Upoko 2 Ūpoko II:    Whakatere Ana Poupaka He Whakamārama Ko tērā tētehi tūpuna Māori, nō neherā, he toa ki runga i te moana nui. [1]   Ko Poupaka tōnā ingoa.   Ahakoa ngā āhuatanga kino i te rangi, ngā teitei nui o ngā ngaru ka whakaputa a Poupaka ki te moana, ā, ka hoki ora atu ai ki te whenua.   E kī ana te kōrero; Tūtūmāiao Tāwhiri-mātea Whakatere ana Poupaka. I roto i tēnei ngahuru tau, kua hanga waka hourua i runga i ngā tauira tawhito, ā, kua whāia e ngā kaumoana ngā āhuatanga o Poupaka.   Ko aua whāinga, arā, ngā whakawhitinga i te moana nui i ngā rua tekau tau nei, he kaupapa mō te Ūpoko II nei. Hei tēnei ūpoko ka whakarārangitia aua rerenga me ētehi paku kōrero tautoko (he maha ngā kōrero e pā ana ki ia momo waka; te tikanga o ngā ingoa, te take i hanga whērāhia ai, te mahi whakatikatika i aua waka, ngā paku raruraru me ngā huanga nunui ka taka ki runga ki ngā iwi, engari he kōrero anō ēnā mā tētehi atu tuhinga, ka waiho te Ūpoko II nei kia wahangia ngā whakawhitinga moana anake). Ka tīmata ngā tirohanga i te mātāmua o aua waka hourua, i a Hōkūle’a me āna rerenga i ngā tau 1976, 1978, 1980, 1985-1987, me te tau 1992 hoki.   Ka whakaputangia he kupu mō te rerenga a te waka hourua a Matahi Whakataka rāua ko Francis Cowan, a Hawaiki-nui.   Ka tirohia hoki ngā ara moana kua takahia e te waka rongonui, e Te Aurere.   Ko te whakamutunga, he kōrero e pā ana ki ngā rerenga kua hikoia e ngā waka hourua e ono i te tau 1995.   Hōkūle’a I te tau 1973, ka whakatūngia te Polynesian Voyaging Society (PVS) e Ben Finney, rātou ko Tommy Holmes, ko Herb Kane. [2]   Ko tā rātou kaupapa, he hanga waka hourua, hei whakawhiti i te moana nui.   He huarahi tēnei hei rangahau kōrero, hei whakautu i ngā whakapae a Andrew Sharp. Pikitia   1 :   Hōkūle’a II By Herb Kawainui Kane Ka pūāwai ō rātou whakaaro i te tau 1975, i te otinga a Hōkūle’a i te marama o Poutū-te-rangi.   He waka hourua, e 62 putu te roa, e waru ngā kiato, e rua ngā tokotū, e rua ngā rā [3] .   Ko te tūmanako kia hangaia te waka nei i ngā āhuatanga tawhito (he rākau ‘koa’, he taura kokonati), heoi anō, nā te utu, nā te roa o te wā ki te kimi i aua āhuatanga kāore i taea.   Nō reira, ka hangaia te waka ki te papakaka, [4] ki te rākau kahupapa, [5] ki te tāpia [6] hoki.   Ko te whakaaro tonu, he waka hanga mai i runga i ngā ritenga tata ki ērā o te wā i whakawhiti ai ngā tūpuna Māori i te moana nui. 1976   Hawai’i - Tahiti - Hawai’i Ka rere tuatahi a Hōkūle’a i te tau 1976, mai i Hawai’i ka tae atu ki Tahiti, ā, mai i Tahiti, ka hoki atu ki Hawai’i.   E rua ngā whakaponotanga e āta tirohia ana e te PVS.   Tuatahi ka taea e te waka hourua, whēnei te hanga, te whakawhiti i te moana nui.   Tuarua, ka taea te whakatere waka hourua me te kore-titiro ki te kamupene, ki te GPS [7] , ki te taputapu Pākehā rānei.   Kāore he kaiwhakatere nō Porinīhia, i taua wā, ā, ka tonoa a Mau Piailug.   He kaiwhakatere ia nō Satawal, nō ngā moutere o te Carolines.   Ka wehe te tekau mā rua o rātou i te 1 o Haratua.   Kotahi te marama e rere ana rātou ka kitea te motu, a Mata’iva.   E rua ngā rā i muri mai, i te 3 o Pipiri, ka ū atu rātou ki Tahiti.   Ahakoa ngā āhuatanga katoa ka pā ki a rātou, i ū tonu te waka hourua nei ki āna mahi, ā, i taea tonutia e Mau te whakatere i te waka. Ahakoa he rerenga pai ki Tahiti, ka tipu tonu mai tētehi tautohetohe i waenganui i ngā kaumoana.   He rerekē nō ngā tikanga Pākehā i ngā tikanga o te tangata whenua o Hawai’i.   Ka wehe atu a Mau, ka hoki atu ia ki tōna kāinga mā runga i te waka rererangi. I tau anō te rangimārie ki te waka, ka whiriwhiringia ngā kaumoana hou, ā, i te 4 o Hōngongoi, ka wehe atu i Tahiti.   E 22 ngā rā, ka ū atu ki Hawai’i.   Heoi anō, he hokinga atu i runga i te āwhina o ngā taputapu Pākehā (arā, he kamupene, he GPS hoki).   Ka whakapae tonu atu te PVS, ko te hua o te whakawhitinga nei,   kua huri ngā whakapono e pā ana ki ngā whakapae a Andrew Sharp. [8]               Whakaahua 1 : Tahiti ki Hawai’i 1976                Whakaahua 2 : Hawai’i ki Tahiti 1976   1978 Ka Tahuri A Hōkūle’a Ka whakaritea tētehi atu rerenga mō te marama o Poutū-te-rangi, i te tau 1978, engari ka raru te waka hourua nei, a Hōkūle’a.   I te wehenga atu i O’ahu, ka kaha pupuhi mai a Tāwhiri-mātea, ka ngaru nui mai a Tangaroa.   Nā te rahi o ngā kai me ngā taputapu, ka taumaha rawa te waka, ā, i roto i te moana teitei kāore e ngāwari ana te rerenga.   Nā wai rā ka kī tētehi takere i te pōrutu mai a Ngaru-nui, ā, ka tahuri te waka.   I reira, i waenganui i ngā motu o O’ahu me Moloka’i, ka tauawhi ngā kaumoana ki ngā takere.   Ka pō, ka ao, i reira tonu rātou e pipiri ana. Mā runga papa retingaru [9] ka wehe atu a Eddie Aikau ki te tiki āwhina.   Ka ngaro noa atu ia ki te moana, mate atu.   Ka whakaoratia ngā kaumoana e piri ana ki te waka, engari anō a Eddie, kāore i kitea. Nā taua matenga rā, ka whakarite he reo irirangi mō runga i te waka, ka whakaritea hoki he poti tautoko hei whai i te waka hourua, kia kaua taua āhuatanga e pā mai anō ki a Hōkūle’a. 1980   Hawai’i - Tahiti - Hawai’i Ko tētehi hua o te rerenga i te tau 1976, ko te whakatupu i te aroha me ngā whakaaro nui mō te kaupapa waka hourua nei.   He mea whakamana, he mea whakaihiihi i ngā iwi o Poronīhia.   Ko tērā a Nainoa Thompson me tōna ngākaunui mō te mahi whakatere a Mau.   Ka matenui a Nainoa ki ngā mātauranga whakatere waka hourua.   Te tini o ngā hāora ka noho a Nainoa i raro i te Whānau Mārama akoako ai i ā rātou rerenga.   Ka haere a Nainoa ki te Whare Mātai Rangihori, [10] i te Whare Taonga a Bishop.   I reira a Will Kyselka e āwhina ana i a ia.   Ka whai wā roa hoki a Nainoa ki te noho i te taha o Mau.   Kāore e mārama ana te katoa o ngā mōhiotanga a Mau ki a Nainoa, heoi, i te otinga, nā ngā akoranga a Mau me tōnā ake akoranga ka whakaritea e Nainoa he huarahi e taea ai e ia te whakatere waka hourua. [11] Ko Poutū-te-rangi te marama, i te tau 1980, ka puta atu anō a Hōkūle’a ki te moana nui.   Ko Nainoa Thompson te kaiwhakatere waka.   Kāore āna titiro ki te kamupene, ki te GPS, otirā ki ngā taputapu Pākehā.   Ka whakaterengia a Hōkūle’a, tae rawa ki Tahiti, arā, mō ngā rā 33.   Kotahi te marama ki reira.   Ka hoki atu i Tahiti, i te 13 o Haratua, ka tae anō ki Hawai’i i te 8 o Pipiri.   Nō reira, e rua ngā rerenga i te moana nui.   Koia nā te wā tuatahi, mō ngā rautau maha, kua whakaterengia he waka hourua e tētehi o ngā iwi o Porinīhia, i runga i taua ara moana. Whakaahua 3 : Ngā Rerenga a Hōkūle’a i te tau 1980 1985-1987   Te Moananui-ā-Kiwa Ka ara ake te tūmanako kia rere a Hōkūle’a ki te rahi o ngā moutere me te maha o ngā iwi i te moananui- ā-Kiwa.   He mea whakatairangi i aua iwi me te mahi whakatere waka i mahingia e ō rātou tūpuna.   He mahi rangahau, he wā ako i ngā āhuatanga a te rerenga waka hourua i aua takiwā o te moana.   Nō reira; Ka Haere ki Aotearoa   - ka wehe a Hōkūle’a i Hawai’i, ka tae atu ki Tahiti (Hōngongoi 10 : Here-turi-kōkā 11, 1985) - ka wehe i Tahiti, ka tae atu ki ngā Kuki Airani (Here-turi-kōkā 30 : Mahuru 14, 1985) - ka wehe i ngā Kuki Airani, ka tae atu ki Aotearoa (Whiringa-ā-rangi 21 : Hakihea 7, 1985)   Ka Hoki ki Hawai’i - ka wehe i Aotearoa, ka ū atu ki Tonga, ā, ka peka atu ki Hamoa (Haratua 1 : Haratua 11, ā, Haratua 23 : 25, 1986) - ka wehe i Hamoa, ka tae atu ki Ngā Kuki Airani , ā, ka whiti atu ki Tahiti (Hōngongoi 7 : 16,   ā, Here-turi-kōkā 12 : 21, 1986) - ka wehe i Tahiti ka tae atu ki te motu o Rangiroa (Paenga-whāwhā 2 :   4, 1987) - ka wehe i Rangiroa, ka tae rawa atu ki Hawai’i (Paenga-whāwhā 22 : Haratua 21, 1987)   Whakaahua 4 :   Hawai’i ki Aotearoa 1985 Whakaahua 5 : Aotearoa ki Hawai’i   1986-1987 I roto i ngā tau e rua kua whakawhitingia e te waka, a Hōkūle’a ngā maera nuku atu i te 12,000.   He mea patu i ngā whakapae e kī ana, kāore e taea e te waka hourua te whakauru ki ngā hau i pūmau mā te Whitinga [12] (whērā, i ngā rerenga mai i Hāmoa, tae atu ki Tahiti).   He mea patu hoki i ngā whakapae e kī ana, kāore e taea e te waka hourua te whakawhiti ki Aotearoa me te hoki atu ki ngā moutere i waenganui i te Moana-ā-Kiwa. [13]   1992   Hawai’i - Tahiti - Kuki Airani - Tahiti - Hawai’i I te marama o Pipiri, 1992, ka wehe anō a Hōkūle’a ki Tahiti.   E 29 ngā rā te roa o taua terenga, ā, ka tae ki Tahiti i 13 o Hōngongoi.   I te Mahuru, ka rere anō te waka ki Huahine, me Rai’atea.   I reira ka huihui ngā kaiwhakatere o ngā waka hou.   Ka karakia, ka wānangangia ngā mahi o te whakatere waka hourua.   Ka oti ngā whakaritenga i Rai’atea, i Borabora hoki, kātahi ka whakawhiti a Hōkūle’a ki ngā moutere o te Kuki Airani. I te 21, i te marama o Whiringa-ā-nuku ka huihui ngā waka ki Rarotonga.   Koia nei te wāhanga waka o te huihuinga nui, e kī ana, ko te 6th Festival Of The Pacific Arts .   Tekau mā ono ngā waka i tae atu, nō ngā moutere maha o te Moananui-ā-Kiwa.   Ko Hōkūle’a tētehi. Pikitia   2 :   Ētehi waka i Rarotonga, i te 6th Festival Of The Pacific Arts Ko te whakaaro, i te mutunga   o te huihuinga i Rarotonga, ka whakawhiti tōtika a Hōkūle’a ki Hawai’i.   Heoi anō ka tukua e Tāwhiri-mātea he aroha, he puhi mā te Tomakanga, ā, nā taua aronga i āhei ai a Hōkūle’a ki te rere atu ki   Tahiti.   Ka whēnā, e whā ngā rā e whanga ana a Hōkūle’a, i Tahiti, kātahi ka tika anō te hau, ka wehe atu a Hōkūle’a ki tōna wā kāinga.   E 25 ngā rā i muri mai, i te ata o te 30 o Whiringa-ā-rangi ka kitea e rātou a Mauna Kea, te maunga nui i te moutere o Hawai’i.   I ngā rerenga nei a Hōkūle’a, i te tau 1992, ka whoatu a Nainoa i te mahi whakatere waka ki ētehi atu.   I te whakawhitinga ki Tahiti, ka whakatere takitahi a Chad Baybayan rāua ko Shorty Bertelmann.   I ngā whakawhitinga i waenganui i ngā motu o Tahiti me Kuki ka riro mā Chad Baybayon rāua ko Keahi Omai.   I te hokinga atu ki Hawai’i ka whakatere takirua a Bruce Blankenfeld rāua ko Kimo Lyman.   He pūāwaitanga aua tohunga whakatere waka i ngā akoranga a Nainoa Thompson. Hawaiki-nui I te raumati, i te tau 1985, ka puta atu te waka nei, a Hawaiki-nui ki te pae o waho. [14]   Ko ngā takere, he tōtara nō Aotearoa, e rua tekau mā rua mita te roa.   He rau kokonati ngā taura, he rākau inanga [15] ngā tokotū, he rākau inanga ngā kahokaho. Nā Matahi (Greg) Whakataka-Brightwell te kaupapa i whanake.   Nāna ngā rākau i whiriwhiri, nā rātou ko āna ākonga ngā takere i tārai.   I runga i te tono a Francis Cowan ka kawea ngā rākau ki Tahiti, ki reira hanga waka ai.   Nuku atu i te rima tau te roa kia hangaia te waka hourua nei.   I aua tau o te hangānga o te waka, ka āhua mōhio rātou ki te toro me te takoto o ngā whetū, te rā me te marama, me te rere hoki o aua whānau mārama.   Ki ō rātou whakaaro, ko te marama kī, ko te rākau-nui, te wā tika hei wehe atu kia maumahara ai rātou ki te takoto o ngā whetū i runga i te rangi. [16] Tokorima i runga i te waka hourua a Hawaiki-nui, ko Franis Cowan te kaiārahi, te tumuaki. Ko Alex Roper hoki he kaiārahi, ā, ko Matahi tētehi o ngā kaumoana.   Ko ngā rerenga tuatahi i takihia ngā moana o Tahiti.   Nā, ka wehe atu i Tahiti, i te 31 o Whiringa-ā-nuku, 1985, ka tae atu ki Moorea, ki Huahine, ki Rai’atea.   I Rai’atea ka wānangangia e ngā kaumoana nei me te tangata whenua ngā ara moana tawhito o ō rātou tūpuna. Tekau mā tahi ngā rā ka tae atu ki Rarotonga i Rai’atea, heoi, i te nuinga o te wā kua kino te patu mai a te haumātakataka.   E rua ngā wiki ki Rarotonga e whakahoutia ana te waka, ā, i te 28 o Whiringa-ā-rangi ka wehe whenua atu.   He whakawhitinga roa, he whakawhitinga uaua kia tae atu ki te Ika-ā-Maui.   He wā ka nohopuku te waka, he wā anō ka pā mai ngā tūpuhi.   E rua tekau mā rua ngā rā ka tae ki te takiwā o Tūhua.   I mua tonu i te paenga ki te whenua ka karawhiu anō mai te āwhā, ā, tae rawa ki te rā whakamutunga o taua tau i te noho te waka rangatira nei i te pae o waho.   Ka whakaotihia te whakawhitinga nei i te tōnga o Hawaiki-nui e tētehi poti hao ika ki roto i te whanga, i Wharekāhika. Te Aurere I te 8 o Hakihea, i te tau 1985, i pōwhiritia a Hōkūle’a i Waitangi.   Ka tū a James Henare, ka whakamārama i te harikoa o tōna ngākau i te kitenga i a Hōkūle’a me tōna tūmanako hoki, ā tōnā wā, ka hāngaia he waka hourua i Aotearoa nei hei hoki atu ki ngā moutere o te Moananui-ā-Kiwa.   Ka mau tonu taua moemoea hei kai-hinengaro mā Hekenukumai Puhipi. [17]   I te tau 1991 ka kawe ake a Hekenukumai i te manuka kua whakatakotoria e James Henare. Ka tonoa āwhina Te Tai Tokerau Tārai Waka Inc. e Hekenukumai, he rōpū kua whakatūngia hei whakahouora i ngā kaupapa waka. [18]   I Kohi-tātea, 1991, ka turakina ngā kauri e rua i te ngahere o Herekino, ā, i mua i te mutunga o te tau kua hangaia e Hekenukumai mā, te waka a Te Aurere.   Tekau mā whitu mita te roa o ngā takere.   I taua wā kotahi noa iho te tokotū, i muri mai ka whakahoutia kia rua ngā tokotū.   I te tau 1990 ka tīmata ngā akoranga a ngā kaihoe mō te rerenga i te tau 1992.   Ka āwhinatia mai e te PVS, e Nainoa Thompson rātou ko Mau Piailug. 1992 Aotearoa - Rarotonga-Aotearoa Ko te kaupapa o te whakawhitinga i te tau 1992, ko te taenga ki Rarotonga mō te 6th Festival Of The Pacific Arts .   Nā taua wawata ka puta atu a Te Aurere ki te pae o waho i waenganui i te marama o Whiringa-ā-nuku.   He wā tonu tēnā o ngā haumātakataka, he āhuatanga i kitea e Te Aurere me āna kauhoe. I ētehi wā, he taikaha nō te makamaka mai a Tāwhiri-mātea, he papā nō te whati mai o ngā ngaru.   Heoi anō he maia tonu ngā kaumoana tekau mā tahi rā.   I runga hoki a Mau Piailug, hei āwhina i te mahi whakatere, me Clay Bertelmann (nō Hawai’i), hei   āwhina i te mahi whakahaere i te waka. I ngā wā o te hau kore, ka āwangawanga rātou mō te taenga takaroa ki Rarotonga, ka whītikingia ki te poti tautoko hei kukume i a rātou.   I te otinga atu, ka ū atu a Te Aurere ki Rarotonga i 22 o Whiringa-ā-nuku, kotahi noa te rā i muri mai i te rā kua whakaritenga.   Ka oti i ngā wāhanga o te huihuinga i Rarotonga, ka wehe atu a Te Aurere.   Tekau mā waru ngā rā o te hokinga atu ki Aotearoa, ā, ka whakatata ki Aotearoa ka karawhiua anō mai te āwhā nui.   E toru ngā rā ka patu mai, ā, ka whati te tokotū.   Nō konā, ka whakaoti ai ngā maera 100   i te mutunga nā te tōnga o te poti tautoko. 1993-1994   Taiāwhio i te Ika-ā-Maui I ngā kaupeka o te raumati, 1993-1994, ka taiāwhio a Te Aurere i Te Ika-ā-Maui.   Ka tere atu te waka rangatira nei ki ngā marae 17 kei ngā tōpito o te motu, mai i te Tai Tokerau, tae atu ki te Hau-ā-uru, ki te Ūpoko-o-te-Ika, whakawhiti atu ki te Waipounamu, ki te Tai Rāwhiti, ā, ka hoki rawa atu ki Te Tai Tokerau.   Ko te kaupapa o te rerenga nei, he tohatoha atu i ngā mātauranga me ngā kōrero o te waka hourua.   Ko ētehi o ngā wānanga ki whakatūngia i rō whare, ko ētehi ki runga i te waka nei.   I te otinga o ngā mahi i tētehi takiwā,   ka whiriwhiringia ngā kaumoana hou tokotoru, tokowhā rānei nō taua takiwā tonu, hei rere atu ki te takiwā hou.   Nō reira, i roto i ngā marama e whā, ka tokomaha ngā kaumoana i waimārie i te rironga o te wā hei rere mā runga i te waka hourua a Te Aurere. Pikitia   3 :   Te Aurere, i tāna wehenga atu i Marquesas, i te tau 1995   Ngā Rerenga I Te Tau 1995 Ka tū tētehi huihuinga waka hourua miharo rawa ki ngā moutere o Tahiti, i te Marqueses, me Hawai’i i ngā marama mai i Poutū-te-rangi, tae atu ki Haratua, i te tau 1995. [19]   Ko ngā waka i reira e whēnei ana; nō Hawai’i           - ko Hōkūle’a , - ko Hawai’iloa ;   he waka hourua i hangaia i te tau 1973.   Ko ngā takere he rākau ‘Sitka’ nō Alaska, 57 putu te roa. - ko Makali’i ;   ka whānau mai i te tau 1995, ko ngā takere he mea papakaka, 54 putu te roa. nō Tahiti               - ko Tahiti-nui , he waka kua whakahoutia i runga i ngā takere o te waka Hawaiki-nui.   E 70 putu te roa o te waka nei. - ko A’a Kahiki-nui ,   he mea hanga ki te rākau kuru, e 40 putu tōna roa. nō Rarotonga      - ko Te Au o Tonga , he waka hourua, e 70 putu te roa i hangaia ki te rākau kahupapa i te tau 1995 - ko Takitumu , he waka hourua i tāraia mō te huihuinga i Rarotonga, i te tau 1992. E 60 putu tōna roa, ā, i hangaia ngā takere ki te kahupapa. nō Aotearoa      - ko Te Aurere . Ka huihui ngā waka a Hōkūle’a rātou, ko Hawai’iloa, ko Tahiti-nui, ko Takitumu, ko Te Aurere, ki waho i te moutere o Rai’atea.   Hāunga a Te Aurere, kua rere mai ēnei waka i ō rātou ake wā kāinga.   I te ata, 18 o Poutū-te-Rangi, ka pōwhiritia ki te marae o Taputapu-ātea.   Ka ū atu ngā waka, ka whakatau, ka tukua ngā pure me ngā whāinga.   Ka oti ngā karakia ka rite ngā waka mō ngā whakawhitinga moana e haere mai ana. Ko te wāhanga nui tuarua mā ngā waka nei, ko te whakawhitinga atu ki Nukuhiva, arā, ki te Marqueses.   Nā te aronga o te hau me te potoo te   wā i tōngia te nuinga o ngā waka hourua ki reira.   Tae atu ki te 12 o Paenga-whāwhā ka tūtū te katoa o ngā waka hourua ki Nukuhiva.   Ka pōwhiringia ngā waka, ka whakaritea mō te wāhanga e whai mai ana. Ko te wāhanga tuatoru, ko te whakawhitinga i Te Marquesas ki Hawai’i.   He whakamātautau nui i ngā kaiwhakatere waka hourua.   E ono ngā waka hourua i rere, e rima ngā waka ka titiro anake ki ngā tohu a te taiao hei arataki i te waka.   E whēnei ana ngā kaiwhakatere; Hōkūle’a              - Chad Baybayan Hawai’iloa           - Bruce Blankenfeld Makali’i                - Shorty Bertelmann Te Au o Tonga     - Tua Pittman rāua ko Pe’ia Tua’ati Takitumu              - ka tirohia te kamupene me te GPS Te Aurere             - Piripi Evans rāua ko Jack Thatcher Ka whakaputa i Nukuhiva a Hawai’iloa,   rātou ko Makali’i, ko Te Aurere i 19 o Paenga-whāwhā, ā, ka whai atu a Hōkūle’a rātou ko Te Au o Tonga, ko Takitumu i te 20 o Paenga-whāwhā.   Kāhore ngā waka o Tahiti i te wehe, nō te mea, kāore anō kia whakaritea, kāore anō kia whakapakaritia aua waka mō te whakawhitinga roa pēnei.   E rua wiki me te hāwhe, ā, ka tae katoa mai ngā waka hourua nei ki te whanga o Hilo i Hawai’i, ā, ka whai mai ko ngā hui whakanui i a rātou.   Nō reira, e rima ngā waka kua whakaterengia i raro i ngā āhuatanga tawhito, mō te rerenga nui ake i te 2000 maera te roa. I muri mai, i te marama o Pipiri ka tukua a Hōkūle’a rāua ko Hawai’iloa ki te Tai Hau-ā-uru o Amerika.   I tere rāua i ngā moana o reira mō ngā marama e rua, hei whakaaturanga, hei mihi ki ngā iwi o reira.   Ka whakawhiti atu a Te Au o Tonga, rātou ko Takitumu, ko Te Aurere ki te moutere o Rarotonga, i taua marama tonu. [20]   I te 30 o Whiringa-ā-rangi ka ū atu a Te Aurere ki te takutai o Te Aurere, i Taipa.   E 20 ngā rā, te roa a te whakawhitinga mai i Rarotonga, ā, kāore ōna raruraru i te whakawhitinga nei.   Whakaahua 6 : Ngā Rerenga a Te Aurere i te tau 1995 I te tau 1995, e whā ngā whakawhitinga nui kua takahia e Te Aurere, mō ngā maera nuku atu i te 7500.   He waka rangatira te waka hourua a Te Aurere, otirā ngā waka hourua katoa, kua whakawhiti i ngā moana nui. Whakarāpopotonga I te Ūpoko nei kua whakarārangitia ngā whakawhitinga moana nui, nuku atu i te toru tekau.   I tīmata i ngā kōkiri tuatahi a Hōkūle’a, ā, kua oti i ngā rerenga i te tau 1995.   E tika ana he kaha te rapu a ngā iwi o Poronīhia i ngā tikanga whakatere waka hourua a ō rātou mātua tūpuna.   Me kī, ko Poupaka anō tēnā e whakatere ana. Nō reira, kua kitea ngā kōrero kei roto i te pukapuka i te Ūpoko I, kua kitea ngā terenga i runga i te moana i te Ūpoko II nei, ā, te tikanga ka māmā noa te kitenga, ka taea te whakatere waka hourua ki runga i te moana nui.   Ko te whakaaturanga e rere mai ana i te Ūpoko III, me pēwhea rā taua mahi whakatere waka hourua.   [1] Best 1925:386. [2] ko te nuinga o ngā kōrero i tēnei Ūpoko e pā ana ki ā Hōkūle’a me ngā rerenga i te tau 1995 ka uru mai i te Internet i te whārangi http://leahi.kcc.hawaii.edu/org/pvs/. [3] ko te rā, ko te wāhanga o te waka e pupuri ana i te hau,   arā ko te hera. [4] he kupu nō te Taura Whiri I Te Reo Māori (82/T) mō te fibreglass. [5] he kupu nō te Taura Whiri I Te Reo Māori (60/T) mō te plywood. [6] he kupu nō te Taura Whiri I Te Reo Māori (68/T) mō te glue/resin. [7] He taputapu nō te ao hou e āta kōrero ana, kei whea koe e tū ana, arā ko te Global Positioning System. [8]   tirohia te Internet : http://leahi.kcc.hawaii.edu/org/pvs/1976.html [9] he kupu nō te Taura Whiri I Te Reo Māori (68/T) mō te surfboard. [10] he kupu nō te Taura Whiri I Te Reo Māori (82/T) mō te planetarium. [11] Ko ngā kōrero i te Ūpoko IV, he mea tuku iho i ngā akoranga whakatere waka a Nainoa Thompson. [12] Sharp 1956:154. [13] Sharp 1956:32. [14] Ko ngā kōrero e pā ana ki a Hawaiki-nui he mea tuku mai i a Whakataka (1995), i a Kaa (1994), i a Finney (1994), i a Taonui (1994). [15] he kupu nō te Taura Whiri I Te Reo Māori (58/T) mō te bamboo. [16] Kaa 1994:16. [17] He mea kōrerotia mai e Hekenukumai, i te Pipiri, 1995. [18] Gabel 1995:A5-A11. [19] Tirohia te Internet http://leahi.kcc.hawaii.edu/org/pvs/L3Nukuhiva.html, Thatcher 1995:A15-A20. [20] kei te Ūpoko V te rahi o ngā kōrero e pā ana ki taua whakawhitinga a Te Aurere.