1 Putanga 23 (3) 2010 Köanga He Pitopito Körero nä Te Taura Whiri i te Reo Mäori I ēnei marama nei, kua kaha ake te aro nui a Te Taura Whiri i te Reo Māori ki te noho mātāmua mai o āna pīkaunga mō te whakarauora i te reo Māori ki te ārahi i te motu, ki te kōtuitui hoki i ngā mahi a tēnā, a tēnā. Ahakoa ngā mahi ka taea e te tari ki te tautoko i te kōrerohia o te reo Māori me te tautoko i ngā mahi whakawhānui i tēnei, e mōhio ana ia kei tari kē, kei ngā iwi, kei ngā hapori kōrero Māori kē te taha whakatinana. Kāore e tohaina ana ki Te Taura Whiri i te Reo Māori ngā pūtea e taea ai e ia te tautoko te taha whakatinana e pīkauria ana e te iwi nui tonu, puta i te motu. Ka mutu,ehara tērā i tāna mahi. Kei ngā kāinga, kei ngā marae me ngā hapori whānui kē tērā mahi. E kore e taea e tētahi tari kei te puku o Te Whanganui-a-Tara kē e noho mai ana. Ko te wāhi kē ki Te Taura Whiri i He Oranga Nui kei te Reo Mäori te Reo Māori ko te ārahi i te motu, ko te kōtuitui i ngā whakapaunga kaha, ko te whakatairanga i ngā mahi e whai hua ana ki te whānui me te whāroa o te motu. I roto i ngā pakanga mō te whakarauora i te reo, he noho tōkeke kē tā Te Taura Whiri i te Reo Māori, me te ngoikore ōna i tana noho mai i waenga i ētahi taha e rua e whakataetae ana, e tukituki ana, arā, ko te iwi i tētahi taha, ko te kāwanatanga i tētahi. Tērā pea ka taea te kī he arawhiti kē Te Taura Whiri i te Reo Māori i waenganui i te tokorua nei, e paiherea ana hoki ki tētahi e te ture me te pūtea, e kaha ana anō te kukumea e tērā taha. Ka riro mā Te Taura Whiri i te Reo Māori e whakatau, e whakatairanga āna karere i runga i ngā rautaki matua a te tari, me te noho mātāmua mai o Te Reo i te Kāinga me te Reo i te Hapori. I ēnei marama tata nei kua aro nui te tari ki te kōrerohia o te reo me te ako i te reo. Ko tōna tauira o nā tata nei ko Te Mahi Kai, te kaupapa a te tari mō te Wiki o te Reo Māori o tēnei tau. Arā kē te whāinga e tika ana mā Te Taura Whiri i te Reo Māori, otirā mā ngā rāngai whakarauora i te reo, ko te whakapau kaha ki te whakapiki ake i te tini, i te mano e kōrero ana i te reo, me te eke anō o taua reo ki ngā taumata. Kei reira anō ōna tauārai e aukati ana i te auroa o te whai me te tautoko a te tangata i te reo, ka mutu e tohu ana ngā rangahau ko ngā tauārai matua ko ngā waiaro me ngā wheako ki te reo. Ahakoa te hanga tawhito o te whakaaro, kei te mau tonu ki tēnei whenua te whakapono, kāore he hua o te ako i te reo kua manawa kiore nei. Arā anō tētahi take e whakararu ana i te reo. He mahi nui te ako i te reo Māori, inā rā, me auroa rawa te whai a te hunga ka noho reo tuarua te reo Māori mō rātou. Ko te mahi nui ko te whai kia whakapono te iwi ki ngā hua mai o te oke tonu ki te ako i te reo, ki te whakaoho anō i a rātou ki ngā uara o te reo, ngā momo oranga kei roto i a ia. He taonga whakahira tēnei, e tika ana kia ako tātou, kia mōhio tātou ki tēnei reo. Mehemea he Māori koe, kātahi ka tino whakahira rawa atu! Ka taea pea te kī kāore e rerekē ake te noho a te tangata ki tēnei ao ki te ako ia i te reo Māori. Engari ka taea hoki te kī ka rerekē ake tāna titiro ki tāna noho ki te ao. Kei roto i te reo Māori ētahi ara e rerekē ai ngā whakaaro o te tangata, e āta whakatinanahia ai te huri o te noho ki te ao. Kei roto i tēnei āhuatanga te pono me te mātauranga o te reo – te kī taurangi ka rerekē ake koe, ka mātau ake koe. Mō te iwi Māori he tino taonga tēnei i te mea he hononga nui tēnei ki te kī a te tangata, he Māori ahau. Nā te Toihau, nā Ērima Hēnare nō Ngāti Hine Ngä kaihäpai i te reo i tö rätou hapori, arä, ko George Ihimaera, Tümuaki Tuarua o Te Kura Tuatahi o Ngä Iwi, ko Lysandra Stuart, Tümuaki Tuarua o Te Kura Motuhake o Sir Keith Park, rätou ko Natalie Hooker o Counties Manukau Sport - Ngä toa o te wähanga kura i Ngä Tohu Reo Mäori, 2009. Kua eke ki te wā e matapakitia ai ētahi o ngā whakatara kei mua i a tātou mō te wāhi ki te whakatairanga i te reo, inā rā, ahakoa te eke o te Wiki o te Reo Māori ki ngā taumata i wawatatia ai, kāore tonu te reo nei e poipoia ana e te ngutu o te marea. Nā Glenis Philip-Barbara, Tūmuaki Ihirangi He Oranga Nui kei te Reo Māori 1 He Kupu Whakataki 2 He Mihi nā te Minita 2 Te Wiki o te Reo Māori ki Countdown 3 Huia Te Reo 4 Me Auroa te Whai 5 Te Kura Reo ki Te Aute 6 Kua Ora i a Kōtuku Rerenga Tahi Ltd 7 E Aronui ana ki ngā Tohu Pukapuka Reo Māori 7 Te Taukaea Māori 8 Te Kāinga Kōrerorero 9 Ngā Tohu a Te Waka Toi 2010 10 Wairua 11 He Tohu Tō mō ngā Ingoa Ipurangi 11 He Pātaka Kupu 12 He Pānui 12 He Kupu Whakataki Te Taura Whiri i te Reo Māori Pouaka Poutāpeta 411 Papa 14 Investment Centre Te Ara o Ballance Te Whanganui-a-Tara 6140 Waea: 64 4 471 0244 Waea whakaahua: 64 4 471 2768 Ī-mēra: tereo@tetaurawhiri.govt.nz Pae tukutuku: www.tetaurawhiri.govt.nz He Mihi nä te Minita 2 Tuatahi, e mihi kau atu ana ki tōku whānau me ōku hoa i tae mai i Te Tairāwhiti me te motu whānui hoki ki te mau mai i a au ki konei ki Te Whanganui-a-Tara me Te Taura Whiri i te Reo Māori. E mīharo ana tō mātou tira ki te pōwhiri a te haukāinga. E hika mā, mai i taku tīmatatanga, tae noa mai ki te Wiki o te Reo Māori e tau nei, kua pokea au e te mahi. Ko te kaupapa mō tēnei tau, ko ‘Te Mahi Kai’. Ko ngā kōrero e rongohia ana, āe rā, he kaupapa e ngākaunuitia ana e te motu me te mōhio e nohotahi ana, e kaitahi ana te tini me te mano me te whakangungu hoki i tō rātau reo i runga i te hari me te koa. E piki haere ana ngā tāngata e ngākaunui ana ki te reo Māori huri noa i te motu. Ko te take kua pērā ai, kua oho te maha ki te kī he mea ātaahua tō tātau reo, he mea E mihi manahau ana i roto i ngā tini āhuatanga o te wā kua uwhia nei ki runga i a tātau katoa. Tēnā tātau e te iwi! I tēnei wā, e tautoko whānui ana te kāwanatanga, ā-tahua nei i ngā tini kaupapa reo Māori me ngā ratonga o ngā pokapū pērā i ngā kōhanga reo, i ngā kura kaupapa Māori, i ngā wānanga me ngā hōtaka e whai wāhi ai te reo Māori. Ahakoa tērā, kua whakaarohia e te kāwanatanga ka taea tonutia te whakapai ake ngā whāinga e wawatatia ana, te whakamahia o te pūtea me te taha whakahaere o te rāngai reo Māori nei. Nā konei, e tika ana kia arotakengia ngā whakaritenga o te Rautaki Reo Māori me te Rāngai Reo Māori, hei whakakaha ake i ngā whakahaeretanga me te arotahi whānui a te kāwanatanga ki ngā hua, kia hāngai pū ai ki te pūtea ka pau. Kua whakatūria tētahi Paepae Motuhake hei whakahaere i tēnei mahi. Ko Ahorangi Tamati Reedy tōna kaihautū, ko Rāhera Shortland, rātou ko Cathy Dewes, ko Pem Bird, ko Pania Papa, ko Toni Waho, ko Hana O’Regan ngā kaihoe. Mā Te Puni Kōkiri te Paepae Motuhake e āwhina. Tāria te wā ka kaha rongo kōrero koutou i a rātau mō te mahi nei. Kua tata te wā ka tū tērā kaupapa hirahira a Te Taura Whiri i te Reo Māori e kīia nei ko Huia Te Reo. E ai ki te Poari Matua o Te Taura Whiri, ko te tikanga o te whānau huia nei, he whakahuihui i a tātau mō te reo te take. Ka noho hoki ko te huia hei tohu i te taonga o te reo, hei whakatūpato anō i a tātau, kei riro te reo pērā i te huia. Nā reira, ko te reo karanga tēnei kia haere atu tātau ki Rotorua ki te Events Centre ā te 8 ki te 9 o Whiringa- ā-nuku 2010, me te whai whakaaro nui ki tēnei o ngā kaupapa mō tō tātau reo rangatira! Ā te Hātarei, ka tū te hui a Te Māngai Pāho me Ngā Aho Whakaari, ko ‘Te Ihi Rangaranga’, hei whiringa kōrero mō ngā āhuatanga katoa o te ao pāpāho, tae atu ki tōna reo Māori. Tākuta Pita Sharples, Minita mō ngā Take Māori ka taea e te katoa te whai atu, ā, he mea hoki e tohu ana i tō tātau mana Māori motuhake. Ko te mea nui mō tō tātau nei reo kia wahatia noatia – arā, whakamahia kei ngaro – ki a au nei ko te mahi tino nui i nāianei, ko te whakatōkia te reo i waenga i ō tātau hapori kia rite tonu tōna āhuatanga ki te hā o te tangata. 3 Tämati Coffey me ëtahi tamariki i te toa hokomaha o Countdown ki Grey Lynn, Tämakimakaurau i te Wiki o te Reo Mäori. Te Wiki o te Reo Mäori ki Countdown Koa katoa ana a Progressive Enterprises ki te whakanui i te Wiki o te Reo Māori ki te toa hokomaha o Countdown ki Grey Lynn, Tāmakimakaurau i tēnei tau. I tae atu te Toihau o te Poari o Te Taura Whiri i te Reo Māori, a Ērima Hēnare, rātou ko te Tūmuaki, a Glenis Philip-Barbara, ko te Tūmuaki o Te Kāhui Tika Tangata, a Rosslyn Noonan, me te Kaikōmihana o te Tari Whakawhanaungatanga ā-Iwi a Joris de Bres ki te whakarewatanga o te kaupapa nei, i whakatūria ai e ngā kaiwhakahaere matua o Progressive Enterprise. E ai ki a Peter Smith, Kaiwhakahaere Matua o Progressive Enterprises, “Ko te whakarewatanga tērā o tā mātou tautoko, o tā mātou whakanui i te Wiki o te Reo Māori, ā-motu nei. E hāngai pū ana te kaupapa nei ‘Te Mahi Kai’ ki tō mātou pakihi. Nā runga i tērā, kua matua whai wāhi tō mātou rōpū ki te whakanui i te Wiki o te Reo Māori i roto i ō mātou toa hokomaha.” Ki tāna anō, “Kotahi rau, e rima tekau mā rua ō mātou toa hokomaha. Tekau mā waru mano ā mātou kaimahi, huri noa i te motu. I whakapau kaha rātou katoa ki te tautoko i te Wiki o te Reo Māori.” I te Wiki o te Reo Māori ka tāngia tētahi tauira raranga i tā rātou rārangi hokohoko. Ka whakamāorihia ngā ingoa o ngā wāhanga kai, ka tāpirihia atu tētahi rārangi kai reo rua, me ngā waiene reo Māori ki ngā pānui hokohoko katoa, arā, mō Countdown, Woolworths me Foodtown. Ka whakamāorihia hoki ētahi o ngā kōrero a Richard Till i te rārangi Smart Shopper. Hei tā Peter Smith anō, “I te katoa o taua wiki, i ngā toa hokomaha katoa, i kitea ngā kupu Māori mō ngā kai o ia rangi, hei akiaki i ngā kaihokohoko ki te ako, ki te whakamātau i ngā kupu Māori. Kia waia rātou ki te reo Māori. I kitea hoki e ngā tāngata katoa o Aotearoa tā mātou whakanui i te reo Māori i roto i ā mātou pānui whakatairanga i roto i ngā niupepa, me te pouaka whakaata. I rongo hoki rātou i ngā whakamāori mō ngā kai o ia rangi i tō rātou taenga atu ki ō mātou toa hokomaha.” E mahi tahi ana a Progressive Enterprises me Te Taura Whiri i te Reo Māori kia ū te noho o tēnei kaupapa i roto i ā rātou whakahaere. Kia whakanuia te reo Māori i nāianei, ā ngā rā e heke mai nei anō hoki. 4 Huia Te Reo Huia Te Reo – Te Hötaka Mahi Ko Huia Te Reo te hui reo matua o te tau. Hei konei ka wānangahia, ka whakatairangahia, ka whakanuia te reo me āna tini kaupapa e haere ana huri noa te motu. I tēnei tau ka tū a Huia Te Reo ā te 8 – 9 o Whiringa- ā-nuku ki te Energy Events Centre ki Rotorua. Ko te kaupapa matua o te hui i tēnei tau ko ‘Te Reo i te Kāinga, te Reo i te Hapori’. E toru ngā wāhanga o te hui nei, arā: Ngä WhakaaturaNga Hei konei ka pōhiritia ngā tūmomo rōpū huri noa i te motu kia whakaatuhia ā rātou kaupapa whakahaumanu i te reo Māori. Ngä körero me Ngä röpü mahi Hei konei ka wānangahia ngā rautaki whakawhanake i te whakahaumanutanga o te reo Māori. Ko ngā kaikōrero matua ko Ērima Hēnare (Toihau o Te Taura Whiri i te Reo Māori), ko Evelyn Tobin (Te Ohu Tautoko o Mā te Reo) rātou ko Tūkiterangi Renata Curtis nō Te Arawa. Ko tāna kaupapa ko te Mahere Rautaki Hapori, Mahere Rautaki Kāinga. Ka whakatūria ētahi rōpū mahi mō te katoa, ā, ko te aronga nui ko te reo o te kāinga me te hapori. Ngä tohu reo mäori Ka tū tēnei wāhanga o te hui ā te pō o te Rāhoroi 9 o Whiringa-ā-nuku. Ko te kaupapa matua ko te whakanui i te hunga kua whakapau kaha ki te whakatairanga i te reo i te kāinga, i te hapori, i te pāpori whānui anō hoki. Ko ngā wāhanga ka whakanuia i tēnei tau ko: • ngā pakihi • ngā kaunihera me ngā pokapū ā-kaunihera • te ao pāpāho – auraki • te ao pāpāho – Māori • ngā hangarau mōhiohio me ngā hangarau whakawhitiwhiti whakaaro • te ao mātauranga – auraki • te ao mātauranga – Māori • ngā whare wānanga • te Wiki o te Reo Māori (26 o Hōngongoi ki te 1 o Hereturikōkā 2010) • te hapori • ngā tari kāwanatanga • ngā tānga E 3 hoki ngā tohu motuhake ka tukuna ā taua pō. Kaupapa: ‘Te Reo i te Kāinga, te Reo i te Hapori’ rämere 8 WhiriNga-ä-Nuku 8.30am Pōwhiri, Energy Events Centre, Queens Drive, Rotorua 9.30am Kua tuwherahia te hui 10.00am ‘Ka Auroa te Whai’ – E whakaatu ana i te whakawhanaketanga o ngā rautaki reo Māori a Te Taura Whiri i te Reo Māori i ngā rua tekau mā rua tau kua pahure. Ērima Hēnare, Toihau – Te Taura Whiri i te Reo Māori 12.30pm ‘Mā te reo, mō te reo, me te reo’ – Ngā mahi whakawhanake i te reo Māori ā-iwi, ā-hapū, ā-whānau, ā-hapori, i ngā tekau tau kua pahure. Evelyn Tobin – Te Ohu Tautoko o Mā te Reo 2.30pm ‘Māhere Rautaki Hapori, Mahere Rautaki Kāinga’ Tūkiterangi Renata Curtis, Te Arawa rähoroi 9 WhiriNga-ä-Nuku 6pm – 12pm Ngā Tohu Reo Māori Mō ngā tīkiti ki Ngā Tohu Reo Māori whakapā atu ki a catherine@tetaurawhiri.govt.nz Waeahia rānei ki 0800 628 373 Ngä taitamatäne o Te Kura Mäori o Porirua e whakatau ana i ngä manuhiri o Huia Kaimanawa 2009 ki Te Rauparaha Arena, Porirua. 5 Me Auroa te Whai He wāhanga hou tēnei o He Muka e whakatairanga ana i te huarahi o tētahi o te hunga kua kaha whai kia pakari tōna reo Māori. Kia matatau te tangata ko te reo Māori tōna reo tuarua me auroa te whai – e kore tōna reo e eke mā te waewae tutuki noa. Hei konei ka rongo tātou i ngā kōrero o tētahi kua eke ki tētahi taumata i tana whai i te reo Māori. Ingoa: Kingi Kiriona Iwi: Ngāti Kahungunu, Ngāti Ruanui, Ngāti Apa Mahi: Kaikawe Kōrero mō Te Karere Tērā te wā, ko te reo Māori te reo kōrero kotahi o taku māmā. He mea whakapakeke e ngā tīpuna o te ao Māori, i tētahi papa kāinga kōrero Māori, i ngā wai whakatere īnanga o Te Wairoa. Heoi, ka hao ana te rangatahi, kātahi a ia ka warea kē atu ki ngā raiti pūaho o te taone nui o Pōneke. Ki reira, pau monemone ai ki ōna tikanga ki ana tāngata, me te āki nui o te wā, kia whāia te mātauranga o te Pākehā. Kīhai i roa, i waimemeha te ārero tīpuna i a ia. E pēnei noa ake ana he tīmatanga kōrero māku, i te mea, nō roto i te ngaro o taku māmā, ko te kunenga, ko te whiwhia, ko te rawea o te au roa mō te reo Māori e kōrerotia nei. I noho ko au te kāinga rua mō tōna āritarita ki te reo rangatira. Nō taku whānautanga mai, kātahi anō te kōhanga reo ka tīmata. Māringanui, ko au tētahi o ngā pēpi tuatahi i tō mātou, i Taniwaka. I taua wā, he kuia ō mātou kaiako. Ā, ko te momo o te reo i a rātou, uaua ana te kitea i ēnei rā. Nā te pūhou o te kaupapa o te kōhanga reo, me te tokomaha o te hunga rite tonu ki taku māmā, i ngākau tapatahi te noho a ngā Māori o te taone. Nō konā, i tapatahi ai hoki te noho o te reo ki roto i ahau. Kāore anō tēnei mea te kura kaupapa i tae ki Tāmakinui- a-Rua. Nō reira, i te otinga o te kōhanga, he mea tuku ahau ki te kura Pākehā. Me kore ake i te rua haora i te wiki, mō te rua tau noa iho, i pōrutu tonu ai te au roa o te reo Māori i ahau. Mā hea mai hoki i te kaha o aku mātua ki te whai i ngā hui Māori, i ngā marae maha o te motu, i ū ai taku Māoritanga. Heoi, nōku i te kura tuarua o Tāmakinui-a-Rua kātahi anō ka hōhonutia atu ngā poupou o te whare kōrero. He matatau nō taku kaiako a Mārama Kingi ki te kārawarawa mō te reo Māori me te reo Pākehā, i taonga ai taku titiro ki te whakatakoto i te kupu. Anana! Nāna ahau i whakaputa hei toa i te whakataetae mō Ngā Manu Kōrero i roto i ngā reo e rua. Ko ngā whakamakaurangi o te kupu he mea whakairo i Te Whare Wānanga o Waikato e te hunga whatiwhati kī pēnei i a Te Kāhautu Maxwell, i a Pānia Papa, rātou ko Tīmoti Kāretu. Ia rā, ia rā, whakamāpuna ai ahau i te kaha o te manaakitia mai. He poai nō tētahi taone kei tua o tāwauwau, kīhai i nanaiore i Te Aho Matua. Me te aha, ko te reo Māori, he reo tuarua ki ōna mātua. I nāianei, ko taua poai, he tauira tuatahi nā Te Panekiretanga o te Reo Māori, he kaiako i tētahi o ngā kapa haka toa o Tainui, he amohau hoki mō te reo Māori ia rā, ia rā, i te hōngere pouaka whakaata matua o Aotearoa. Nā, mai i te kore ki te ao whānui, mai i ngā kuia o te kāuta, ki ngā tāngata tino ahorangi o te iwi, he au roa te whai. He aha koa, he au roa tēnā me whai. Me i kore i pērā, kua rite ki te moa, te reo i ōhākitia e ōku tīpuna. Tōku reo, tōku māpihi maurea, te mounga i hoe ai te waka i ngā ngarungaru tukituki kau ana i taku manawa. E kōkōia e ara e! Kingi Kiriona kaikawe körero Te Karere, Te Reo Tätaki. 6 Te Kura Reo ki Te Aute Nō te 4 o Hōngongoi 2010 ka tau petapeta atu ngā uri o te tī, o te tā ki te papa o Te Kāreti o Te Aute ki te Kura Reo ā-motu, ki te kura whakapakari ake i te reo Māori me ōna āhuatanga katoa. Mutu ana te pōwhiri, ka kai tahi. I konei ka mākona a tia i tā te wahawaha whiunga mai o te kai, engari a hinengaro, ka pīkoko tonu. Whai muri iho i te whakarōpūtanga o ngā tauira me ngā mihimihi, kotahi atu mātou ki te kaikaru i runga i te whakaaro he nui tonu ngā mahi kei mua i te ropi. Nā Hēmi Kelly nō Ngāti Maniapoto I taua pō tonu ka patapata mai te ua, ā, urupū ana te heke o te ua i te rangi mō te roanga atu o tā mātou noho ki Te Aute, tē tāhaohao ake ai. Ahakoa tērā, i pūāhuru tonu tā mātou noho ki te kura rā, ā, ko te hatete o te reo tērā i tutūngia e āna pononga kia muramura ai hei whakamahana i a mātou. I ia ata, i ia ahiahi ka toro atu ngā rōpū ki tētehi kaupapa hou, kātahi ka mākona te pīkoko o hinengaro i ngā kupu makatika o raurangi, i ngā rerenga kōrero hoki a rūruhi mā, a koroheke mā. Kāre i ārikarika te whiunga mai o ngā kai hei timotimo mā hinengaro. I ētehi wā ka kaha te whāngai mai a ngā kaiako i a mātou kia apuapu, kia kī puru noa te waha, ā, i ētehi wā ka waingōhia ake te whāngai mai kia āta rongo ai mātou i te namunamuā, i te tāwhara o ngā kai kia tino manawareka ai. He rite anō ki te ua urupū i heke i te rangi hei whāngai i te papa. I ētehi wā ka ua makerewhatu, kia waipuke noa ai te whenua, ā, i ētehi wā ka tātāriki iho te ua kia pipī ai te wai ki te uma o Papa. Ko tēnei taku taenga tuarua atu ki ngā kura reo. Kātahi te kaupapa pai ko tēnei mō te ākonga e pūnganangana ana ki te reo Māori. He huarahi ka taea e ia te whakapakari tana reo, otirā, te whakawhānui, te whakarētō ōna mōhiotanga ki te reo Māori. Inā te nui hoki o ngā haumāuiui i puta mai i tēnei haerenga ōku ki te kura reo. E rua ngā take i mānenei tai aku hokinga atu ki te wā kāinga. Tuatahi ko te reo, me uaua ka whai wāhi e taea ai e au te noho rūmaki i te reo i te ao, i te pō. Tuarua ko te whakawhanaungatanga, te whai hoa kōrero Māori. E tika ana tā Tīmoti i kī ai, ‘He hoa tautauāmoa i te ekenga mai, he hoa piripono ka hoki atu nei’. Ka noho tonu ko te reo Māori hei taura rangitāmiro i āna pononga, e whanga ana kia tae mai te kura reo e tū mai nei kia ngata anō ai taua pīkoko o hinengaro. Katoa ngā kaupapa i tēnei kura reo i rawe. He pai nō ngā mātanga reo i tū hei kaiako i pērā ai. Tēnei te tuku i te matihere ki a koutou, ki te kāhui kaiako, nā koutou mātou i whāngai ki tā te rangatira kai. Ko ngā huruhuru i rere ai Te Kura Reo ki Te Aute nō Mā te Reo. He wä ki te mahi . . . . . . he wä anö mö te ngahau i te Kura Reo ki Te Aute. Nä Leslie Tiki Koroheke ënei whakaahua. 7 Kua tīkina atu te kōtuku hei tohu haumaru mō ngā rauemi kaupare taotū take–kore a Allan Brown (Rongowhakaata, Ngāi Tāmanuhiri, Ngāi Tūhoe me Ngāti Kahungunu). Ia wiki, e tata ana ki te 300 ngā tamariki ka whara i ngā momo aituā ka pā ki a rātou i te kāinga, i te huarahi, i ngā wāhi kaukau anō hoki. Hāunga te nui o tēnei hunga, ko te raru nui, he momo whara ēnei ka taea te kaupare atu. He kaipatu ahi a Allan Brown, ā, he nui ngā taotū take- kore kua kitea e ia i roto i ngā tau. E ai ki a ia, he nui ngā tamariki Māori ka pāngia e ēnei momo aituā pērā i te weranga, i te kōhuatanga, i ngā tūmomo whara o te haere mā raro, me te haere mā runga motokā hoki. Ko te tūmanako mā āna pukapuka me āna panga-honohono hei tautoko i ngā hōtaka whakaako haumarutanga ka kore ēnei momo aituā e pā atu ki ngā tamariki. Kī tā Allan, “Mā te waihanga rauemi ka ako ngā tamariki ki te tāutu i ngā mōreareatanga i roto i tō rātou ao, ā, mā tērā, ka taea te kaupare atu ēnei āhuatanga kia kore ai ēnei taotū take- kore e pā atu ki a rātou.” E toru ngā pukapuka kua oti i a Allan ko Kua Ora i a Kōtuku, Whakawhiti i te Huarahi, Waenganui i ngā Haki me Ka Mau te Wehi Kōtuku. I tukuna ngā pukapuka tuatahi nei ki ngā kōhanga reo o Te Hiku o te Ika, engari ko te wawata ka whiwhi ngā kōhanga reo me ngā kura tuatahi reo Māori katoa i ngā rauemi nei. Kua hopukina hoki ngā kōrero nei ki te kōpaepae hei whakapāho ki te reo irirangi, hei whakarongo rānei mā ngā kōhanga reo, me ngā kura tuatahi. I whakawhiwhia a Allan ki tētahi tohu i Ngā Tohu Reo o He Huia Kaimanawa i te tau 2009 mō te kōpaepae o āna pukapuka. Nā tāna kamupene, a Kōtuku Rerenga Tahi Ltd, i whakaputa ngā rauemi katoa. E ai ki a Allan, ‘”Mā te wā ka tutuki tō mātou wawata, arā, kia pakari te reo Māori me te āheitanga o te hapori ki te tiaki i a ia anō.” E ono anō ngā pukapuka ka whakaputahia e Kōtuku Rerenga Tahi Ltd. Tirohia te pae ipuranga www.healthandsafetypuzzles.co.nz mō ngā rauemi a te kamupene nei. He kaupapa tēnei kua tautokona e Mā te Reo. Kua Ora i a Kötuku Rerenga Tahi Ltd E Aronui ana ki ngä Tohu Pukapuka Reo Mäori He mea ā-pōti tūmatanui te toa o Ngā Tohu Pukapuka o Ngā Kupu Ora Māori. He kaupapa tēnei nā te Whare Wānanga o Te Kunenga ki Pūrehuroa. I riro te tohu reo Māori ki te pukapuka, People of the Land: Images and Mäori Proverbs of Aotearoa New Zealand nā Tā Hirini Moko Mead rāua ko Reiri June Te Rina Mead. He pepeha, he whakaahua kei ngā whārangi o tēnei kōnae aronui hei matapihi ki te whakaaro Māori, ki tōna ao me ōna tikanga. I whakahaerengia te pōti mō ngā tohu pukapuka nei i te Wiki o te Reo Māori, ā, kua pūruatia te nui o ngā pōti mai i tērā tau. E ai ki te Kaiwhakahaere, a Spencer Lilley (Kaihautū Māori o te Whare Pukapuka i Te Kunenga ki Pūrehuroa), “I ahu mai te kaupapa nei, te whakanui i ngā tuhinga Māori, mai i te koretake o ngā tohu pukapuka nui a te motu. E koa ana te ngākau ki te aronui a te iwi me te kounga o ngā pukapuka e whakataetaehia ana. Ahakoa he iti ake ngā wehenga pukapuka ki tērā tau (e ono i tērā tau), he rawe te kite i te pūruatanga o ngā tau pōti.” I whiria ngā pukapuka kaupapa Māori i whakaputaina i waenganui i a Pipiri 2009 me te 30 o Haratua 2010 hei whiringa whāiti i roto i ngā wehenga pukapuka e whai ake nei: ngā toi, te waihanga me te hoahoanga; te haurongo; hītori; me te reo Māori. He mea whakaputa te tino pukapuka reo Māori nā Robyn rāua ko Brian Bargh o Huia Publishers i Pōneke. I whakanuia ngā pukapuka toa ki Te Kunenga ki Pūrehuroa i te Rā o te Reo Māori i te 14 o Mahuru. People of the Land: Images and Mäori Proverbs of Aotearoa New Zealand nä Tä Hirini Moko Mead räua ko Reiri June Mead (Huia Publishers). 8 Te Taukaea Mäori Ki konei tuia anō ai te taukaea Māori e! Uia te ruranga, te manuhiri me ko wai? Māku rā e paremata, Te Panekiretanga e! Ko te tira haere e mihi nei ki ngā iwi ki ngā matamatahuānga o Te Moana a Kiwa Mō te manaakitanga, ko koutou kei tawhiti! Heoi anō rā, ko tāku he whakamānawa, he ngongoro He purapura i ruia mai i Rangiātea I ahu mai i Tawhiti nui, i Hawaiki pāmamao Tēnei te auraki mai nei ki aku taketakenga ki konei tuia anō ai te taukaea Māori e He waiata nā Te Pairi (Leon) Blake rāua ko Pānia Papa Nā te tira haere o Te Panekiretanga o Te Reo ngā pārahi o ngā tūpuna i takahi kia auraki atu ki Tahiti nui, ki Ra’iatea, ki Hawaiki pāmamao i ngā wiki kua taha ake nei. Ko te hunga kua puta te ihu i Te Panekiretanga o Te Reo mai i tōna tīmatanga i te tau 2004 i haere i raro i te maru o te tāiki ngāpara o te reo Māori, o Tīmoti Kāretu. Ka uia te urupounamu – he aha te tino pūtake o te haere? Kei te rārangi whakamutunga o tā mātou waiata te kupu paremata. I auraki te tira nei ki ngā moutere o Te Moana- nui-a-Kiwa ki te tuitui, ki te whakarenarena anō hoki i te taukaea Māori ki ngā Maohi o Tahiti me ngā Maoli o Hawai‘i. Ko te reo te tūāpapa me te tuanui o te haerenga. Ahakoa huri mātou ki whea, i ū ki te reo Māori hei reo kōrerorero i waenganui i a mātou anō. Mō te nuinga o mātou koinei te wā tuatahi kua ū ki te reo Māori anahe mō ngā wiki e toru. Ka toko ake te pātai, me puta rawa i Aotearoa kātahi nā ka taea tērā roa o te kōrero Māori anahe ki te hunga e mōhio ana ki te kōrero Māori? Heoi, i tāwāhi ko te tino hua i puta, ko te aro mai, ko te tahuri mai anō hoki a ō tātou whanaunga o ngā moutere i toroa ai e mātou ki tēnā ū ki te reo hei āhuatanga whakamīharo ki a rātou. Ehara hoki i te mea ko rātou anahe i whakamīharo. Ka piki ana mātou ki ngā waka rererangi o Tahiti, o Hawai‘i hoki, ko te reo taketake te reo ka mātua rangona e ō mātou taringa. Koia hei whakamīharotanga mā mātou. Ahakoa he tokomaha ake ngā kaikōrero o te reo Māori i Aotearoa i ngā kaikōrero o te reo Tahiti me te reo Hawai‘i i aua moutere, he nui ake te kitea o ō rāua reo i ngā tohu kei ngā takiwā me te rangona o ō rāua reo i runga waka rererangi tēnā i te kitea me te rangona o tō tātou reo i tō tātou nei motu. E kīia ana me whakatā te tangata kia whai ngoi anō ai ki te mahi i ngā mahi kei mua i te aroaro. Māringanui kua pērā tēnei hokowhitu a te reo i te mea he nui tonu ngā mahi kei mua i te aroaro e renarena ai te taukaea o te reo Māori i waenganui i ōna anō iwi i tōna anō whenua. Ki te hoe! Mauï ki katau: Paräone Gloyne, Raukura Roa, Jeanne McLeod, Te Aro Moxon, Hïria Joe-Olsen, Leon Blake, Äwhina Twomey, Tämati Olsen, Charisma Rangipunga, Evelyn Tobin, Tiki Koroheke, Pänia Papa, Chris Winitana, Tïmoti Käretu, Wena Harawira, Justin Tipa, Ngähuia Wade, Jason King. Aroaro ä-kapa: Hana O’Regan, Tina Wickliffe, Tuirina Wehi, Tina Maree Kaipara. Nä Hïria Joe-Olsen tënei whakaahua i hömai. Nā Pānia Papa, nō Ngāti Korokī-Kahukura, Ngāti Māhuta. 9 Te Käinga Körerorero Suezanne Pohe, Ewan Pohe, Horiana Pohe rätou ko Anahera Pohe (kei mua). Ingoa: Ewan Pohe Iwi: Rongomaiwahine, Ngāti Kahungunu Rohe: Te Whanganui-a-Tara Mahi: Pouārahi Whānau KK Ngā tamariki: Horiana rāua ko Anahera Te roa e whai ana i tēnei kaupapa: E 2 tau Te take e whai ana mātou i te kaupapa Kāinga Kōrerorero: Kia whakaū te reo i roto i te whānau Pohe. Hei reo tuku iho nō roto i te kāinga mō ake tonu atu. Ko te reo te kaikawe o ō tātou tikanga. He aha ngā uauatanga? Ko te whakapiki i te reo ki te taumata e tika ana kia taea ai e mātou te kōrero mō ngā āhuatanga huhua o te kāinga. Waihoki, ko te rapu atu i ngā kupu mō ngā mea o te ao hangarau nei. Kua wareware i a tātou te reo ōpaki. Ehara i te reo o te kāuta anake, engari ko te reo o ngā rūma me ngā whaitua katoa o te kāinga. He mahi ā-hāpori tēnei. Ko tā māua mahi he whakakotahi i ngā whānau e pīrangi ana ki te whai i tēnei huarahi. Inā kē hoki, nō rātou te kaha me te manawanui ki te ū mō te wā roa. Heoi, he ongeonge tonu ngā rauemi reo e pā ana ki te hunga taiohi. Nō te tau 2005, ka tahuri Te Puni Kōkiri ki te rapu huarahi hei āwhina i ngā whānau ki te kōrero Māori i roto i ō rātou kāinga. Tekau ngā Pouārahi ā-motu ka whakatūria. Ka whakaritea kia tekau ngā whānau, ngā kāinga rānei, hei tiaki mā ia Pouārahi. Ko tā te Pouārahi he tuku whakamārama, he tuku rauemi hoki ki ngā whānau o aua kāinga me te āwhina i a rātou ki te hanga me te whai i tā rātou ake mahere whakamahi i te reo. Ko te whānau o Te Kāinga Kōrerorero i tēnei putanga, ko ngā Pouārahi o te rohe o Te Whanganui-a-Tara. He aha ngā painga? Ka ū te reo me ōna tikanga hei whakaruruhau mō tēnei whānau. Nā te reo i whakakotahi tō mātou whānau. He tūmomo āhuru mōwai ngā tikanga. Ka tautokona hoki ngā mahi o te Kura Kaupapa Māori i te kāinga . Ka renarena te taukaea i waenga te whānau, te hapū me te iwi Māori Ingoa: Suezanne Pohe Iwi: Ngāti Pākehā Mahi: Pouārahi Whānau KK I te whānautanga mai o āku tamariki ko te reo Ingarihi te reo i te kāinga. Ko Ewan te tuatahi ki te whai i te reo Māori. Kua eke ia ki tētahi taumata e taea ai e ia te tautoko te reo o ā māua kōtiro, ka whai hoki ko rāua. E 6 tau te pakeke o te mātāmua i taua wā. He tino wero tana neke atu ki tētahi kura e whai ana i te reo Māori. I a au e ako ana he tino wero hoki te kōrero Māori ki āku tamāhine i te mea ko te reo Ingarihi kē tā mātou reo kōrero i aua wā. He ngāwari ake te kōrero Māori ki ōku hoa nō taku akomanga reo tēnā i te kōrero ki āku tamariki. Ka āwekeweke au e kore e tika taku reo Māori, kei whai aku tamāhine i taku tauira kino nei. E kore e taea e au te whakamārama tere nei i ahau anō, i ōku kare ā-roto, i ōku hiahia hoki. Ko ngā mea māmā noa iho ngā mea uaua ki te whakamāori. He aha ngā uauatanga? • Ko te akoako i ngā kupu hou, i ngā rerenga hou mō ngā tini āhuatanga e putaputa mai ana • Me pēhea te aukati te whakapōrereatanga mai o te hunga kore reo e whakakōtiti ana i te kaupapa. Arā, kia rata mai rātou ki reo kē. • Kia waihanga he hapori kōrerorero, ko te reo Māori te reo matua He aha ngā painga? Ki ahau, nā tēnei kaupapa kua kaha ake te whanaungatanga ki waenganui i tō mātou whānau. E whai ana mātou katoa i te kaupapa kotahi, arā, ko te whakamahi i te reo Māori i te kāinga, hei reo kōrerorero mō te whānau. He whakangahau te kōrero Māori, ā, i a mātou e whai ana i te reo kua nui hoki ō mātou hoa hou. 10 Ngä Tohu a Te Waka Toi 2010 Te Onehou Phillis, kaiwhiwhi o Te Tohu Aroha mö Ngoi Kumeroa Pewhairangi: 'Whakarongo, Titiro, Körero' i te Pö Tuku Taonga a Te Waka Toi, Te Whanganui-a-Tara. I whakanuia a Te Onehou Phillis, nō Te Moananui- a-Toi, mō tōna whakapūmau ki te reo Māori i te pō tuku tohu a Te Waka Toi mō te tau 2010, i tū rā ki Te Whanganui-a-Tara i te 28 o Hereturikōkā. I whakawhiwhia a Te Onehou ki Te Tohu Aroha mō Ngoi Kumeroa Pewhairangi: ‘Whakarongo, Titiro, Kōrero’ hei whakahōnore i tōna whakaū, tōna takoha kairangi hoki ki te whakatairanga i te reo rangatira nei. He kaituku mātauranga, kaituhi kōrero hītori hoki a Te Onehou, ā, kua whakaputaina ētahi o āna pukapuka ki te reo Māori tae atu ki te haurongo mō tōna matua, mō Eruera Mānuera i whakawhiwhi tohu motuhake ai i tā Montana Tohu Pukapuka o Aotearoa i te tau 2002. Kua kitea te hiringa o Te Onehou e te hunga e pōhēhē ana kua pakeke rawa ki te akoako. E ai ki tōna matua, he tino taonga te mātauranga. Ahakoa te haere a Te Onehou ki wāhi kē, ki te kura whakangungu kaiako me tōna ake whakapono, kei mua tonu i a ia, kei tōna ake marae, te whare wānanga o te ao Māori. Nō tōna hokinga atu ki te wā kāinga hei kaiwhakaako ka pau rawa i a ia te toru tekau tau e āwhina ana i a Eruera ki āna kaupapa mahi tae atu ki ngā take ā-iwi pērā i Te Poukai me te whanaungatanga ki a Tainui. Nā tōna matua te kākano i whakatō, nāna anō ia i ārahi, kia rangahautia te whakapapa, tae atu ki ngā kōrero nō te wā kāinga, ngā waiata me ngā kōrero tawhito. Ka whakaputaina e ia ētahi pukaiti mō Ruataupare, mō Warahoe me Ruaihona, ā, mai i te tau 1992 he kaitautoko, kaituhi anō hoki ia mō te niupepa ā-rohe, mō Pūkaea. Neke atu i te rua tekau tau tau a Te Onehou e tautoko ana i Te Rūnanga o Ngāti Awa me te kerēme ki te Karauna i waitohua ai i te tau 2002. Mai i te tau 1989 ki te tau 2000, ko ia tonu te māngai mō te hapū o Warahoe, ā, ko ia hoki te kanohi kitea o Ngāti Awa i te whakatuwheratanga o tētahi whakaaturanga toi Māori i tū rā ki te Whare Taonga o Queensland i te tau 1990. I tae atu anō ia ki te Hui mō te Tau o ngā Iwi Taketake a te Kotahitanga o ngā Whenua o te Ao i Huiterangi i te tau 1993. E hia kē ōna whakatutukinga i roto i ngā tau tekau mā tahi hei māngai mō tōna hapū tae atu ki tōna whaiwāhitanga ki te komiti mātauranga me te kaunihera tuatahi i whakatūria ai Te Whare Wānanga o Awanuiārangi; he mema taketake nō Te Reo o te Mānuka Tūtahi; he māngai nō te Rūnanga ki te Uepū Māori ā-Motu (te National Māori Congress); he mema taketake nō Te Kāhui Kaumātua, ā, he mema anō ia nō Tohunga Ora o Ngāti Awa mō ngā tau e rima. Tae noa ki nāianei, he ngākaunui nōna ki te hītori Māori o Ngāti Awa. E ai ki a Darrin Haimona, Heamana o Te Waka Toi, "Mā ēnei tohu ka whakanuia te mana o ngā tāngata kua kaha te whakapeto ngoi mō te whakapūmautanga me te whakawhanaketanga o ngā mahi toi me te ahurea Māori." I whakanuia e ngā Tohu a Te Waka Toi – • te angitu ā-ao o Dame Kiri Te Kanawa (Ngāti Maniapoto, Ngāti Porou) ki Te Tohu Aroha mō Te Arikinui Dame Te Atairangikaahu • te auahatanga o te kaikanikani a Taiaroa Royal (Te Arawa, Ngāti Raukawa, Kāi Tahu) ki Te Tohu Toi Kē; • te whakatairangatanga i te reo Māori o Te Onehou Phillis (Ngāti Awa) ki Te Tohu Aroha mō Ngoi Kumeroa Pewhairangi: ‘Whakarongo, Titiro, Kōrero; • te whakaū nui rawa atu o ētahi kaumātua tokorima mō ō rātou takoha mai, pūkenga mai ki te whakanui i ngā tikanga mahi toi ā-hapori, ki Ngā Tohu a Tā Kīngi Ihaka - o ko Jossie Kaa (Ruawaipu, Ngāti Porou), o ko Kihi Ngatai (Ngāi Te Rangi, Ngāti Ranginui) o ko Tata Maere (Ngāti Naho, Ngāti Mahuta o Tainui, Waikato, Ngāti Poporo, Kahungunu) o ko Vera Morgan (Te Māhurehure) o ko Wiremu Kaa (Ruawaipu, Ngāti Porou). Ka tuku tohu anō Te Waka Toi ki ētahi kaimahi toi e puta mai nei te ihu, pērā i a Reuben Friend (Ngāti Maniapoto) rāua ko Taryn Te Uria Beri (Ngāti Toarangatira, Ngāti Raukawa, Te Ati Awa) ki Ngā Karahipi a Te Waka Toi 11 Wairua Ngätapa Black, Kaihautü mö te hötaka 'Wairua' i runga i a Te Reo. Nā Ngātapa Black, nō Ngāi Tūhoe Ka hoki anō ngā kōrero ki te orokohanga o te ao me ngā atua o taua orokohanga i puta ai te iwi atua nei ki te whai ao, ki te ao mārama. Otirā, e ai ki ngā kōrero he taha atua, he taha tangata anō hoki tō tātau. Me kī, i tau wairua mai, ka hoki wairua atu anō ki ngā taumata o ngā rangi e tika ana mōu. Tāria te wā, ka hoki ake anō ki te whakatikatika anō i a koe kia eke atu ai koe ki te toi o ngā rangi. He maha ngā peka o te wairua kua whakaarahia ake e ngā kaikōrero o tēnā iwi, o tēnā whānau. Hei whakaohooho i ngā mahara me te wairua hīkaka ki ēnei taonga tuku iho e pā ana ki te taha wairua o te tangata me te taha wairua o ngā mea ora katoa. Tae atu ki te iwi wairua kāre nei te nuinga o tātau e kite, me ngā tamariki i pakeke mai i roto i te ao wairua, i ngā patupaiarehe me ngā iwi wairua o te ngahere. Ka puta ngā kōrero mō ngā moemoeā, ngā ariā, ngā whakakitenga, tae atu ki ngā kōrero a ngā matakite me ngā tohunga. Ko ngā kōrero tuku mākutu, tae atu ki ngā kōrero kaupare i te mākutu. Ko ngā kōrero mō te mate Māori, tae atu ki ngā kōrero mō te whakawhiti ki tua o te ārai me te hoki mai anō ki tēnei ao. Ka rongohia ngā kōrero mō ngā wairua kino me te whakawātea anō i aua wairua, tae atu ki ngā kēhua. Ko te taura here i ēnei kaupapa katoa ko te aroha o ngā kaikōrero ki ngā taonga tuku iho a kui, a koro mā o te ao o namata. Ka haere ngātahi anō ngā kōrero me ngā whakaaro o tēnā iwi, o tēnā whānau. Kia rongohia ēnei kōrero e te tini me te mano i runga anō i ngā pēhitanga ā-ture a te kāwana ki ngā mahi a ngā tohunga me ngā matakite o aua wā. He ohonga tēnei kia puta ēnei taonga ki te whai ao, ki te ao mārama, i runga anō i te whakaaro pai ki ngā tāngata katoa. E te iwi, aro mai ki a Wairua hei ngā Rātapu ā te 7 karaka, i runga i a Te Reo. He Tohu Tö mö ngä Ingoa Ipurangi Kua whakarewahia tētahi āhuatanga hou mō ngā ingoa ipurangi o .nz. Kua whakawhānuihia ake ngā tohu tuhi ingoa ipurangi kia uru mai ko te ā, ē, ī, ō me te ū. Nō te Wiki o te Reo Māori ka taea te rēhita ngā ingoa ipurangi e mau tohu tō ana. I te mea kua tutuki pai ngā mahi mō te kaupapa Internationalised Domain Name (IDN), kua pai ake te aro o te ipurangi o Aotearoa ki te reo Māori. Mā te tāpiri tohu tō ki ngā ingoa ipurangi o Aotearoa e kitea ai te Māori e te ao hurihuri. E toru tau pea ngā kaimahi a te rōpū o IDN Aotearoa me te Ratonga Rēhita o .nz e whakapau kaha ana i konei, i rāwāhi hoki, kia tutuki ai tēnei kaupapa. E ai ki te Kaikōmihana o ngā Ingoa Ipurangi o Aotearoa a Debbie Monahan, “I whakarewahia te kaupapa nei i te tīmatanga o te Wiki o te Reo Māori, he mea nui tērā i te mea koia nei te wā tuatahi kua tika te whakatakoto o te reo taketake o Aotearoa, arā, te reo Māori, ki te ipurangi.” Otirā, he rite tonu ngā tikanga rēhita ingoa ipurangi, arā, me whakapā atu ki tētahi kairēhita, ā, ka tukuna te mana whakahaere o ia ingoa ki te kaitono tuatahi. Hei rēhita i tō ingoa ipurangi e mau tohu tō ana, tirohia te pae ipurangi www.dnc.org.nz 12 He Pänui “Whakaangi ki roto ki ngä huatau o te inäianei kia kawea ngä wai o ngä kupu o nehe, o nä koa tonu nei, hei korokï mä tënä mä tënä e whakangäkau ana kia mate kore te reo e kïia nei ko te reo rangatira, te reo Mäori”. He PAtAkA kuPu te kai a te rangatira He Pätaka Kupu - te kai a te rangatira Ko ‘He Pātaka Kupu - te kai a te rangatira’ te papakupu reo Māori anake tuatahi kua hangaia mā ngā pakeke. Āwhiwhi 24,000 ngā whakaurunga kupu ā, ka tū te papakupu reo Māori hei rauemi reo Māori kī rawa hei āwhina i ngā kaikōrero tino matatau me ngā ākonga hoki. Anei te whakamārama o He Pātaka Kupu mō ētahi o ngā kupu ka kitea i roto i tēnei putanga o He Muka. kupu paremata [Tūmatauenga] He whakahoki poto hei whakautu i te kōrero kino, i te kōrero ngahau rānei a tētahi atu. (i) ‘A koe rānei!’ tana kupu paremata ki a Tame. (ii) Ka mea atu tētahi, ‘Tō tero, e tā!’ Ko te kupu paremata a te hoa ngangare ki tērā, ‘Hei mitimiti māu!’ (iii) ‘He ātaahua tonu ngā waewae o Tū.’ Ko te kupu paremata a tana hoa, ‘E kare, te katoa ōna!’ monemone [Ranginui & Papatūānuku] maho, āhua. Kua matemate katoa, kua kore katoa, kua pau katoa. (i) Ka hinga te tini o Manahua, monemone noa i ngā uri o Hou (W 380). (ii) Ka waerea haerehia ngā ngahere o Aotearoa, me te aha, ka monemone noa ētahi o ngā manu taketake ake o tēnei whenua, pērā i te moa me te huia (KK 188). pārahi -tanga [Papatūānuku] āhua, ing, mahp. E tino kaha ana te rōnaki. Mā te nanenane kē tēnā ara pārahi. poupou pūnganangana -tanga [Ranginui & Papatūānuku] mahp, ing, āhua. Ka kaha tonu te hiahia ki te mahi i tētahi mahi, ki te whai i tētahi kaupapa. E pūnganangana ana te wahine kia kite i tana tama kua roa ki tāwāhi. ngākaunui renarena -tia -tanga [Tūmatauenga] mahw, ing, āhua. Ka whakamau ki te aho, ki te taura, ki tērā momo hanga rānei, ka paihere rānei kia apiapi, kia raungaiti. E renarenatia ana te whakapipi nūpepa ki te taura. here tātāriki -tanga [Tāne] āhua, ing, mahp. Kāore i rahi te hanga, ina whakaritea ki ētahi atu mea; arā tōna kupu tauaro, ko te ‘nui’. iti taukaea [Tāne] ing. Ētahi weu kua kōmiroa, kua whiria rānei kia ū, kia kotahi, kia roa. I te taumaha o te maitai, ka motu te taukaea i te hikitanga ki runga. taura E 8,000 kupu kua utaina ki te pae ipurangi www.korero.maori.nz/forspeakers/patakakupu. He tīpakonga kupu noa iho tēnei, arā, he takahanga tuatahi; ā tōna wā ka utaina mai ngā kupu katoa o He Pātaka Kupu ki te pae tukutuku nei. WhiriNga-ä-Nuku – hakihea 2010 huia te reo 2010 8 – 9 Whiringa-ä-nuku Kaupapa: ‘Te Reo i te Kāinga, te Reo i te Hapori’ Wā: 8.30am Wāhi: Energy Events Centre, Rotorua Tirohia te pae ipurangi o www.koreromaori.co.nz mō ngā whakamārama me ngā puka tono. E wātea ana ētahi wharau hei whakaatu, hei hoko i ā koutou hanga e hāpai ana i te reo Māori me ētahi atu take Māori, pērā i te rauemi, i te kākahu. Ki te hiahia koe ki ētahi atu kōrero, tēnā whakapā mai ki a: Catherine Sinclair Waea: 0800 628 3736 Īmēra: catherine@tetaurawhiri.govt.nz Kāore he utu mō tēnei hui. Ngä tohu reo mäori 9 o Whiringa-ä-nuku Wā: 6pm – 12pm Wāhi: Rotorua Energy Events Centre Utu: $125 Mō ngā tīkiti ki Ngā Tohu Reo Māori whakapā atu ki a catherine@tetaurawhiri.govt.nz Waeahia rānei ki 0800 628 373.