Te huarahi rangahau mō Te Ahu o te Reo He rangahau kaupapa Māori Te Ahu o te Reo. Ko te aronga ake o te kaupapa Māori ko te whakamana. Nō te ao Māori anō Te Ahu o Te Reo ina hoki he kaupapa Māori. He mea mahi nā te Māori, mō te Māori, ā, nā te Māori anō ngā whakatau huarahi rangahau puta noa. E āta whakamāramahia ana te huarahi rangahau ki ngā whārangi 4 ki te 9 o te rīpoata. Ka whakautu hoki ēnei whārangi i ngā pātai māmā mō te mahinga o te rangahau. He aha te pānga o Te Ahu o te Reo ki ētahi atu rangahau reo Māori? He āhua ōrite ētahi wāhi o te huarahi rangahau nei o Te Ahu o te Reo ki tērā nā te rōpū rangahau o Richard Benton mā i whai mō te NZCER i te tau 1978. Rite anō ki tērā rangahau nā ngā kairangahau o Te Ahu o te Reo i uiui ngā kāinga o roto i ngā hapori. O ngā hapori e iwa i rangahaua e mātou e waru rawa i uru hoki ki taua rangahau o mua. Ko te rerekē mō Te Ahu o te Reo i uru mai hoki he hapori nō te Waipounamu ka uiui hoki mātou i ngā tamariki me ngā pakeke. Ko ngā pātai o Te Ahu o te Reo i ahu mai i ētahi wāhi katoa: · te rangahau a Benton i te tau 1978 · Te Kupenga a Tatauranga Aotearoa (2013) · ngā rangahau a Te Puni Kōkiri mō te Hauora o te Reo Māori (2001) me Ngā Waiaro ki te Reo Māori (2000, 2003, 2006, 2009) · he rangahau nā Te Whare Wānanga o Te Ūpoko o te Ika a Māui Ka whakamahia e mātou ngā ine ōrite tonu ki ō Te Kupenga (i mahi tuatahitia i te Rangahau mō te Hauora o te Reo Māori 2001) mō te whakawā a te tangata i tōna anō matatau ki te reo. Nā wai ngā rangahau i mahi? Ko te rōpū rangahau mō Te Ahu o te Reo i ahu mai i Te Wāhanga – NZCER, i Te Kawa a Māui ki Te Whare Wānanga o Te Ūpoko o te Ika a Māui, he kaiārahi rangahau hapori, he kairangahau hapori, he kaitohutohu kaupapa, he hoa anō hoki nō te NZCER. He mea tuitui te kaupapa e Te Wāhanga i mahi tahi ai ki te rōpū o Te Whare Wānanga o Te Ūpoko o te Ika a Māui. Ka riro nā ngā kaiārahi rangahau hapori i ārahi ngā rangahautanga ki roto i ō rātou ake hapori, tae atu ki te tohu atu me te mahi tahi atu ki ngā kairangahau hapori. Pēwhea ai te whiriwhiri i ngā hapori? Nā te hui tahi ki Te Taura Whiri i whiriwhirihia ai ngā hapori mō Te Ahu o te Reo. Ka mahi tahi mātou ki ō mātou kaitohutohu kaupapa me ētahi o ngā kaiārahi rangahau hapori ki te āta whiriwhiri i te whakatau whakamutunga. Ka whai mātou kia uru mai ētahi hapori katoa ki raro i ēnei whiriwhiringa: 1. Ngā hapori i tohua e Richard Benton me tana rōpū rangahau o te ngahuru tau 1970 he kaha te reo 2. Ngā hapori i ruarua noa iho te hunga matatau ki te reo Māori i te ngahuru tau 1970, engari nō muri ake kua whai rautaki whakarauora i te reo 3. Ngā hapori e tokomaha ana te hunga kōrero Māori 4. Ngā hapori kāore i te tokomaha te hunga kōrero Māori 5. Ngā hapori e tokomaha ana te Māori noho taone 6. Ngā hapori e tokomaha ana te Māori noho tuawhenua 7. Ngā hapori i tono kia uru mai ka mutu e kōkiri ake ana i te whakarauoratanga o te reo Māori. Tokohia ngā tāngata i uiuia? Ka whai ngā kairangahau kia uiui atu i te 70 ki te 80 tāngata ki ia hapori e iwa. Ka oti i ngā kairangahau ngā tāngata e 606 te uiui: e 448 ngā pakeke, 158 ngā tamariki (18 ngā tau iti ake rānei). Pēwhea ai ngā uiuitanga? Ko te nuinga o ngā uiuitanga i kanohi ki te kanohi ka mutu e 60 ki te 90 meneti te roa. Kāore i taea te uiui ngā tāngata katoa i pīrangi ki te āwhina mai i Te Ahu o te Reo nā reira ka hangā e mātou he uiuitanga ā-ipurangi kia whai reo ai hoki rātou. He aha ngā whakataunga? Ko ngā tino whakataunga kua whakarāpopotohia ki ngā whārangi xvii-xx o te rīpoata, me ngā whārangi 11-25. He mea wehewehe ki raro i ngā pātai rangahau, arā: Ko wai kei te kōrero i te reo ka mutu e kōrero ana ki a wai? Kei hea te reo Māori e kōrerohia ana ka mutu hei kōrero i te aha? He aha te take ka kōrerohia te reo Māori ki ētahi wāhi kaua ki ētahi? Pēwhea ai te nui o te reo Māori kei te kōrerohia? He aha atu anō hei tautoko i ngā hapori me ngā whānau kia kōrerotia ai te reo hei reo mō ia rā ki roto i ngā kāinga me ngā hapori?