke kē o te ao Māori puta noa i ōna roherohenga katoa! Ko māua ko te tuakana, ko Te Wharehuia, kua roa kē e whakatakoto mahere ana, e whiriwhiri ana mō āhea rā māua toro atu ai i a koe i te rongonga o māua i te hē haere koe i ngā ākinga a ahungarua, a mātāpūpututanga. I konā tonu māua me ō māua whakaaro ka tae ake nei ō rongo, ā, nāna kē te whakamōhio mai i a au ko koe tēnei kua riro. E rua, e rua ēnā koroua ki konā rohi ai, wairutu ai i te rironga ōu ka tahi, i te korenga i tae atu ki a koe i mua atu i tō rironga ka rua. Nā konei, e Mate, te ngau tarariki nei, te kai ngoto nei o te aroha i te ngākau, tē taea te aha. Ko hūpē, ko roimata hei whakamauru noa i te mamae e kai kino nei, ā, mā te wā rawa te rāwakiwaki e whakangaro. Ko mahara ia ka tū tonu, e Mate, ko mahara ka tū tonu. Kāti, e Mate, haere rā i tō tira mokemoke ki tō tāua tini, ki tō tāua mano e kāpunipuni mai rā i te haumūmūtanga o te tangata, haere atu rā. Mēnā au i tū i te marae o Mangahānea, e Mate, kua āhua pēnei atu aku kupu ki a koe. Ahakoa kāore i kopaina te auhi, te poreirewa ki te kupu i mua tonu i tō aroaro, mā te aha rā i ēnei kupu iti kua tuhia nei – engari anō tēnei i te kore rawa atu nei! Ko te pō rā ki a koe, e Mate, ko te pō rā ki a koe. Moe mai. 55 Te reo ka wänangahia Te reo ka whakaaturia Te reo ka whakanuia He Huia Kaimanawa ë! I tū te whakaaturanga reo Māori a He Huia Kaimanawa ki te whare tapere o Te Rauparaha i Porirua i te 15–16 o Whiringa-ā-nuku 2009. Neke ake i te 500 ngā tāngata i tae atu ki te hui nei ki te wānanga, ki te whakaatu, ki te whakanui hoki i te reo Māori. I konei anō, ka whakanuia te hunga kua eke nei ā rātou kaupapa whai i te reo Māori ki te taumata. Wähanga Toa Ngä Kura Te Kura Tuatahi o Ngä Iwi, Tämakimakaurau Te Kura Motuhake o Sir Keith Park Ngä Kura Mätauranga Tuatoru Ngäi Tauira, Te Whare Wänanga o Te Upoko-o-Te-Ika-a-Mäui Te Wiki o te Reo Mäori Ngäi Tauira, Te Whare Wänanga o Te Upoko-o-Te-Ika-a-Mäui Hapori Te Poari Matua o Raukawa Te Whare Ahorangi Ngä Kaunihera me ngä Pokapü ä-Kaunihera Te Kaunihera o Pöneke Pakihi Cinco Cine, Tämakimakaurau Tänga Te Whare Wänanga o Te Upoko-o-Te-Ika-a-Mäui Irirangi Kötuku Rerenga Tahi Ltd. Pouaka Whakaata Te Reo Tätaki Ngä Kaiwhiringa Hirahira Te Tari Taake Mana Tohu Mätauranga o Aotearoa Tokoroa Betta Electrical Entire Katoa Ltd Te Päriha Mihinare o Mäwhera me Kümara Karanga Metekingi räua ko Merimeri Penfold Te Rangimarie Williams, Mahinarangi Baker, Victor Manawatu, Pania Lee (Ngäi Tauira, Te Whare Wänanga o Te Upoko-o-Te-Ika-a-Mäui) Ngä Tohu Reo Mäori 2009 66 Ngä toa reo Mäori, 2009 E toru ngā tohu motuhake i whakawhiwhia ki te rōpū, ki te tangata takitahi rānei e whai ana tā rātou i mahi ai mō ngā mahi whakaora ake i te reo Māori, i ēnei paearu e takoto ake nei: • E mōhiotia ana nā wai – kua rongonui tāna i mahi ai, e whakamihia ana e ētahi atu; • E whai hua ana – kua puta he hua pai i tāna i mahi ai, kua huri, kua pai ake ngā whanonga me ngā waiaro o te tangata ki te reo Māori; • E arotahi ana ki te kounga – ka whakamahia, ka whakatairangatia hoki e tāna i mahi ai te reo Māori e tika ana, e hāngai ana hoki; • He tūmau, he tāroa – e puta ana he hua tūmau, he hua tāroa i tāna i mahi ai 1. Taku Toa Takimano, 2009 Ko Taku Toa Takimano te tohu ka whakawhiwhia ki te tangata kua oke nui, kua oke roa mō te oranga tonutanga o te reo Māori. Kua whakawhiwhia tēnei o ngā tohu ki a Tīmoti Kāretu. He tangata rongonui a Tīmoti Kāretu huri noa i te motu, puta atu hoki ki tāwāhi mō te kohara tonu o tōna ngākau ki te reo Māori, me tana whakatauira mai i ngā taumata tiketike hei whakamaunga atu mā te hunga e whai ana i te reo. Kāore he tangata i tua atu i a ia mō te ārahi i ngā mahi whakaora ake i te reo i roto o tōnā iwi, puta atu ki ētahi atu. He kupu nā Tīmoti Kāretu ki a Mate Kaiwai I te rā i kōrero ai tāua i ā tāua kōrero whakamutunga ki a tāua, kua kite kē au i te toro atu o te ringa kaha o Aituā ki a koe, ā, ko tōku nā waimarie i taua rangi rā, kāore anō taua ringa rā kia kapo. Koinā i hoto ai tōku nā ngākau i te kitenga tuatahitanga atu i a koe i taua rangi rā, ka haere rā ō mihi mai ki a au ki te taonga a Te Taura Whiri i whakawhiwhi mai ai ki a au, engari ko te ringa tuku mai, nōu. I te mea kua takoto noa atu taku kupu taurangi ki ngā kōhanga reo o Kahungunu, ka tae atu au ki te rā e whakanuitia ai te hunga kua puta ngā ihu i roto i ngā mahi huhua a Te Poari o Te Kōhanga Reo, kāore au i wātea atu ki te hui a Te Taura Whiri i ōrua mai nei ngā rā o taua hui ki tērā o te hui a Kahungunu. Nā tēnei, riro ana mā te reo hangarau tāua e tūhono. Arā au te pati kē ai i a Kahungunu kia whakawāteatia mai au kia tae atu ki a koe, engari e kī ana te kōrero ko te ara ki Tāhekeroa e apua ana e te whakaaro pai. Mā te aha i tērā! Hana O’Regan, (Kaiwhiri – Te Poari Matua o Te Taura Whiri i te Reo Mäori) räua ko Mate Kaiwai Tïmoti Käretu - Taku Toa Takimano, 2009 77 2. Te Tira Aumangea, 2009 Ko Te Tira Aumangea te tohu mō Te Reo Māori i te Hapori. Ka whakawhiwhia ki tētahi rōpū, ki tētahi hapori rānei mō tā rātou i mahi ai i roto i ngā mahi whakaora ake i te reo Māori. Kua whakawhiwhia tēnei ki Te Ataarangi. E mōhiotia ana ko rātou te tauira tuatahi i puta mō te ako i te reo Māori i roto i te kāinga me te hapori. 3. He Huia Kaimanawa – Te Tohu o ngā Tohu Katoa, 2009 Ko Te Tohu Huia Kaimanawa 2009 te tohu ka whakawhiwhia ki te rōpū, te tangata rānei i eke rawa ki ngā taumata i roto i ngā mahi whakaora ake i te reo Māori. Kua whakawhiwhia ki Te Poari Matua o Raukawa. Kei mua rātou e haere ana i roto i ngā mahi whakatakoto rautaki reo Māori, whakatakoto mahere reo Māori, tae atu ki tā rātou kōkiri i te reo Māori, kua tū nei hoki ngā Tohu Reo Māori a Raukawa ake. (Tirohia te whārangi 10) Te Poari Matua o Raukawa, Höri Deane, Charlie Tepana, Tangiwai Amopiu, Rauhuia Tepana (pëpi) - (Te Tohu Huia Kaimanawa, 2009), Erima Henare (Toihau, Te Taura Whiri i te Reo Mäori) Te Röpü o Te Ataarangi – Te Tira Aumangea, 2009 88 He whakairinga kupu, he whakapiringa tangata NGÄ TÜTOHUNGA KI TE MINITA MÖ NGÄ TAKE MÄORI A TE HUNGA I TAE AKE KI HE HUIA KAIMANAWA I tīmata tēnei wāhanga o He Huia Kaimanawa ki te āta whakaaro, ki te āta wetewete i tēnei whāinga a ngāi tātou ‘te whakaū me te whakapiki tonu i te kounga me te tohungatanga o te reo Māori.’ E kīia ana tēnei ko te ‘hiranga o te reo Māori.’ Koianei ngā kōrero i puta i te wānanga nei hei tuku ki te Minita mō ngā Take Māori. Ko nga tūtohutanga ēnei i puta i ngā hui iti nā ngā tāngata i tae ake ki a He Huia Kaimanawa, te wānanga reo Māori i tū ki te Whare Tapere o Te Rauparaha ki Porirua, i te 15-16 o Whiringa-ā-nuku 2009. Ngā tūtohunga 1. I puta te kōrero, ki te kore he rautaki reo Māori ā-iwi e whai ana i ngā kaupapa reo ki roto i te kāinga, ki roto i te hapori, ki runga i ngā marae, e kore e ora te reo hei reo kōrero mō ia rā, ia rā. 2. I puta te kōrero, i hua mai ngā huarahi mātauranga Māori i ngā pakanga a ngā tāngata i ngākaunui rawa kia ora tonu te reo Māori, kia rangona anō hoki. I puta anō te kōrero, ka whāiti atu te nuinga o te angitūtanga o ēnei rā i te ao mātauranga ki ngā huarahi mātauranga Māori. Nā runga i tēnei, ko te whakaaro nui o te hui, me tautoko, me whakakotahi ngā huarahi mātauranga ki te reo Māori, arā, ko ngā kōhanga reo, ko ngā kura kaupapa Māori, ko ngā wharekura, ko ngā wānanga me Te Ataarangi. 3. I puta te kōrero he whāiti noa ngā tautoko e puta ana i ēnei rā mō ngā mahi āwhina i te oranga tonutanga o te reo Māori. Kāore tēnei momo tautoko e whai whakaaro ki te hiahia kia tuia tahitia, kia ukauka hoki ngā mahi mō te reo Māori, puta noa i te motu. Ngā Whāinga Ka tuku pūrongo a Te Taura Whiri i te Reo Māori mō ngā kōrero i puta i He Huia Kaimanawa, tae noa ki ngā kōrero i tuhia i ngā hui iti. E hiahia ana hoki a Te Taura Whiri i te Reo Māori ki te hui atu ki te Minita mō ngā Take Māori ki te matapaki i ēnei tūtohunga. Charlie Tepana (Te Poari Matua o te Reo o Raukawa), Liz Hunkin (Te Ataarangi), Te Ripowai Higgins (Te Mängai Pähö), Tipene Chrisp (Te Puni Kökiri), Herewini Parata (Te Matatini) 99 He Huia Kaimanawa, he rangatira te kai nā Waihoroi Shortland, nō Ngāti Hine Ahakoa au huri ki hea, ānō nei he rautaki kei te haere. Mei kore i tērā kei te waihangatia, kei te arotakehia kei te whakaarotia rānei. Kāhore i te rerekē ka pā ana ki te reo. Ahakoa ko wai te hunga e kōkiri ana i ōna ritenga, he mahere rautaki tāna. Anei kē pea te pātai i hua ake ki ahau i te hui a ngā Huia Kaimanawa o tāinahi ake nei, ‘Āhea rā anō tātou rongo ai, e kao ai, e kite ai i ngā hua o ngā rautaki nei?’ I mua i te putanga o ngā whakatau, kua horaina mai anō he mahere hou. Tēnā pea koinei te mahi ina tūpono whakatau ana te takirua, te takitini manu huia ki tētahi moka o te ngahere. Ka tīmata ana te ketekete, i te mutunga ake, kua hora he mahere rautaki. He aha i kore ai mō te hui o Whiringa-ā-nuku nei? Mehemea he wāhi o te hui i āhua tanuku te kaupapa, ko tērā o te whakarongo ki ngā whāinga a tēnā me tēnā o ngā manawa kāwanatanga kua tohia hei kawe ake i te kaupapa. Matea ana te nuinga ki te taki ake i ngā mea kāhore ia e āhei ki te mahi, i te toko ake i ngā tikanga i tairanga ai i a ia te reo, i kapi ai ngā whārua e tapoko atu nei te rahi o tō tātou iwi. Mahue ake ana mōku ko ngā rongo mō ngā mahi kau ake i roto i ngā hapori. Ko ngā mahi e pīkautia mai rā e te iwi i runga i tō rātou ngākaunui ki te reo i waenga ake i a rātou, hei hiki ake i ngā mahara o te hui. Tāpiri atu ki tērā, ko ngā tini mahi i whakaarahia mai i tua ake o te hui, mīharo kau ana. Ko te wāhi i pāpouri rawa pea au ko te poto o te wā i tukua ki te kōwhiri i ngā whakaaro o te hui, mō te whakatairanga tonu i te reo. Pai kē mēnā i tū taua wāhanga o te hui i te ahiahi o te rā tuatahi, ka waiho kia mīrere noa i ngā hinengaro mō te pō, ka kao ake ai i ata mutunga. Ahakoa anō rā tērā, kei te mīharo tonu ki ngā whakaaro o te iwi i puta i te rā mutunga. Kia tahuri ake au ki te wāhanga tuku tohu nei. Ina hikina e tātou ngā whakaaro ki ngā taumata o te Huia Kaimanawa, kia āhei anō ki taua paerewa ngā mea e tohia. Koia te marewa ki te rangi o ngā aumihi ki a Tīmoti Kāretu, ki tō tātou kuia, ki a Mate Kaiwai, me Ngāti Raukawa ki Raro. Hei whakaoti ake i aku kohinga whakaaro, kei te rongo tonu au i te reo o te kuia rā, o Mate Kaiwai, e kawe atu rā i ō tātou whakaaro ki a Tīmoti, te kaha, te mārama, me hāngai tonu ki te tangata. Ko wai i mōhio mō te rahi o tātou i reira, ko tana reo mutunga tērā e rongo ai tātou. I muri noa nei ka rongo au i karangahia e ia tana whānau, ka pēnei te kī, ‘Kua oti i ahau ngā mea katoa i pīrangitia e au’. I muri ka moe i tana moe, tē whakaarahia. E kui, e Mate, moe mai rā. Mereana Selby (Te Wänanga o Raukawa), Erima Henare (Toihau, Te Taura Whiri i te Reo Mäori), Pania Papa (Ngäti Korokï – Kahukura, Ngäti Mahuta), Evelyn Tobin (Te Puna Mätauranga o Aotearoa) 1010 Whakamänawa reo, whakamänawa tangata, whakamänawa tangata, whakamänawa reo! nā Charlie Tepana, Pouwhakahaere Kaupapa Reo i Te Poari Matua o Raukawa He whakamärama mö te pö tuku taonga a Te Poari Matua o Raukawa, 2009 Ki te whakanuia tōna reo, ko tōna ope tāngata hoki e whakanuia ana. Nei anō te āhua, ki te whakanuia ōna kaimanawanui, ko tō rātou nā reo hoki e whakanuia ana. I tū ai te takunetanga nei i te tāone o Tokoroa, me kī rā, i te pokapū o Raukawa. I te ahiahi o te rua tekau mā ono o Mahuru, rarau mai ana te tini me te mano ki te whare hui o Te Wānanga o Aotearoa. Kī katoa te whare rā i te tangata me te wairua uruhau hoki, nā te hanga papai o tēnā, nā te ātaahua hoki o tēnā me ngā ingoa nui i rārangitia ai i runga i te hōtaka o te pō. Kua toru tau tēnei kaupapa e tū ana. I reira ngā whītiki o te kī, ngā waewae takahi o ngā marae ātea katoa o Raukawa. I tautokona nuitia hoki te pō e te hapori, e ngā pakihi, e ngā kaimahi o ngā kaunihera me ngā reo irirangi, me ngā kaitā o ngā niupepa. I tae hoki ngā pouwhakaako o ngā kura me ngā kōhanga reo. Waihoki, nā rātou ngā tamariki i hari atu kia kitea ai e tērā whakatupuranga te painga o tō tātou reo Māori me ōna tikanga, me te eke anō ki ngā taumata i wawatatia ai e te iwi. Otirā, i tae atu ā mātou manuwhiri hei kawe atu i ō rātou whakaaro mō tēnei mea nunui, mō te whakarauoratanga Te Wiki o te Reo Mäori 2009 Te Hapori Whānui Betta Electrical ki Tokoroa Ngā Rōpū Kāwanatanga Te Whare Pukapuka o Waikato ki te Tonga, ki Tokoroa Te Hunga Whakaako Te Kura Tuarua o Tokoroa Te Ao Pāpāho Te Niupepa o Waikato ki te Tonga, ki Tokoroa Te Manawa Whakaü Te Hunga Whakaako Te Kura Kaupapa Māori o Te Hiringa Te Hapori Whānui Te Wakaiti Tōku Tūrangawaewae Te Marae o Whakamārama Ngä Tohu Motuhake Te Pātaka Kōrero – Te Hunga Uiuia Haonakaha Grace Ihapera Bella Roycroft Ripeka Springer Rautaki Reo ā-Marae Te Marae o Pikitū Te Marae o Tangata Ngä Tohu Rangatira Te Wiki o te Reo Māori 2009 Te Whare Pukapuka o Waikato ki te Tonga, ki Tokoroa Te Manawa Whakaū Te Marae o Whakamārama Te Tohu Rangatira Wiremu Barret Te Marae o Whakamärama - Ngä Tohu Reo Mäori a Te Poari Matua o Raukawa, 2009 o te reo. Nā reira, i kitea, i rangona e Raukawa whānui te hōhonutanga me te whakahirahiratanga hoki o ngā tini kaupapa o te reo, arā, i ā te hunga kaikōrero i whakaatu ai. Ko Ruakere Hond tētehi toki nō Taranaki, nāna i whakarangatira te pō i tana taenga atu. I pērā hoki a Rangi Nicholson nō Raukawa ki te Au o te Tonga rāua ko Sharon Armstrong o Te Taura Whiri i te Reo Māori. 1111 Wä: Te 30 o Oketopa ki te 1 o Noema 2009 Wähi:Te Whare Wänanga o te Salvation Army, Collaroy, Poihäkena Kauria atu rā te Moana Tāpokopoko-a-Tāwhaki Tau atu ki te whenua o Te Pāpaka-nui-a-Maui Tūrangawaewae o te mōrehu iwi Moemoeā Takahia rā te paringa i Rangihou Te tūtakitanga o te Māori ki te Hāhi Mihingare I kawea mai rā Tū ana Te Ataarangi hei tauawhi i te hunga manako nei Kia puta te reo o ngā tīpuna kua mene ki te pō e … Marū ana te papa i te whakaekehanga o te whānau Ataarangi ki runga o Rangihou. Nā ngā tamariki o te pēne Rātana mātou i ārahi tae noa ki te whakataunga a te iwi Moemoeā, arā, te tangata whenua. Koia nei te hui tuatahi a Te Ataarangi kia tū ki waho atu o Aotearoa. Nā te pōwhiri mai a te whānau o Poihākena ka tukua te taonga, arā, te waka huia a Te Ataarangi ki a rātou i te tau 2008. Ko te pātere i runga ake nei he mea tito hei maumahara ki te hononga tuatahi a te Māori ki te Hāhi Mihingare, te kura tuatahi hoki i whakangūhia ai ngā tamariki a ngā rangatira Māori ki ngā tikanga o te hāhi. Ko Rangihou te wāhi i tū ai te kura nei. Ko te ingoa kua tapaina e te whānau Ataarangi o konei mō Ahitereiria, ko te Pāpaka-nui-a-Maui, ā, ka noho tēnei hei ingoa rohe, mō nga peka ka tūpono te hiahia whai i te kaupapa o Te Ataarangi. Nā tēnei haerenga kātahi anō Te Ataarangi ka noho tahi, ka kai tahi, ka moe tahi ki te wāhi kotahi. Kei whea mai ki tēnei āhua! Ko ngā hui e whakahaerehia ana ki Aotearoa nei, ka nōnoho ngā rohe ki marae kē, kāhore e whai wā ki te āta noho tahi, ki te āta korero, ki te āta whakawhitiwhiti whakaaro. I tua atu i te kitekite i ngā whanaunga kua tangata whenua kē ki konei, i tau mai he hunga o Piripane e pīrangi ana ki te whakatū i Te Ataarangi ki reira. Ko wai ka hua, ko wai ka tohu, mēnā ka tutuki ō rātou moemoeā. Iwa karaka i te ata Rātapu ka hikina e Tāmakimakaurau te taonga, ka hoki ki te kāinga. Hei te tau rua mano tekau ka tū te Hui Whānui ki Tāmaki. Hei kōpani ake i tēnei pūrongo, me mihi mārika ki te whānau o Poihākena, ki tō rātou māia ki te tono mō te hui, ki te wairua o te hui, ki te manaaki, te atawhai, me te ngāwari o tērā noho. Kei runga noa atu koutou! Te Hui Whänui a Te Ataarangi ki te Päpaka-nui-a-Mäui nā Rahera Shortland, nō Ngāpuhi Te iwi Moemoeä me te röpü o Te Ataarangi ki Poihäkena (nä Hënare Ngaia tënei whakaahua) 12 He pänui 12 Kua tata ki te rua tekau mā rima tau a Waldo Houia e mahi ana ki te Whare Wānanga o Waikato. Nō te marama o Whiringa-ā- rangi i wehe atu ia ki te Whare Wānanga o Awanuiārangi. He mihi tēnei ki a ia nā Tom Roa, Pou Reo o te Whare Wānanga o Waikato. ‘Mai ea te tupua, te tawhito! I haere mai koe i te whakaotinuku, i te whakaotirangi’ Nā tō hoa piritata, nā Rewi Panapa koe i tapā ai ki te ingoa ‘Waratau’ i tō tatūnga mai ki roto i a au, i a Waikato- Tainui i te tau 1984. I roto i ā kōrua mahinga ngātahi ki Te Rōpū Reorua, koutou o taua akoranga i raro i a Mikaere Hollings, ka tau ai tō wairua ki tēnei takiwā, otirā, ki Te Whare Wānanga o Waikato. Ka mutu ko tōu whakaahua tērā ka kōwhiria hei kanohi kitea mō Te Whare Wānanga o Waikato me ōna pānui! Ka tika te kōrero a te marea mōu - he tupua! he atua! he taniwha! I haere mai koe i tōu nā ūkaipō, mai i a Ngāti Uepōhatu, i a Ngāti Porou. Ko te whakapaunga tērā o tō kaha mō tō iwi Māori te take, otirā mō tō reo Māori, te reo rangatira o ngō tūpuna mātua. Nāu rā ngā huarahi whakaora i te reo i whakapāpāoho ki te motu, ki ngā tōpito o te ao. Nāu rā te waka o te whakaako reorua, rūmaki reo hoki, me ngā kaupapa ‘ringikuihi’ o roto, nāu i whakatere ki taiwīwī, ki taiwāwā, ka tau. Waratau, kāore e ea i roto i ēnei kupu ruarua kau te nui o te mihi o te ngākau ki a koe! Mai i ngā mihi a ngō hoa mahi, a ngō ākonga ngā kōrero mōu. Mō tō motupaika – me te kore e whakapono o tēnei reanga mōna, mōu me tō ‘eke’ motupaika! Mō te roa o ngō makawe – ko taua kore e whakapono anō! Mō tō tūturu whakapapa Māori – ka tika ngā kōrero a tō whaea, kei pōhēhē te tangata he mea whānako kōrua ko tō tuahine i te hōhipere, he kiritea rawa! Kua pau te rua tekau mā whā, tata ki te rua tekau mā rima tau, kāore anō kia ngata te hemokai o ngā hoa mahi, o ngā ākonga o Te Whare Wānanga o Waikato, he oti rā, o tēnei iwi o Waikato-Tainui ki a koe. He oti rā te whakapono a tō hoa a Katerina, nā te whakapau o ngō kaha ki te whakatutuki i ngā mahi mō Te Whare Wānanga me āna pānga ki te hapori, otirā, ki a au ki a Waikato-Tainui, kei ētahi wā, kua kore te tangata e mahara kei whea tana kāinga! E te tau! He tīhaehaenga ki te ate nō tō wehenga i a mātou, mō mātou, mōu tahi. Ka pai kua riro i a koe te mahi āwhina i te hunga kaiako reorua o tō Tai Rāwhiti mō Te Whare Wānanga o Awanuiārangi. E te hoa, ko tā Te Awanuiārangi, he kata, kua riro i a rātou ngā pukenga o tō autaia! Ko tā mātou o Waikato, he tangi ki te manu kua rere atu nei i waenga i a mātou – taukuri e! Hei kai māhau te whetū! Hei kai māhau te marama! E rere te manu ki te mau i te rau o te aroha ...! Waldo Houia – He mihi nā Tom Roa, nō Waikato-Tainui 2010 Kura reo Ki Waimärama 10-15 Kohitätea Wāhi: Te Whare Takiura o Kahungunu Utu: $250 pakeke, $75 tamariki Haere ki: http://www.korero.maori.nz Tau waea: (06) 87 85 600, 021 024 00145 Īmēra:helenbarlow12@xtra.co.nz Käi Tahu Kura reo 2010 17 - 22 Kohitätea Wāhi: Te Hapa o Niu Tīreni marae, Arowhenua Whakapā atu ki a: whetu. moataane@ngaitahu.iwi.nz mä Te reo 2010 29 Poutüterangi Ka tuwhera te rauna tahua Ka KaTi ngä PuKa Tono ä-PePa 23 Paengawhäwhä Ka kati i te 5 karaka i te ahiahi. Ka KaTi ngä PuKa Tono ä-iPurangi 07 haratua Ka kati i te 5 karaka i te ahiahi Tau waea kore utu:0800 628 373 Īmēra: mtr@tetaurawhiri.govt.nz Whārangi ipurangi: www.ma-tereo.co.nz maTariKi 2010 14 Pipiri Te WiKi o Te reo mäori 26 höngongoi – 01 hereturikökä He Puka Aromatawai mö He Muka Hakihea, 2009 Kua raua atu ki te pae ipurangi nei www.koreromaori.co.nz tētahi rārangi pātai e mōhio ai te Taura Whiri i te Reo Māori e pēhea ana ngā whakaaro o te hunga pānui i a He Muka, arā, e pai ana rānei, e rerekē ana rānei, e pēhea kē ana rānei. Whakakīia mai koa te puka aromatawai nei.