Ngā Tātai Kōrero Ngā tātai kōrero o te reo Māori – mai i mua o te tau 1840, i noho ai ko te reo Māori te reo matua o Aotearoa, taka mai ki nāianei. I mua i te 1840 Ko te reo Māori te reo e hōrapa ana ki Aotearoa nui tonu. Kōrero whānuitia ai i ngā kawenga noa a te tangata, a te iwi, i ngā karakia, i ngā mahi hokohoko, mahi tōrangapū, Māori ki te Māori, Māori ki te Pākehā. Ko ngā mea e ākona ana e te mihinare ki te Māori, he mea kawe katoa ki te reo Māori. 1840 Ka hainatia Te Tiriti o Waitangi. E noho tonu ana ko te reo Māori te reo mātāmua o Aotearoa. 1842 Ka tāia te nūpepa reo Māori tuatahi. ngā 1850 Ka nui ake te tokomaha o te Pākehā, tēnā i te Māori. Riro ana i reira ko te reo Māori te reo o te iwi tokoiti i tōna whenua ake. 1858 Ka tū te uiuinga ā-motu tuatahi ki te kohi kōrero mō te iwi Māori. E ai ki tāna, e 56,049 te tauanga o te iwi Māori. 1867 Poua ana te Ture Kura Māori ki te whenua, me tana whakahau kia kawea ngā mahi whakaako i ngā tamariki Māori ki te reo Pākehā anake. Nā wai, nā wai, ka kaha kē atu te whai i tēnei kaupapa. ngā 1870 Whai i muri i ngā pakanga o Aotearoa, ka tōtara wāhi rua te porihanga o Aotearoa, ko tētahi wāhi e Māori ana, ko tētahi e Pākehā ana. Otiia ko te reo Māori tonu te reo matua i te whaitua Māori. ngā 1890 He huhua tonu ngā nūpepa Māori e whakaputa ana i ngā rongo o te wā – ō konei, ō tāwāhi, ki te reo Māori. E noho tonu ana ko te reo Māori te reo mātāmua o te whaitua Māori. 1896 Kua kaha heke te tokomaha o te iwi Māori ki tōna tino itinga. E ai ki te uiuinga o te motu, e 42,113 noa te tauanga Māori. 1913 E 90% o ngā tamariki Māori i te kura, he kōrero Māori tonu. E kaha ana a Te Puke ki Hikurangi, a Te Mareikura me ētahi atu nūpepa Māori ki te whakaputa i ngā kōrero tai tata, tai tawhiti o te wā, tae atu ki ngā kōrero ahuwhenua, ki te reo Māori. ngā 1920 Ka tīmata a Tā Apirana Ngata ki te akiaki i ngā hapori Māori ki te kōrero Māori i ngā kāinga me ngā kawenga a te hapori. He haere tahi tēnei me tāna akiaki kia kaha te Māori ki te rapu i te mātauranga i ngā kura kōrero Pākehā. ngā 1930 Ko te reo Māori tonu te reo mātāmua i ngā kāinga me ngā hapori Māori. Engari kua nui haere te kōrero Pākehā, ā, arā tonu ētahi kaiārahi o te iwi Māori e tautoko ana i te whai a ngā tamariki Māori i ngā ara mātauranga reo Pākehā. ngā 1940 Kua tīmata te hūnuku haere a te iwi Māori ki ngā tāone nui noho ai. ngā 1950 Kei te nunumi tonu te Māori ki ngā tāone nui. Kaupararī ana te noho i waenganui i te mātotorutanga o te Pākehā, riro ana ngā ritenga me te reo tūturu o te hapori Māori, tahuri kē ana ngā whānau Māori ki te kōrero Pākehā. Me te aha, kua tupu ake he reanga tamariki he kōrero Pākehā kē. 1951 Ki tā te uiuinga ā-motu, kua piki te tauanga Māori ki te 134,097 tāngata. ngā 1960 He akiaki tā ētahi whare kōhungahunga kia kōrero Māori ngā mātua Māori, kia waia ai ngā tamariki ki te reo Pākehā i mua i tā rātou tīmata i te kura. 1961 Ko te whakatau kī a te Pūrongo a Hunn, he taonga onamata te reo Māori, e ao ana kia mahue atu ki te ao onamata o te Māori. ngā tau tuatahi o ngā 1970 Ka whakapuakina e ētahi rōpū Māori noho tāone pērā i Ngā Tamatoa me Ngā Kaiwhakapūmau i te Reo tō rātou māharahara nui ki te āhua o te reo Māori. 1972 Ka hainatia te Tāpaenga mō te Reo Māori e te 30,000 tāngata, me te whakatakoto ki te aroaro o te Pāremata. http://www.archives.govt.nz/exhibitions/pastexhibitions/tereo/1970_eng.php 1973–78 E ai ki te Rangahautanga Reo Māori ā-Motu a NZCER, e 70,000 noa iho pea ngā Māori e matatau ana ki te reo (18–20 ōrau o te iwi Māori), ā, ko te nuinga o ēnei, kua kaumātua. 1975 Ka whakaarahia ake e Ngāti Raukawa, e Ngāti Toa me Te Āti Awa a Whakatipuranga Rua Mano, he kaupapa whakapakari iwi ko te whakaora ake i te reo tētahi o ōna tino whāinga. 1978 Riro ana ko Te Kura o Rūātoki te kura reorua tuatahi o Aoteoroa. 1979–80 Ko te aranga ake o Te Ātaarangi, me tāna whakapau kaha kia matatau anō te hunga taipakeke Māori ki te reo Māori. 1981 Tū mai ana ko Te Wānanga o Raukawa, ki Ōtaki. 1982 Ko te orokohanganga o Te Kōhanga Reo, he mea whakatū hei whakatō i te reo ki roto i ngā kōhungahunga Māori. ngā 1980 Ka haere ētahi whātoro i te reo irirangi Māori, ka mea ā, ka maranga ko Te Upoko o te Ika me Te Reo Irirangi o Ngāti Porou. 1985 Ka tū mai te Kura Kaupapa Māori tuatahi, hei whare āhuru mō ngā pī e rere ana i ngā kōhanga reo. 1985 Ka takoto te take e karangahia ana ko Te Reo Māori WAI 11 ki te aroaro o Te Rōpū Whakamana i te Tiriti o Waitangi. E whakapaetia ana kua heke te taupori o te hunga kōrero Māori ki te 50,000 – ko tōna 12 ōrau tēnei o te iwi Māori. 1986 Ka puta i Te Rōpū Whakamana i te Tiriti o Waitangi tā rātou Pūrongo mō Te Reo Māori, e tono ana kia whakaturengia te āhei o te tangata ki te kōrero Māori i ngā whare whakawā, kia whakatūria anō hoki e te ture he rōpū hei whakaruruhau mō te reo Māori.   http://www.waitangi-tribunal.govt.nz/reports/generic/   1987 Ka mana te Ture Reo Māori. Pepehatia ana i konā te whai mana o te reo Māori ki Aotearoa, tū ake ana ko Te Taura Whiri i te Reo Māori. Ka mahuta anō hoki ko Te Poari Matua o ngā Kōhanga Reo. 1989 Poua ana ko te Ture Whakahou i te Taha Mātauranga, i āta whakaaetia ai e te ture ngā kura kaupapa Māori me ngā wānanga. Ka tāpuia anō hoki e te kāwanatanga ētahi aratuku reo irirangi, pouaka whakaata, hei kawe i ngā pāhotanga a te iwi Māori. 1991 1991 Ka ara ake ko te take mō ngā Rawa Pāpāho. E ai ki te uiuinga ā-motu, e 435,619 te taupori Māori. Ka takoto te Take mō Te Ao Tūroa, a Wai 262, ki te aroaro o Te Rōpū Whakamana i te Tiriti o Waitangi. Ka āta wherawherahia e Wai 262 te wāhi ki ngā tikanga, te tuakiri me te mātauranga Māori i ngā ture o Aotearoa, tae atu ki ngā kaupapa-here me ngā mahi a te kāwanatanga. Ka uia te pātai kei a wai te mana whakahaere i ngā mātauranga Māori, ko wai te rangatira o ngā mahi toi pērā i te haka, i te waiata, tae atu ki ngā tini a Tāne, a Tangaroa, me te ao tūroa koia te pūtakenga mai o te ao me ngā tikanga Māori. 1993 Mātika ana ko Te Māngai Pāho hei pou mō te reo me ngā tikanga Māori. Neke atu i te 20 ngā reo irirangi Māori ka tūtū mai puta noa i te motu. Ka whakarewahia a Mai Time, he hōtaka pouaka whakaata e anga nui ana ki ngā taiohi Māori me ō Te Moana-nui-a-Kiwa. 1995 Ko He Taonga Te Reo te ingoa, ko Te Tau o te Reo Māori te kaupapa. Ka tū anō he Hui Taumata Reo Māori, ki Te Whanga-nui-a-Tara. E ai ki tētahi rangahautanga reo Māori ā-motu, kua paheke te tokomaha o ngā pakeke Māori tino matatau ki te reo Māori ki te 10,000. 1996 Ka tīmata ngā pāpāhotanga a te Aotearoa Television Network, he pāpāhotanga whakamātau noa, he utu kore, ki te rohe o Tāmakimakaurau. Kua tīmata te pāpāho i a Mai Time i ia wiki. 1997 Hui katoa, e 675 ngā kōhanga reo kua mārō kē te haere, e 30 atu anō kua tata te pērā, e morimori ana i ngā tamariki 13,505. E 54 ngā kura kaupapa Māori, e toru ngā wānanga Māori. He nui ake i te 32,000 ngā ākonga kei ngā kura reo Māori, e 55,399 atu anō e ako ana i te reo Māori. 1998 Ka pānuitia e te kāwanatanga tana whakawātea moni hei whakatū hongere pouaka whakaata Māori, me te whakarahinga ake o te pūtea ka rere ki Te Māngai Pāho. Ka pānuitia anō tana tāpui i te $15 miriona hei whakapau ki ngā Kaupapa Reo Māori i te Hapori. 1999 Ka tīmata te whakaatatanga mai o Tūmeke, he hōtaka reo Māori mā te rangatahi, i te hongere 4. 2000 Ka huri a Tūmeke he ara pāho kē, ka noho ki TV3, riro ana ko Pūkana kē te ingoa. 2001 Ka pānuitia e te kāwanatanga tana āta tautoko i te hongere Whakaata Māori, me te anga whakahaere e whakaarohia ana mōna. Ka mea ake anō taihoa ka tīmata tana tohatoha i te $15M i tohua i te toru tau i mua atu. 2001 Ka tū ko Uia Ngā Whetū: Hui Taumata Reo. Nō Te Taura Whiri te reo karanga, ko Te Whanga-nui-a-Tara te wāhi i tū ai. 2001 E ai ki te Uiuinga i te Hauora o te Reo Māori 2001, kei te takiwā o te 136,700 ngā tāngata kōrero Māori. 2002 Ka tū ko Uia Ngā Kāinga: Hui Taumata Reo. Nō Te Taura Whiri anō te reo rāhiri, ko Te Whanga-nui-a-Tara te wāhi i tū ai. 2002 Horahia ana e te kāwanatanga te Tahua o Mā te Reo hei tautoko o te tupu o te reo Māori i ngā hapori. 2003 Ka tū ko Te Reo i te Whenua Tipu – te tuawhitu o ngā Taiopenga mō ngā Tini Reo Māori o Te Moana-nui-a-Kiwa. 2003 Ka whakaterea te whakahounga o te Rautaki Reo Māori a te kāwanatanga. 2003 Ka whakamanaia e te Whare Pāremata te Ture Ratonga Pouaka Whakaata Māori. 2004 Ko te 28 o Poutūterangi te rā, ko te pāhotanga tuatahi a Whakaata Māori te tino kaupapa. Koinei anō te tau i tū ai Ngā Tohu Reo Māori tuatahi, ki Te Whanga-nui-a-Tara. 2008 Whakarewatia ana e Whakaata Māori tō rātou hongere hou, ko Te Reo te ingoa. 2008 Ka whakaputaina te papakupu reo Māori, a He Pātaka Kupu, e Te Taura Whiri i te Reo Māori. 2011 Ka puta te pūrongo a Te Rōpū Whakamana i te Tiriti o Waitangi mō Wai 262 – Te Ao Tūroa, i te 20 tau i muri i te tāpaenga o te take ki tō rātou aroaro. E mea ana te Upoko 5 (Te Reo) me whakanui ake te mana o Te Taura Whiri i te Reo Māori, kia noho mārire anō koia te whakahaere reo Māori matua o te motu. 2011 Ka puta te pūrongo Te Reo Mauriora me ōna whakaaro ki te Rautaki Reo Māori. E ai ki te pūrongo, me whakatū he minita mō te reo Māori, me whakatū anō he rōpū ko Te Mātāwai te ingoa, māna e ārahi ngā mahi katoa e pā ana ki te reo Māori. E mea ana hoki te pūrongo mā te whakatupu anō i te reo i ngā kāinga e tino ora ai te reo Māori, waihoki, ko te whakatinanatanga o te rautaki, me waiho mā ngā iwi tonu e ārahi. 2011 Ka takoto te take mō ngā Kōhanga Reo, a Wai 2336, i mea ai Te Poari Matua o ngā Kōhanga Reo he mea āta whakahanumi atu e te Karauna te Kōhanga Reo ki roto i ērā atu kaupapa tuku mātauranga ki te kōhungahunga, i āhua nātia ai tōna korokoro, i tāmoetia ai āna mahi whakahauora ake i te reo Māori. 2012 I tāna tirotiro i te take Wai 2336 mō te Kōhanga Reo, kitea ana e Te Rōpū Whakamana kāore i tika tā te Karauna tautoko i ngā kōhanga reo ki te moni, ki te paerewa ine i te pai o ngā mahi, ki te pūnaha whakatāmau, me kī he takahi tonu tā te Karauna i te Tiriti. 2013 Te Uiuinga Rohe Pōtae. Whakatau ana te kaiwhakawā o Te Rōpū Whakamana kāore ngā rōia o Ngāti Pehi Te Kanawa e āhei te uiui i te hunga kōrero Pākehā kei tērā taha o te kōti ki te reo Māori, kei roa rawa, me te nui rawa o te moni, o te aha atu ka pau. 2013 Whakahaeretia ana e Tatauranga Aotearoa te rangahau tuatahi i te noho ora o te iwi Māori, ko Te Kupenga te ingoa o te mahi nei. Ka kohia he kōrero mō ngā āhuatanga huhua e kitea ai e pēhea ana te ora o te iwi Māori – taha pāpori, taha tikanga, taha ōhanga, ā, me te kaha ora anō o te reo Māori. 2013 Ka taka mai i te Rohenga Pūtea Take Māori tētahi $8 miriona i roto i te whā tau mō tētahi tahua rangahau, whakawhanake i te reo Māori. 2014 Ka whakaūngia e Te Kōti Matua te whakahau a Te Rōpū Whakamana i te Tiriti o Waitangi kia kaua te tangata e āhei te uiui ki te reo Māori i ngā tangata kōrero Pākehā kei tērā taha o te kōti. 2014 Ko te whakatau kī a Te Taura Whiri i te Reo Māori, ‘Noho papa ana te reo Māori i te whakatau a Te Kōti Matua. Kua unuhia e ia he taniwha tērā e ngaro ai te mana o te reo Māori i tō tātou pūnaha ture.’ 2014 Whakatōkia ana te Pire Reo Māori ki te Pāremata hei whakatinana i ngā whakaaro o te pūrongo Te Reo Mauriora o te tau 2011. 2014 Ka whakatuwheratia a He Puna Whakarauora – te pūtahi rangahau, whakawhanake i te reo Māori, i raro i te maru o Te Taura Whiri i te Reo Māori. 2015 Kopoua ana ko te Rōpū Whakamaherehere Reo Māori hei whakatakoto whakaaro motuhake, kairangi tonu, ki te Pire Reo Māori.