Whāia kia tata | Te Taura Whiri i te Reo Māori Skip to main content Skip to page navigation Māori English Māori English Enter search terms Rapua whānuitia Menu Enter search terms Main navigation Ko wai mātou He aha Te Taura Whiri i te Reo Māori? Ngā tātai kōrero Tānga rangatōpū Whakapā mai Pānui Pāpāho Ā mātou mahi Te Tuku Tohu ki ngā Kaiwhakamāori ā-Tuhi, ā-Waha Whakamātauria Tō Reo Māori Rēhita Kaiwhakamāori ā-tuhi ā-waha Te whakawhanake reo, whakamaherehere reo Te Pūtahi Rangahau Ngā Tikanga Tuhi Te Amo Te Reo Māori Tikanga Māori Whakahuatanga : Pronunciation Learning te reo Māori resources Te Reo Māori Mō ngā take motuhake Wāhi Ako Reo Kaupapa Whakatairanga Te Wiki o te Reo Māori Hīkoi Whakanui i te Reo Māori Rauemi He Muka He Muka Pūrangaranga Breadcrumbs Home He Muka He Muka Whāia kia tata Kāinga I tēnei putanga → Te Matatini ki te Ao → Te Vaka Reo ki Hawai’i 2019 → Te Reo Māori, Tōku Oranga, Tōku Ara Mahi → Te Kupu a Te Toihau → Kupu Hangarau - Paengawhāwhā → Ngā kupu kāore i roto i te Wiremu → Karanga Aotearoa e! → Whāia kia tata → Whakamāoritia te Ao Whāia kia tata Nā Wareko Te Angina | Kohitātea 2019 Ngā Toa Tohu Reo Māori 2018 Whāia Kia Tata Kua tū ngā Tohu Reo Māori 2018 ki Te Whanganui a Tara.  Ko te tikanga o ēnei he whakamihi i te hunga e whakanui ana i te reo Māori, ahakoa iti, ahakoa nui, i roto i te tau, i ngā tau kua taha, i te wiki o te reo Māori, i te ao toi, i te ao pāpāho, i te kāwanatanga, te mātauranga, te pakihi, te hapori, te iwi, te whānau, huri noa i Aotearoa, whakawhiti atu ki tāwāhi, puta ki te ao.  Ko te pepeha o te tau ‘Kia kaha te reo Māori’ me te whakaaro ahakoa iti, ahakoa nui,  ākona, kōrerotia, whakanuia! I tae mai te marea me ō rātou kākahu pai, kanohi kitea mai, kanohi hou mai, he mātanga, he pīpī, he kaitautoko, Māori mai, tauiwi mai, mō te whakanui i te reo me ngā tāngata e kaha hāpai ake ana i te reo te take. Ko ōna kaihautū ko ngā tohunga o te manaaki a Stacey Morrison rāua ko Mātai Smith. Ko tā rāua he whakahaere i ngā mahi i runga atamira, he whakangahau i te iwi, he whakapāoho hoki i te ingoa o ngā toa. I reira hoki ngā kaitautoko nā rātou te pūtea tautoko i te pō. Ko te Papa, ko Whakaata Māori, ko Toi Aotearoa, ko Te Wānanga o Aotearoa, ko Vodafone, ko Te Māngai Pāho, ko Manatū Taonga, ko Te Matatini, ko Te Puni Kōkiri, ko Te Tāhuhu o te Mātauranga, ka mutu ko Te Taura Whiri i te Reo Māori. Waihoki i tae ā-ataata mai te Minita a Nanaia Mahuta me ōna whakaaro, tōna mihi anō hoki ki te kaupapa. Nei te whakamānawa a Te Taura Whiri ki a koutou ngā kaitautoko, otirā, te Minita i tā koutou kaha tautoko mai i tēnei kaupapa nui whakaharahara nei o tātou, ki a koutou katoa, e kore rawa te puna o mihi e mimiti. Ko te tino toa i eke whakaihuwaka i taua pō ko Spark rāua ko Te Aka me tā rātou taupānga ‘ KUPU (external link) ’.  He taupānga e whakamahi ana i te kāmera o tō waea ki te whakamāori i ngā hanga noa o ia rā, heoi anō tāu he tango whakaahua o tētahi taputapu, taonga, pāraharaha ranei kia kitea te kupu Māori. Ka taea te whakaahua te tiaki ki tō waea, te tuku ki tētahi atu, te tīmata anō rānei.  Kua kitea e ngā pakihi nui te whaihua o te whakanui me te tautoko i te reo Māori, hei painga mō rātou, otirā, tātou a Aotearoa nei. Kāore pea i tua atu i te reo Māori kia whakaatu atu te tangata i tōna Aotearoatanga. I whakanuia hoki a Te Amorangi Whatarangi Winiata (external link) ki te Tohu Oranga Angitu mō tana kaupapa 'Whakatipuranga Ruamano’.  He kaupapa whakarauora ake i te reo o ngā iwi tokotoru nei a Te Ātiawa, a Ngāti Toa, a Ngāti Raukawa hoki.  Nā tōna matatau, tohungatanga hoki ki te whakahaere i ngā āhuatanga katoa o te kaupapa, ahakoa te taha pūtea, te whakatakoto mahere, te whakahaere, te paihere i te tangata, te whakaemi rauemi e tika ana me te huhua anō o ana pukenga i tutuki ai tēnei o ngā tino kaupapa. E ai ki Te Ahorangi a Rāwinia Higgins, Toihau o Te Taura Whiri i te Reo Māori, “nā tana kaupapa kua kitea e te ao e taea ana te reo te whakarauora”.  Ko ngā hua o tana kaupapa, ko Te Wānanga o Raukawa, ko ngā kura Te Rito me Whakatupuranga Ruamano, me ngā kōhanga, i tua atu i tērā kua piki noa atu te nui o ngā kaikōrero Māori i roto i tōna iwi o Ngāti Raukawa. Tirohia ngā kōrero i tuhia e tana tama mōna (external link) . O ngā ingoa 150 i tonoa mai hei whakaarotanga mā ngā tiati, 36 i tae ki te whiringa whāiti, kāore i tokomaha ake i tērā i ngā tau ki muri. Rua tekau ngā tohu i whakawhiwhia ki ngā toa, heoi anō ko taua kōrero anō, ko te tino toa o te pō ko te reo Māori. Kia kitea te rārangi o ngā toa katoa o te pō pēhi i konei (external link) . Ka taea hoki te kite ngā ataata o ngā toa me ngā kaitautoko, pēhi i konei. Kei te mōhio tātou arā tētahi hunga e whakanui ana i te reo ao te pō, pō te ao, arā, ko te hunga kua waiho ko te reo Māori hei reo matua mā rātou ia rā, ia marama, ia tau. Ko ngā kura Māori, ko ngā wānanga, ko ngā iwi, hapū, whānau, a wai ake, a wai ake, ka mutu ko te tangata tonu. Me mihi ki a rātou e hāpai ana i te wāhi nui o ngā mahi whakarauora ake i te reo Māori, heoi anō kia kaha ake te reo Māori me whai tautoko, me whai kaikōrero Māori. Kua kite i ngā tau tata nei te hapori katoa o Aotearoa e whai ana ki te whakapiki i tā rātou matatau ki te reo Māori. E kitea ana tēnei tūāhuatanga i ngā pakihi, i rūnga pouaka whakaata, ki ngā tohu i ngā tiriti huri noa, huri noa, e huri pena ana a Aotearoa whānui. I te tau kua pahure nei kua mīharo katoa mātou o Te Taura Whiri ki ngā mahi kua mahia e tātou o Aotearoa ki te tautoko i te kaupapa, i te roanga o te tau, otirā, i te Wiki o Te Reo Māori. Nō reira me mihi te katoa o Aotearoa me tā rātou hiahia ki te tautoko i ngā whakarauoratanga ake o te reo Māori. Heoi i runga i te here o te pūtea i taea ko ētahi tauira pai rawa atu noa iho te whakanui ki ngā tohu reo, hei whakamaunga atu mā te tangata, hei tauira whai mā te hunga e matekai ana ki te reo Māori.  Arā ētahi pakihi, tari kāwanatanga ā-motu, ā-rohe hoki e whai ana kia reorua ā rātou ratonga me ā rātou kaimahi, kia māmā ake te wāhi ki te hunga kōrero Māori te kōrero Māori ahakoa ki hea, ahakoa ki a wai.  Kua whakatauhia ā rātou manuhiri, kiritaki ki te reo Māori, kua whakamāorihia ā rātou ratonga, i ngā tau tata nei kua hanga taupānga anō hoki ki te reo Māori mō te ako reo Māori, mō te huhua anō hoki o ngā kaupapa. Kei te tino whakapau kaha ngā whakahaere ki te kimi huarahi e tautokona ai tēnei kaupapa o tātou, āe e kare mā, o tātou a Aotearoa whānui. Mā te tautoko i runga i te wairua pai, te whakaaro pai me te mōhio pai e tino āwhina ai tā tātou kaupapa whakarauora.  Kāore e kore he roa tonu te huarahi kia kitea tēnei āhuatanga o te Aotearoa kōrero Māori, heoi anō ināianei i ēnei tau tata nei e taea ana te kite te whakatinanatanga haere o te wawata a kui mā, a koro mā otirā o te hunga i pakanga i te pakanga kia ora tonu ai tō tātou reo rangatira. Me kī kua tata te pae tawhiti kua eke te pae tata, nō reira whakamaua kia tina, tina! Haumi e, hui e, tāiki e! Ngā Toa Iwi Ko te toa o te tohu Iwi ko Muriwai Maggie Jones Nā Whakaata Māori (external link) te Tohu Iwi i tautoko Whānau Ko te toa o te tohu Whānau ko Oti te Nanekoti (external link) nā Te Tāhuhu o Te Mātauranga Nā Te Papa (external link) te tohu Whānau i tautoko Tirohia te ataata tuku tohu Rangatahi Ko te toa o te tohu Rangatahi ko Māori Television Giphy Channel (external link) by Fly Nā Vodafone (external link) te tohu whānau i tautoko Tirohia te ataata tuku tohu Takitahi  Ko te toa o te tohu Takitahi ko Mike Hollings Nā Toi Aotearoa (external link) te tohu Takitahi i tautoko Tirohia te ataata tuku tohu Mātauranga – Kaupapa Māori       Ko te toa o te tohu Mātauranga – Kaupapa Māori ko Taringa Punua Pāoho (external link) nā Te Wānanga o Aotearoa Nā Te Tāhuhu o te Mātauranga (external link) te tohu Mātauranga – Kaupapa Māori i tautoko Tirohia te ataata tuku tohu Mātauranga – Whānui Ko te toa o Mātauranga – Whānui ko Mahuru Māori - Fortnite (external link) nā Te Wānanga o Aotearoa Nā Te Tāhuhu o te Mātauranga (external link) te tohu Mātauranga – Whānui i tautoko Tirohia te ataata tuku tohu Kāwanatanga Ko te toa o te tohu Kāwanatanga ko Te Amorangi ki mua, Te Hāpai Ō ki muri (external link) nā Rotorua Lakes Council Nā Te Puni Kōkiri (external link) te tohu Kāwanatanga i tautoko Tirohia te ataata tuku tohu Pakihi         Ko te toa o te tohu Pakihi ko Te Mātāpuna nā Fonterra Nā Vodafone (external link) te tohu Pakihi i tautoko Tirohia te ataata tuku tohu Te Mahi Toi, Te Mahi Whakangahau  Ko te toa o te tohu Te Mahi Toi, Te Mahi Whakangahau ko Oti te Nanekoti (external link) nā Te Tāhuhu o Te Mātauranga Nā Te Matatini (external link) te tohu Te Mahi Toi, Te Mahi Whakangahau i tautoko Tirohia te ataata tuku tohu Ngā Mahi Pāpāho          Ko te toa o te tohu Ngā Mahi Pāho ko Sky TV - Tiki Towns (external link) Nā Te Māngai Pāhō (external link) te tohu Ngā Mahi Pāpāho i tautoko Tirohia te ataata tuku tohu Ngā Hapori Māori          Ko te toa o te tohu Ngā Hapori Māori ko Dr. Te Taku Parai Nā Te Puni Kōkiri (external link) te tohu Ngā Hapori Māori i tautoko Tirohia te ataata tuku tohu Aotearoatanga (external link) Ko te toa o te tohu Aotearoatanga ko Kōrero Māori (external link) by Te Hiku Media Nā Te Manatū Taonga (external link) te tohu Aotearoatanga i tautoko Tirohia te ataata tuku tohu Te Wiki o te Reo Māori    Ko te toa o te tohu Te Wiki o te Reo Māori ko te taupānga Kupu (external link) nā Spark & Te Aka Māori Dictionary Nā Whakaata Māori (external link) te tohu Te Wiki o te Reo Māori i tautoko Tirohia te ataata tuku tohu Te Tohu Huia te Reo        Ko te toa o te tohu Huia te Reo ko te taupānga Kupu (external link) nā Spark & Te Aka Māori Dictionary Nā Te Wānanga o Aotearoa (external link) te tohu Huia te Reo i tautoko Tirohia te ataata tuku tohu Ngā Tohu Kairangi          Ko ngā toa o Ngā Tohu Kairangi ko: #1miriona – Te Māngai Pāho (external link) Hīkoi Reo Māori Whangārei (external link) – Te Kura Taitamawāhine o Whangārei Guyon Espiner (external link) – Te Reo Irirangi o Aotearoa Fush Uka (external link) - Anton Matthews Te Tauihu (external link) – Te Kaunihera o Pōneke Nā Te Taura Whiri i te Reo Māori (external link)  Ngā Tohu Kairangi i tautoko Tirohia te ataata tuku tohu Te Tohu Oranga Angitu      Ko te toa o Te Tohu Oranga Angitu ko te Amorangi Whatarangi Winiata (external link) Nā Te Taura Whiri i te Reo Māori (external link) te tohu Oranga Angitu i tautoko Tirohia te ataata tuku tohu   RSS Feed Footer Ko wai mātou He aha Te Taura Whiri i te Reo Māori? Ngā tātai kōrero Tānga rangatōpū Whakapā mai Pānui Pāpāho Ā mātou mahi Te Tuku Tohu ki ngā Kaiwhakamāori ā-Tuhi, ā-Waha Whakamātauria Tō Reo Māori Rēhita Kaiwhakamāori ā-tuhi ā-waha Te whakawhanake reo, whakamaherehere reo Te Pūtahi Rangahau Ngā Tikanga Tuhi Te Amo Te Reo Māori Tikanga Māori Whakahuatanga : Pronunciation Learning te reo Māori resources Te Reo Māori Mō ngā take motuhake Wāhi Ako Reo Kaupapa Whakatairanga Te Wiki o te Reo Māori Hīkoi Whakanui i te Reo Māori Rauemi He Muka He Muka Pūrangaranga Contact Us +64 4 471 0244 info@tetaurawhiri.govt.nz Postal Address: Level 11, The Co-operative Bank House 20 Ballance St, Wellington 6011 Sitemap Te Matatapu Te Noho Wātea o ngā kōrero He Kupu Kaupare Te Taura Whiri i te Reo Māori © 2019 Last modified: 29th April 2019