Upoko 4 Ūpoko IV:    He Moana Pukepuke He Whakamārama Ko tā te ūpoko i muri tata mai, ko ngā tikanga a te mahi whakatere waka hourua i runga i te moana nui. Ko tā tēnei ūpoko, ko ngā mahi-ā-ringa o te whakatere waka hourua i runga i te moana nui.   He tirohanga nei ki ngā kōkiritanga i whakatinana ai te kōrero ... "He moana pukepuke e ekengia e te waka." Ko te moana pukepuke ko te Moananui-ā-Kiwa, mai i Hawai'i, whakawhiti atu ki Rarotonga.   Ko te waka, ko Te Aurere.   I wehe te waka a Te Aurere me tētehi poti tautoko i Honolulu, i te 1 o Pipiri, i te tau 1995.   Ka ū rawa atu ai ki Rarotonga i te 30 o Pipiri.   E rua tekau mā iwa ngā rā i te moana nui, kāore te whenua i kitea.   Ka whakamātau ngā kaumoana kia mahi tūturu katoatia ai ngā mahi.   I roto i ngā whārangi e whai mai ana ka āta tātaritia ngā mahi whakatere waka i tae ora atu ai a Te Aurere ki tōna ūnga. I te Ūpoko III i kitea e toru ngā wāhanga whānui o te mahi whakawhiti moana, ā, ka āhua whēnā anō ngā wehewehenga o te Ūpoko IV nei. Tuatahi, ko te whakarite i te huarahi.   Ka tirohia te ara moana i whakarite.   Ka kōrerohia ngā wāhanga o taua ara moana me ngā māharahara nui hei whakatūpato mā runga i taua ara moana.   Ka whakaingoatia ngā kaumoana kua whiriwhiringia me te poti tautoko kua whakatūngia hei haere ngātahi mai.   Ka kōrerotia hoki ngā herenga me ngā taputapu Pākehā i runga i te waka. Tuarua, ko te arataki i te waka.   Me kī, koia nei te matū o te tuhinga roa nei.   Ka āta tirohia ngā wāhi i rere ai te waka hourua a Te Aurere i tāna haerenga i Hawai’i ki Rarotonga.   Ka whakaputangia ngā āhuatanga i aua wāhi me ētehi whakaaro i aua wā.   Ka āta tirohia ngā huarahi i aratakina mai mā te Whānau Mārama, mā Tangaroa me ōna wāhanga katoa, mā Tāwhiri-mātea hoki.   Ka āta tirohia hoki ngā mahi tatau o te kaiwhakatere waka i taea ai e ia te kī i rere te waka hourua nei mai i whea, atu ki whea. Tuatoru, ko te rapu i te whenua.   He kōrero tēnei mō te whakaotinga o te rerenga.   Ka whakamāramahia ētehi māharahara i ngā rā whakamutunga me te āhuatanga o te ū rawa ki Rarotonga. Ko ngā kōrero i te mutunga o te Ūpoko IV nei, he tirohanga whakamuri, he hokinga whakaaro, he whakarāpopototanga. Te Whakarite Huarahi Ko te pūtake o tēnei rerenga ko te hoki mai a Te Aurere ki Rarotonga.   Kua oti ngā whakamātautau i ngā kaiwhakatere waka, kua oti ngā pōwhiri me ngā hui whakanui i Hawai'i, kua tae ki te wā me huri te ihu, me aro atu ki ngā moutere i te Tonga.   Ka āta noho, ka āta titiro whakamua ki ngā āhuatanga o tēnei whakawhitinga.   Ka whakaritea ngā pūtea.   Ka whakaritea te waka.   Ka whakaritea ngā kai me ngā taputapu.   Ka whakaritea hoki ngā āhuatanga i te wā kāinga, kātahi ka tirohia te ara moana.   Ka whakaritea he ara moana hei whai mā te waka hourua.   Ka tirohia ngā māharahara mā runga i taua ara, ka tirohia ngā kaumoana, ka whakaritea hoki tētehi poti tautoko.   Ka whēnei hoki ngā wāhanga tuhituhi o tēnei ūpoko: ka tirohia te ara moana i whakaritea; ka tirohia ngā kaumoana; ngā māharahara; te poti tautoko; me ngā taputapu Pākehā hoki.   Te Ara Moana i Whakarite I whakatauria kia wehe i te wā o Paenga-whāwhā/Pipiri, nā te mea, kua oti ngā hui i Hawai'i, kua whakaritea te waka, kua tae mai ngā kaumoana hou mō tēnei whakawhitinga a Te Aurere, ā, he wā ka tika te pupuhi mai o ngā hau mō te tere whakarunga. Nā, ka āta tirohia ngā āhuatanga o Tāwhiri-mātea me ngā ia rere o Tangaroa mō te katoa o te haerenga.   Ka whakaritengia e te kaiwhakatere waka he ara moana hei whai.   Ehara i te mea ka taea e te waka te rere tōtika mā runga i taua ara moana, e kāo.   Kāore e ōrite ana ngā puhi o Tāwhiri-mātea i ngā wā katoa.   Heoti, ko tō te tūmanako ka whai tata te waka ki taua ara moana.   Kei te Whakaahua 23 te ara moana i whakaritea, kei reira hoki ngā āhuatanga o Tāwhiri-mātea rāua ko Tangaroa.   Nā ngā whanonga o aua atua e rua ka rerekē te aronga o te waka hourua ki tā te rerenga a te waka hourua. Whakaahua 23 :   Te Ara Moana I Whakaritea Kāore e tika ana kia anga tōtika ai ki a Rarotonga kei pā mai te tūpuhi mā te Whitinga, ā, ka ngaro rawa te waka i Tomokanga, i ngā moutere o Tonga tē taea te ahu atu ki Rarotonga.   I tirohia ēnei momo āhuatanga kātahi ka whakaritea kia whā ngā wāhanga o te whakawhitinga ki Rarotonga. Nā te rerekē o ngā hau e tāwhirowhiro ana i ngā moutere o Hawai'i, ka whakatauria kia tīmata ai te mahi whakatere waka i tētehi wāhi whakaterunga o te motu nui o Hawai’i.   Ki ngā whakawehenga ao o te Pākehā, ka tū taua takiwā i 18° 30' N,   155° 50' W.   Ko te wāhanga tuatahi o te whakawhitinga moana ka wehe i te takiwā whakaterunga i Hawai’i, ka aro ki te whare o Ngā Reo, ka tae ki te 9°N.   He āhuatanga anō i runga i te moana kei te 9°N.   Taihoa ake rā ka kōrero mō taua wāhi.   Ka tīmata te wāhanga tuarua i te 9°N ka haere ki te 3°N.   Ka aro ki te whare o Haka tae rawa ki te putanga i taua wāhi rerekē.   Ka whakarerea taua takiwā, ka ahu atu ki ngā Kuki Airani.   I te wāhanga tuatoru ka aro ki waenganui o ngā moutere Aitutaki, Manuae, Takutea, Atiu, Mitaro me Mauke.   Ko te whakaaro ka aro ki waenganui i aua motu kia pā ai ki tētehi ahakoa ko wai.   Ka ū ki tētehi o aua moutere, ka āta mōhio mātou kei whea mātou.   Ka mōhio hoki me aro ki whea kia tae atu ai ki Rarotonga.   Nō reira, ko te wāhanga tuawhā ko te rerenga i taua moutere ki Rarotonga whakaoti atu ai.   Kāore te wāhanga tuawhā i tuhia ki te Whakaahua 23 nei, nā te kore mōhio ka pae ki tēwhea o ngā moutere o te Kuki Airani. Nō reira ka whēnei ngā wāhanga e whā:                                  Wāhanga I   18° 30'N -   9°N te tawhiti                            ≈        620 m te tere                                ≈        5 n (120m/rā) te roa                                 ≈        5 ngā rā, 4 hāora te au moana                       ≈        12 m/rā Tomo.                                         ≈        62 m/wāhanga 1 te aronga                           =        Ngā Reo -Mara.                                     Wāhanga II    9°N -   3°N te tawhiti                            ≈        360 m te tere                                ≈        5 n (120m/rā) te roa                                 ≈        3 ngā rā te au moana                       ≈        kore (pea) te aronga                           =        Haka-Marangai                                  Wāhanga III   3°N   -   19° 30'S te tawhiti                            ≈        1350 m te tere                                ≈        5 n (120m/rā) te roa                                 ≈        11   rā, 12 hāora te au moana                       ≈        12 m/rā Tomo.                                         ≈        138m/wāhanga 3 te aronga                           =        Haka-Mahutonga                            Wāhanga IV    19° 30'S -   21° 14'S te tawhiti                            ≈        150 m pea te tere                                ≈        5 n (120m/rā) te roa                                 ≈        1 te rā, 6 hāora te au moana                       ≈        12m/rā Tomo.                                         ≈        16m/wāhanga 4 te aronga                           ≈        ?? Ko te tawhiti i te katoa o te haerenga e 2480 ngā maera. Heoi anō, he ariā noa iho te ara moana nei kua whakatakoto.   Kāore mātou i te whakapono ka tika rawa te haere mā runga i taua ara, engari ka whakatata noa. Ngā Māharahara I te aweke ngā rangatira me te kaiwhakatere o Te Aurere ki ngā take nui e toru i mua i te wehenga.   Tuatahi, ko te marama o Pipiri te marama e tipu ana ngā haumātakataka ki te takiwā o Hawai’i.   Ko te tūmanako ka puta atu i taua takiwā i mua i te aranga ake o tētehi. Tērā hoki tētehi wāhi rerekē kei te pae o waho.   I te nuinga o te wā ka noho i te 3° North ki te 9° North, engari ka nuku ki runga, ka nuku ki raro, ka whānui haere, ka ngaro haere.   E ai ki te Pākehā, ko te InterTropical Convergence Zone (ITCZ), arā, ko te doldrums.   E ai ki te Māori pea, ko te tuarā o Hine-moana, arā, ko te Tuahiwi-nui-ā-Hinemoana. [1]   He takiwā takaro, he wāhi huihuinga o ngā tamariki a Tāwhiri-mātea.   Ko ngā āhuatanga i reira kāore i kitea i tētehi atu wāhi o te ao.   Ka takimoana ngā tūpuhi, ka makihi noa ngā apū matangi, ka aewa iho ngā āwhā.   Kāore he wāhi i te ao katoa, tua atu i tēnei, e tāmaru ana te rangi.   He kāpunipuni o ngā pūao, o ngā pūrehurehu, o ngā pōkēao hoki.   Mehemea ka rongona te puhi he kōhengihengi noa.   Ka tae mai te waka hourua ki tēnei wāhi he uaua hei whakaputa, he uaua hoki te kitea ngā tohutohu e whakaatu ana kei whea te waka e aro ana.   I tētehi haerenga a Hōkūle’a ka mau ki reira mō ngā rā tekau mā waru. [2]   Otirā, ko te whakaputa i te Tuahiwi-nui-ā-Hinemoana te āwangawanga tuarua. Ko te mānukanuka tuatoru, ko ngā Kuki Airani, te ūnga e rapangia ana e Te Aurere, he huinga o ngā moutere pakupaku noa.   He ngāwari rawa te tere ki waenganui i ngā moutere me te hipa noa atu, ā, tē kitea tētehi.   Ko te tūmanako kia kaua e whērā, kia pā kē ki a Manue, ki a Takutea rānei, ki a Atiu rānei, ki a Mitiaro rānei, ki a wai rānei. Ngā Kaumoana Tekau mā rua ngā kaumoana i runga i tēnei whakawhitinga.   Tokoiwa nō Aotearoa, kotahi nō Hawai’i, kotahi nō te Caroline Islands, kotahi nō Rapanui.   He Māori te katoa.   He tāne te katoa.   Ehara i te mea kāore e whakaaetia ngā wāhine kia haere mai.   Engari ia ko ngā kaumoana wāhine kua akongia te mahi hoe waka kāore i te wātea mō tēnei haerenga.   Ka whēnei;       Heke Nukumai Puhipi           -- Rangatira     John (Jacko) Thatcher          -- Kaiwhakatere Rōpū Mahi Tuatahi                        Ke Ahi Omai                        -- Kaiwhakahaere             * nō Hawai’i     Hector (Maurice) Busby        -- Kaumoana                        George (Hori) Murray            -- Kaumoana/Kūki                Sesario Sewralur                    -- Kaumoana                    * nō Satawal     Carl Ahlers                           -- Kaumoana                    Rōpū Mahi Tuarua     Tūrakuraku (Lux) Kereopa     -- Kaiwhakahaere     Peter Rupapera                      -- Kaumoana     Carlos Atan                           -- Kaumoana                    * nō Rapanui     James (Hōri) Ahlers               -- Kaumoana     Te Taka (Adrian) Keegan       -- Kaumoana/Reo Irirangi   Nā Heke Nukumai te kaupapa waka hourua i whakahauora i Aotearoa nei.   Nāna te waka a Te Aurere i tarai.   Ko tētehi o ōna pūmanawa i tere kitea e au i waho, ko tāna tirohanga me tōna mātauranga ki ngā whanonga o te waka hourua.   Ka noho iho ia ka mātakitakingia te rā matua, te rā tauaki, te rā ngongo-hau.   Ka tirohia hoki te whena o ngā taura kutikuti, o ngā taura whakaara, o ngā waha me ngā waewae.   Nāwai rā, ā, ka tū ia, ka whakatangatangatia ētehi aho, ka whakakikīa ētehi taura, ko te otinga atu ka piki te tere o te waka, ka ngāwari hoki te mahi urungi. Ko tā Jacko, arā, tā te kaiwhakatere mahi, he mahi uaua.   Ko tāna, he whakatere i te waka hourua.   He mahi tūturu, kāore he mīhini, he kāmupene, he wāti rānei hei āwhina i a ia.   Ka mātakitaki ia kei whea te waka e haere ana i ngā wā katoa.   Ki te kōtiti te aronga o te waka māna hei whakatikatika.   Torutoru noa iho ngā hāora ka moe ia ia rā, ia rā. Ko Ke Ahi te kaiwhakahaere o te rōpū tuatahi.   Nō Hawai’i ia, he kaiwhakatere i runga i te waka o Hōkūle’a, nō reira, ka āwhina ia i te mahi a te kaiwhakatere i ētehi wā.   He tautōhito hoki te kaiwhakahaere o te rōpū tuarua, a Lux, ki ngā rerenga moana o Te Aurere.   He kaumoana hūmarie, he pou whirinaki o te waka nei. Ko tēnei te whakawhitinga nui tuatahi mō ētehi o te tira pōkai moana nei, heoi anō, ko te nuinga kua tau kē ki ngā haerenga-ā-moana whēnei. E rua ngā rōpū mahi, tētehi e mahi ana, tētehi e moe ana.   Ka oti i te ono hāora ka whakawhiti ngā rōpū.   Ka mahi mātou, ko te rōpū tuarua, i te whitinga mai o te rā ki te rā-nui, kātahi ka moe.   Ka mahi anō mātou i te tōnga o te rā ki te waenganui pō, kātahi ka moe anō.   I runga i tēnei āhuatanga kāore i tino mākona te moe.   Heoi, i te mutunga kua waia te tinana ki ngā moe whēnei. Te Poti Tautoko Kia tiaki ai i a Te Aurere i whakarite kia rere ngātahi mai tētehi poti tautoko.   Ko te whakaaro, mehemea ka pā mai te raruraru nui ki a Te Aurere, ka āwhinatia mai e te poti tautoko, ka kimihia rānei he āwhina. Ko te ingoa o te poti tautoko ko Potzalana.   Tokotoru ngā kaumoana i runga, ko te katoa nō Amerika.   Ko Joseph Dragovich te rangatira, nōna te poti.   He mīhini hinu, he reo irirangi nunui, he GPS, he radar hoki i taua poti.   I whakaritea kia kaua te poti tautoko e whakamārama mai i tētehi wāhi rere, i tētehi kōrero hoki, hāunga i te wā ka tata aituā mātou.   Ko te tikanga, ka tautoko te poti rā i a mātou inā ka tino raru mātou.   I āhua whērā hoki i te tīmata, engari ka tae ki te mutunga ka tautokohia kētia te poti tautoko e te waka hourua. Ngā Herenga Me Ngā Taputapu Pākehā He rerekē ngā tikanga i te ao hou nei ki tā te ao kōwhatu tikanga.   Ka rerekē ngā mahi i te ao hou nei ki tā te ao kōwhatu mahi.   Ka rerekē hoki ngā herenga i te ao nei ki tā te ao kōwhatu herenga.   Ko tētehi herenga nui i roto i te ao hou nei, ko te wā.   He wā potopoto e āhei ana te waka ki te whakarere whenua, nā te utu me ngā herenga a ngā kaumoana ake mahi.   I ngā wā o mua e āhei ana ngā kaumoana ki te whanga i ngā āhuatanga papai a Tāwhiri-mātea, kātahi ka puta ki te pae o waho.   Nō reira, he terenga i roto i ngā āhuatanga rangimārie o runga i te rangi.   I ēnei rā kotahi te wiki pea e taea te tatari, kātahi ka puta ki te moana, ahakoa e mārire ana a Tāwhiri-mātea, e aha atu ana rānei. Ki ōku nei whakaaro e pai ana te tō a te waka ki waho i te whanga, tīmataria ai te whakawhitinga,   ki roto rānei ki te whanga kia whakaotia ai te whakawhitinga.   I ngā wā o mua ka whanga i ngā hau tika hei māwhiti i taua pae.   He pōrangi noa te kōrero e kī ana, ‘ka taea te waka hourua te whakawhiti i te moana e 2500 maera te tawhiti, engari e kore e taea te whakawhiti i ngā maera whakamutunga e 20 .’   Ka taea te waka hourua te nuku haere i roto i te whanga engari me tatari kia tika te aro mai o Tāwhiri-mātea.   I ēnei rā he māmā noa atu te tō i te waka hourua ki roto i te whanga ki te tatari ki ngā apū e tika ana te aro. Koinā hoki te take he mīhini poti kei runga i te waka hourua a Te Aurere, arā, hei whakanukunuku i te waka ki roto i ngā tāwhangawhanga.   He mea āwhina hoki ki te ara ake mai tētehi ākau i te moana nui.   Mā runga i te whakawhitinga e 2500 maera te tawhiti, e kore e taea te mīhini poti me te 40 rita o ngā kōhinu [3] te whakarerekē i ngā āhuatanga o te haere. Tērā tētehi atu herenga, ko ngā ture a te Pākehā. [4] Nā aua ture i kī me kawe i ngā waka rauora, me kawe hoki i ngā reo irirangi.   Kāore he tautohetohe i aua āhuatanga, he mea tiaki i te oranga o te tangata, ahakoa ka taea te whiu a te kupu, ‘he Pākehā taputapu kua utaina’.   I te whakawhitinga nei kāore kau he mahi tā ngā waka rauora, engari he mahi nui tā te reo irirangi.   Ko ngā pūtake nui i whakakāngia e mātou te reo irirangi e whēnei ana : - kia kōrero ki te poti tautoko - kia rongona mehemea he tūpuhi nui e whakatata mai ana - kia āwhina atu, āwhina mai i ētehi atu waka hourua e tere ana i taua wā - kia rongona ngā whakaritenga a te whenua i wehe me ngā whakaritenga a te whenua ka ū - kia whakamōhio atu ki ō mātou kaitiaki me te hau kāinga, kei whea mātou, e pēwhea hoki ana mātou Ko tētehi atu taputapu Pākehā i runga i te waka hourua a Te Aurere, ko te GPS.   Nā māua ko Hekenukumai anake i titiro ki tēnā, ā, hāunga i ngā wāhi e rua kāore e kōrerohia ki te kaiwhakatere waka.   I ētehi wā kāore te GPS i runga i te waka hourua i taea te whakaputa i ngā wāhi rere nā te ngarotanga a ngā waka ātea.   Nā reira, ko te nuinga o ngā wāhi rere i ngā Rārangi 1 ki te Rārangi 4, he mea kōrerotia mai e te poti tautoko.   Tērā tētehi wā ka ngaro mātou i te tirohanga a te poti tautoko.   I te 17 o Pipiri, ka kaha pupuhi mai a Tāwhiri-mātea, ka nui te piki me te heke o ngā ngaru, ā, ka 6 noti te tere a Te Aurere.   Kāore te poti tautoko e taea te tere whēnā i runga i aua āhuatanga, ā, ka ngaro mātou i a ia.   Kotahi te pō e ngaro ana, ka awatea, ka kōrerorero i runga i te reo irirangi.   Ka kimihia e au te wāhi rere a te GPS i runga i te waka a Te Aurere, ka kōrerohia atu ki te poti tautoko, ka tīmata te poti tautoko ki te rapu i a mātou.   I taua ahiahi ka nohopuku a Te Aurere,   kia whakatata mai ai te poti tautoko, ā, taro ake rā, ka kitea mātou e te poti tautoko.   Ki te kore te waka hourua e mau ana i te GPS i taua wā, ka ngaro noa atu te poti tautoko i a mātou, tē taea tētehi te kimi i tētehi. Hāunga te reo irirangi me te GPS he matawā i ahau.   I whēnā au kia taea ai e au te whakatūtuki i ngā wā kōrerorero a te reo irirangi.   Atu i taua mahi, kāore he take mō te matawā i runga i te moana.   Ka ao, ka pō, ka ao, ka pō.   Koia noa te āhuatanga.   Ko te wā nui anake mā ngā kaumoana, ko te wā i whakawhiti ai ngā rōpū mahi.   Nā te kaiwhakatere tēnā i karanga, i runga tonu i tāna tirohanga ki a Tamanui-te-Rā, ki te Whānau Mārama rānei. Nō reira, he taputapu Pākehā i runga i te waka hourua, engari mena kāore te kaiwhakatere i kite, kāore e tōngia te waka, ko tāku e kī nei, ‘he tikanga tawhito i whāia e Te Aurere kia whakawhiti mai ai i Hawai’i ki Rarotonga’.   Te Arataki I Te Waka Ko te mahi nui a te whakatere waka hourua, ko te arataki waka i te wā e tere ana te waka.   I tēnei wāhanga o te tuhinga roa nei ka āta wānangangia te mahi whakatere waka hourua i mahitia i waenganui o Hawai’i me Rarotonga.   E toru ngā tirohanga nui nei kia whakaatu ai i pēwhea a Te Aurere   i wehe i Hawai’i, i whakawhiti i te Moananui-ā-Kiwa, ā, i ū ora tonu ai ki te moutere o Rarotonga. Ko tā te tirohanga tuatahi, ko ngā rerenga a te waka rangatira nei.   Ka āta kōrerohia ngā wāhi i rere ai e ai ki te kōrero a te kaiwhakatere waka ā, ka kōrerohia ngā wāhi i rere tūturu ai ki tā ngā tirohanga ki te GPS.   E whā ngā whakaahua e whakaatu ana i aua rerenga.   He kōrero hoki i ētehi āhuatanga, i ētehi whakaaro o ngā kaumoana i runga i te whakawhitinga nui o te moana pukepuke nei. Ko tā te tirohanga tuarua, ko ngā tohutohu mai i ngā atua.   Ka whakaatu i te arataki waka nā tā mātou tirohanga ki a Tamanui-te-Rā, ki ngā whetū, ki te marama, otirā, ki te whānau marama.   Ka whakamāramahia ngā amotai me ngā tamariki a Tangaroa i aratakina mai.   Ka kōrerohia hoki te āwhina mai a Tāwhiri-mātea i a mātou e rere ana i te pae o waho. Ko tā te tirohanga tuatoru, ko ngā mahi tatau a te kaiwhakatere waka.   Ka āta tirohia, he aha ia i mahi whika ai, pēwhea te āhua o tāna tatau, ā, he aha ngā āhuatanga me ngā whakatōpūtanga o tēnei mahi tatau i runga i te whakawhitinga   moana mai i Hawai’i   tae rawa atu ki Rarotonga. Ngā Rerenga Kotahi o Pipiri te rā, kotahi karaka te wā, ka kumea te waka a Te Aurere ki waho i te whanga o Honolulu.   Ka whakarerea te whenua kātahi ka wetea te taura tō.   Ka tū motuhake te waka.   Nā Heke-nukumai i tuitui ngā whakaaro me ngā whakamoemiti ki runga, ki ngā atua me ngā tūpuna.   Ka wherawherahia ngā rā, ka rere atu mātou.   Ko tā Tāwhiri-mātea, ko te 10 noti pea mā te whare o Manu i Tokerau.   Ko tā Tangaroa, ko te 1-2 mita te teitei mā te whare o Manu i Tokerau.   Ko te tere o te waka e whā noti pea.   Ka tere ngaro te whenua i a mātou.   Wāhanga I   1-7 Pipiri:              21° 19'N - 07° 02'N Ka whakaatu ngā rerenga a te waka a Te Aurere i te Whakaahua 24 ...   Whakaahua 24 :   Wāhanga   1   Te Tīmatanga I roto i te Whakaahua 23 kua whakatakoto i te huarahi kia tīmata ai i tētehi wāhi whakarunga tonu i te moutere nui o Hawai’i.   I whēnei, nā ngā māharahara ki ngā hau e kōpikopiko ana i te taha whakaruru o ngā motu o Hawai’i.   Heoti, ka tae rawa ki te wā wehe, ka tōtika tonu mai te āwhina a Tāwhiri-mātea i te Whitinga.   Ka rerekē ngā whakaritenga, ka puta tōtika i a Honolulu, i reira kē tīmata ai te whakawhitinga. I te Whakaahua 24 , e rua ngā tohu o ia rā, tētehi i te ata, tētehi i te ahiahi.   Ko ngā tohu whero he whakaatu i ngā wāhi rere ki te tirohanga a te kaiwhakatere waka.   Ko ngā tohu pango he whakaatu i ngā wāhi rere tūturu ki te kōrero a te GPS, i te poti tautoko a Potzalana.   Hei te Āpitihanga V ka whakarārangitia ngā wāhi rere a te kaiwhakatere me ngā wāhi rere a te GPS. Ka hohoro te waka i tēnei wāhanga.   Ki te noho te kaumoana ki runga i te waka ka noho mākū, he kaha whatiwhati mai nō ngā ngaru.   Te pāwera hoki i reira, he tarau anake ka mau, arā, he tarau mākū.   I te hihiri ngā wairua kaumoana katoa nā te ū a Te Aurere ki tāna mahi whakawhiti moana. Nā te kaha o ngā ngaru me te kaha mānukanuka o te waka i ngā rā tīmatatanga ka māuiui ngā puku.   Ko tōku tētehi.   I mua i te haerenga ka whakapono ko au tētehi e whērā ana, ā, i te taenga atu ka kitea e tika ana ōku whakapono.   Ka pahemo te wiki kotahi, ka wāia ngā tinana (me ngā wheua) ki te tāhurihuritanga i runga i te moana. Ka ātaahua ngā āhuatanga o te rangi tae noa ki te pō tuaono.   I konei ka heke te ua, ka māmā haere te pā mai o ngā apū, ka whakaatu mai a Hinemoana i ngā āhuatanga o tōna tuarā.   Ka kōuaua te rā 7 o Pipiri.   Ka tika tonu tō mātou mōhio kua oti te wāhanga I o te haerenga. I te wiki tuatahi ka rite tonu te kaha pupuhi mai a Tāwhiri-mātea i te aronga pai, 10-25 noti tōna hohoro.   Ka ahu mai mā te Whitinga.   Ka rite tonu te teitei o ngā ngaru o Tangaroa, 1-2 mita te whati mai mā te aronga i te Whitinga.   Ka rite tonu hoki te tere o te waka rangatira, o Te Aurere: 5-7 noti te tere i te nuinga o te wā.   Nō reira, i te wiki tuatahi   e 880 maera te tawhiti i rerea.   Wāhanga II   8-16 Pipiri:   07° 02'N - 01°08' S Ko Whakaahua 25 ko ngā rerenga i te Tuahiwinui-ā-Hinemoana. Whakaahua 25 :   Wāhanga II   Te Tuahiwinui-ā-Hinemoana Mā tēnei whakaahua ka taea te kite e noho tata ana ngā tohu rerenga.   E whēnei ana nā te mea kāore he tere nō te waka i tēnei takiwā.   I ētehi wā ka hoki whakamuri kē.   Ko te tohu kōwhai he mea tuhi hei whakakī i te wā i wareware i te poti tautoko te titiro ki te GPS. I tēnei wāhanga ka rerekē ngā āhuatanga i te rangi, i te moana hoki.   Ka   tāmaru i runga, ka māmā i raro.   Ka heke te ua.   Ko te whānau puhi ka takahuri mā ngā pae Tonga.   I reira mātou ka raru.   Kāore e āhei ana te waka ki te nuku whakatemua.   Kotahi te rā ka noho i raro i tēnei   āhuatanga, me tō mātou mōhio, āe rā, kua tae rawa ki te Tuahiwi-nui-ā-Hinemoana.   Ka huihui ngā kaiwhakahaere o te waka kia wānangangia ai tētehi huarahi hei whakaputa mātou.   Ko te otinga atu, ko te rerenga a te tono, ‘Herengia ki te poti tautoko, mā tāna mīhini mātou hei whakaputa i tēnei āhuatanga.’ Ka whītikina tōtikahia ki te poti tautoko ka kumea mātou e tāna mīhini. Ka ahiahi, ka ara ake i te pae tētehi pāroro, he hautupua rawa te āhua.   Ka nuku mai.   Anō nei he matapari pōkēao.   Ka nuku mai.   Kei tua atu i tōna awe māpara ko te mutunga kē mai o te pōuriuri.   Ka nuku mai.   Ka whakawehi i a mātou.   Ka nuku tonu mai.   Ka tirohia e au, ko te awatea o te rangi kei muri, ko te kerekere o te pō kei mua.   Ka whakatata mai.   Ka whakatāpouritia te poti tautoko e tō ana i a mātou.   Kātahi ka kōpakina mātou e te pō kerekere, e te pō tangotango o Pōkēkohu. Ono hāora pea ka mau a Te Aurere i te karawhiu o te āwhā kātahi ka māmā haere.   Heoi, ka mate tonu mātou i te aronga o te hau me tōna ngoi-kore.   Ko te 8 o Pipiri te rā, e tō ana te poti tautoko i a mātou kātahi ka pakaru rawa tāna mīhini.   I pahū te manawa hinu.   Tē taea te paku whakatika i konā, i waenganui moana.   Nā reira, ka tūturutia rawatia te mahi .   Inaiānei mā ngā atua anake mātou e kawe.   Ki te kore a Tāwhiri-mātea e rata mai ka kore mātou e nuku.   Nā konā, ka noho mātou i te Tuahiwi-nui-ā-Hinemoana mō ngā rā e waru. Ko tā mātou mahi i taua wāhi he hure hau, he kimi puhi, he rapurapu apū kia taea ai e mātou te haere whakamua.   I taritari mātou, i taritari, i taritari.   He maha ngā rerenga kupu whēnei ana, ‘Akuni pea hei āpōpō ka pupuhi mai.’ Heoi,   ko te nuinga o aua rā e waru, ka aewa noa mātou.   Ko tā ngā āwhā me ngā tūpuhi mahi he kōtītiti haere, anō nei he papa tākaro taua takiwā mā rātou.   Engari tonu ka paki ētehi o ngā rā.   Ahakoa ka pōkino ngā rangi, ka maomao rānei ka noho marino tonu te karetai.   He wāhi ātaahua tēnei mō te noho noa, mō te pōteretere noa, engari ki te haere koe ki tētehi ūnga kē ka takeo haere ki te wāhi nei.   Ko tētehi painga, kāore e kaha ana te pīoioi o te waka, he māmā te hikoi i runga i te waka, he māmā hoki te kai i runga i te waka, he māmā te tunu kai i runga i te waka, ā, kāore ngā ngaru e whakamākūkū mai.   Whakatoi mai ai ngā tuku hā a Tāwhiri-mātea i tēnei wāhanga.   Ko ētehi he kaha, ko te nuinga he māmā noa, kāore i pā mai mā te aronga takitahi.   Nā konā, ki te rere ngā amotai o Tangaroa, ka rere mā ngā aronga takitini, ā, ka iti iho te teitei i te kotahi mita.   Ka pūrewa noa te waka rangatira a Te Aurere.   Tata ki te 450 maera i rere, engari 300 maera noa iho ka rere mā te ara moana i whakaritea. Nāwai rā ka pupuhi mai a Tāwhiri-mātea mō ētehi hāora, ka mehameha noa i ētehi hāora.   I raro i tēnei āhuatanga, ahakoa he pōrori te haere, ka whakaputa i te Tuahiwinui-ā-Hinemoana. Wāhanga IIIa         16-24 Pipiri:          01°08' S - 10°02' S Whakaahua 26 : Wāhanga   IIIa   Te Nohopuku Tuarua He uaua te whakatere waka hourua i te Tuahiwinui-ā-Hinemoana.   Ka rere mai ngā amotai mā ngā aronga maha; ka ahu mai ngā hau mā ngā aronga maha; ka kōruru ngā rangi.   I te putanga atu kāore e takitahi ana ngā wāhi rere a te kaiwhakatere waka me ngā wāhi rere a te GPS.   Ko te tikanga, i te Whakaahua 26 , ka noho tahi ngā wāhi tuatahi kua tuhia te tohu whero me ngā wāhi tuatahi kua tuhia te tohu pango.   Engari ia ko te 170 maera kē te tawhiti mai i tētehi tohu ki tētehi atu. Ko māua ko Heke-nukumai anake i titiro ki ngā wāhi e ai ki te   kaiwhakatere waka, me ngā wāhi e ai ki te GPS.   I te 17 o Pipiri ka āwangawanga a Heke nā te rahi o te rerenga kētanga.   Ki te haere whēnei tonu, kāore pea e tae tōtika ki Rarotonga, nā, i runga i tērā whakaaro, ka whakamōhio atu ki te kaiwhakatere ki whea kē mātou e rere ana.   Ka āhua ohorere te kaiwhakatere waka.   E rua ngā rā ka whakatikatika ia i tāna mahi, ā, i te 19 o Pipiri ka tīmata anō ia ki te whakatere i te waka hourua nei.   Nō reira, ko ngā tohu māwhero-pango i te Whakaahua 26 , he wā i titiro te kaiwhakatere waka ki ngā wāhi rere o te GPS. I tēnei wāhanga o te whakawhitinga ka tīwara tā mātou rere i ngā moutere e rua, i a Malden rāua ko Starbuck.   Ahakoa ko te tekau maera noa iho te tawhiti, kāore tonu mātou i kite i aua motu.   Ka mea atu ētehi kaumoana kua kitea e rātou he rerenga kētanga kei ngā kapua, he tohutohu i te whenua, engari he marangai hoki kei te rangi i taua wā, nā, ka uaua te tirohanga.   Anō nei, ko mātou anake kei waenganui tonu i te tāhorahora nui rawa. Kātahi tētehi āwhā ka noho mai ki runga i a mātou.   I ngā tūpuhi whēnā e mārama tonu ana te kitenga kei te whawhai nui tonu a Tāwhiri-mātea rāua ko Tangaroa.   Ka makamaka iho ngā haupatu   a Tāwhiri-mātea,   ka karawhiua ake ngā whakahoki a Tangaroa, ka ihiihi iho ngā huripari, ka whakarāwhaki ake ngā whatiwhatinga tūātea.   Ka patua, ka patua, ka patua, e kore rawa tētehi i toa i tētehi.   Nā, ko tā Tane-whakapiripiri mahi, ko tā te waka hourua mahi, he kūpapa atu ki waenganui i ngā hoariri rā, ki waenganui i te whiunga a te patu, ki roto hoki i te mura o te ahi.   Pikitia   4 :   He āwhā i te moana e haere mai ana Ka ngaro atu te āwhā rā ka paki te rā.   Ka hīa e Tāwhiri-mātea i tōna hā.   Kāore te waka i neke.   Kotahi te rā, ka rua, ka toru, ka whā, ka noho tonu mātou i te wāhi kotahi.   Anō nei kua mau i te kupenga nui.   Te tahutahu hoki a Tamanui-te-Rā.   I kaukau te nuinga o mātou i reira, he mahana nō te wai, he purata hoki nō tō Tangaroa kāinga.   Kua ruharuha haere ō mātou tinana, ko te takeo kei ngā hinengaro.   Ka takoto mātou i runga i te kaupapa, whakamaroke tinana ai, whakamaroke kākahu ai.   Ko ētehi e ngutu pI ana i ō rātou moemoea, he wātakirihi tō tēnā, he poaka tō tēnā, he laolao tō tēnā, he aihikirimi tō tēnā, he pia mātaotao tō tēnā.   Ka kitea e tētehi te kōauau kua hanga ki te kōiwi hipi, ka warea e ia te mate kiko hipi. I tēnei wāhanga, e whā ngā rā ka rongona te ringa kōpana o Tāwhiri-mātea, 15 noti mā te Whitinga, ā, i aua rā ka piki ake ki te kotahi mita pea ngā pūkarukaru o Tangaroa.   E whā ngā rā ka ngaro a Tāwhiri-mātea i a mātou, ka marino rawa tō Tangaroa kāinga.   E 600 maera te tawhiti i rere te waka hourua i aua rā e waru. Wāhanga IIIb         24-30 Pipiri:          10°02' S -21°14' S Ko tēnei, te wāhanga i whakaoti ai i te rerenga. Whakaahua 27 : Wāhanga   IIIb   Te Whakaotinga Roa mātou e nohopuku ana i te takiwā o Penrhyn, me te mōhio tonu, he ngāwari te kitenga, kei a wai te mana whakahaere i runga i te moana nui.   Ahakoa te kaha o ngā ngaru, ngā rerenga hoki o ngā ia, kei a Tāwhiri-mātea kē te mana whakahaere o ngā waka hourua i runga i te pae o waho. I te takoto noa mātou kātahi ka kitea te pekepeke o ngā puhi ariki.   Ka tū ake ngā kaumoana, ka rongo i te whātoro mai o te hau.   Ka whakatūwherangia ngā rā, ka hopungia ngā apū, ka oho anō te waka a Te Aurere.   Ka whakakaha te pupuhi mai, ka kamakama te rerenga, ka hikohiko ngā whatu manawa.   Ahakoa te tawhiti kei te toi, ka whakapono mātou ki tēnei te apū o Tāwhiri-matea e kore e memeha i mua mai i te ūnga.   He koha i tukuna mai e Tāwhiri-mātea kia kawea rawa atu ai mātou ki ngā Kuki Airani.   Ka whakatata ki ngā moutere rā ka hiamo haere ngā tinana, ka rū ngā manawa, ka reka katoa hoki ngā whakaaro.   Ka hipa ki waenganui o ngā moutere o Manuae me Takutea.   Heoi, nā te teitei o ngā ngaru, nā te pūrehurehu me te pouri o runga, kāore e kitea i tētehi o aua moutere.   Ka rere tōtika ki Rarotonga. I tēnei te wāhanga whakamutunga, i pūmau tonu te āwhina mai a Tāwhiri-mātea, 10 noti tōnā taikaha, mā te Whitinga.   Pakepake mai ai ngā amotai o Tangaroa, tae rawa ki te 2 mita te teitei, i rere mai mā ngā aronga i te Whitinga.   E 800 maera te tawhiti i rere te waka rangatira i ngā rā e ono nei hei whakatūtuki ai i ōna tūmanako. Ngā Tohutohu O Ngā Atua E whai mai ana ngā tohutohu o runga i te rangi, ngā tohutohu hoki o runga i te moana i kitea ē mātou i te whakawhitinga mai i Hawai’i ki Rarotonga.   He mea kite-ā-karu, he mea mahi-ā-ringa kia whakarārangitia ai, kia aratakina ai te waka hourua a Te Aurere i te marama o Pipiri, i te tau 1995. Te Ārahi a Te Whānau Mārama Tata te katoa o te rerenga ko tā Tāwhiri-mātea mahi, he whakapā mai mā ngā whare i te Whitinga.   Nā, ka whakarara atu ngā rā ki te Tomokanga, ka ngaro noa ngā whetū o te Tomokanga ki tua i aua rā nunui.   Ko ngā tohu o te rangi e māmā ana ki te kimi, ko ngā tohu i te Whitinga. Hāunga i ngā ao kōruki me ngā pō pouri, i whakarārangitia e te kaiwhakatere i te waka ki ngā tohutohu o runga.   I te wāhanga tuatahi o te haerenga ko te tūmanako kia aro ki te whare Ngā Reo, whēnā ki te Whakaahua 28 . I te awatea i tirohia e mātou te rerenga tāwhana a Tamanui-te-Rā.   Ka whēnei tāna rerenga, ka whiti mai i te whare o Kāinga i Tokerau, ka tō atu ki te whare o Kāinga i Whakararo.   Nō reira, i tēnei aronga, i whakarārangitia ngā kahokaho muri i te waka ki te whitinga mai a Tamanui-te-Rā, ā, i whakarārangitia aua kahokaho ki te tōnga atu a Tamanui-te-Rā, engari kia whā ngā whare ki muri i te waka.   I te pō ka tirohia ngā whetū.   Mehemea kei te haere tōtika te waka ki Ngā Reo; ko Kōpū tērā e hāngai tonu ana ki te waka, ko Vega tērā, kotahi me te hāwhe o ngā whare ki muri i te hāngaitanga, ko Pareārau tērā, e whā ngā whare ki mua i te hāngaitanga. I roto i te Whakaahua 29 kua kōtiti kē te aronga o te waka mā te whare o Haka.   He mea ngāwari tēnei te kite.   Tuatahi ko te whitinga mai me te tōnga atu o te rā ka rerekē.   I tēnei aronga ka whiti mai te rā, kotahi kē te whare ki muri i te hāngaitanga, ā, ka tō atu, e toru kē ngā whare ki muri. Whakaahua 28 : Ka aro te waka ki 'Ngā Reo' Whakaahua 29 : Ka Aro Te Waka ki ‘Haka’ Kāore hoki a Kōpū e hāngai tonu ana ki te waka.   Ko Poutū-te-Rangi kē e hāngai tonu ana.   Kāore a Vega e whiti mai ana i te kotahi me te hāwhe o ngā whare ki muri i te hāngaitanga, engari e rua kē me te hāwhe.   Kāore a Pareārau e whiti mai ana i te whā o ngā whare ki mua i te hāngaitanga, engari e toru kē.   Kua whakarerekē ngā aranga katoa nā te hē o te aronga o te waka.   He mea tere kitea e te kaiwhakatere waka.   Ehara hoki i te mea ka titiro te kaiwhakatere waka nei ki a Tamanui-te-Rā me ngā whetū tokorima noa iho.   Ka tirohia ngā whetū maha.   Ko ētehi i ara ake i ētehi wā o te pō ko ētehi i ara ake i ētehi atu wā o te pō. Ki te karo i te kapua ngā whetū o mua, ka tirohia ngā whetū o muri.   Ki te ngaro ngā whetū o muri, ka tirohia ngā whetū ki te taha.   Ki te ngaro te katoa mō te wā roa, ka whakatū te waka.   I tētehi pō, i ahau e urungi ana, ka uaua te mahi.   Ka ngaro ngā whetū o mua i te waka, ka huri au ki muri.   E rima meneti pea ka ngaro ngā whetū i reira, ka huri au ki te taha.   Ka ngaro ki reira, ka hoki au ki mua.   He wā poto ka ngaro te katoa, ka tīmata au ki te rongo i ngā ngaru e whakapīoioi ana i te waka me ngā hau e whakakīkī ana i ngā rā. Tekau meneti i muri mai ,ka puta mai anō ētehi whetū, ka māmā anō te mahi. E whā ngā wā i te katoa o te haerenga i whakatūria te waka hourua nā te ngarotanga o ngā tohutohu o runga i te rangi. Ko tā te marama he kōkiri atu i waenganui i ngā whetū.   I te whakarerenga i te whenua ka whiti mai te marama i te whare Kāinga i te Tokerau.   Ka nuku haere te whitinga mai ki te whare Kāinga i te Marangai, ā, ka hoki haere anō ki te whiti mai i te whare Kāinga i te Tokerau.   I wehe mātou e toru ngā pō i muri mai i te tauwhirowhiro o te marama.   He pai tēnei nā te mea i te taenga atu ki te Tuahiwinui-ā-Hinemoana, kua rākaunui te marama.   He kaha nōna i te wā i te āta kimi mātou i ngā tohutohu o runga.   I ētehi wā ka whakarārangitia te waka ki te marama i ngā awatea.   I ētehi wā ka whakarārangitia te waka ki te marama i te pō.   Engari i mua i te whakarārangitia ka āta tirohia e te kaiwhakatere waka kei whea kē te marama i taua wā.   Ka rahi ngā wā ka arahina mai te waka e te marama. Te Ārahi a Tangaroa Ko te rongo i ngā amotai tētehi tohu nui.   E wāia ana ngā kaumoana tautōhito ki te titiro ki ngā piki me ngā heke o ngā ngaru me te whāki atu ko tēhea te amotai e rere mai ana mā te Whitinga, ko tēhea te amotai e rere mai ana mā te Tonga, mā whea rānei.   Ehara i te mea he māmā te kitea, engari mehemea ka roa tāu mataara, ā, ka maha rānei āu noho i runga i te moana kātahi ka mārama mai ētehi ritenga ngaru.   Ko ngā amotai nui ka kitea e mātou i kōkiri mai mā te Whitinga, mā te whare Manu i Tokerau, mā te whare Manu i Marangai hoki.   He tohu āwhina ēnei i te aronga o te waka.   Hāunga i te tirohanga, i te wāhanga tuatahi, ka taea hoki te rongo i ngā amotai nā te mānukanuka o te waka hourua. Tirohia te Whakaahua 30 . I whēnei i te wāhanga I o te haerenga, ko te amotai matua ka pūrewa mai mā te Whitinga.   Ko te waka ka aro ki te whare o Ngā Reo.   Nō reira,   i te Whakaahua 30 ka whēnei te rongo ki ngā ngaru; ka piki te ihu mauī, ka hiki tēnā i te pikinga o te kei mauī me te ihu katau, ka heke aua wāhanga i te pikinga o te kei katau, ka hiki te kei katau, ā, kua hipa te ngaru. Mehemea ka huri te waka kia whērā i te Whakaahua 31 he ngāwari noa iho kia kite ka piki te ihu me te kei o te taha mauī i te wā kotahi kātahi ka whai atu te ihu me te kei o te taha matau.   Ka tere mōhio te kaiurungi kua hē te aronga o te waka.   I te Whakaahua 30 he itiiti noa iho ngā ngaru ka whati ki runga i ngā kaumoana e noho ana, e takoto ana i runga i te kaupapa, engari kē mō te pōrutu mai o ngā ngaru ki runga i ngā kaumoana i te Whakaahua 31 .   I ētehi wā, ka nui te whati mai a te ngaru ki runga i te kaumoana, ā, ka tere huri tōna kanohi ki te kaiurungi kia kite mehemea e tika ana tāna mahi. Whakaahua 30 : Ngā Amotai i te Aronga ki ‘Ngā Reo ’   Whakaahua 31 : Ngā Amotai i te Aronga ki ‘Haka ’   Nō reira, e āhua ngāwari ana te rongo i ngā amotai i te wāhanga tuatahi o te haerenga, engari ka tae ki te Tuahiwinui-ā-Hinemoana, ki te Wāhanga Tuatoru hoki o te haerenga kāore, i te māmā te rongo me te titiro ki ngā amotai.   I aua takiwā o te moana ka rere te maha (te kore rānei) o ngā amotai i te wā kotahi, ka uaua mā mātou e whiriwhiri ko tēwhea tēwhea. Ngā Tamariki a Tangaroa He kaitiaki tō te waka a Te Aurere, ko tētehi o ōna āhua he aihe.   E whitu pea ngā wā ka tūtaki mātou ki te hunga aihe, engari e toru ngā huihuinga aihe nunui i kitea.   E whitu tekau pea te rahi o tētehi rōpū, he tamariki ō rātou āhua. Ka panau ake, ka rukuruku iho, ka whakapūhoru ki tēnā taha, ka whakapūhoru ki tērā taha, ka tūpekepeke ki mua, ka tūpekepeke ki muri.   Te harikoa hoki kei ā rātou tākaro.   E whā hāora pea ka kōkirikiri mai rātou.   Koia nei hoki te wā e tata ana mātou ki te pae waenganui o te ao.   Ka tipu ake te whakaaro nā rātou mātou i kawe kia whakawhitia ai taua pae. Ehara te kitenga ki ngā aihe i te tohutohu e āta kōrero ana kei whea mātou,   engari ka whēnei ngā whakaaro, ‘Kua tae mai anō tō mātou kaitautoko, tō mātou kaiārahi, ko te āhua nei kei te tika tonu tā mātou takahi.’   E tata tonu ana ki te whanga o Ngā Tangi’ia ka kitea e mātou te aihe whakamutunga. [5] I te putanga atu i te Tuahiwinui-ā-Hinemoana ka mui mai te tira Haku.   He maha ki mua e tūpekepeke ana, he maha ki muri e tūpekepeke ana.   Ka noho taua rōpū i tō mātou taha mō te wiki kotahi, neke atu rānei.   Inā ka hopungia te hau ka nuku whakamua te waka, ka nuku whakamua hoki te hunga ika nei.   Inā kare kau he hau, ka noho noa te waka, ka noho noa hoki ō mātou hoa ika.   Anō nei, nā tā rātou tiakitanga i taea ai e mātou te nukunuku haere i taua takiwā akaaka o te moana. Nā te maha o ngā ika, ka maha hoki ngā manu e hī-ika ana.   E toru tekau pea te rahi.   I reira ngā Kiwa , ngā Tara, ngā Amokura, ngā Ngongo me ngā Kena hoki.   I taua wā, i te mōhio mātou kei waenganui tonu mātou i te māhoranui.   I te tōnga o tētehi rā, ka āta mātakitaki māua ko Sesario i ngā manu, otirā i ngā Ngongo.   He waru, he iwa rānei ka rere tōtika ki te Tomokanga.   Ko tā Sesario ki a au, “arā, te huarahi kia tae atu ai ki tētehi whenua, akuni pea ki a Kirimati.” [6]   Nō reira, ka aratakina mai e ngā tamariki a Tāne-māhuta hoki. Te Ārahi a Tāwhiri-mātea I ngā rā i kōruki o runga i te rangi me te kore rere ngātahi mai a ngā amotai, ka noho mā ngā apū o Tāwhiri-mātea e tohutohu mai.   E rima ngā wā roa (nuku atu i te kotahi hāora) i whēnei.   I aua wā ka urungi te waka ki ngā āhuatanga o te rā matua me te rā tauaki.   Mehemea e kī rawa ana ngā rā i te hā o Tāwhiri-mātea, ka whakakake ki te hau.   Mehemea e piupiu noa ana ngā rā, ka whakaheke i te hau.   I ētehi rā i te hiahia mātou ki te aro ki te whare o Ngā Reo i Marangai, engari nā te ahu mai o ngā puhi (mā ngā whare i te Marangai) ka aro kē te waka ki te whare o Haka i Marangai.   I aua wā, ka whēnā anō te mahi.   Inā ka kī rawa ngā rā ka whakakake ki te hau, inā ka piupiu noa mai ngā rā ka whakaheke i te hau.   Ka āta tirohia ngā puhi ariki.   Ki te tika te rere o te puhi ariki, ka tika te aronga o te waka i taua hau. Tērā tētehi ahiahi ka kitea te āwhiowhio.   I te pae, āhua 10 maera pea te tawhiti, ka kitea ētehi kapua e tū taki ana.   Kua whakarārangitia he pou kapua.   Ka tū rā, ka tū rā, kātahi ka takahuri haere.   Ka hohoro te tāwhirowhiro ka tiro mākutu atu mātou.   Ki te pā mai te āwhiowhio rā ki a mātou e kore rawa e taea e mātou te aha.   Ka poto te wā ka māmā haere te takahuri.   Ka pōturi haere, ā, ka ngaro noa te āwhiowhio.   Ka hotu ngā manawa o te hunga mātakitaki.   Te Mahi Tatau O Te Kaiwhakatere Waka He Kupu Takataka Ko te noti, ko te tere o te waka, arā, e hia ngā maera [7] ka haere i te hāora kotahi.   Nā reira, mehemea ko te 10 noti te tere o te waka, i roto i te hāora kotahi ka hipa te waka i te 10 maera. Ko tā te Pākehā, ko te whakawehewehe i te ao whānui ki ngā rārangi longitude me ngā rārangi latitude .   Ka rere ngā rārangi longitude mā te Tonga me te Raki.   Ka rere ngā rārangi latitude mā te Whitinga me te Tomokanga.   I roto i ngā mahi tatau a ngā kaiwhakatere waka i ēnei rā, kāore he tirohanga ki ngā rārangi longitude , engari ka tirohia ngā rārangi latitude . I whakawehewehea te ao kia 180 ngā rārangi latitude , arā, kia 180°: e 90 ki te Raki, e 90 hoki ki te Tonga.   Ka noho te pae waenganui o te ao [8] i te 0°, ko Hawai’i kei te 21°N, ko te Pou Raki kei te 90°N, ko Rarotonga kei 21°S, ko Aotearoa kei 40°S, ko te Pou Tonga kei 90°S.   E hāngai ana ngā rārangi latitude ki ngā maera.   Ka whēnei ; 1° =   60' (meneti),   60'   =   60 maera ki te Tonga, ki te Raki rānei (arā, i te aronga latitude).   Nō reira, ki te haere tōtika te waka 180 maera ki te Tonga, ka hipa i te 180' ki te Tonga, ā, ka nuku i te 3° ki te Tonga.   He aronga whakaterunga, whakateraro anake tēnā, e kore e taea te tatau whēnā mō te aronga ki te Whitinga, ki te Tomokanga, ki tētehi atu rānei. Ka mōhio te kaiwhakatere waka i whakarerea te whenua i whea.   Ka āta tatau ia i ngā tawhiti me ngā aronga i rere ai te waka.   I te whakawhitinga atu o te rā, i te whakawhitinga mai hoki o te rā, ka whakatōpū ia i ngā tatau.   Ka whakatau ake te kaiwhakatere waka kei whea hoki te waka i aua wā.   I tēnei wāhanga o te ūpoko ka whakamārama i ngā mahi tatau a te kaiwhakatere waka hourua. Ngā Tatau Nui E Rua E rua ngā tatau me mōhio te kaiwhakatere waka.   Tuatahi, pēwhea te tawhiti kua haere whakaterunga, whakateraro rānei (arā, te latitude).   Tuarua, pēwhea te tawhiti kua kōtiti i te ara moana i whakaritea.   Nā tōnā mōhiotanga ki ēnei tatau e rua ka āta mōhio ia kei whea te waka. Mehemea e rima noti te tere o te waka, i roto i te rā kotahi ka hipa i te 120 maera, (5 noti x 24 hāora = 120 maera).   Mehemea ko te ara moana kua whakatakotoria, ka haere mā te Tonga, ā, ka pūmau tōtika te waka ki taua ara, i taua rā ka haere 120 maera, ka nuku 2°, kāore he kōtiti.   Ka ōrite te rerenga o te waka, te ara kua whakaritea, me te tawhiti whakaterunga.   Ka whēnā i te Whakaahua 32 .(i). He ngāwari noa iho te tauira i runga, i te wā ka whai tōtika te waka i te ara moana mā te Tonga.   Engari e kore ngā whakawhitinga moana e whēnā ana.   Kāore he maha ngā ara ka whakaritea kia haere mā te Tonga.   Kāore te waka hourua i pūmau tōtika katoa ki ngā ara moana kua whakaritea. Ngā Nama Tauira E Whitu Kua hangaia tētehi huarahi kia kimi ai i te tawhiti whakaterunga, i te tawhiti kōtiti hoki, inā kāore te ara moana me te waka hourua e haere mā te Tonga.   E whitu ngā nama tauira ka maumahara te kaiwhakatere waka.   Ki te maumahara ia i aua nama tauira e whitu ka taea e ia te tatau i te tawhiti whakaterunga, i te tawhiti kōtiti hoki, ahakoa he aha te ara moana kua whakatakotoria, ahakoa i rere te waka mā whea, ahakoa hoki he aha te tere o te waka. Ka whēnei ngā nama tauira e whitu;                                 te kōtiti             ngā maera            (i)                   0 whare            120 / 0            (ii), (viii)         1 (7) whare       118 / 24            (iii), (vii)         2 (6) whare       112 / 46            (iv), (vi)          3 (5) whare       100 / 67            (v)                  4 whare            85 / 85   Ka hāngai ngā nama tauira nei ki te Whakaahua 32 .   Ka hāngai te kapa tuatahi ki ngā wāhanga o taua whakaahua. Ko te kapa kōtiti he kōtiti i tō te waka aronga.   Ko te kapa tuatoru ngā maera ka rere te waka mehemea e 5 noti tāna tere, ā, ka haere mō te 24 hāora.   Ko te whakaaro hoki ko te ara moana i whakaritea ka haere mā te Tonga. Nō reira, mehemea kāore te waka e kōtiti ana, ka rere te waka i te 120 maera ki te Tonga, whēnā i te Whakaahua 32.(i);   Whakaahua 32 : Ngā Tatau Tawhiti, inā mā te Tonga te Ara Moana Mehemea ka rere te waka mā te whare o Haka kē i Marangai: kotahi te whare i kōtiti, ko 118 maera te tawhiti whakaterunga, ko 24 maera te tawhiti i kōtiti.   Tirohia te Whakaahua 32 .(ii). Mehemea ka rere te waka mā te whare o Ngā Rangi kē i Marangai: e 3 ngā whare i kōtiti,   100 maera te tawhiti whakaterunga, e 67 maera te tawhiti i kōtiti.   Tirohia te Whakaahua 32.(iv). Mehemea ka rere te waka mā te whare o Kāinga kē i Marangai: e 6 whare i kōtiti, ko 46 te tawhiti whakaterunga, ko 112 te tawhiti o te kōtiti.   Tirohia te Whakaahua 32.(vii). Ka whēnā hoki ngā tawhiti mehemea i kōtiti te waka ki te taha Mahutonga o te ara moana.   He tauira māmā tonu tēnei, nā te mea, i whakaritea kia haere te ara moana mā te Tonga.   Te Aronga Mā Te Whare O Ngā Reo Tēnā, me titiro ki te tauira mehemea i whakaritea kia haere te ara moana mā te whare o Ngā Reo i Marangai (i whēnei i te Wāhanga Tuatahi i te whakawhitinga mai ki Rarotonga).   Ko te tere o te waka e rima noti tonu, ā, ka haere mō ngā hāora e 24.   I te tuatahi ka rere mā te ara moana, i te tuarua ka rere mā te whare o Haka, i te tuatoru ka rere mā te whare o Manu...   tauira tuatahi;           tauira tuarua;            tauira tuatoru;          aronga Ngā Reo          aronga Haka             aronga Manu - 112   whakaterunga - 118 whakaterunga   - 85 whakaterunga - 0 kō­titi                    - 24 kōtiti                  - 46 kōtiti   Nō reira, ahakoa ka whakaritea te ara moana kia haere mā hea, ahakoa ka kōtiti te aronga o te waka ki whea, ka hāngai tonu aua nama e whitu ki te tatau i te tawhiti whakaterunga, ki te tatau hoki i te tawhiti kōtiti.     E Rua noti Te Tere O Te Waka Ka titiro inā ka rerekē te tere o te waka.   I ēnei tauira, e rua noti te tere o te waka.   Ka whakaritea te ara moana mā te whare o Ngā Reo, e 24 hāora te roa.   I te tuatahi ka rere mā te ara moana, i te tuarua ka rere mā te whare o Haka, i te tuatoru ka rere mā te whare o Manu. tauira tuatahi;               tauira tuarua;            tauira tuatoru;   aronga Ngā Reo             aronga Haka             aronga Manu          - 45   whakaterunga      - 47 whakaterunga       - 34 whakaterunga - 0 kōtiti                      - 10 kōtiti                    - 18 kōtiti Ko ngā tawhiti hou nei i ara ake i te whakawhiti mai i ngā nama tauira e whitu. He tātai kia whakawhiti i ngā nama tauira e whitu ki ngā āhuatanga rerenga.   Ka whēnei te tātai;         tawhiti     =     nama tauira     x    tere/5      x   roa/24 [9]        Nā reira i ngā tauira i runga nei, i whēnei: tauira tuatahi; -            120           x      2/5        x    24/24          =        48                        -            112           x      2/5        x    24/24          =        45 tauira tuarua; -            120           x      2/5        x    24/24          =        48                        -            118           x      2/5        x    24/24          =        47                        -             24            x      2/5        x    24/24          =        10 tauira tuatoru;                -              120    x          2/5    x             24/24           =         48                        -             85            x      2/5        x    24/24          =        34                        -             46            x      2/5        x    24/24          =        18 E Ono Hāora Te Roa O Te Rerenga Ka titiro anō ki aua rerenga engari ka rerekē te roa o te wā ka haere.   I tēnei tauira e rima noti te tere o te waka, ka whakaritea te ara moana mā te whare o Ngā Reo, e 6 hāora kē te roa.   I te tuatahi ka rere mā te ara moana, i te tuarua ka rere mā te whare o Haka, i te tuatoru ka rere mā te whare o Manu.   tauira tuatahi;               tauira tuarua;            tauira tuatoru;   aronga Ngā Reo             aronga Haka             aronga Manu          - 28   whakaterunga      - 29.5 whakaterunga    - 21 whakaterunga - 0 kōtiti                      - 6 kōtiti                      - 12 kōtiti I ēnei tauira, ko te mea rerekē, ko te roa e rere ana.   Me uru taua rerenga kētanga ki te tātai nei:         tawhiti     =     nama tauira     x    tere/5      x    roa/24         Me whēnei, tauira tuatahi; -            120           x      5/5        x     6/24           =        30                        -            112           x      5/5        x     6/24           =        28 tauira tuarua; -            120           x      5/5        x     6/24           =        30                        -            118           x      5/5        x     6/24           =        29.5                        -             24            x      5/5        x     6/24           =        6 tauira tuatoru;                -              120    x          5/5    x             6/24   =         30                        -             85            x      5/5        x     6/24           =        21                        -             46            x      5/5        x     6/24           =        12   Nō reira, ahakoa ka rere te waka mā hea, ahakoa ka whakarite te ara moana mā hea, ahakoa te tere me te roa o te haerenga, ka taea te tatau i pēwhea te tawhiti i haere whakaterunga, i pēwhea hoki te tawhiti i kōtiti i te ara kua whakaritea.   Heoi, me mau tika ki aua nama tauira e whitu, me mōhio hoki me pēwhea te whakawhiti tika i aua nama ki ngā āhuatanga o tāu ake nei haerenga.   Mehemea ka kaha te au moana, ka rerekē hoki te terenga o te waka.   Inā ka whēnā me uru atu hoki aua āhuatanga ki ngā mahi tātai nei.   He tauira i ngā mahi tātai i te 26 o Pipiri, i te whārangi 83 . Ki te āta tātari i ngā mahi whika kua whakatakotoria i runga ake nei ka kitea pea ngā hē pakupaku rawa ka uru mai i te tatau tawhiti kōtiti.   Ka ngarongaro noa aua hē i te wā ka hoki te waka ki runga i te ara moana i whakaritea.   Nā te pakupaku o aua hē, i te mahi-ā-ringa i runga i te moana, kāore aua hē i kitea.   Ētehi Tauira Nō Te Rerenga I te whakawhitinga mai i Hawai’i ki Rarotonga, e rua ngā mahi tatau a te kaiwhakatere i ngā wāhi rere, ia rā, ia rā.   Kā whēnā ia i te whitinga mai o Tamanui-te-Rā, i te tōnga atu hoki o Tamanui-te-Rā.   Nō reira, ka riro tekau mā rua hāora mā ia wāhanga.   E whai mai ana ētehi tauira, nō te whakawhitinga mai i Hawai’i ki Rarotonga,   tētehi i te pō 4 o Pipiri, tētehi i te rā 26 o Pipiri. Te Pō I Te 4 o Pipiri I te tōnga o te rā, i te 4 o Pipiri, ko tā te kaiwhakatere, i tae atu ai te waka hourua a Te Aurere ki te 14°32' N (i te wāhanga Raki o te ao), ā, 16 maera te tawhiti kua kōtiti ki te taha Whitinga o te ara moana i whakaritea.     te tūranga i te ata                                     14° 32' N      16 Wh     te rerenga i te pō           (i)   Ngā Reo (Marangai) te aronga, 7 noti, 6 hāora                                     (ii)   Haka (Marangai) te aronga, 7 noti, 6 hāora     tawhiti whakaterunga                nama tauira   x    tere/5    x      roa/24 (i)                112          x      7/5      x       6/24         =     39 (ii)               118          x      7/5      x       6/24         =    41                                                                          39   +   41   =   80     =   1°   20'   tawhiti kōtiti             nama tauira   x    tere/5    x      roa/24 (i)                  0           x      7/5      x       6/24         =       0 (ii)                24           x      7/5      x       6/24         =      8                                                                     0   +   8   =   8 maera ki te Tomo.                                 tatau       14° 32' N    -     1°   20'           =     13° 12' N                                               16 Wh      -       8 T              =        8 Wh .   Nō reira, i te whitinga mai o te rā, i te 5 o Pipiri, ka kī atu te kaiwhakatere, i tae atu ai a Te Aurere ki te 13°12' N (i te wāhanga Raki o te ao), ā, 8 maera te tawhiti kua kōtiti ki te taha Whitinga o te ara moana i whakaritea. Te Rā 26 o Pipiri I te whitinga mai o te rā, i te 26 o Pipiri,   i tae atu ki te 14°24' S (i te wāhanga Tonga o te ao), ā, 17 ngā maera kua kōtiti ki te taha Whitinga o te ara moana.     te tūranga i te ata, 26 o Pipiri;                                14° 24' S      17 Wh     te rerenga i te rā 26 o Pipiri    (i)   Tonga te aronga, 6.5 noti te tere, 12 hāora                                              (ii)   Tomokanga te ia, 1/2 noti, 12 hāora [10]     tawhiti whakaterunga                nama tauira   x    tere/5    x      roa/24 (i)                120          x     6.5/5    x      12/24        =     78 (ii)                 0           x     0.5/5    x      12/24        =      0                                                                          78   +   0   =   78     =   1°   18'     tawhiti kōtiti             nama tauira   x    tere/5    x      roa/24 (i)                 24           x     6.5/5    x      12/24        =     15 ki te Whitinga (ii)               120          x     0.5/5    x      12/24        =      6 ki te Tomokanga                                                                       15   -   6   =   9 maera ki te Whiti.                                 tatau       14° 24' S    +    1°   18'           =     15° 42' S                                               17 Wh      +     9 Wh            =       26 Wh .   I tēnei tauira, kotahi te aronga o te waka engari e rua ngā tātai, he mea kua tāpiri kia uru mai ai ngā tātai i te au moana o Tangaroa.   Nā reira, e ai ki ngā mahi tatau, i te tōnga o te rā, ka tae te waka ki te 13°12' N (i te wāhanga Raki o te ao), ā, 8 maera te tawhiti kua kōtiti ki te taha Whitinga o te ara moana. Ngā Rerenga a Te Waka Ko ngā rerenga e whai mai nei, ko ngā rerenga katoa nō ngā tuhituhi a te kaiwhakatere waka i te whakawhitinga mai i Hawai’i ki Rarotonga.   Rā   Aronga o te Waka Tere Hāora   Aronga o te Waka Tere Hāora 2-6-95 rā Ngā Rangi (Mara.) Ngā Reo (Mara.) 4.5 4.5 6 6 pō Ngā Reo (Mara.) 4.5 12 3-6-95 rā Ngā Reo (Mara.) 6.5 12 pō Ngā Reo (Mara.) 7 12 4-6-95 rā Ngā Reo (Mara.) 7 12 pō Ngā Reo (Mara.) Haka (Mara.) 7 7 6 6 5-6-95 rā Ngā Reo (Mara.) 7 12 pō Ngā Reo (Mara.) Ngā Rangi (Mara.) Haka (Mara.) 7 4.5 4.5 6 4 2 6-6-95 rā Ngā Reo (Mara.) 6 12 pō Ngā Reo (Mara.) 6 10 7-6-95 rā Tonga Ngā Reo (Mara.) Ngā Reo (Mahu.) 8 3.5 6 2 7 2 pō Manu (Mara.) Ngā Reo (Mara.) 3 6 1 11 8-6-95 rā Ngā Reo (Mara.) 4 12 pō Whitinga Haka (Mara.) Tonga 1.5 4 4 2 6 4 9-6-95 rā Tonga Haka (Mara.) 3.5 4 9 3 pō Tonga Haka (Mahu.) 3 3 6 2 10-6-95 rā Tonga Whitinga Ngoi (Mara.) 3 3 2.5 3 3 6 pō Ngā Reo (Mahu.) 4 12 11-6-95 rā Ngā Reo (Mahu.) Tonga 3 3 6 6 pō Ngā Reo (Mahu.) 2 12 12-6-95 rā Tonga Haka (Mahu.) Manu (Mahu.) Whitinga 2 3 3 3.5 3 2 3 4 pō Whitinga Whitinga Whitinga 4 3 2 3 2 1 13-6-95 rā Whitinga Haka (Mara.) Whitinga Haka (Mara.) 2 3 0.5 1 1 3 3 5 pō Ngā Reo (Mara.) Haka (Mara.) Ngā Rangi (Mara.) Ngā Reo (Mara.) 2.5 2 4 5.5 5 2 3 2 14-6-95 rā Tonga 4 12 pō Ngā Haka (Mahu.) Ngā Rangi (Mahu Tomokanga 4 2 0.5 4 6 2 15-6-95 rā Tomokanga Ngā Reo (Mahu.) Tonga Haka (Mara.) 0.5 3 4.5 4 1 3 4 4 pō Tonga Haka (Mahu.) 5 4.5 6 6 16-6-95 rā Haka (Mahu.) Haka (Mara.) Tonga 5 6.5 6.5 3 3 6 pō - [11]     17-6-95 rā -     pō Haka (Mahu.) Ngā Reo (Mahu.) 5.5 5.5 6 6 18-6-95 rā Tonga 6 3 pō Tonga 6 12 19-6-95 rā Tonga Haka (Mara.) Tomokanga - ia 6 6 0.5 5 6 12* pō Haka (Mara.) Tonga Haka (Mahu.)   4 4 4 20-6-95 rā Ngā Rangi (Mahu) Tonga Haka (Mahu.) Ngā Reo (Mahu.) 4 3 3 6.5 3 3 4 2 pō Tomokanga - ia 1 10* 21-6-95 rā Tomokanga - ia Ngā Reo (Mahu.) 1 1 12* 12 pō Tomokanga - ia Ngā Rangi (Mara.) Ngā Rangi (Mara.) 0.5 3 1 6 2 2 22-6-95 rā Manu (Mara.) Whitinga Rā (Mara.) 0.5 3 5 10 1 1 pō Whitinga Kāinga (Mara.) Ngoi (Mara.) Rā (Toke) Kāinga(Toke.) 3 4 4 4 5.5 2 2 2 2 4 23-6-95 rā Kāinga (Toke.) Ngā Reo (Mahu.) Ngā Rangi(Mahu.) 4.5 5 5 1 3 8 pō Ngā Rangi(Mahu.) Ngā Reo (Mahu.) Haka (Mahu.) Tonga Tomokanga-ia 4 5 5 5 0.5 2 4 2 4 12* 24-6-95 rā Tonga Haka (Mara.) Tomokanga-ia 5.5 4.5 0.5 8 4 12* pō Haka (Mara.) Tonga Tomokanga-ia 5 5.5 0.5 6 6 12* 25-6-95 rā Tonga Tomokanga-ia 6 0.5 12 12* pō Tonga Haka (Mara.) Tonga Tomokanga-ia Tomokanga-ia 6.5 4 7 1 0.5 6 3 3 3* 9* 26-6-95 rā Tonga Tomokanga-ia 6.5 0.5 12 12* pō Haka (Mahu.) Tomokanga-ia 6.5 1 12 12* 27-6-95 rā Ngā Reo (Mahu.) Ngā Rangi(Mahu.) Ngā Rangi(Mahu.) 3 3.5 4.5 3 3 6 pō Ngā Rangi(Mahu.) Haka (Mahu.) Tonga Tomokanga-ia 4 5 6 0.5 2 7 3 12* 28-6-95 rā Tonga Haka (Mahu.) Tonga Tonga Ngā Reo (Mahu.) Tomokanga-ia 5.5 5.5 5 4.5 4.5 0.5 2 1 2 6 1 12 * pō       Rārangi   1 :   Ngā Rerenga a Te Aurere, Pipiri 1995. Te Rapu Whenua I whakaritea te ara moana kia tae ora ai ki ngā moutere i te Tonga o ngā Kuki Airani.   Ko te tikanga, i te taenga atu ki taua takiwā, ka pā ki tētehi o aua motu kia mōhio mai ai mātou i tae ki whea.   Ka āta kite mātou kei whea mātou, kātahi ka whakarite i te wāhanga tuawhā o te ara kia ū rawa ai ki Rarotonga. I te rā 28 o Pipiri, i tae mātou ki te takiwā o ngā moutere.   Ngarongaro katoa ngā tohutohu o Tangaroa i taua wā.   Kua kore he paruparu whenua i rō wai.   Kua kore he ika e ngau ana i ngā matau.   Kua kore he rerenga kētanga o ngā tae moana.   Kua kore he rerenga kētanga i ngā amotai (ki ā mātou tirohanga).   Ka whēnā hoki ngā tohutohu o Tāwhiri-mātea.   I rite tahi te pouri o runga i te katoa o te rangi.   Tē taea tētehi o te Whānau Marama te kite.   Tē taea a Tamanui-te-Rā te kite.   Tē taea tētehi manu te kite,ki te kore he ika, ka kore he manu.   I te mōhio mātou kua tae rawa ki taua takiwā nā te mahi tatau o te kaiwhakatere waka. Ka maruahiahi te rā ka hui anō ngā rangatira.   Āe rānei, me whakatū te waka ki kō, tatari ai ki te awatea, arā, ki te wā e ahei ana mātou te kite i ngā tohutohu whenua.   Āe rānei, me haere tonu mātou i te pō, i runga tonu i ngā tohutohu o te GPS.   Ko ngā whakaaro i puta; kua tika te mahi a te kaiwhakatere, i tae ora atu ai te waka ki reira; kāore e tawhiti atu te wāhi tū tā te kaiwhakatere waka ki   te wāhi tū tā te GPS; kua roa rawa te wā i te moana; e whanga ana ngā tāngata whenua i Rarotonga ki a mātou.   Ko te otinga atu, ka haere tonu mātou. I taua pō i wehe rua mātou i ngā moutere o Manuae rāua ko Takutea.   Kāore te paku tohu whenua i kitea. I te ahiahi o te 29 o Pipiri ka kimihia ngā karu i te whenua o Rarotonga.   I te mōhio mātou kei te tika te tirohanga nā te kitenga i te waka rererangi e haere whēnā ana.   Āhua whā karaka pea ka ūmere atu a Ke Ahi me tāna tohutohu atu.   I reira, i te pae tētehi hua e kore rawa au e wareware.   Kei tawhiti, kei te pae o Tonga, he āhuatanga pakupaku noa iho, engari mārama tonu atu: kotahi te maunga me ngā puke kei ngā taha!   Ko Rarotonga! He Tirohanga Whakamuri Nō reira,   i te mutunga, ka āhua whēnei kē ngā wāhanga o te haerenga:                             Wāhanga I   21° 19'N -   07° 02'N te tawhiti              ≈        880 m te tere                  ≈        6 n (144m/rā) te roa                  ≈        8 ngā rā te au moana         ≈        12 m/rā Tomo.                           ≈        62 m/wāhanga 1 te aronga             =        Ngā Reo -Mara.                           Wāhanga II    07° 02'N -   01° 08'S te tawhiti              ≈        450 m te tere                  ≈        3 n (72m/rā) te roa                  ≈        8 ngā rā te au moana         ≈        kore (pea) te aronga             =        Haka-Marangai                           Wāhanga IIIa   01° 08'S -   10° 02'S te tawhiti              ≈        600 m te tere                  ≈        2 n (48m/rā) te roa                  ≈        8   ngā rā te au moana         ≈        12 m/rā Tomo.                           ≈        138m/wāhanga 3 te aronga             =        Haka-Mahutonga                           Wāhanga IIIb    10° 02'S -   21° 14' te tawhiti              ≈        800 m pea te tere                  ≈        5 n (120m/rā) te roa                  ≈        5 ngā rā te au moana         ≈        12m/rā Tomo.                           ≈        16m/wāhanga 4 te aronga             ≈        Haka-Marangai Ko te katoa i tawhiti e 2730 ngā maera, ko te roa e 29 ngā rā. Whakaahua 33 : Te Ara Moana i Takahia e Te Aurere Ngā Āwhina a te Mīhini Pākehā Me kī, e toru ngā wā i āwhinatia mai e te mīhini Pākehā ngā mahi whakatere waka a Te Aurere i te whakawhitinga mai i Hawai’i ki Rarotonga. (i)    I te 7 o Pipiri ka takahaere ngā puhi a Tāwhiri-mātea ki te aro mai mā te Tonga.   Nā taua aronga ka nohopuku te waka, tē taea te kōkiri whakatemua.   Ka noho, ka noho, ka noho.   Ko te takeo kei ngā kaumoana.   Ka huihui ngā rangatira o Te Aurere, ka whakaputa whakaaro e pā ana ki te autō wā me te tangata whenua e tatari ana i Rarotonga.         Ka ahiahi te rā, ka karangahia te poti tautoko, a Potzalana.   Ka whiua te taura ki a ia, ka tīmata tāna kumekume.   I taua wā, kāore kau he takunetanga i puta, engari ngā kare a roto.   E 22 hāora i haukumea a Te Aurere, mā runga tonu i te aronga kua tohua e te kaiwhakatere waka.   I te ahiahitanga, i te 8 o Pipiri, ka pakaru rawa te manawa hinu o te poti tautoko.   He paru nō te kōhinu i whakaurua.   I mua rā he poti mīhini, he poti rā hoki a Potzalana.   I muri mai he poti rā anake a Potzalana.   I te pakarutanga a te mīhini a Potzalana, kāore kau he kupu kurekure i puta, engari ngā kare a roto. (ii)   I te putanga atu i te Tuahiwinui-ā-Hinemoana kua rahi te rerenga kētanga o ngā wāhi rere a te kaiwhakatere waka me ngā wāhi rere a te GPS.   Ka aratakina te waka hourua e te kaiwhakatere i runga tonu i tōna whakapono ki āna wāhi rere.   Ko te mate, ki te aro whēnā tonu te waka, hei te otinga ka tae kē atu ki Hāmoa pea.   He uaua te whakawhiti mai i Hāmoa ki Rarotonga i taua kaupeka a te tau nā te ahu mai a ngā hau i te Whitinga.   Nō reira, i te 17 o Pipiri, ka kōrerotia ngā wāhi rere a te GPS ki te kaiwhakatere waka.       Ka aroha atu au ki te kaiwhakatere waka i taua wā, nā te taumaha o te matangurunguru ka taka ki runga ki a ia.   Heoi anō, ka whai māia anō ia, ka āta wanangangia e ia ngā take i rerekē ai aua wāhi noho.   E rua rā ka whakatikatika te kaiwhakatere waka i āna mahi me āna tatau, i runga hoki i te titiro ki te GPS.   Ka nui tōna akoranga i aua rā.   I te 19 o Pipiri, ka aukatingia te tirohanga ki te GPS, ka tīmata anō te whakatere waka hourua i runga i ngā tikanga tawhito. (iii) Ka rehurehu a Tamanui-te-Rā i te 28 o Pipiri, ka tirohia anō ngā wāhi rere a te GPS.   Ehara i te mea i te ngaro mātou, i te rerekē rānei ngā wāhi rere a te kaiwhakatere waka.   Engari, ko te whakatau kua tae ki te takiwā e kimi ana mātou, kua tika ngā mahi a te kaiwhakatere waka, ā, me kamakama inaiānei te whakaotinga i te whakawhitinga.   Ki te kore mātou e titiro ki te GPS, ka tatari ki te awatea, ā, ka rapurapu haere ngā tohu whenua e āta whakamōhio ana kei whea hoki mātou.   Kua kī atu e toru ngā wā i takahia ngā tikanga tawhito, engari e rua ngā take i whēnā ai.   I te 7 o Pipiri me te 28 o Pipiri ko Kaikā rāua ko Kaikaha i whakaete te waka hourua kia hohoro atu te taenga ki Rarotonga.   Tērā pea ki te noho ō rāua tou ki raro, ki te mokonahatia ngā waha a aua kurī rā, kāore ngā tikanga tawhito i takahia i taua wā. Ko te take tuarua i takahia ai, ko te uauatanga o te mahi whakatere waka hourua i runga i te moana nui.   Hāunga ngā wā korekore tohu, hāunga i ngā āhuatanga i te Tuahiwinui-ā-Hinemoana, hāunga hoki ngā pōua i patu mai ka raru te kaiwhakatere waka i ēnei kaupapa.   Ko ngā āhuatanga rerekē o tēnei whakawhitinga, ko te ruwha, ko te ihupuku hoki. Ko te whakawhitinga i Hawai’i ki Rarotonga, he mea rerekē ki ngā whakawhitinga katoa kua takahia e Te Aurere.   He tawhiti rawa, he roa rawa.   I te whakawhitinga mai i Nukuhiva tae atu ki Hawai’i, i te marama o Paenga-whāwhā, ka pā mai ngā hā o Tāwhiri-mātea mā te aronga kotahi, i te kaha kotahi, tata ki te katoa o te rerenga.   Nō reira, kotahi te hanga a te rā matua, te rā tauaki me te rā ngongo-hau, ā, kotahi te tere a te waka.   Kua wāia te kaiwhakatere waka ki tēnā āhuatanga.   Engari kāore i whēnā i te whakawhitinga ki Rarotonga.   Kāore i takitahi te aronga me te kaha o ngā puhi.   Ko te tere a te waka he kamakama, he pōturi, he nohopuku, he hoki whakamuri rānei.   Nō konā, he maha ngā wā ka whakarerekē te rā matua, te rā tauaki, te rā ngongo-hau, ngā taura kutikuti me ngā taura whakaara.   Ka rerekē aua hanga, ka rerekē hoki te whanonga a te waka hourua. I te whakawhitinga ki Hawai’i tokorua ngā kaiwhakatere waka.   He āhuatanga pai tēnā, nā te mea, ka taea te riro te katoa o te mahi i tētehi kaiwhakatere, ā, ka whai wā tētehi atu kaiwhakatere ki te moe.   I te whakawhitinga roa nei ki Rarotonga, kotahi anake te kaiwhakatere, e whā pea ngā hāora ka moe ia, ia rā, ia rā, ā, he moe tūtakarerewa.   Ka roa te 29 o ngā rā ki te whēnā ngā moe. He tauhou tonu te kaiwhakatere waka a Te Aurere, a Jack Thatcher ki ngā mahi moana.   Kāore ia i tipu i runga i te moana, whērā i ngā tūpuna Māori pea i ngā wā o mua .   Ahakoa kua haere ia mā runga i te nuinga o ngā rerenga a Te Aurere i te moana nui, ko tēnei te whakawhitinga nui tuarua noa iho kua riro māna hei whakatere.   Kua riro hoki māna hei whakahaere te waka i te nuinga o te wā.   He whēuaua te mahi whakahaere waka hourua me te mahi whakatere waka hourua i te wā kotahi. Nō reira, i te otinga atu ka tae ora mai te waka a Te Aurere me ōna kaumoana ki te takiwā o te Moananui-ā-Kiwa i hiahiatia ai.   Kua whai wā aua kaumoana ki te mahi i tētehi mahi tawhito, i mahitia e ō rātou tūpuna, arā, te mahi whakawhiti moana nui i runga i te waka hourua.   Ko te huarahi i takahia e rātou, tērā pea he huarahi kua takahia hoki e ō rātou tūpuna i ngā wā o mua.   He Whakarāpopoto I te rānui, i te 30 o Pipiri ka tomo te waka a Te Aurere ki te whanga o Ngā Tangi’ia, ka ū ki te whenua o Rarotonga.   Kua nui ake i te whā wiki kua ngaro te waka me ngā kaumoana i te whenua.   Kua nui ake te tawhiti i te 2700 maera.   Kua whakawhitingia te Moananui-ā-Kiwa i waenganui i Hawai’i me Rarotonga. Me kī, ‘he moana pukepuke kua ekengia e te waka’. Ko tā te Ūpoko IV nei he tirohanga ki taua whakawhitinga moana i runga i te mahi a te kaiwhakatere waka hourua.   Kua kōrerohia te ara moana, me ngā āhuatanga i whakaritea i mua i te wehenga.   Kua wānangangia ngā wāhi rere ki tā te kaiwhakatere waka mahi me ngā wāhi rere ki tā te GPS kōrero.   Kua tirohia ngā tohutohu me ngā mahi tatau a te kaiwhakatere waka.   Kua whakaputangia ngā āhuatanga i te wā e rapu whenua ana, ā, kua tirohia whakamuri ki te katoa o te rerenga nei. Nā te tātaritanga i ngā kōrero o te whakawhitinga mai i Hawai’i tae atu ai ki Rarotonga, kua kitea te whakatinana i ngā tikanga a te mahi whakatere waka hourua.   Ka riro mā te Ūpoko V ngā whakaaro whakamutunga e whakatau. [1] Ki te tirohia ngā kōrero a Mātorohanga i te JPS 22 1913, whārangi 110, 123 me te JPS 24, 1915 whārangi 2, 10 ka kitea ngā āhuatanga taurite. [2] Nā Jack Thatcher i kōrero mai i a mātou e pōteretere ana i reira. [3] he kupu nō te Taura Whiri I Te Reo Māori (60/T) mō te petrol. [4]   kia utua ngā nama me inoi atu ki ngā kamupene nui, mō tētehi pūtea.   Ka māmā ake te riro mai o aua pūtea ka whiwhi   te waka i te Class A Multi-Hull Rating.   I raro i ngā ture o tēnei rating me mau te waka i ngā waka houora, i ngā reo irirangi, i ngā rama hoki. [5]   Ka kōrero mai ngā tāngata whenua o Rarotonga i taua wā, he uaua rawa te kite i ngā aihe ki reira. [6]   I te taenga ki te whenua, ka tirohia e au ngā mapi, me te wā i kōrero whēnā mai a Sesario, ā, i te tika ānā whakatau. [7]   I te katoa o tēnei tuhinga ko te maera, he maera-ā-moana (Nautical maera).      1 Maera-ā-moana = 1.15 maera-ā-whenua   =   1852   mita. [8] E ai ki te Pākehā, ko te equator . [9]   Ko te tawhiti, he maera kua haere whakaterunga (whakateraro rānei), he maera kua kōtiti rānei.   Ko te nama tauira, ko te nama tika i te whakaahua 11 e hāngai tonu ana ki tāu ake haerenga.   Ko te tere, he tere nō te waka.   Ko te roa, ko te wā e rere ana te waka i taua terenga, mā taua aronga. [10] Ehara tēnei i te rerenga a te waka, engari kē ko te ia o Tangaroa,   0.5 noti ki te Tomokanga. [11] I konei ka tirohia te GPS, karekau he tuhituhi. *   Ko te au moana ka tāpiri ki ngā tatau rerenga.